មេបញ្ជាការដ្ឋានទ័ពជើងទឹកសមុទ្ររាម លោក ម៉ី ឌីណា បានលើកឡើងនៅក្នុងសេចក្ដីប្រកាសព័ត៌មានចុះថ្ងៃទី៣មិថុនាថា កម្មវិធីហ្វឹកហ្វឺនបាញ់គ្រាប់ពិតនៅលើដែនសមុទ្រនេះនឹងធ្វើឡើងចន្លោះពីកោះពូលូវ៉ៃនិងកោះតាង នៅក្នុងខេត្តព្រះសីហនុ។
កងទ័ពជើងទឹកក៏អំពាវនាវឱ្យអាជ្ញាធរពាក់ព័ន្ធ និងប្រជាពលរដ្ឋ កុំមានការភ័ន្តច្រឡំនៅពេលលឺសំឡេងកាំភ្លើង ការចល័តកងទ័ព និងនាវាចម្បាំងអំឡុងពេលធ្វើសមយុទ្ធនេះ ព្រមទាំងហាមប្រជានេសាទកុំឱ្យធ្វើដំណើរឆ្លងកាត់នៅតំបន់ធ្វើសមយុទ្ធអំឡុងពេលហ្វឹកហ្វឺននេះ។
អ្នកអត្ថាធិប្បាយនយោបាយ លោក គឹម សុខ យល់ថា កម្ពុជាធ្វើសមយុទ្ធបាញ់គ្រាប់ពិតអំឡុងពេលមានជម្លោះប្រដាប់អាវុធនៅតាមព្រំដែននេះជារឿងមិនល្អសម្រាប់កម្ពុជាឡើយ ហើយលោកបានប្រដូចការប្រើកងកម្លាំងសម្ញែងប្រទេសជិតខាងនៅពេលនេះថា ជាការហុចដងដាវឱ្យថៃកាប់ទៅវិញទេ។
ការប្រើកម្លាំងមែនទែនគឺជាការហុចដងឱ្យចាក់ទៅវិញ នៅក្នុងស្ថានភាពដែលកម្ពុជាកំពុងតែអន់ខ្សោយនៅឡើយពេលដែលកម្ពុជាបង្ហាញកម្លាំងបាញ់គ្រាប់ពិតនៅក្បែរព្រំដែនវាចូលអន្ទាក់របស់គេ។គេអាចចោទថា ត្រៀមឈ្លានពានគេ តាមពិតយើងត្រៀមកម្លាំងដើម្បីតទល់ម្ល៉ោះហើយ គួរណាស់តែមេដឹកនាំក្រសួងការពារជាតិកម្ពុជាមានភាពឆ្លាតវៃបន្តិច មិនគួរណាបង្ហាញកម្លាំងបាញ់គ្រាប់ពិតក្ដៅក្នុងស្ថានភាពដែលកំពុងក្ដៅទៅហើយនោះទេ។
— លោក គឹម សុខ
អ្នកវិភាគលើកឡើងថា ក្នុងស្ថានការណ៍បែបនេះ កម្ពុជាគួរតែដោះស្រាយបញ្ហាដោយការប្រើច្បាប់ គឺទី១ផ្ដល់សច្ចាប័នលើច្បាប់អន្តរជាតិ ទី២រាយការណ៍ទៅសហប្រធាននៃកិច្ចព្រមព្រៀងក្រុងប៉ារីស ទី៣ប្រើសន្ធិសញ្ញាបារាំង-សៀមឆ្នាំ១៩០៧ និងប្ដឹងទៅតុលាការយុត្តិធម៌អន្តរជាតិឱ្យដោះស្រាយ។
ស្របពេលដែលទ័ពកម្ពុជាត្រៀមហ្វឹកហ្វឺនបាញ់គ្រាប់ពិតនេះ ប្រមុខការពារជាតិប្រទេសកម្ពុជានិងថៃឯណោះវិញ ក៏បានជួបពិភាក្សាគ្នានៅតំបន់ព្រំដែនស្រុកអារ័ញប្រទេសថៃដើម្បីដោះស្រាយជម្លោះប្រទេសទាំងពីរ។
សារព័ត៌មានថៃភីប៊ីអេស្ស(Thai PBS)របស់ថៃ បានចុះផ្សាយថា រដ្ឋមន្ត្រីក្រសួងការពារជាតិកម្ពុជា លោក ទៀ សីហា និងមេទ័ពមួយចំនួនទៀត បានជួបពិភាក្សាជាមួយ រដ្ឋមន្ត្រីក្រសួងការពារជាតិថៃ លោក ភូមិថាំ វេឆាយ៉ាឆៃ (Phumtham Wechayachai )នៅស្រុកអារ័ញខេត្តស្រះកែវជាប់ក្រុងប៉ោយប៉ែត ខេត្តបន្ទាយមានជ័យ នៅថ្ងៃទី៥ខែមិថុនា។ ភាគីទាំងពីរបានយល់ស្របគ្នាដោះស្រាយបញ្ហាព្រំដែនតាមយន្តការដែលមានស្រាប់ ដើម្បីរកច្រកចេញដ៏សមស្រប និងបានរក្សាកងកម្លាំងដូចកាលពីឆ្នាំ២០២៤កន្លងទៅ។
ស្របពេលដែលប្រមុខការពារជាតិប្រទេសទាំងពីជួបពិភាក្សាគ្នានេះ រដ្ឋាភិបាលកម្ពុជាបានប្រកាសនឹងប្ដឹងបញ្ហាជម្លោះនៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ នៅទីក្រុងឡាអេ (The Haguge) ប្រទេសហូឡង់ (Netherlands) ដើម្បីឱ្យជួយកាត់ក្ដីរឿង។
ភាពតានតឹងរវាងកម្ពុជានឹងថៃបន្តឡើងកម្ដៅ បន្ទាប់ពីប្រទេសទាំងពីរបានបញ្ជូនកងទ័ពនិងអាវុធបន្ថែមទៅកាន់ព្រំដែន ក្រោយមានករណីផ្ទុះអាវុធសម្លាប់ទាហានខ្មែរម្នាក់ និងការជួបចរចារវាងមេទ័ពជើងគោកប្រទេសទាំងពីរកាលពីថ្ងៃទី២៩ឧសភាបានបរាជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។