មន្ត្រី​បក្ស​សមរង្ស៊ី​ប្រកាស​មិន​ចូល​រួម​បោះ​ឆ្នោត​មេ​ភូមិ​ថ្មី​នៅ​ប៉ោយប៉ែត

មន្ត្រី​គណបក្ស សម រង្ស៊ី ប្រកាស​​ជំទាស់​មិន​ចូល​រួម​ការ​បោះ​ឆ្នោត​ជ្រើសរើស​មេ​ភូមិ​ ដែល​​អាជ្ញាធរ​ក្រុង​ប៉ោយប៉ែត គ្រោង​នឹង​រៀបចំ​ឡើង​នៅ​ថ្ងៃ​ទី​២៧ ខែ​មិថុនា ខាង​មុខ​នេះ។
ដោយ សួន សុផលមុន្នី
2011.06.23
Share on WhatsApp
Share on WhatsApp

គណបក្ស សម រង្ស៊ី បាន​ធ្វើ​ពហិការ​មិន​ព្រម​ចូល​រួម​ក្នុង​ការ​បង្កើត​គណៈកម្មការ​បោះ​ឆ្នោត​ជ្រើសរើស​មេ​ភូមិ នៅ​ក្នុង​សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយមានជ័យ កាល​ពី​ថ្ងៃ​អង្គារ ទី​២១ ខែ​មិថុនា ឆ្នាំ​២០១១ ដោយ​ចោទ​ប្រកាន់​ថា ការ​បង្កើត​គណៈកម្មការ​ដើម្បី​ឈាន​ទៅ​ធ្វើ​ការ​បោះ​ឆ្នោត​ជ្រើស​រើស​មេ​ភូមិ នៅ​ថ្ងៃ​ទី​២៧ ខែ​មិថុនា ខាង​មុខ​នេះ ធ្វើ​ឡើង​ខុស​ច្បាប់ និង​មាន​ភាព​អយុត្តិធម៌​ចំពោះ​គណបក្ស សម រង្ស៊ី។

សមាជិក​ក្រុមប្រឹក្សា​ក្រុង​ប៉ោយប៉ែត មក​ពី​គណបក្ស សម រង្ស៊ី លោក មាន សារិទ្ធិ បាន​ថ្លែង​កាល​ពី​ថ្ងៃ​ពុធ ទី​២២ ខែ​មិថុនា ថា មន្ត្រី​មូលដ្ឋាន​របស់​គណបក្ស​ប្រជាជន កំពុង​ប្រើ​អំណាច​របស់​ខ្លួន​ក្នុង​ការ​រៀបចំ​ការ​បោះ​ឆ្នោត​ជ្រើសរើស​មេភូមិ​នៅ​ឆ្នាំ​២០១១​នេះ ៖ «សមាជិក​ក្រុមប្រឹក្សា​គណបក្ស សម រង្ស៊ី ជាប់​ឆ្នោត​នៅ​សាលា​សង្កាត់​ប៉ោយប៉ែត គឺ​មាន​បី​រូប​ហ្នឹង គឺ​មិន​ទាន់​បាន​ធ្វើការ​ផ្លាស់​ប្ដូរ​បាន​ត្រឹមត្រូវ​ទេ ហើយ​ក្រុមប្រឹក្សា​សង្កាត់​របស់ សម រង្ស៊ី ហ្នឹង គេ​មិន​ឲ្យ​សិទ្ធិ​ធ្វើការ​ជ្រើសរើស​បេក្ខជន​មេ​ភូមិ​ដាក់​ចូល តើ​យើង​ចូលរួម​បោះ​ឆ្នោត​ទាំង​ខុស​ច្បាប់​ហ្នឹង​យ៉ាង​ម៉េច?»

កាល​ពី​ថ្ងៃ​អង្គារ ទី​២១ ខែ​មិថុនា អាជ្ញាធរ​ក្រុង​ប៉ោយប៉ែត ខេត្ត​បន្ទាយមានជ័យ បាន​ជួប​ប្រជុំ​គ្នា​ ដោយ​មាន​មន្ត្រី​មក​ពី​គណបក្ស​ប្រជាជន​កម្ពុជា គណបក្ស នរោត្តម រណឫទ្ធិ និង​គណបក្ស សម រង្ស៊ី ដើម្បី​បង្កើត​គណៈកម្មការ​បោះ​ឆ្នោត​ជ្រើស​រើស​មេ​ភូមិ​ចំនួន ២៣​ភូមិ នៅ​ក្នុង​សង្កាត់​ប៉ោយប៉ែត នៅ​ឆ្នាំ​២០១១។

