តើ​សម្ដេច​ព្រះ​នរោត្តម សីហនុ ព្រះអង្គ​បាន​ធ្វើ​អ្វី​ខ្លះ​ចំពោះ​ខ្មែរ​ក្រោម?

0:00 / 0:00

សម្ដេច​ព្រះ​នរោត្តម សីហនុ ព្រះ​បរម​រតន​កោដ្ឋ គឺ​ជា​អង្គ​ព្រះមហាក្សត្រ​ដែល​ប្រជាពលរដ្ឋ​ខ្មែរ​ភាគ​ច្រើន​គោរព​ស្រឡាញ់ មិន​ថា​កាល​ពី​ពេល​ព្រះអង្គ​នៅ​មាន​ព្រះជន្ម ឬ​ពេល​ព្រះអង្គ​ចូល​ទិវង្គត​ឡើយ។

ចំណែក​ពលរដ្ឋ​ខ្មែរ​ក្រោម ជាពិសេស​អង្គការ​សមាគម​ខ្មែរ​កម្ពុជា​ក្រោម​នៅ​កម្ពុជា ពួក​គេ​ក៏​គោរព​ស្រឡាញ់​ចង​ចាំ​មិន​ភ្លេច​នូវ​គុណូបការៈ​ របស់​ព្រះអង្គ ដែល​បាន​អាណិត​អាសូរ​ចំពោះ​ពលរដ្ឋ​ខ្មែរ​ក្រោម​ទូទៅ​ផង​ដែរ។

តើ​សម្ដេច​ព្រះ​នរោត្តម សីហនុ ព្រះអង្គ​បាន​ធ្វើ​អ្វី​ខ្លះ​ចំពោះ​ខ្មែរ​ក្រោម?

នៅ​កម្ពុជា នៅ​ពេល​ដែល​ពលរដ្ឋ​និយាយ​ពី​សម្ដេច​ព្រះ​នរោត្តម សីហនុ ពួក​គេ​ច្បាស់​ជា​មិន​សូវ​ភ្លេច​ឡើយ​លើក​ឡើង​ពី​ស្នាព្រះហស្ត​របស់​ព្រះអង្គ ក្នុង​ការ​ទាមទារ​ឯករាជ្យ​ពី​អាណានិគម​និយម​បារាំង នៅ​ឆ្នាំ​១៩៥៣ ពី​ការ​ឈ្នះ​ក្តី​នៅ​តុលាការ​យុត្តិធម៌​អន្តរជាតិ ទាមទារ​យក​ប្រាសាទ​ព្រះវិហារ​ពី​ប្រទេស​ថៃ នៅ​ឆ្នាំ​១៩៦២ ពី​ការ​ដឹក​នាំ​របស់​ព្រះអង្គ ធ្វើ​ឲ្យ​កម្ពុជា រីក​ចម្រើន​ក្នុង​សម័យ​សង្គម​រាស្ត្រ​និយម​ពី​ឆ្នាំ​១៩៥៥ ដល់​ឆ្នាំ​១៩៧០ ហើយ​ដែល​ពេល​នោះ កម្ពុជា ត្រូវ​បាន​ចាត់​ទុក​ជា​កោះ​សន្តិភាព​ទៀត​ផង។

លើស​ពី​នេះ ស្នាព្រះហស្ត​ថ្មីៗ​របស់​ព្រះអង្គ​ដែល​ពលរដ្ឋ​ខ្មែរ​មិន​អាច​បំភ្លេច​បាន​ដែរ​នោះ គឺ​ការ​ផ្សះផ្សា​បង្រួប​បង្រួម​ជាតិ​នៅ​ឆ្នាំ​១៩៩១ តាម​រយៈ​ការ​ចុះ​កិច្ច​ព្រមព្រៀង​សន្តិភាព​ទីក្រុង​ប៉ារីស នៅ​ថ្ងៃ​ទី​២៣ ខែ​តុលា។ ក្រៅ​ពី​នេះ ភាព​ទន់​ភ្លន់​រួស​រាយ​រាក់​ទាក់ ក្តី​ស្រឡាញ់ អាណិត​អាសូរ និង​ស្នាម​ញញឹម​មិន​ចេះ​រីង​ស្ងួត​របស់​ព្រះអង្គ ក៏​មិន​អាច​ធ្វើ​ឲ្យ​កូន​ចៅ​បំភ្លេច​ព្រះអង្គ​បាន​ដែរ។

