លោកស្រីវេជ្ជបណ្ឌិត វង ដាវី បានឲ្យដឹងថា ៖ «ស្ត្រីត្រូវយល់ដឹង ពេលមករដូវនោះគឺត្រូវត្រៀមខ្លួន អនាម័យខ្លួនប្រាណ លាងប្រដាប់របស់យើងឲ្យបានម្តងឬពីរដងក្នុងមួយថ្ងៃ។ បើល្អទៅទៀត ត្រូវកត់ចំណាំនិងត្រៀមរៀបចំទុកជាមុននូវសំឡីអនាម័យនិងក្រណាត់...»។
លោកស្រីវេជ្ជបណ្ឌិតមានប្រសាសន៍បន្តថា ប្រសិនបើស្ត្រីពុំមានសំឡីអនាម័យសម្រាប់ប្រើទេនោះ គេអាចប្រើក្រណាត់ស្អាតល្អដោយបោកគក់ជាមួយសាប៊ូ ហើយហាលថ្ងៃដើម្បីសម្លាប់មេរោគ ៖ «សំឡីអនាម័យត្រូវផ្លាស់ប្តូរ៣ឬ៤ម៉ោងម្តង។ បើគ្មានសំឡី ត្រូវប្រើក្រណាត់ស្អាតល្អដោយបោកគក់នឹងសាប៊ូ ហាលថ្ងៃ ព្រោះថ្ងៃអាចសម្លាប់មេរោគបានច្រើនផងដែរ...»។
ក្នុងទំព័រវ៉ឹបសាយថ៍ kidshealth.org ដែលបានដកស្រង់យោបល់វេជ្ជបណ្ឌិតជំនាញ បានឲ្យដឹងថា ការផ្លាស់ប្តូរសំឡីអនាម័យពី៣ទៅ៤ម៉ោងម្តង ទោះបីជាឈាមរដូវនោះមកតិចៗមិនប្រឡាក់ជោកក៏ដោយ វានឹងផ្តល់អនាម័យល្អ ជួយបន្ថយកុំឲ្យមានក្លិនស្អុយ និងការពារការកកើតនៃមេរោគឬបាក់តេរី។
បន្ថែមពីការសម្អាតខ្លួនប្រាណឲ្យមានអនាម័យស្អាតល្អនោះដែរ លោកស្រីវេជ្ជបណ្ឌិត វង ដាវី បានមានប្រសាសន៍ថា ការហាត់ប្រាណក៏ជាវិធីមួយក្នុងការជួយសម្រាលអារម្មណ៍និងការឈឺចាប់ពេលមករដូវផងដែរ។
អ្នកស្រី សំអឿន ពីខេត្តក្រចេះ ដែលមានអាយុ៥២ឆ្នាំ ហើយដែលអះអាងថា នៅមានសម្រស់ស្អាតបាត នៅក្មេង បានមានប្រសាសន៍សម្ដែងមោទនភាពថា នៅពេលមករដូវម្តងៗ អ្នកស្រីតែងតែងូតទឹកក្តៅឧណ្ហៗ និងញ៉ាំម្ហូបអាហារតម មិនបរិភោគប្រហុកឬសម្ល។
អ្នកស្រី សំអឿន បានបញ្ជាក់ថា ៖ «មិនដែលហូបសម្លឬប្រហុក ហូបតែម្ហូបក្រៀមក្រោះ ដល់អស់រដូវទើបហូបធម្មតាវិញ ហើយបើផ្លែឈើញ៉ាំ។ បងងូតទឹកក្តៅរហូត បើគ្មានទឹកលាងសម្អាតមុខទ្វារ។ បងធ្វើតាមចាស់ៗប្រាប់ ហើយសាច់នៅស្អាត គេមិនជឿថា បងអាយុ៥២ឆ្នាំ...»។
ទាក់ទងនឹងការតមចំណីអាហារនៅពេលស្ត្រីមករដូវនេះ លោកស្រីវេជ្ជបណ្ឌិត វង ដាវី ប្រធានគ្លីនិកសមាគមថែទាំសុខភាពគ្រួសារកម្ពុជា ហៅកាត់ថា រ៉ាក់ (RHAC) បានថ្លែងបញ្ជាក់ថា តាមក្បួនវេជ្ជសាស្ត្រមិនមានចំណីអាហារណាដែលត្រូវតមនោះទេ។
