ប្រជាពលរដ្ឋក្នុងភូមិទឹកហូត ឈ្មោះ ម៉ុម អន បានថ្លែងប្រាប់វិទ្យុអាស៊ីសេរីនៅព្រឹកថ្ងៃទី២២ មីនា ថាក្រុមហ៊ុនឡានដឹកដីមួយ ដែលមានថៅកែឈ្មោះ ម៉ម ចន្ថា និងមេការឈ្មោះ សុង បានដឹកដីតាមផ្លូវភូមិដែលបណ្ដាលឲ្យធូលីដីហុយសំពោង ប្រឡាក់ផ្ទះសម្បែង និងបណ្ដាលឲ្យខូចសុខភាពអ្នកភូមិយ៉ាងខ្លាំង។ ប្រជាពលរដ្ឋរូបនេះបន្តថា គាត់បានដាក់បណ្ដឹងទៅអាជ្ញាធរដែនដីឃុំ និងស្រុក ឲ្យជួយដោះស្រាយក្តីកង្វល់នេះជូនប្រជាពលរដ្ឋដែរ តែហាក់ពុំទទួលលទ្ធផលអ្វីឡើយ។
អ្នកភូមិម្នាក់ទៀតឈ្មោះ នន់ ចំរើន បន្ថែមថា ក្រុមហ៊ុននេះមិនត្រឹមតែបើកបរបង្ហុយធូលីមកលើប្រជាពលរដ្ឋប៉ុណ្ណោះទេ ហើយថែមទាំងបើកបរក្នុងល្បឿនលឿនគួរឲ្យព្រួយបារម្ភ ដែលអាចបង្កគ្រោះថ្នាក់ដល់កូនចៅអ្នកភូមិទៀតផង។
ប្រភពពីប្រជាពលរដ្ឋបានឲ្យដឹងថា ក្រុមហ៊ុនឡានដឹកដីនេះ មានសំអាងខ្នងបង្អែកជាមន្ត្រីខេត្ត ទើបគេមិនសូវខ្លាចញញើតនរណាឡើយ ហើយគេដឹកដីនេះទៅលក់ឲ្យឡឥដ្ឋនានា ដែលមានទីតាំងនៅក្នុងឃុំទឹកហូតនេះផងដែរ។
វិទ្យុអាស៊ីសេរីមិនអាចទាក់ទងសុំការបំភ្លឺពីលោក ម៉ម ចន្ថា ប្រធានក្រុមហ៊ុនរថយន្តដឹកដីនេះបានទេ នៅល្ងាចថ្ងៃទី២២ មីនានេះ។ ប៉ុន្តែមេការក្នុងក្រុមហ៊ុនគឺលោក សុង បានបដិសេធការចោទប្រកាន់របស់ប្រជាពលរដ្ឋក្នុងភូមិ។
ជំទប់ទី១ ឃុំទឹកហូត គឺលោក ជ័យ ម៉ូត មានប្រសាសន៍ថា អាជ្ញាធរឃុំធ្លាប់បានឲ្យក្រុមហ៊ុនធ្វើកិច្ចសន្យាថា ពេលបើកបរក្នុងភូមិ ត្រូវប្រើល្បឿនតាមច្បាប់កំណត់ និងត្រូវស្រោចទឹកជារៀងរាល់ថ្ងៃ ដើម្បីកុំឲ្យធូលីហុយមកលើប្រជាពលរដ្ឋ។ លោកជំទប់បន្តថា អាជ្ញាធរកំពុងធ្វើការសម្របសម្រួលជម្លោះនេះហើយ។
វិទ្យុអាស៊ីសេរីមិនអាចទាក់ទងសុំការបំភ្លឺពីលោកមន្ត្រីជំនាញផ្នែកជលផលបានទេនៅល្ងាចថ្ងៃទី២២ មីនានេះ។ ប៉ុន្តែប្រភពពីប្រជាពលរដ្ឋបានឲ្យដឹងថា ទីតាំងដែលក្រុមហ៊ុនកំពុងជីកយកដីនេះ គឺនៅក្នុងភូមិព្រែកសាលា ឃុំទឹកហូត ស្ថិតក្នុងតំបន់ព្រៃលិចទឹកដែលជាតំបន់ហាមឃាត់៕