កាល​ពី​ពេល​ព្រះអង្គ​នៅ​មាន​ព្រះជន្ម ព្រះអង្គ​តែង​បោះ​ព្រះហស្ដ​ទៅ​រក​គ្រប់​ប្រជាពលរដ្ឋ​ខ្មែរ​ទាំងអស់ មិន​ថា​អ្នក​នយោបាយ ព្រះសង្ឃ ឬ​ពលរដ្ឋ​សាមញ្ញ​ឡើយ។ ដោយ​ឡែក​សម្រាប់​ព្រះសង្ឃ និង​ពលរដ្ឋ​ខ្មែរ​កម្ពុជា​ក្រោម​វិញ សម្ដេច​ព្រះ​បរម​រតន​កោដ្ឋ ព្រះអង្គ​មិន​ដែល​បំភ្លេច​ពួក​គេ​ឡើយ។ ព្រះអង្គ​តែង​ចាត់​ទុក​ពួក​គេ​ជា​កូន​ជា​ចៅ​របស់​ព្រះអង្គ ដូច​ពលរដ្ឋ​ខ្មែរ​ទូទៅ​នៅ​កម្ពុជា យ៉ាង​ដូច្នេះ​ដែរ។

តំណាង​សហព័ន្ធ​ខ្មែរ​កម្ពុជា​ក្រោម​ពិភពលោក​នៅ​កម្ពុជា លោក តាំង សារៈ ដែល​ធ្លាប់​បាន​ចូល​គាល់​សម្ដេច​ព្រះ​នរោត្តម សីហនុ កាល​ពី​ពេល​ព្រះអង្គ​នៅ​មាន​ព្រះជន្ម​នោះ ថ្លែង​រំឭក​ពី​គុណ​បំណាច់​របស់​ព្រះអង្គ​ចំពោះ​ខ្មែរ​ក្រោម​ថា កាល​ពី​ពេល​ព្រះអង្គ​គង់​ជា​ព្រះ​ប្រមុខ​រដ្ឋ​គ្រប់គ្រង​ប្រទេស​កម្ពុជា សម្ដេច​ព្រះ​បរម​រតន​កោដ្ឋ ព្រះអង្គ​តែង​បាន​សន្តោស​ប្រជារាស្ត្រ​ខ្មែរ​ក្រោម​របស់​ព្រះអង្គ នៅ​ពេល​ពួក​គេ​ឡើង​មក​ប្រទេស​កម្ពុជា។ ព្រះអង្គ​បាន​ផ្តល់​សញ្ជាតិ​ខ្មែរ​ឲ្យ​ពួក​គេ​ជា​ស្វ័យ​ប្រវត្តិ ព្រម​ទាំង​បាន​បង្ក​លក្ខណៈ​ងាយ​ស្រួល ដើម្បី​ឲ្យ​ខ្មែរ​ក្រោម​អាច​ចាប់​ផ្ដើម​ជីវិត​ថ្មី​របស់​ពួក​គេ​នៅ​កម្ពុជា។

លោក តាំង សារៈ៖ «យើង​ឃើញ​ថា​ចាប់​តាំង​ពី​ព្រះអង្គ​ឡើង​គ្រងរាជ្យ​រហូត​ដល់​ព្រះអង្គ​សោយ​ព្រះ​ទិវង្គត ព្រះអង្គ​ហាក់​ដូច​ជា​មាន​មនោសញ្ចេតនា​ជាមួយ​នឹង​ខ្មែរ​កម្ពុជា​ក្រោម​យ៉ាង​ច្រើន ក្រោម​ព្រះរាជ​កិច្ច​ដឹក​នាំ​របស់​ព្រះអង្គ គឺ​ព្រះអង្គ​បាន​ផ្តល់​នូវ​ដីធ្លី ស្រែ​ចម្ការ​ជាច្រើន​ដល់​បង​ប្អូន​ខ្មែរ​កម្ពុជា​ក្រោម ដែល​ជា​អ្នក​ក្រីក្រ​នៅ​ឯ​មាតុភូមិ ហើយ​ឡើង​មក​ដល់​ប្រទេស​កម្ពុជា ពុំ​មាន​ដីធ្លី​សម្រាប់​បង្កបង្កើនផល។ ព្រះអង្គ​ទ្រង់​ប្រោស​ព្រះរាជ​ទាន​នូវ​ដីធ្លី​ដល់​បង​ប្អូន​ខ្មែរ​ក្រោម​ទាំង​នោះ»

