ស្ថានទូតសហរដ្ឋអាមេរិកប្រចាំកម្ពុជា កាលពីថ្ងៃទី១៨ ខែឧសភា ឆ្នាំ២០១១ បានប្រារព្ធខួបលើកទី៥០ឆ្នាំ នៃថ្ងៃបង្កើតអ្នកស្ម័គ្រចិត្តភ្នាក់ងារ ភីសខ័រ Peace Corps ) របស់ខ្លួន ដោយបានបង្ហាញពីភាគជោគជ័យក្នុងការងារនៅកម្ពុជា។
លោកស្រី ខារ៉ូល រ៉ុដលី (Carol Rodley) ឯកអគ្គរដ្ឋទូតអាមេរិកប្រចាំកម្ពុជា មានប្រសាសន៍ក្នុងពិធីអបអរខួបលើកទី៥០ឆ្នាំ នៅចំពោះមុខអង្គទូតសន្តិភាពថា បេសកកម្មភីសខ័រនៅកម្ពុជា ប្រយោជន៍ផ្ដល់ជំនាញ ចំណេះដឹង និងឯកទេសទាក់ទងវិស័យអប់រំ កសិកម្ម បរិស្ថាន ការអភិវឌ្ឍជំនួញខ្នាតតូច វិស័យសុខាភិបាល បង្រៀនភាសាអង់គ្លេស ព្រមទាំងបច្ចេកវិជ្ជាកុំព្យូទ័រដល់យុវជនតាមសាលាផងដែរ។
លោកស្រីបន្តថា ចាប់ពីឆ្នាំ២០០៧មក សហរដ្ឋអាមេរិកបានបញ្ជូនភ្នាក់ងារភីសខ័រមកកម្ពុជា ១ឆ្នាំៗ ប្រមាណ ៨០នាក់ ដោយបញ្ជូនទៅដល់សហគមន៍តាមជនបទ ដោយអង្គទូតសន្តិភាព បានផ្ដល់នូវជំនាញដល់យុវជន និងពលរដ្ឋតាមសហគមន៍ចំនួន ១៤ខេត្តក្រុងនៅកម្ពុជា។
លោកស្រីទូតបន្តថា ទៅថ្ងៃអនាគតសហរដ្ឋអាមេរិកនឹងបញ្ជូនភ្នាក់ងារភីសខ័រឲ្យបានច្រើន ដើម្បីផ្ដល់បទពិសោធន៍ការងារ ជាពិសេសជំនាញភាសាអង់គ្លេសដល់យុវជនខ្មែរឲ្យបានច្រើននៅតាមសាលាឲ្យបានទូលំទូលាយថែមទៀត។
ចំណែកក្រុមអង្គទូតសន្តិភាព ដែលបានចូលរួមប្រារព្ធខួបលើកទី ៥០ឆ្នាំ នាស្ថានទូតអាមេរិកប្រចាំកម្ពុជា កាលពីព្រលប់ថ្ងៃទី១៨ ខែឧសភា បានថ្លែងប្រហាក់ប្រហែលគ្នាថា បេសកកម្មរបស់ពួកគេមកកម្ពុជា គ្មានអ្វីក្រៅពីចែករំលែកជំនាញ និងចំណេះដល់ពលរដ្ឋកម្ពុជា ដើម្បីរួមចំណែកអភិវឌ្ឍកម្ពុជា តាមរយៈសកម្មភាពចុះផ្ទាល់តាមមូលដ្ឋាន។
មន្ត្រីអង្គទូតសន្តិភាពមានប្រសាសន៍ជាភាសាខ្មែរឲ្យដឹងថា វត្តមានរបស់ពួកគេមកកម្ពុជា ក្រៅពីផ្ដល់ជំនាញដល់យុវជនខ្មែរ ពួកគេក៏បានសិក្សាពីវប្បធម៌ ប្រពៃណីខ្មែរ និងរៀននិយាយភាសាខ្មែរផងដែរ ៖ «សកលវិទ្យាល័យភ្នំពេញខ្ញុំបង្រៀនអំពីប្រវត្តិសាស្ត្រតំបន់អាស៊ីអាគ្នេយ៍។ ធ្វើការនៅទីនេះ ខ្ញុំធ្វើការជាមួយជនជាតិខ្មែរល្អ»។
