អ្នកវិភាគថាគោលដៅអាស៊ានកំណត់តំបន់គ្មានថ្នាំញៀនគឺមិនអាចទៅរួចទេ
2016.10.31
គ្រឿងញៀនដែលអាជ្ញាធររឹបអូសបាន និងដុតបំផ្លាញចោលកាលពីថ្ងៃទី២៦ ខែមិថុនា ឆ្នាំ២០១៦។ RFA/Leng Maly
RFA/Leng Maly
គោលដៅចម្បងមួយរបស់សហគមន៍អាស៊ាន គឺការធ្វើឲ្យសហគមន៍ក្លាយទៅជាតំបន់គ្មានគ្រឿងញៀននៅឆ្នាំ២០១៥។ ទោះបីជាយ៉ាងនេះក្តី រដ្ឋមន្ត្រីនៃប្រទេសទាំង១០ នៃសហគមន៍អាស៊ាន បានទទួលស្គាល់ថា មកដល់ឆ្នាំ២០១៦ ហើយ ថ្នាំញៀនកំពុងត្រូវបានផលិត ចែកចាយ និងប្រើប្រាស់នៅក្នុងកម្រិតមួយដែលគួរឲ្យព្រួយបារម្ភនៅឡើយ។
នៅក្នុងជំនួបប្រជុំរដ្ឋមន្ត្រីអាស៊ានលើកទី៥ ស្ដីពីបញ្ហាគ្រឿងញៀននៅប្រទេសសិង្ហបុរី រដ្ឋមន្ត្រីរបស់ប្រទេសសមាជិកទាំង១០ បានឯកភាពគ្នាទទួលស្គាល់ថា ថ្នាំញៀននៅតែជាបញ្ហាប្រឈមដ៏ធំមួយនៅក្នុងតំបន់អាស៊ីអាគ្នេយ៍។
បញ្ហាចម្បងចំនួន៧ ដែលថ្នាក់ដឹកនាំអាស៊ានបានឯកភាពក្នុងកិច្ចប្រជុំនោះ កាលពីថ្ងៃទី២០ តុលា ថាជាមូលហេតុដែលអាស៊ានមិនទាន់អាចសម្រេចគោលដៅជាតំបន់គ្មានថ្នាំញៀនបាននៅក្នុងតំបន់អាស៊ាន។
បញ្ហាមួយ គឺថាថ្នាំពេទ្យដែលមានធាតុផ្សំពីអាភៀន និងសារធាតុអំហ្វេតាមីន (Amphetamine) ដែលអាចបង្កការញៀន កំពុងត្រូវបានយកមកប្រើប្រាស់ដោយត្រឹមត្រូវ ឫដោយគ្មានវេជ្ជបញ្ជាច្បាស់លាស់។
ក្រៅពីសារធាតុញៀនដែលគេស្គាល់ បញ្ហាមួយទៀត គឺការកើនឡើងនូវប្រភេទសារធាតុញៀនថ្មីៗដែលយកមកផលិតជាថ្នាំញៀន។ ជារៀងរាល់ឆ្នាំមានសារធាតុញៀនថ្មីយ៉ាងហោចណាស់ ១០០ប្រភេទ ត្រូវបានរកឃើញ។
បណ្ដាញឧក្រិដ្ឋជនឆ្លងដែនក្នុងតំបន់ដែលជាអ្នកផលិត និងជាអ្នកចែកចាយ នៅជាបញ្ហាដែលអាជ្ញាធរក្នុងតំបន់មិនទាន់អាចដោះស្រាយបាន ហើយការពង្រឹងភាពតភ្ជាប់រវាងបណ្ដាប្រទេសអាស៊ាន ដូចជាចរាចរផ្លូវទឹក ក៏ធ្វើឲ្យបញ្ហានេះកាន់តែលំបាកដោះស្រាយទៅទៀត។
ទន្ទឹមនឹងនេះ សហគមន៍ក្រីក្រដែលកំពុងដាំដុះដំណាំខុសច្បាប់ដែលយកមកធ្វើថ្នាំញៀននោះ មិនទាន់ត្រូវរដ្ឋាភិបាលរៀបចំដោះស្រាយមានប្រសិទ្ធភាពជូនពួកគាត់នៅឡើយ។ ឧទាហរណ៍ដូចជាប្រទេសមីយ៉ាន់ម៉ា ដែលជាអ្នកផលិតដាំដុះអាភៀនធំជាងគេទីពីរនៅលើលោក និងបញ្ហាចុងក្រោយ គឺតំបន់ត្រីកោណមាសនៅចន្លោះប្រទេសឡាវ ភូមា និងថៃ ដែលនៅតែជាកន្លែងផលិត និងចរាចរថ្នាំញៀនដ៏ធំមួយក្នុងតំបន់ដដែល។