លោក តាំង សារៈ បញ្ជាក់​ថា ដី​ធ្លី​ដែល​ពលរដ្ឋ​ខ្មែរ​ក្រោម​ទទួល​បាន​ពី​សម្ដេច​ព្រះ​នរោត្តម សីហនុ មាន​ដូចជា​នៅ​ឃុំ​រំលេច ឃុំ​ថ្នាលទទឹង ស្រុក​បាកាន ខេត្ត​ពោធិ៍សាត់ ឃុំ​រាំងពិសី ឃុំ​កំពង់ព្រាង និង​ឃុំ​កំពង់ព្រះ ស្រុក​សង្កែ ខេត្ត​បាត់ដំបង ព្រម​ទាំង​នៅ​ភូមិ​ខ្នាចរមាស ស្រុក​បវេល ខេត្ត​បាត់ដំបង ជាដើម។

ក្រៅ​ពី​បាន​ផ្តល់​សញ្ជាតិ និង​ដីធ្លី​ឲ្យ​ពលរដ្ឋ​ខ្មែរ​ក្រោម លោក តាំង សារៈ អះអាង​បន្ថែម​ថា សម្ដេច​ព្រះ​នរោត្តម សីហនុ ព្រះអង្គ​ក៏​បាន​យក​ចិត្ត​ទុក​ដាក់​ពី​ការ​សិក្សា​របស់​ព្រះសង្ឃ​ខ្មែរ​ក្រោម​ផង​ដែរ នោះ​គឺ​ព្រះអង្គ​បាន​ផ្តល់​អាហារូបករណ៍​ឲ្យ​ព្រះសង្ឃ​ខ្មែរ​ក្រោម​ជា​បន្តបន្ទាប់ ដើម្បី​ឡើង​មក​បន្ត​ការ​សិក្សា​នៅ​សាលា​ពុទ្ធិកវិទ្យាល័យ​ព្រះសុរាម្រិត ក្នុង​ប្រទេស​កម្ពុជា បន្ទាប់​ពី​ពួក​គេ​បាន​បញ្ចប់​ការ​សិក្សា​ថ្នាក់​ពុទ្ធិក​បឋម​សិក្សា ឬ​ភាសា​បាលី​រង​នៅ​ឯ​ដែន​ដី​កម្ពុជា​ក្រោម។ លើស​ពី​នេះ លោក តាំង សារៈ ថា ព្រះ​បរម​រតន​កោដ្ឋ ព្រះអង្គ​ក៏​បាន​ជ្រោមជ្រែង​ក្នុង​ការ​បង្កើត​សមាគម​ខ្មែរ​កម្ពុជា​ក្រោម នៅ​ឯ​ខេត្ត​ឃ្លាំង ទៀត​ផង។

លោក តាំង សារៈ៖ «បើ​និយាយ​ឲ្យ​ចំ​ពាក្យ​ថា​មិត្ត​សមាគម​ខ្មែរ​កម្ពុជា​ក្រោម កើត​ឡើង​ជា​ដំបូង គឺ​មាន​ទីតាំង​នៅ​ឯ​ដែន​ដី​កម្ពុជា​ក្រោម ក្នុង​ទី​រួម​ខេត្ត​ឃ្លាំង។ ហើយ​នៅ​ពេល​នោះ គឺ​ថា​ព្រះអង្គ​បាន​ប្រោស​ព្រះរាជ​ទាន​នូវ​ព្រះរាជ​ទ្រព្យ ដើម្បី​កសាង​នូវ​អគារ​របស់​សមាគម​មួយ ជា​អគារ​មួយ​ដ៏​ធំ ហើយ​មាន​រូបភាព​ប្រហាក់​ប្រហែល​ជាមួយ​នឹង​រដ្ឋសភា​ចាស់​របស់​យើង​សព្វថ្ងៃ​នេះ។ ហើយ​ដល់​ក្រោយ​មក មិន​អាច​ធានា​សុវត្ថិភាព​នៃ​សមាគម​នោះ​បាន មិត្ត​សមាគម​ខ្មែរ​កម្ពុជា​ក្រោម បាន​លើក​សមាគម​នោះ​មក​ដាក់​នៅ​ឯ​ទីក្រុង​ភ្នំពេញ នៃ​ព្រះរាជាណាចក្រ​កម្ពុជា វិញ ហើយ​ព្រះអង្គ​ទ្រង់​សព្វ​ព្រះរាជហឫទ័យ​គង់​ជា​ព្រះ​ប្រធាន​កិត្តិយស​នៃ​មិត្ត​សមាគម​ខ្មែរ​កម្ពុជា​ក្រោម​នេះ​ទៀត​ផង»