លោកស្រី ភឿង សកូណា រដ្ឋលេខាធិការក្រសួងអប់រំ យុវជន និងកីឡា ដែលបានចូលរួមក្នុងពិធីរំលឹកខួបលើកទី៥០ឆ្នាំ ថ្ងៃបង្កើតភ្នាក់ងារភីសខ័រ បានចាត់ទុកវត្តមានភ្នាក់ងារភីសខ័រនៅកម្ពុជា ថាបានចូលរួមចំណែកជំរុញឲ្យវិស័យអប់រំកម្ពុជាមានការរីកចំរើន ពិសេសជំនាញភាសាអង់គ្លេសដល់យុវជនកម្ពុជា។ បន្ថែមលើនេះ លោកស្រីចង់ឲ្យវត្តមានភ្នាក់ងារភីសខ័រសហរដ្ឋអាមេរិកមានចំនួនកាន់តែច្រើននៅកម្ពុជា ដើម្បីជួយផ្ដល់ជំនាញទាក់ទងការអប់រំ កសិកម្ម បរិស្ថាន ក៏ដូចជាបញ្ហាសុខភាពជាដើម បានដល់ពលរដ្ឋនៅតាមមូលដ្ឋាន ពិសេសផ្ដល់ការយល់ដឹងពីបំណិនជីវិតដល់យុវជនកម្ពុជាសម្រាប់រៀបចំខ្លួននៅថ្ងៃអនាគត ៖ «ជួយប្រទេសដែលត្រូវការជំនួយ ជួយជនជាតិកម្ពុជាយើងឲ្យបានយល់ច្បាស់ពីជនជាតិអាមេរិកាំង ហើយពេលពួកគាត់ត្រឡប់ទៅវិញ គាត់អាចនិយាយអំពីជនជាតិកម្ពុជាយើងឲ្យជនជាតិអាមេរិកបានដឹង»។
មន្ត្រីស្ថានទូតអាមេរិកឲ្យដឹងថា តាមការអញ្ជើញរបស់រាជរដ្ឋាភិបាលកម្ពុជា មន្ត្រីអង្គទូតសន្តិភាព សហរដ្ឋអាមេរិក បានបើកការិយាល័យរបស់ខ្លួន នៅកម្ពុជាក្នុងឆ្នាំ២០០៦ ហើយគិតមកដល់ឆ្នាំ២០១១ មានអ្នកស្ម័គ្រចិត្តសរុបជិត ២០០នាក់ បានចុះធ្វើការតាមគោលដៅតាមខេត្តក្រុងចំនួន១៤ ក្នុងចំណោម២៤ខេត្ត-ក្រុងទូទាំងប្រទេសកម្ពុជា។
អ្នកស្ម័គ្រចិត្តអង្គទូតសន្តិភាព ត្រូវបានជ្រើសរើសដោយយកចិត្តទុកដាក់នៅអាមេរិក ដោយភ្នាក់ងារភីសខ័រទាំងបុរស និងស្ត្រី ត្រូវមានអាយុពី២២ ដល់៧៥ឆ្នាំ ជាតំណាងឲ្យជនជាតិខុសៗគ្នា ក្នុងសហរដ្ឋអាមេរិក។ អ្នកស្ម័គ្រចិត្តភ្នាក់ងារភីសខ័រ សុទ្ធតែបានបញ្ចប់សញ្ញាប័ត្រពីសាកលវិទ្យាល័យនៅសហរដ្ឋអាមេរិក។ អ្នកស្ម័គ្រចិត្តភ្នាក់ងារភីសខ័រ បានធ្វើការជិតស្និទ្ធក្នុងប្រទេសជិត ១៤០ប្រទេសនៅលើពិភពលោក។
មន្ត្រីអង្គទូតសន្តិភាពត្រូវបានបង្កើតឡើងដោយអតីតប្រធានាធិបតីអាមេរិក លោក ចន ខេននីឌី (John F. Kennedy) ក្នុងឆ្នាំ១៩៦១ មានគោលដៅលើកកម្ពស់សន្តិភាព និងមិត្តភាពជាអន្តរជាតិ តាមរយៈសេវាអ្នកស្ម័គ្រចិត្តអាមេរិកនៅឯនាយសមុទ្រ ដោយមិនប្រកាន់និន្នាការនយោបាយ សាសនា និងមិនគិតពីប្រាក់ចំណេញនៃរដ្ឋាភិបាលអាមេរិកនោះទេ៕