លោក សាន ស៊ានហូ ចៅ​សង្កាត់​ប៉ោយប៉ែត និង​ជា​ប្រធាន​គណៈកម្មការ​បោះ​ឆ្នោត​ជ្រើស​រើស​មេ​ភូមិ​សម្រាប់​ឆ្នាំ​២០១១​នេះ មិន​អាច​ទាក់ទង​សុំ​ប្រតិកម្ម​ជុំវិញ​បញ្ហា​ខាង​លើ​នេះ​ទេ។ ប៉ុន្តែ​លោក ទ្រី ណារិន អភិបាល​ក្រុង​ប៉ោយប៉ែត បាន​ប្រតិកម្ម​ថា ការ​ធ្វើ​ពហិការ​មិន​ចូល​រួម គឺ​ជា​សិទ្ធិ​របស់​គណបក្ស សម រង្ស៊ី។ ចំណែក​អាជ្ញាធរ​សង្កាត់​ប៉ោយប៉ែត គឺ​បាន​អនុវត្ត​ទៅ​តាម​ច្បាប់​ដែល​កំណត់​ដោយ​ក្រសួង​មហាផ្ទៃ។

លោក ទ្រី ណារិន បន្ត​ដូច្នេះ ៖ «ការ​ពិត​ពួកគាត់​ជា​អ្នក​ខូច​ទេ។ គាត់​ដឹង​ថា គ្នា​គាត់​មាន​បី​នាក់ គឺ​មិន​ជាប់​ទេ អ៊ីចឹង​គាត់​ធ្វើ​ពហិការ អា​នេះ​ជា​រឿង​របស់​គាត់ ប៉ុន្តែ​កូរ៉ុម​ហ្នឹង គណបក្ស​ប្រជាជន​ជា​អ្នក​ឈ្នះ ៧​កៅអី ក្នុង​ចំណោម ១១ មាន​ន័យ​ថា គាត់​ជា​អ្នក​ខូច»

លោក ទ្រី ណារិន អភិបាល​ក្រុង​ប៉ោយប៉ែត បាន​ព្រមាន​ថា ការ​ធ្វើ​ពហិការ​របស់​គណបក្ស សម រង្ស៊ី នឹង​ត្រូវ​ទទួល​បាន​លិខិត​ព្រមាន​តាម​បទបញ្ជា​ផ្ទៃក្នុង​របស់​សង្កាត់ ហើយ​បើ​សិន​ជា​គណបក្ស សម រង្ស៊ី ខកខាន​ជា​លើក​ទី​២ នឹង​មាន​ការ​ធ្វើ​លិខិត​ព្រមាន​ដាក់​ទៅ​ក្រសួង​មហាផ្ទៃ ដក​ចេញ​ពី​មុខ​តំណែង។

កាល​ពី​ឆ្នាំ​២០០៦ នៅ​សង្កាត់​ប៉ោយប៉ែត ធ្លាប់​មាន​ការ​បោះឆ្នោត​ជ្រើស​រើស​មេ​ភូមិ​រួច​ម្ដង​ទៅ​ហើយ ដោយ​នៅ​គ្រា​នោះ គណបក្ស សម រង្ស៊ី ឈ្នះ​បាន ៥​ភូមិ គណបក្ស​ប្រជាជន​បាន ៤​ភូមិ និង​គណបក្ស​ហ៊្វុនស៊ិនប៉ិច បាន ២​ភូមិ ប៉ុន្តែ​លទ្ធផល​នៃ​ការ​បោះ​ឆ្នោត​នោះ​ត្រូវ​បាន​ក្រសួង​មហាផ្ទៃ មិន​ទទួល​ស្គាល់។

នៅ​ឆ្នាំ​២០១១​នេះ ការ​បោះ​ឆ្នោត​ជ្រើស​រើស​មេ​ភូមិ​ថ្មី នឹង​ត្រូវ​ធ្វើ​ឡើង​ជា​ថ្មី​ម្ដង​ទៀត​នៅ​ក្នុង​សង្កាត់​ប៉ោយប៉ែត បន្ទាប់​ពី​ក្រសួង​មហាផ្ទៃ បាន​ប្រកាស​បង្កើត​ភូមិ​ថ្មី​ចំនួន ១២។ សរុប​ជា​រួម​ទៅ​នៅ​ក្នុង​សង្កាត់​ប៉ោយប៉ែត មាន​ភូមិ​កើត​ឡើង​រហូត​ទៅ ២៣​ភូមិ នៅ​ឆ្នាំ​២០១១​នេះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។