លើស​ពី​នេះ ឯកសារ​ប្រវត្តិសាស្ត្រ​បញ្ជាក់​ដែរ​ថា នៅ​ឆ្នាំ​១៩៤២ ពោល​គឺ​មួយ​ឆ្នាំ​ក្រោយ​ពី​ឡើង​គ្រងរាជ្យ ព្រះបាទ​សម្ដេច​ព្រះ​នរោត្តម សីហនុ ព្រះអង្គ​ក៏​បាន​យាង​ទៅ​ជួប​កូន​ចៅ​របស់​ព្រះអង្គ​នៅ​កម្ពុជា​ក្រោម ដែរ។ នៅ​ពេល​នោះ ព្រះអង្គ​បាន​យាង​ធ្វើ​ជា​អធិបតី​ក្នុង​ពិធី​សម្ពោធ​បើក​ឲ្យ​ប្រើប្រាស់​មន្ទីរ​ពុទ្ធសាសនបណ្ឌិត្យ​រង ដែល​ឋិត​ក្នុង​ទី​រួម​ខេត្ត​ឃ្លាំង បច្ចុប្បន្ន។ ពុទ្ធសាសនបណ្ឌិត្យ​រង​នៅ​ខេត្ត​ឃ្លាំង នេះ ត្រូវ​បាន​ចាប់​ផ្ដើម​កសាង​ឡើង​ក្នុង​ឆ្នាំ​១៩៤០ និង​ចប់​សព្វ​គ្រប់​នៅ​ឆ្នាំ​១៩៤២ ក្រោម​ការ​ជួយ​ឧបត្ថម្ភ​របស់​ព្រះមហាក្សត្រ​ខ្មែរ និង​អាជ្ញាធរ​បារាំង នៅ​កូសាំងស៊ីន។ ពុទ្ធសាសនបណ្ឌិត្យ​រង​នេះ ត្រូវ​បាន​បង្កើត​ឡើង​១២​ឆ្នាំ​ប៉ុណ្ណោះ បន្ទាប់​ពី​ពុទ្ធសាសនបណ្ឌិត្យ​នៅ​កម្ពុជា ត្រូវ​បាន​បង្កើត​នៅ​ឆ្នាំ​១៩៣០។

សព្វថ្ងៃ ទីតាំង​អតីត​សមាគម​ខ្មែរ​កម្ពុជា​ក្រោម ឬ​ហៅ​ម្យ៉ាង​ទៀត​ថា ក្រុម​សមាគម​សិក្សា​វិទ្យាល័យ​ខេមរៈ​ជាតិ នៅ​ដែន​ដី​កូសាំងស៊ីន និង​អគារ​ពុទ្ធសាសនបណ្ឌិត្យ​រង ឋិត​នៅ​ជាមួយ​គ្នា​ក្នុង​ទី​រួម​ខេត្ត​ឃ្លាំង ប៉ុន្តែ​អគារ​នេះ​ត្រូវ​បាន​ប្រើប្រាស់​ធ្វើ​ជា​សារមន្ទីរ​ខ្មែរ​ទៅ​វិញ។

