ពលរដ្ឋគ្មានជំនឿថា ការបោះឆ្នោតជ្រើសរើសក្រុមប្រឹក្សាថ្នាក់ក្រោមជាតិប្រព្រឹត្តទៅដោយតម្លាភាព
2024.05.20
គណបក្សប្រជាជនកម្ពុជា ធ្វើយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ អាណត្តិទី៤ ក្នុងខេត្តកំពង់ឆ្នាំង នៅថ្ងៃទី១៧ ខែឧសភា ឆ្នាំ២០២៤។
រូប៖ គណនីហ្វេសប៊ុកគណបក្សប្រជាជនកម្ពុជា
ប្រជាពលរដ្ឋគ្មានជំនឿថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅអាណត្តិទី៤ នេះអាចប្រព្រឹត្តទៅដោយតម្លាភាពឡើយ ស្របពេលដែលអង្គបោះឆ្នោតរបស់គណបក្សប្រឆាំងមួយចំនួន នៅតែរងការធ្វើទុក្ខបុកម្នេញ និងការចាប់ដាក់ពន្ធនាគារឥតស្រាកស្រាន្ត។
ពលរដ្ឋមិនរំពឹងថា ការបោះឆ្នោតជ្រើសរើសក្រុមប្រឹក្សាសម្រាប់ដឹកនាំនៅថ្នាក់ក្រោមជាតិ អាណត្តិថ្មីនេះ នឹងបម្រើផលប្រយោជន៍ឱ្យពលរដ្ឋនោះឡើយ។ ពួកគាត់សង្កេតឃើញថា បក្សកាន់អំណាចបានប្រើប្រាស់មធ្យោបាយគ្រប់រូបភាព ដើម្បីគំរាមកំហែងដល់អង្គបោះឆ្នោតមកពីបណ្ដាគណបក្សប្រឆាំង។
ពលរដ្ឋរស់នៅខេត្តសៀមរាប លោក មូល ម៉ៃ ប្រាប់វិទ្យុអាស៊ីសេរីនៅថ្ងៃទី១៩ ខែឧសភា ថា បើទោះបីជាមានការបោះឆ្នោតជ្រើសរើសក្រុមប្រឹក្សាថ្នាក់ក្រោមជាតិ ដោយមានគណបក្សនយោបាយចំនួន៥ ចូលរួមប្រកួតប្រជែង។ ទោះជាយ៉ាងណាក្ដី ក៏លោកយល់ថា គណបក្សកាន់អំណាចនៅតែទទួលបានកៅអីច្រើន ពីព្រោះលោកថា អង្គបោះឆ្នោតមួយចំនួនរងការគំរាមកំហែង និងការបំភិតបំភ័យពីបក្សកាន់អំណាច ដូច្នេះការបោះឆ្នោតនៅពេលខាងមុខនេះ គឺគ្រាន់តែជាការបោះឆ្នោតបង្គ្រប់កិច្ច។
លោក មូល ម៉ៃ៖ «ខ្ញុំចង់ថាប្រសិនបើបោះឆ្នោត បើកសិទ្ធិសេរីភាពទាំងអស់គ្នាឱ្យស្មើភាពគ្នាទាំងបក្សតូចទាំងបក្សធំ យើងបោះឆ្នោតដោយសេរី ត្រឹមត្រូវទៅឃោសនាៗ បានដូចគ្នា។ ពេលគូសសន្លឹកឆ្នោត យើងបើកឱ្យទូលាយទៅ បើថាក្នុងបន្ទប់រាប់សន្លឹកឆ្នោត យើងបើកមើលទាំងអស់គ្នាទៅ ឱ្យប្រជាពលរដ្ឋអើតមើលតាមបង្អួចតាមទ្វារទៅ កុំតែរញ៉េរញ៉ៃប៉ះពាល់ដល់សណ្ដាប់ធ្នាប់»។
ដោយឡែក តំណាងសហគមន៍សាមគ្គីរមាសហែកខេត្តស្វាយរៀង លោកស្រី ខៀវ សារ៉ុន ថ្លែងថា លោកស្រីមិនទុកចិត្ត ចំពោះដំណើរការបោះឆ្នោតខាងមុខនេះឡើយ ពីព្រោះមន្ត្រីបក្សកាន់អំណាចបានយកលុយទិញទឹកចិត្តអង្គបោះឆ្នោតមកពីបក្សប្រឆាំងមួយចំនួន។ លោកស្រីចង់ឃើញការបោះឆ្នោតខាងមុខប្រកបដោយសេរី ត្រឹមត្រូវ និងយុត្តិធម៌ ដើម្បីបើកលំហសិទ្ធិនយោបាយឱ្យមានការប្រកួតប្រជែងដោយស្មើមុខស្មើមាត់។
លោកស្រី ខៀវ សារ៉ុន៖ «សូមឱ្យគិតគូរដល់ប្រជាពលរដ្ឋជាធំធ្វើអ្វីឱ្យតាមអ្វី ដែលគាត់ប្រកាសមុនបោះឆ្នោត ធ្វើតាមគោលការណ៍ ដែលគាត់បាននិយាយឱ្យបាន។ កុំនិយាយហើយមុនពេលបោះឆ្នោត និយាយល្អ ដល់ពេលបោះឆ្នោតហើយ និយាយផ្សេង។ មួយវិញទៀត ចង់ឱ្យមានការកែប្រែនៃអ្នកដឹកនាំថ្នាក់ក្រោមឱ្យគាត់យកចិត្តទុកដាក់លើប្រជាពលរដ្ឋដែរ ពីព្រោះទាំងសេវាអប់រំទាំងសេវាសុខភាពសំខាន់សម្រាប់ប្រជាពលរដ្ឋ»។
