តួនាទីស្ត្រីខ្មែរនៅក្នុងសង្គមកម្ពុជាបច្ចុប្បន្នមានការផ្លាស់ប្ដូរច្រើន។ មន្ត្រីអង្គការសង្គមស៊ីវិលនៅកម្ពុជា បានអះអាងថា ជាប្រពៃណី និងទំនៀមទម្លាប់ខ្មែរពីដើមមក ស្ត្រីរៀបការហើយគឺគ្រាន់តែក្លាយជាភរិយា ជាស្ត្រីមេផ្ទះ មើលថែរក្សាកូន រៀបចំទុកដាក់ផ្ទះសម្បែង ចម្អិនម្ហូបអាហារ និងចាត់ចែងសន្សំលុយកាក់ដែលប្តីរកបាន។ ប៉ុន្តែសព្វថ្ងៃនេះ ស្ត្រីត្រូវធ្វើការរកប្រាក់ចំណូលសម្រាប់ក្នុងគ្រួសារបន្ថែមទៅនឹងកិច្ចការទទួលខុសត្រូវនៅក្នុងផ្ទះ។
លោកស្រី ធីដា ឃិះ នាយិកាអង្គការសីលការ និងជាអគ្គលេខាធិការនៃគណៈកម្មាធិការដើម្បីលើកស្ទួយស្ត្រីក្នុងវិស័យនយោបាយ បានមានប្រសាសន៍ប្រាប់វិទ្យុអាស៊ីសេរី តាមទូរស័ព្ទអំពីការផ្លាស់ប្ដូរតួនាទីរបស់ស្ត្រីខ្មែរបច្ចុប្បន្ននេះ ៖ «ផ្លាស់ប្ដូរច្រើន។ សង្គមខ្មែរមិនមែនស្ត្រីនៅចាំផ្ទះឲ្យប្ដីរកស៊ីចិញ្ចឹម ធ្វើការនៅក្នុងផ្ទះតែប៉ុណ្ណោះទេ។ ស្ត្រី ៧០ ទៅ ៨០% ចេញទៅរកស៊ីចិញ្ចឹមគ្រួសារដែរ ហើយការងារផ្ទះនៅធ្វើដដែល ទាំងចេញទៅរកស៊ី និងធ្វើការក្នុងផ្ទះ...»។
មន្ត្រីសង្គមស៊ីវិលរូបនេះបន្តថា ទោះបីថាតួនាទីរបស់ស្ត្រីមានការផ្លាស់ប្ដូរក៏ពិតមែន ក៏ប៉ុន្តែតួនាទីរបស់បុរសជាស្វាមីហាក់ដូចជានៅមិនទាន់មានការផ្លាស់ប្ដូរនៅឡើយទេ។ បុរសមួយចំនួនច្រើនយល់ឃើញថា ការងារនៅក្នុងផ្ទះជាការងារកំប៉ិកកំប៉ុករបស់ស្រីភេទ ហើយមានបុរសខ្លះថា ស្ត្រីមានការប៉ិនប្រសព្វច្រើនក្នុងការធ្វើកិច្ចការទាំងនោះ។
លោកស្រី ធីដា ឃិះ បញ្ជាក់ថា ប្រការដែលបុរសជាប្ដីមិនបានគិតគូរ ឬចែករំលែកជួយការងារនៅផ្ទះទាំងនោះ គឺជាឧបសគ្គដែលរារាំងស្ត្រីមិនអាចបង្កើនសមត្ថភាព ឬចូលរួមសកម្មភាពក្នុងសង្គមបានច្រើន ៖ «ខាងបុរសនៅពុំទាន់ប្រែប្រួល ផ្លាស់ប្ដូរឥរិយាបថក្នុងការជួយកិច្ចការរបស់ប្រពន្ធនៅឡើយ។ នេះជាការបន្ទុកលើស្ត្រី និងជាការរើសអើងដែលស្ត្រីមិនអាចទៅរៀន មិនអាចចូលរួមការងារក្នុងសង្គម ដោយសារតែបន្ទុកធ្ងន់ខ្លាំង...»។