និយាយ​ជា​រួម ក្រៅ​តែ​ពី​មាន​មនោសញ្ចេតនា​ជាមួយ​កូន​ចៅ​ខ្មែរ​ក្រោម ក្នុង​ជីវិត​នយោបាយ​របស់​សម្ដេច​ព្រះ​នរោត្តម សីហនុ ព្រះអង្គ​ក៏​មាន​មិត្ត​ជិតស្និទ្ធ​ជាមួយ​អ្នក​នយោបាយ​ដែល​មាន​ឈាម​ជ័រ​មក​ពី​កម្ពុជា​ក្រោម​មួយ​ចំនួន ហើយ​ដែល​ព្រះអង្គ​បាន​ព្រះរាជ​ទាន​ព្រះ​គោរមងារ​រហូត​ដល់​សម្ដេច​ទៀត​ផង ក្នុង​នោះ​មាន​ដូចជា សម្ដេច ចៅ​សែន កុសល​ឈុំ និង​សម្ដេច​បវរ​សេដ្ឋា សឺន សាន ជាដើម។

បន្ថែម​ពី​លើ​នេះ សម្ដេច​ព្រះ​នរោត្តម សីហនុ ព្រះ​បរម​រតន​កោដ្ឋ កាល​ពី​ពេល​ព្រះអង្គ​នៅ​មាន​ព្រះជន្ម ព្រះអង្គ​តែង​អនុញ្ញាត​ឲ្យ​ព្រះសង្ឃ តំណាង ឬ​ប្រធាន​អង្គការ​សមាគម​ខ្មែរ​កម្ពុជា​ក្រោម​នៅ​កម្ពុជា ចូល​គាល់​ដើម្បី​ក្រាប​បង្គំ​សួរ​សុខ​ទុក្ខ និង​ទូល​ថ្វាយ​ព្រះអង្គ​អំពី​សកម្មភាព​ការងារ​របស់​ពួក​គេ​នៅ​កម្ពុជា។ ចំណែក​ព្រះអង្គ​វិញ ព្រះអង្គ​ក៏​តែង​បាន​ជួយ​ឧបត្ថម្ភ​គាំទ្រ​ពួក​គេ​វិញ ទាំង​ស្មារតី និង​ថវិកា។ រៀង​រាល់​ឆ្នាំ នៅ​ពេល​ដែល​ខ្មែរ​ក្រោម​ប្រារព្ធ​ខួប​រំឭក​បាត់​បង់​ទឹក​ដី​កម្ពុជា​ក្រោម នៅ​ថ្ងៃ​ទី​៤ ខែ​មិថុនា ព្រះអង្គ​តែង​បាន​បញ្ជូន​ព្រះរាជ​តំណាង គឺ​ព្រះអង្គម្ចាស់​ស៊ីសុវត្ថិ ពង្ស​នារី​មុនី​ពង្ស ឲ្យ​យាង​ចូលរួម​ជា​អធិបតី។ គំរូ​ដ៏​ល្អ​ប្រពៃ​របស់​ព្រះអង្គ​នេះ ត្រូវ​បាន​ព្រះរាជបុត្រ​របស់​ព្រះអង្គ គឺ​សម្ដេច​ព្រះ​បរមនាថ នរោត្តម សីហមុនី បន្ត​អនុវត្ត​រហូត​មក​ទល់​សព្វថ្ងៃ។

ដោយសារ​សម្ដេច​ព្រះ​នរោត្តម សីហនុ តែង​ធ្លាប់​បាន​យក​ចិត្ត​ទុក​ដាក់​ការពារ​ចំពោះ​ពលរដ្ឋ​ខ្មែរ​ក្រោម លោក តាំង សារៈ ក៏​សង្ឃឹម​ដែរ​ថា រដ្ឋាភិបាល​កម្ពុជា សព្វថ្ងៃ នឹង​បន្ត​អនុវត្ត​គំរូ​ដ៏​ល្អ​របស់​ព្រះអង្គ។ លោក​ក៏​សង្ឃឹម​ដែរ​ថា រដ្ឋាភិបាល​កម្ពុជា នឹង​ជួយ​ការពារ​ខ្មែរ​ក្រោម នៅ​ពេល​ដែល​ពួក​គេ​ត្រូវ​បាន​អាជ្ញាធរ​វៀតណាម ធ្វើ​ទុក្ខ​បុក​ម្នេញ ដូច​អ្វី​ដែល​អតីត​ព្រះមហាក្សត្រ​ខ្មែរ​ទ្រង់​ធ្លាប់​បាន​ធ្វើ​ក្នុង​ពេល​ដែល​ព្រះអង្គ​ទ្រង់​កាន់​អំណាច​នៅ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។