ក្ដីបារម្ភរបស់ពលរដ្ឋទាំងនេះ គឺក្រោយពេលដែល តុលាការដែលស្ថិតក្រោមឥទ្ធិពលបក្សកាន់អំណាចបានបង្កើតបទចោទប្រកាន់ប្លែកៗ ដើម្បីតាមចាប់ខ្លួន និងឃុំខ្លួនសមាជិកគណបក្សប្រឆាំងនៅតាមរាជធានី-ខេត្តនានា។ ក្រៅពីនេះ ក៏មានមន្ត្រីគណបក្សកាន់អំណាចដើរសូកប៉ាន់ដោយសន្យាផ្ដល់តួនាទី និងលុយកាក់ដល់អង្គបោះឆ្នោត ដែលជាសមាជិកក្រុមប្រឹក្សាឃុំសង្កាត់មកពីបក្សភ្លើងទៀន ឱ្យចុះចូល និងបោះឆ្នោតឱ្យបក្សប្រជាជនកម្ពុជានៅពេលខាងមុខនេះ។
វិទ្យុអាស៊ីសេរីមិនអាចទាក់ទងអ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា និងអ្នកនាំពាក្យគណបក្សកាន់អំណាច លោក សុខ ឥសាន ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១៩ ខែឧសភា។
ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ នេះ នឹងប្រព្រឹត្តទៅនៅថ្ងៃអាទិត្យ ទី២៦ ខែឧសភា ដោយមានគណបក្សនយោបាយចំនួន៥ ចូលរួមប្រកួតប្រជែងគឺ គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។ ការបោះឆ្នោតអសកលនេះមានអ្នកបោះឆ្នោតសរុបចំនួន ១១.៦២២នាក់ ដែលជាសមាជិកក្រុមប្រឹក្សាឃុំ-សង្កាត់។ ប៉ុន្តែគិតត្រឹមថ្ងៃទី១៨ ខែឧសភា គណៈកម្មាធិការជាតិរៀបចំការបោះឆ្នោត (គ.ជ.ប) ឱ្យដឹងថា មានគណបក្សនយោបាយចំនួន៤ បានចូលរួមការឃោសនាបោះឆ្នោត ខណៈគណបក្សខ្មែររួបរួមជាតិពុំទាន់ធ្វើសកម្មភាពនៅឡើយទេ។ ការឃោសនាបោះឆ្នោតមានរយៈពេល ៨ថ្ងៃ ចាប់ពីថ្ងៃទី១៧ រហូតដល់ថ្ងៃទី២៤ ខែឧសភា។ គ.ជ.ប គ្រោងប្រកាសលទ្ធផលផ្លូវការនៃការបោះឆ្នោតនេះ យ៉ាងយូរបំផុតត្រឹមថ្ងៃទី៨ ខែមិថុនា។
ជុំវិញបញ្ហានេះ មន្ត្រីសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែម (Comfriel) លោក កន សាវាង្ស មានប្រសាសន៍ថា ប្រសិនបើមានការធ្វើទុក្ខបុកម្នេញលើអង្គបោះឆ្នោតគណបក្សប្រឆាំង គឺនឹងប៉ះពាល់ដល់សិទ្ធិសេរីភាពបញ្ចេញមតិ និងបរិយាកាសនៃការបោះឆ្នោត។
លោក កន សាវាង្ស៖ «ប្រសិនជាអង្គបោះឆ្នោតនោះ ត្រូវបានតុលាការចោទប្រកាន់នៅក្នុងខណៈពេលហ្នឹង ឬមួយក៏មានការឃុំខ្លួនអីផ្សេងៗ។ មានន័យថា អង្គបោះឆ្នោតហ្នឹងមិនអាចចូលរួមបានទេ នៅក្នុងដំណើរការបោះឆ្នោត។ អ៊ីចឹង កាលណាមិនអាចចូលរួមបានន័យថា សំឡេងអង្គបោះឆ្នោតមានការបាត់បង់ ដែលធ្វើឱ្យចំនួនសំឡេងការគាំទ្រក្នុងការចាប់យកសំឡេងអាសនៈក្នុងការបោះឆ្នោតខាងមុខហ្នឹង វាអាចមានផលប៉ះពាល់ដែរ »។
គិតមកទល់ពេលនេះសកម្មជនរបស់គណបក្សប្រឆាំងជិត ៣០នាក់ ត្រូវបានចាប់ខ្លួនជាបន្តបន្ទាប់ក្រោមការដឹកនាំរបស់ លោក ហ៊ុន ម៉ាណែត បន្ទាប់ពីពួកគាត់មិនព្រមចុះចូលជាមួយគណបក្សកាន់អំណាច។ ក្រៅពីនោះនៅមានសកម្មជនបក្សប្រឆាំង ដែលជាអង្គបោះឆ្នោតមួយចំនួនទៀត កំពុងរត់ភៀសខ្លួនទៅកន្លែងមានសុវត្ថិភាព ដើម្បីគេចពីអាជ្ញាធរគណបក្សកាន់អំណាចចាប់ខ្លួន។
ពលរដ្ឋអំពាវនាវឱ្យរដ្ឋាភិបាលរៀបចំដំណើរការការបោះឆ្នោតដោយ សេរី ត្រឹមត្រូវ និងយុត្តិធម៌ ព្រមទាំងធ្វើកំណែទម្រង់រដ្ឋបាលថ្នាក់ក្រោមជាតិ ដើម្បីឆ្លើយតបនឹងតម្រូវការរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