ទោះបីជាតួនាទីរបស់ស្ត្រីខ្មែរបច្ចុប្បន្នមានការផ្លាស់ប្ដូរក្នុងគ្រួសារ ស្ត្រីត្រូវធ្វើការរកប្រាក់ចំណូល និងបំពេញការងារនៅក្នុងផ្ទះក៏ដោយ ក៏ប៉ុន្តែដោយសារតែប្រពៃណី និងទំនៀមទម្លាប់ក្នុងសង្គមគ្រួសារកន្លងមក គេនៅតែរំពឹងចង់បានឲ្យស្ត្រីមានឫក្សពារសុភាពរាបសា មានសេចក្ដីថ្លៃថ្នូរដើម្បីផ្ដល់កិត្តិយសដល់ក្រុមគ្រួសារ។ ស្ត្រីត្រូវតែខិតខំតស៊ូ ទ្រាំការលំបាកគ្រប់បែបយ៉ាង ទោះបីជារងការវាយធ្វើបាបពីប្ដីខាងផ្នែកផ្លូវកាយ ផ្លូវចិត្ត និងលុយកាក់ក៏ដោយ។
ទាក់ទងនឹងបញ្ហាថវិកាក្នុងគ្រួសារនេះ លោកស្រី ឈុំ សារ៉ានី ប្រធានការគាំទ្រអង្គការសង្គមស៊ីវិលបានមានប្រសាសន៍ប្រាប់វិទ្យុអាស៊ីសេរីថា បញ្ហាប្រាក់កាសនេះគឺជាចំណែកមួយដ៏ធំដែរសម្រាប់សុភមង្គលក្នុងគ្រួសារនីមួយៗ ៖ «ជាធម្មតាទេ ពាក់ព័ន្ធនឹងលុយកាក់នេះទាល់តែមានលុយដែរទើបអាចរស់នៅបានសុខស្រួលដែរ។ ក៏ប៉ុន្តែពិបាកដែរ ដោយសង្គមយើងសព្វថ្ងៃនេះវាជាសង្គមជឿនលឿន ដែលជាហេតុធ្វើឲ្យបុរសៗដែលសម្បូណ៌លុយធ្វើផ្ដេសផ្ដាសទៅ នាំឲ្យមានបញ្ហាក្នុងគ្រួសារ មានការសងសឹកគ្នា...»។
លោក យ៉ែម កូវ មេឃុំកំពាន់ ស្រុកមេមត់ ខេត្តកំពង់ចាម បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទថា នៅក្នុងឃុំរបស់គាត់ពុំមានបញ្ហារឿងលុយកាក់ក្នុងគ្រួសារទេ។ ដោយឡែកក្នុងក្រុមគ្រួសាររបស់គាត់ផ្ទាល់ នៅពេលដែលគាត់រកបានប្រាក់ចំណូលមក គាត់តែងតែប្រគល់ឲ្យភរិយាទុកដាក់។
ក្នុងប្រទេសកម្ពុជា ក្នុងចំណោមពលរដ្ឋសរុបទាំងអស់ជាង ១៤លាននាក់ គឺមានអត្រាស្ត្រីជាង ៥២% ហើយដែលស្ត្រីទាំងនោះភាគច្រើនជាមេគ្រួសារ ជាស្ត្រីមេម៉ាយដែលត្រូវរកប្រាក់ចំណូលសម្រាប់ចិញ្ចឹមផ្គត់ផ្គង់ក្នុងគ្រួសារ។ ចំពោះគ្រួសារដែលមានប្ដីប្រពន្ធរស់នៅជុំគ្នាវិញ គឺគេពុំដែលមានរបាយការណ៍ស្រាវជ្រាវណាមួយទាក់ទងនឹងបញ្ហាដែលកើតឡើងក្នុងគ្រួសារបណ្ដាលមកពីរឿងលុយកាក់នោះទេ។ ប៉ុន្តែជាទូទៅ តាមការសាកសួរគឺថា ទម្លាប់របស់គ្រួសារខ្មែរ ប្ដីដែលធ្វើការរកប្រាក់ចំណូលបានមកតែងប្រគល់ឲ្យភរិយាទុកដាក់សន្សំសំចៃ ហើយការចាយវាយផ្សេងៗគឺប្ដីប្រពន្ធទាំងនោះតែងតែពិភាក្សាជាមួយគ្នាមុនសម្រេចធ្វើអ្វីមួយ ជាពិសេសគឺទាក់ទងនឹងការទិញដូរដែលត្រូវការចំណាយប្រាក់ច្រើន៕