រំលងទៅមាតិកាចម្បងសង្គមស៊ីវិលរម្លឹកខួប ៧ឆ្នាំនៃឃាតកម្មលើលោកបណ្ឌិត កែម ឡី ដោយរំឭកពីការតស៊ូ និងភាពក្លាហានរបស់លោក
មមជ្ឈមណ្ឌលសិទ្ធិមនុស្សកម្ពុជា សិស្ស និស្សិត និងប្រជាពលរដ្ឋ មន្រ្តីអង្គការសង្គមស៊ីវិល និងតំណាងមន្រ្តីស្ថានទូតប្រទេសប្រជាធិបតេយ្យ ជិត ១០០នាក់ រួមគ្នាប្រារព្ធពិធីរម្លឹកខួប ៧ឆ្នាំនៃមរណភាព បណ្ឌិត កែម ឡី កាលពីព្រឹកថ្ងៃព្រហស្បតិ៍ទី៦ កក្កដា។ ពិធីនេះ ប្រារព្ធឡើងនៅការរិយាល័យមជ្ឈមណ្ឌលសិទ្ធិមនុស្សកម្ពុជា ដោយមានរបៀបវារៈសំខាន់ៗ ដូចជា ពិធីសូត្រមន្ត ដារបង្សុកូលរំលឹកដល់វិញ្ញាណក្ខន្ធលោកបណ្ឌិត កែម ឡី អានកំណាព្យ និងអត្ថបទខ្លី ដែលត្រូវបានជ្រើសរើស ពីអ្នកគោរពស្រលាញ់ លោក បណ្ឌិត កែម ឡី ដែលបានផ្ញើមកចូលរួមជាមួយមជ្ឈមណ្ឌលសិទ្ធិមនុស្សកម្ពុជា ព្រមទាំងកម្មវិធីស្ដាប់ និងចាក់បញ្ចាំងវីដេអូរបស់ បណ្ឌិត កែម ឡី ជាដើម ។ បន្ថែមពីលើនេះ ក៏មានប្រធានបទសំខាន់មួយចំនួនទៀត ដែលបានរំលេចនៅក្នុងកម្មវិធីនេះ មានជាអាទិ៍ ល្ខោនវិទ្យុ ក្រោមចំណងជើងថា «ពាក្យពិត» និង «ការបង្រៀនឱ្យខ្មែរចេះគិត គឺជាការចាំបាច់បំផុត»។
អ្នកចូលរួម ដែលគោរពស្រឡាញ់ លោកបណ្ឌិត កែម ឡី និងអ្នក កែម ឡី និយម សុទ្ធតែនាំគ្នារម្លឹកនូវវីរភាពបណ្ឌិត កែម ឡី ព្រមទាំងសម្តែងការសោកស្តាយ ចំពោះការបាត់បង់ជីវិតរបស់លោក ហើយទទូចឲ្យអាជ្ញាធរស្វែងរកឃាតកពិតប្រាកដ និងអ្នកនៅពេលក្រោយឃាតកម្មបណ្ឌិត កែមឡី មកផ្តន្ទាទោសតាមច្បាប់៕