នៅប្រទេសថៃ អ្នកជាប់ពន្ធនាគារជាង ២សែន ៣ម៉ឺននាក់ដែលត្រូវនឹង ៧០ភាគរយនៃអ្នកជាប់ពន្ធនាគារទាំងអស់ គឺដោយសារបទឧក្រិដ្ឋទាក់ទងនឹងគ្រឿងញៀន។
ចំណែកប្រទេសកម្ពុជា វិញ របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ឲ្យដឹងថា មួយឆ្នាំចុងក្រោយនេះ ការឃាត់ខ្លួនទាក់ទងនឹងថ្នាំញៀនបានកើនឡើងជាង ៧០ភាគរយ ពី ៤.៨០០នាក់មក ៨ពាន់នាក់។
កាលពីខែកុម្ភៈ ដើមឆ្នាំ២០១៦ កន្លងទៅ ការិយាល័យអង្គការសហប្រជាជាតិ ទទួលបន្ទុកផ្នែកឧក្រិដ្ឋកម្ម និងថ្នាំញៀនបានចេញរបាយការណ៍ រកឃើញថា កម្ពុជា កំពុងក្លាយជាកន្លែងជួញដូរដ៏ក្តៅមួយសម្រាប់ថ្នាំហេរ៉ូអ៊ីន (Heroine) និងមេតំហ្វេតាមីន (Methamphetamine)។ ការកើនឡើងនេះ ត្រូវបានរកឃើញថា កើតឡើងស្របគ្នានឹងកំណើននៃភាពតភ្ជាប់ក្នុងតំបន់អាស៊ាន។ របាយការណ៍ដដែលឲ្យដឹងទៀតថា ចំនួនថ្នាំមេតំហ្វេតាមីន ដែលចាប់បាននៅតំបន់អាស៊ីប៉ាស៊ីហ្វិកសម្រាប់ឆ្នាំ២០០៨-២០១៣ ដោយរកឃើញថា ចំនួនបានកើនឡើងជិត ៤ដង ពី ១១តោនមកច្រើនជាង ៤០តោន ហើយឧក្រិដ្ឋកម្មឆ្លងដែនក្នុងតំបន់អាស៊ីអាគ្នេយ៍ និងចិន បើគិតជាទឹកប្រាក់គឺរហូតដល់ ១០០ពាន់លានដុល្លារសហរដ្ឋអាមេរិកជារៀងរាល់ឆ្នាំ។
ប្រធានសម្ព័ន្ធគោលនយោបាយថ្នាំញៀនអន្តរជាតិ អ្នកស្រី អាន ហ្វដហេម (Ann Fordham) ប្រាប់សារព័ត៌មាន ឌីផ្លូម៉ាត (Diplomat) កាលពីខែសីហា ថាការចង់ធ្វើឲ្យតំបន់អាស៊ានទៅជាតំបន់គ្មានថ្នាំញៀន គឺគ្រាន់តែជាការស្រមើស្រមៃខុសពីការពិត ដែលមិនអាចទៅរួចបាននោះទេ។ អ្វីដែលអាស៊ានអាចធ្វើបាន គឺបានត្រឹមការទប់ស្កាត់មិនឲ្យថ្នាំញៀនចរាចរច្រើនពេកតែប៉ុណ្ណោះ។
ប្រទេស៧ ក្នុងចំណោម ១០ប្រទេសនៅអាស៊ាន មានដូចជា វៀតណាម ថៃ ឡាវ សិង្ហបុរី ម៉ាឡេស៊ី ប្រ៊ុយណេ និងឥណ្ឌូនេស៊ី សុទ្ធតែមានច្បាប់ប្រហារជីវិតដល់អ្នកទោសថ្នាំញៀន។ ប្រទេសហ្វីលីពីន ទោះបីជាមិនមានច្បាប់ប្រហារជីវិតក៏ដោយ ក៏មានមនុស្សច្រើនជាង ៣.៥០០នាក់ត្រូវបានសម្លាប់ក្រោមយុទ្ធនាការកម្ចាត់គ្រឿងញៀនរបស់ប្រធានាធិបតីហ្វីលីពីន លោក រ៉ូឌ្រីហ្គោ ឌូធឺតេ (Rodrigo Duterte)។
