អត្ថន័យនៃយុទ្ធនាការបំពាក់បូពណ៌ស
2012.11.29
ជារៀងរាល់ឆ្នាំ គឺចាប់ពីថ្ងៃទី២៥ វិច្ឆិកា ដល់ថ្ងៃទី១០ ខែធ្នូ ប្រទេសជាច្រើនក្នុងពិភពលោក បាននាំគ្នាធ្វើយុទ្ធនាការយុទ្ធនាការបំពាក់បូពណ៌ស។
នៅឆ្នាំនេះ នៅកម្ពុជា យុទ្ធនាការបូពណ៌ស រៀបចំឡើងដោយក្រុមអង្គការមិនមែនរដ្ឋាភិបាលដែលធ្វើកិច្ចការពាក់ព័ន្ធស្ត្រី ដោយផ្ដោតលើប្រធានបទ "ការបញ្ឈប់អំពើហិង្សាលើស្ត្រី គឺជាការទទួលខុសត្រូវរបស់មនុស្សគ្រប់រូប និងផ្ដល់ផលប្រយោជន៍ដល់យើងទាំងអស់គ្នា"។
ប្រធានបណ្ដាញបុរសនៃអង្គការយេនឌ័រ និងអភិវឌ្ឍន៍ដើម្បីកម្ពុជា លោក ឆាយ គឹមស័រ មានប្រសាសន៍ថា បណ្ដាញរបស់លោកបានរៀបចំសកម្មភាពមួយចំនួនដូចជា ការរៀបចំមិទ្ទិញ ការដង្ហែក្បួនតាមទីសាធារណៈ និងពាក់បូពណ៌សតាមផ្ទះ នៅក្នុងខេត្តចំនួន៦ ព្រមទាំងការពិភាក្សាតាមវិទ្យុ និងទូរទស្សន៍។
ទីកន្លែងនៃការរៀបចំអង្គមិទ្ទិញ និងការដើរដង្ហែក្បួនតាមទីសាធារណៈ ត្រូវធ្វើនៅក្នុងខេត្តពោធិ៍សាត់ កំពង់ធំ និងរតនគិរី។ ចំណែកយុទ្ធនាការដើរបំពាក់បូពណ៌សតាមផ្ទះ ត្រូវធ្វើនៅក្នុងឃុំគោលដៅមួយចំនួន នៅក្នុងខេត្តកំពង់ឆ្នាំង ពោធិ៍សាត់ ព្រៃវែង និងបាត់ដំបង។
ប្រធានអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព មានប្រសាសន៍ថា ការបំពាក់បូពណ៌ស គឺសំដៅដល់ការចូលរួមរបស់បុរសក្នុងការចូលរួមលប់បំបាត់អំពើហិង្សាលើស្ត្រី និងកុមារ។
យុទ្ធនាការរយៈពេល ១៦ថ្ងៃនៃដំណើរលុបបំបាត់អំពើហិង្សាលើស្ត្រី ត្រូវអនុម័តដោយសន្និបាតអង្គការសហប្រជាជាតិ កាលពីឆ្នាំ១៩៩១។ អង្គការសហប្រជាជាតិក៏បានបង្កើតទិវាអន្តរជាតិប្រឆាំងអំពើហិង្សាលើស្ត្រី ដោយកំណត់យកថ្ងៃទី២៥ ខែវិច្ឆិកា។ ការបង្កើតយុទ្ធនាការ និងទិវានេះ គឺដើម្បីរំលឹកដល់អំពើហិង្សាលើស្ត្រីដ៏ធ្ងន់ធ្ងរកើតឡើងនៅប្រទេសដូមីនិក (Dominica) កាលពីឆ្នាំ១៩៦០ និងក្នុងប្រទេសកាណាដា កាលពីឆ្នាំ១៩៨៩។ ក្នុងឆ្នាំ១៩៦០ អ្នកនយោបាយជាស្ត្រីចំនួន ៤នាក់ ត្រូវសម្លាប់ ដោយសារពួកគេប្រកាន់យកនយោបាយដែលមាននិន្នាការផ្ទុយពីគណបក្សកាន់អំណាច។ ចំណែកនៅក្នុងប្រទេសកាណាដា ខ្មាន់កាំភ្លើងដែលជាអ្នកមានទស្សនៈប្រឆាំងនឹងស្ត្រី បានបាញ់សម្លាប់សិស្សស្រីចំនួន ១៤នាក់ នៅក្នុងសាលាពហុបច្ចេកវិទ្យា។