លោកស្រីវេជ្ជបណ្ឌិត វង ដាវី បានមានប្រសាសន៍ថា ៖ «នៅពេលមករដូវ ស្ត្រីបាត់បង់ឈាមក្រហមច្រើន យើងញ៉ាំអាហារណាដែលមានជីវជាតិគ្រប់គ្រាន់ នាំឲ្យសុខភាពយើងល្អ គ្មានចំណីអាហារដែលត្រូវតមទេ។ កាលខ្ញុំនៅពីក្មេង ម្តាយខ្ញុំឲ្យតមទឹកកក អត់ឲ្យញ៉ាំម្ជូរ តាមក្បួនពេទ្យពុំមែនឲ្យតមទេ។ កាលណាយើងញ៉ាំចំណីអាហារគ្រប់ប្រភេទនោះ វានឹងជួយកាត់បន្ថយការឈឺចាប់ពេលមករដូវ...»។
លោកស្រីវេជ្ជបណ្ឌិត វង ដាវី បានផ្តល់ដំបូន្មានបន្ថែមថា ស្ត្រីឬក្មេងស្រីជំទង់ ទោះបីជាអំឡុងពេលមានរដូវឬក្រោយអស់រដូវម្តងៗ ត្រូវតែឧស្សាហ៍លាងសម្អាតប្រដាប់ភេទនិងបោកគក់ខោអាវទ្រនាប់នឹងសាប៊ូឲ្យបានស្អាត។
លោកស្រីវេជ្ជបណ្ឌិត វង ដាវី បានឲ្យដឹងថា ៖ «នៅពេលយើងអស់រដូវក៏ដោយ គឺយើងត្រូវមានអនាម័យខ្លួនប្រាណដែរ ជាពិសេសខោទ្រនាប់ត្រូវបោកគក់ឲ្យស្អាត ហាលចំថ្ងៃ ហើយត្រូវលាងទ្វារមាស ម្តងឬពីរដងក្នុងមួយថ្ងៃ...»។
ទាក់ទងនឹងសំណួរដែលចង់ដឹងថា តើពេលមករដូវស្ត្រីអាចមុជទឹកត្រាំយូរក្នុងស្ទឹងឬទន្លេដែរឬទេ? ចំពោះសំណួរនេះ លោកស្រីវេជ្ជបណ្ឌិត មាន ម៉ាឡុងវី ប្រធានគ្លីនិកសមាគមថែទាំសុខភាពគ្រួសារកម្ពុជា នៅស្ទឹងមានជ័យ ក្រុងភ្នំពេញ បានមានប្រសាសន៍ពន្យល់ពីហេតុផលយ៉ាងនេះថា ៖ «...ស្ត្រីដែលមករដូវគួរតែចៀសវាងត្រាំទឹកយូរ ពីព្រោះពេលមករដូវមាត់ស្បូនបើកធំជាងធម្មតាដែលអាចឲ្យមេរោគចូលបាន។ បើមុជទឹកដុសលាងមាត់ទ្វារជាច្រើនដង ល្អហើយ...»។
ចំពោះការធ្វើការធ្ងន់នៅពេលមករដូវ លោកស្រីវេជ្ជបណ្ឌិត មាន ម៉ាឡុងវី បានមានប្រសាសន៍ថា បញ្ហាហ្នឹងពុំមានហាមឃាត់ទេ ប៉ុន្តែវាស្ថិតលើរាងកាយរបស់ស្ត្រីឬក្មេងជំទង់នោះតែម្តង។
លោកស្រីវេជ្ជបណ្ឌិត មាន ម៉ាឡុងវី បានមានប្រសាសន៍ថា ៖ «គេអត់មានហាមឃាត់ទេ តែពេលមករដូវ ស្ត្រីមានការហេវហត់ព្រោះធ្លាក់ឈាម ម៉្លោះហើយត្រូវញ៉ាំអាហារមានជីវជាតិល្អ បើស្ត្រីនោះមានកម្លាំងពលំ អាចធ្វើការធ្ងន់បាន...»។
សូមជម្រាបជូនថា ក្នុងទំព័រវ៉ឹបសាយថ៍ kidshealth.org ដដែលបន្ថែមថា ពេលនៅសាលារៀនកុមារីឬក្មេងជំទង់គួរផ្លាស់សំឡីអនាម័យ៤ម៉ោងម្តង ហើយត្រូវលៃពេលចូលរៀនពីថ្នាក់មួយទៅថ្នាក់មួយដើម្បីចៀសវាងការមកច្រើនធ្វើឲ្យជោកសំឡីខ្លាំង ជាហេតុធ្វើឲ្យប្រឡាក់ខោឬសំពត់ដោយចៃដន្យ៕