កាលពីជំនួបប្រជុំកំពូលអាស៊ាន កាលពីខែកញ្ញា ឆ្នាំ២០១៥ នៅប្រទេសឡាវ លោកនាយករដ្ឋមន្ត្រី ហ៊ុន សែន បានចូលជួបពិភាក្សាផ្ទាល់ជាមួយនឹងប្រធានាធិបតីហ្វីលីពីន លោក រ៉ូឌ្រីហ្គោ ឌូធឺតេ ហើយថ្នាក់ដឹកនាំទាំងពីរបានលើកយកបញ្ហាថ្នាំញៀននៅក្នុងតំបន់មកពិភាក្សា។
ក្រោយពីជំនួបប្រជុំនោះ នៅដើមខែតុលា លោក ហ៊ុន សែន បានថ្លែងទៅកាន់ក្រុមនិស្សិតបញ្ចប់ការសិក្សាពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ថាកម្ពុជា នឹងមិនមានការបាញ់សម្លាប់ជនល្មើសគ្រឿងញៀនទេ ក៏ប៉ុន្តែពួកគេក៏មិនត្រូវបានការលើកលែងដូចគ្នា។ លោកបានបង្គាប់បញ្ជាឲ្យសមត្ថកិច្ចបង្កើនប្រតិបត្តិការបង្ក្រាបគ្រឿងញៀនបន្ថែមទៀត ដោយហេតុថា ចរាចររបស់វាកំពុងតែកើនឡើងនាពេលបច្ចុប្បន្ន។
អ្នកតំណាងប្រចាំតំបន់នៃការិយាល័យអង្គការសហប្រជាជាតិ ទទួលបន្ទុកផ្នែកឧក្រិដ្ឋកម្ម និងថ្នាំញៀន លោក ចេរីមី ដូខ្លាស (Jeremy Douglas) ឆ្លើយប្រាប់សារព័ត៌មានភ្នំពេញប៉ុស្តិ៍ កាលពីខែកុម្ភៈ ថា មូលហេតុមួយដែលបណ្ដាលឲ្យចរាចរថ្នាំញៀននៅកម្ពុជា មានការកើនឡើង គឺដោយសារតែភូមិសាស្ត្ររបស់កម្ពុជា ដែលឋិតនៅចន្លោះសេដ្ឋកិច្ចធំៗពីរ គឺវៀតណាម និងថៃ។ កម្ពុជា បានក្លាយជាកន្លែងដែលគេយកមកចរាចរមនុស្ស ឈើខុសច្បាប់ និងថ្នាំញៀន ទៅកាន់ប្រទេសសេដ្ឋកិច្ចលូតលាស់ខ្លាំងទាំងនោះ។
អ្នកឯកទេសទំនាក់ទំនងអន្តរជាតិ លោក ឡុង គឹមឃន ឯកភាពថាការរៀបចំតំបន់អាស៊ានឲ្យទៅជាតំបន់គ្មានគ្រឿងញៀន គឺពិបាកនឹងក្លាយជាការពិតណាស់ ដោយមានហេតុផលជាច្រើនដូចជា ភាពទន់ខ្សោយនៃនយោបាយ និងការអភិវឌ្ឍច្បាប់របស់ប្រទេសជាសមាជិក៖ «បញ្ហាធំមួយរបស់អាស៊ាន គឺប្រព័ន្ធគ្រប់គ្រងព្រំដែន មានសភាពខ្សោយ។ តាមរបាយការណ៍កន្លងទៅ ទំនិញធំៗផងយកតាមច្រករបៀង ខ្លះដោយចំហធ្វើឲ្យបាត់លុយរាប់រយលានដុល្លារតាមរយៈការរត់គេចពន្ធ។ នេះយើងមិនទាន់និយាយពីចរាចរគ្រឿងញៀនផង»។
ទាក់ទិននឹងបញ្ហាទាំងនេះ រដ្ឋមន្ត្រីទាំង១០ របស់អាស៊ាន បានឯកភាពអនុម័តយកផែនការការងារថ្មីឆ្នាំ២០១៥-២០១៦ ស្ដីពីការការពារសហគមន៍អាស៊ានឲ្យរួចផុតពីថ្នាំញៀន។ ផែនការចាស់របស់អាស៊ានឆ្នាំ២០០៩-២០១៥ ត្រូវបានអ្នកជំនាញអន្តរជាតិមើលឃើញថា មានប្រសិទ្ធភាពតិចតួចនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត