ក្រុមនិស្សិតពេទ្យផ្នែកទន្តសាស្ត្រជំនាន់ទី២៣ និងវេជ្ជសាស្ត្រជំនាន់ទី៣៤ ប្រមាណ ១០០នាក់ បានស្នើកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ជួយលុបចោលការប្រឡងថ្នាក់ជាតិ ក្រោយបញ្ចប់ការសិក្សា។ ក្រុមនិស្សិតបានចាត់ទុកការតម្រូវឲ្យពួកគេប្រឡងថ្នាក់ជាតិ ថាជារឿងអយុត្តិធម៌សម្រាប់ពួកគេម្នាក់ៗ។
នៅព្រឹកថ្ងៃសុក្រ ទី១៨ ខែមេសា និស្សិតពេទ្យពីរមហាវិទ្យាល័យ គឺផ្នែកទន្តសាស្ត្រ និងវេជ្ជសាស្ត្រ ប្រមាណ ១០០នាក់ បានលើកបដាតវ៉ានៅខាងមុខសាកលវិទ្យាល័យវិទ្យាសាស្ត្រសុខាភិបាល ក្នុងសង្កាត់ស្រះចក រាជធានីភ្នំពេញ ដើម្បីទាមទារឲ្យប្រមុខដឹកនាំជួយដោះស្រាយកង្វល់ពួកគេ។
លោក ហ៊ួ ប៉ារ៉ាឌី តំណាងនិស្សិតពេទ្យផ្នែកទន្តសាស្ត្រ ឬពេទ្យធ្មេញជំនាន់២៣ បានឲ្យដឹងក្នុងពេលតវ៉ាថា ការដែលរដ្ឋាភិបាល ឬក្រសួងសុខាភិបាលកំណត់ឲ្យប្រឡងថ្នាក់ជាតិ នៅក្រោយបញ្ចប់ការសិក្សាជារឿងអយុត្តិធម៌។
និស្សិតរូបនេះបានចាត់ទុកការតម្រូវឲ្យពួកគេប្រឡងថ្នាក់ជាតិ ថាបានអនុវត្តផ្ទុយពីអនុក្រឹត្យស្ដីពីការបណ្តុះបណ្ដាលក្នុងវិស័យសុខាភិបាលរបស់ លោក ហ៊ុន សែន កាលពីឆ្នាំ២០០៧។ លោកបន្តថា អនុក្រឹត្យបានចេញនៅឆ្នាំ២០០៧ ប៉ុន្តែពួកគាត់បានចូលរៀនតាំងពីឆ្នាំ២០០៥ និងឆ្នាំ២០០៦ ដែលកាលនោះរដ្ឋាភិបាល ឬក្រសួងសុខាភិបាល ពុំបានកំណត់ឲ្យមានការប្រឡងថ្នាក់ជាតិនោះទេ៖ «វាអយុត្តិធម៌ពេកសម្រាប់ពួកខ្ញុំ។ អ៊ីចឹងពួកខ្ញុំទាមទារឲ្យលើកលែងការប្រឡងថ្នាក់ជាតិសម្រាប់ពួកខ្ញុំ ពីព្រោះអនុក្រឹត្យដែលសម្ដេចបានចេញ គឺនៅឆ្នាំ២០០៧ ហើយពួកខ្ញុំបានចូលរៀននៅឆ្នាំ២០០៥ និង២០០៦។ អ៊ីចឹងសុពលភាពអនុក្រឹត្យមិនគួរប្រើប្រាស់ជាមួយពួកខ្ញុំទេ»។
កាលពីថ្ងៃទី១៣ ខែមីនា ឆ្នាំ២០០៧ លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យស្ដីពីការបណ្ដុះបណ្ដាលក្នុងវិស័យសុខាភិបាល។ អនុក្រឹត្យនេះបានតម្រូវឲ្យនិស្សិតសិក្សានៅគ្រប់កម្រិត និងគ្រប់ជំនាញក្នុងវិស័យសុខាភិបាល ត្រូវប្រឡងថ្នាក់ជាតិ ហើយត្រូវឲ្យស្ថាប័នពាក់ព័ន្ធអនុវត្តឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ។
និស្សិតឈ្មោះ សួង បញ្ញា និងនិស្សិតច្រើននាក់ទៀត ក៏បានសំណូមពរទៅលោកនាយករដ្ឋមន្ត្រី ហ៊ុន សែន និងថ្នាក់ដឹកនាំក្រសួងស្ថាប័នពាក់ព័ន្ធ ឲ្យជួយរកដំណោះស្រាយចំពោះការទាមទាររបស់ពួកគេឲ្យបានឆាប់៖ «ចង់ឲ្យគេលុបចោល មិនមែនថា ប្រឡងថ្នាក់ជាតិមិនល្អទេ ប៉ុន្តែវាមិនយុត្តិធម៌សម្រាប់និស្សិតជំនាន់ខ្ញុំរៀន។ បើជំនាន់ក្រោយៗមកទៀត គេអាចធ្វើបាន ព្រោះពេលគេចូលរៀនគេប្រឡងថ្នាក់ជាតិ ហើយពួកខ្ញុំចូលរៀន អត់បានប្រឡងថ្នាក់ជាតិទេ។ ឥឡូវនេះ គឺនៅតែបន្តការតវ៉ាហ្នឹងរហូត ហើយធ្វើពហិការមិនចូលប្រឡងប្រមាណ ៨០នាក់ ខាងផ្នែកវេជ្ជសាស្ត្រ និងផ្នែកទន្តសាស្ត្រខ្ទង់ ៩០នាក់ ធ្វើពហិការមិនចូលប្រឡង»។
បញ្ហានេះដែរ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល កាលពីថ្ងៃទី១០ ខែមេសា សប្ដាហ៍មុននេះធ្លាប់បានចុះមកជួបជាមួយក្រុមនិស្សិត ដើម្បីរកដំណោះស្រាយបញ្ចប់វិវាទ ប៉ុន្តែនិស្សិតថ្លែងថា ជំនួបនោះមិនទទួលបានលទ្ធផលទេ ទើបពួកគេបន្តលើកបដាតវ៉ាជាថ្មីទៀត។
លោក ម៉ម ប៊ុនហេង បានជំរុញឲ្យក្រុមនិស្សិតដែលប្រមូលផ្តុំគ្នាតវ៉ា ត្រូវតែដាក់ពាក្យប្រឡងថ្នាក់ជាតិ ដោយមិនអាចជៀសផុតបានទេ៖ «វិទ្យុអាស៊ីសេរី៖ ឯកឧត្តមសុំប្រសាសន៍ខ្លីបន្តិចបានទេ? តើការប្រកាសប្រឡងថ្នាក់ជាតិហ្នឹង ក្នុងគោលបំណងអ្វីដែរបាទ? លោក ម៉ម ប៊ុនហេង៖ អូ! សម្រាប់ពង្រឹងគុណភាព ព្រោះជាច្បាប់ដើម្បីឲ្យមានគុណភាពដូចគ្នាទាំងអស់ ទាំងផ្នែករដ្ឋ និងឯកជន។ យល់អត់? ល្អណាស់អាហ្នឹង! ហើយឲ្យមាននិយាមដូចគ្នា គឺមានកម្មវិធីប្រឡងចូល និងប្រឡងចេញ»។
ក្រុមនិស្សិតឲ្យដឹងថា ការលើកបដានៅមុខសាកលវិទ្យាល័យវិទ្យាសាស្ត្រសុខាភិបាល រហូតដល់ល្ងាចថ្ងៃទី១៨ ខែមេសា មិនមានមន្ត្រីពាក់ព័ន្ធរដ្ឋាភិបាលចេញមុខមកជួបក្រុមនិស្សិតទេ។ ជាងនេះ ក្រុមនិស្សិតក៏បាននាំយកញត្តិស្ដីពីកង្វល់របស់ពួកគេ ដាក់ជូនមន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន ជួយអន្តរាគមន៍បន្តទៀត។
មន្ត្រីខុទ្ទកាល័យប្រមុខដឹកនាំដែលបានទទួលយកញត្តិនិស្សិតពេទ្យ លោក គង់ ចំរើន ថ្លែងថា នឹងនាំយកញត្តិរបស់និស្សិតពេទ្យទាំងពីរមហាវិទ្យាល័យដាក់ជូនស្ថាប័នពាក់ព័ន្ធពិនិត្យ និងឆ្លើយតបនៅពេលក្រោយ។ និស្សិតពេទ្យបានឲ្យដឹងថា សាកលវិទ្យាល័យវិទ្យាសាស្ត្រសុខាភិបាល បានប្រកាសទទួលពាក្យប្រឡងថ្នាក់ជាតិ ពីក្រុមនិស្សិតពេទ្យនៅថ្ងៃទី៨ ខែមេសា និងឈប់ទទួលពាក្យនៅថ្ងៃសុក្រ ទី១៨ ខែមេសា។ រីឯកាលបរិច្ឆេទនៃការប្រឡងថ្នាក់ជាតិ នឹងប្រព្រឹត្តទៅនៅថ្ងៃទី២៦-២៧ ខែមេសា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។