លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍នៅថ្ងៃទី២ ឧសភា ថា វិស័យអប់រំនៅកម្ពុជា កំពុងធ្លាក់ចុះ ដោយសារតែប្រាក់បៀវត្សរ៍តិច និងការប្រព្រឹត្តអំពើពុករលួយនៅក្នុងវិស័យអប់រំ ដែលជាបញ្ហាចម្បង។
សេចក្ដីប្រកាសព័ត៌មានរបស់សមាគមគ្រូបង្រៀនកម្ពុជាឯករាជ្យ កាលពីថ្ងៃទី១ ឧសភា បានសរសេរថា លោកគ្រូ អ្នកគ្រូជាង ៧០០នាក់នៅចំនួន ១៧ខែត្រ ក្រុង បានឆ្លើយតបទៅនឹងកម្រងសំណួរបិទ និងសំណួរបើកនៃការអង្កេតនេះ បានបង្ហាញថា មានគ្រូចំនួន ៨៥% មិនបានចូលរួមធ្វើការសម្រេចចិត្តនៅក្នុងសាលារបស់ពួកគេ និងទទួលបានព័ត៌មានពីការបង្ហាញរបាយការណ៍ហិរញ្ញវត្ថុបានច្បាស់លាស់ឡើយ។ គ្រូមិនធ្លាប់បានឮអំពីគោលនយោបាយអប់រំរបស់ក្រសួងអប់រំមាន ៤៥% គ្រូគិតថា គ្មានការអភិវឌ្ឍទៅលើវិស័យអប់រំមាន ៤៥% និងគ្រូគិតថា វិស័យអប់រំធ្លាក់ចុះមាន ៣៩%។
លោក រ៉ុង ឈុន បានលើកឡើងថា គោលនយោបាយអប់រំថ្នាក់ជាតិរបស់ក្រសួងគឺល្អណាស់ ប៉ុន្តែការអនុវត្តជាក់ស្ដែងមិនឆ្លើយតបទៅនឹងគោលនយោបាយរបស់ក្រសួងនោះទេ មានន័យថា អំពើពុករលួយនៅតែកើតមានពីក្នុងវិស័យអប់រំនេះ ដែលជាកត្តារាំងស្ទះក្នុងការអភិវឌ្ឍវិស័យអប់រំនៅកម្ពុជានេះ។
រដ្ឋមន្ត្រីក្រសួងអប់រំយុវជន និងកីឡា លោក អ៊ឹម សិទ្ធី មិនបានធ្វើការអធិប្បាយជុំវិញ និងករណីនេះទេនៅថ្ងៃទី២ឧសភា។ រីឯអនុរដ្ឋលេខាធិការនៃក្រសួងនេះ លោក ស្រី ទន់ សាអ៊ីមបានឆ្លើយថា បានឲ្យថាជាប់រវល់។
ទោះជាយ៉ាងណាក៏ដោយ ប្រធានគណៈកម្មការសេដ្ឋកិច្ច ហិរញ្ញវត្ថុ និងសវនកម្ម លោក ជាម យៀប បានពន្យល់ថា គោលការណ៍របស់រដ្ឋាភិបាល គឺផ្ដល់ថវិកាជាតិទៅដល់ក្រសួងជាអាទិភាព មានដូចជាក្រសួងអប់រំ ក្រសួងកសិកម្ម ក្រសួងដែនដីនគរូបនីយកម្ម ក្រសួងអភិវឌ្ឍន៍ជនបទ ក្រសួងសុខាភិបាល ក្រសួងធនធានទឹក និងសមាគមនារី ដែលសភាបានបង្កើនថវិកាជាតិកាលពីឆ្នាំ២០១០ ចំនួន ១៨% បន្ថែមទៀត ផ្ដល់ជូនស្ថាប័នទាំងនេះ។
លោក រ៉ុង ឈុន បានផ្ដល់អនុសាសន៍ថា ដើម្បីបង្កើនគុណភាពវិស័យអប់រំ គឺរដ្ឋាភិបាលត្រូវដំឡើងប្រាក់ខែឲ្យគ្រូបង្រៀន ដើម្បីកុំឲ្យគ្រូបង្រៀនបង្កើតមុខរបរទីពីរ ព្រោះប៉ះពាល់ការបង្រៀន ផ្ដល់សម្ភារៈសិក្សាឲ្យបានគ្រប់នៅតាមសាលានីមួយៗ កាត់បន្ថយចំនួនសិស្សក្នុងថ្នាក់កុំយកបរិមាណច្រើនតែគ្មានគុណភាពនោះ។
លោក រ៉ុង ឈុន ក៏បានលើកឡើងដែរថា លោកនឹងធ្វើការប្រកាសរបាយការណ៍អង្កេតនេះជាផ្លូវការក្នុងពេលឆាប់ៗនេះ ហើយក៏នឹងផ្ញើជូនទៅក្រសួងអប់រំ និងស្ថាប័នដែលពាក់ព័ន្ធផងដែរ៕