នៅកម្ពុជា បណ្ដាញបុរសបានចាប់ផ្ដើមយុទ្ធនាការប្រឆាំងអំពើហិង្សាលើស្ត្រី ចាប់តាំងពីឆ្នាំ១៩៩៩។ ប្រធានបណ្ដាញបុរសនៃអង្គការយេនឌ័រ និងអភិវឌ្ឍន៍ដើម្បីកម្ពុជា លោក ឆាយ គឹមស័រ មានប្រសាសន៍ថា ក្នុងរយៈពេល ១៣ឆ្នាំកន្លងទៅនេះ មានចំណុចវិជ្ជមានមួយចំនួនដែលក្រុមរបស់លោកទទួលបាន ដោយរួមទាំងការផ្លាស់ប្ដូរផ្នត់គំនិតទាក់ទិននឹងអំពើហិង្សាចំពោះស្ត្រី និងកុមារផង។
ក្រៅពីការផ្សព្វផ្សាយដើម្បីលើកកម្ពស់ចំណេះដឹងពលរដ្ឋ បណ្ដាញបុរសកម្ពុជា បានអូសទាញបុរសជាច្រើនអោយបញ្ឈប់អំពើហិង្សា និងងាកមកចូលរួមក្នុងបណ្ដាញនេះ។
និយាយដោយមិនបញ្ចេញឈ្មោះ សកម្មជនបណ្ដាញបុរសនៅក្នុងស្រុកកំពង់លែង ខេត្តកំពង់ឆ្នាំង បានអោយដឹងថា គាត់បានសម្រេចចិត្តឈប់ប្រើអំពើហិង្សាក្នុងគ្រួសារ និងបានចូលរួមក្នុងបណ្ដាញ ដើម្បីផ្សព្វផ្សាយបន្តពីការប្រឆាំងអំពើហិង្សាទៅលើស្ត្រី និងកុមារក្នុងតំបន់ដែលគាត់រស់នៅ។
នៅកម្ពុជា អំពើហិង្សាផ្អែកលើយេនឌ័រ រួមមានអំពើហិង្សាក្នុងគ្រួសារ អំពើរំលោភសេពសន្ថវៈ និងការជួញដូរមនុស្ស គឺជាក្ដីកង្វល់ដ៏ធ្ងន់ធ្ងរមួយ។
យោងតាមសន្ទស្សន៍វិសមភាពយេនឌ័រអន្តរជាតិ ប្រទេសកម្ពុជា ទទួលបានចំណាត់ថ្នាក់លេខ៩៥ ក្នុងចំណោម ១៣៣ប្រទេស។ របាយការណ៍នៃការស្រាវជ្រាវ បានបង្ហាញថា ស្ត្រីកម្ពុជា ម្នាក់ ក្នុងចំណោមស្ត្រី ៥នាក់ ដែលរៀបការរួច បានទទួលរងអំពើហិង្សាពីស្វាមីរបស់ពួកគេ ក្នុងនោះក៏មានស្ត្រីច្រើនជាងពាក់កណ្ដាល បាននិយាយថា ពួកគេស្គាល់បុរសដែលបានប្រើហិង្សាលើភរិយា។ ការស្ទង់មតិបង្ហាញថា បុរស និងស្ត្រីច្រើនជាង៨០% ដឹងពីសកម្មភាពអំពើហិង្សាលើស្ត្រី ដោយមិនបានធ្វើសកម្មភាពឆ្លើយតបអ្វីទាំងអស់។
បើទោះជាយ៉ាងណា កម្ពុជា បានបង្កើតបទដ្ឋានច្បាប់ជាច្រើនរួចមកហើយ ដើម្បីទប់ស្កាត់អំពើហិង្សា និងការពារជនរងគ្រោះពីអំពើនេះ។
រដ្ឋលេខាធិការក្រសួងកិច្ចការនារី អ្នកស្រី ស៊ីវណ្ណ បុទុម មានប្រសាសន៍ថា ក្នុងបរិបទកម្ពុជា បច្ចុប្បន្ន ការតាមដានការអនុវត្តច្បាប់ដែលនៅជាធរមាននោះ គឺជាកត្តាចម្បង។
ទាក់ទិននឹងការប្រយុទ្ធប្រឆាំងអំពើហិង្សាទៅលើស្ត្រី និងកុមារ ក្រសួងកិច្ចការនារី កំពុងរៀបចំប្រមូលការចូលរួមពីអង្គការមិនមែនរដ្ឋាភិបាលធ្វើការងារពាក់ព័ន្ធនឹងសិទ្ធិនារី ដើម្បីបង្កើតផែនការសកម្មភាពថ្នាក់ជាតិ ដែលឈានទៅរកការលុបបំបាត់អំពើហិង្សាលើស្ត្រី និងកុមារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា