ຈໍາປາສັກ ຍົກເລີກສັນຍາ ຮັບເໝົາສໍາປະທານກິດຈະການ ເກັບເງິນຄ່າຜ່ານທາງ 14A

ເຈົ້າແຂວງຈໍາປາສັກ ໄດ້ອອກຂໍ້ຕົກລົງໃນມື້ວັນທີ 31 ກໍລະກົດທີ່ຜ່ານມາ ໃຫ້ພະແນກການເງິນແຂວງ ຍົກເລີກສັນຍາຮັບເໝົາສໍາປະທານ ກິດຈະການເກັບເງິນຄ່າຜ່ານທາງ 14A ຂອງບໍລິສັດດວງດີ ກໍ່ສ້າງຂົວ-ທາງຈໍາກັດຜູ້ດຽວ ແບບຖາວອນ ແຕ່ບ້ານຫ້ວຍເພັກ ເມືອງໂພນທອງ ຫາບ້ານພະພີນ ເມືອງຈໍາປາສັກ ແຕ່ວັນທີ 1 ສິງຫານີ້ເປັນຕົ້ນໄປ.

ເພື່ອຂໍຮູ້ລາຍລະອຽດ ກ່ຽວກັບເລື່ອງທີ່ວ່ານີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາພະແນກການເງິນແຂວງຈໍາປາສັກ ໃນມື້ວັນທີ 2 ສິງຫານີ້ ໄດ້ຮັບຄໍາຕອບຈາກເຈົ້າໜ້າທີ່ທ່ານໜຶ່ງ ທີ່ຂໍສະຫງວນຊື່ ແລະສຽງ ຊຶ່ງເວົ້າພຽງແຕ່ວ່າ ປັດຈຸບັນ ບໍ່ມີການເກັບເງິນຄ່າຜ່ານທາງສາຍນັ້ນແລ້ວ ເນື່ອງຈາກໄດ້ຍົກເລີກສັນຍາສໍາປະ ທານ ກັບບໍລິສັດຜູ້ສໍາປະທານນັ້ນແລ້ວ.

ໃນຂະນະດຽວກັນ ປະຊາຊົນຢູ່ແຂວງຈໍາປາສັກ ກໍພາກັນດີໃຈ ທີ່ໄດ້ມີການຍົກ ເລີກການເກັບຄ່າຜ່ານທາງນັ້ນ, ເຖິງຈະເກັບບໍ່ຫຼາຍ ແຕ່ໃນສະພາບເສດຖະກິດຫຍຸ້ງຍາກຄືໃນທຸກມື້ນີ້ ກໍບໍ່ສົມຄວນເກັບ ດັ່ງຊາວບ້ານຢູ່ເມືອງໂພນທອງຜູ້ໜຶ່ງ ເວົ້າຕໍ່ວິທຍຸເຊັຍເສຣີໃນມື້ວັນທີ 2 ສິງຫານີ້ວ່າ:

“ເພິ່ນເປີດມື້ວານນີ້ເດ ກໍດີໃຈນໍ ເພີ່ນຢຸດແລ້ວເດ ເພີ່ນປິດເລີຍ ເພີ່ນເປີດໃຫ້ໃຊ້ ເພີ່ນມອບແລ້ວເດ ໄດ້ທຽວຟຣີບາດນີ້ ສະດວກແລ້ວເດ.”

ແລະຄົນຂັບລົດແທັກຊີ ຢູ່ແຂວງຈໍາປາສັກ ກໍເວົ້າວ່າ ຫຼາຍຄົນດີໃຈ ທີ່ມີການຍົກເລີກການເກັບຄ່າຜ່ານທາງນັ້ນ ແຕ່ກໍຍັງມີທາງສາຍອື່ນ ທີ່ຍັງເກັບຄ່າຜ່ານທາງຢູ່ ເຊັ່ນ ທາງ ລະຫວ່າງນະຄອນປາກເຊ ແລະດ່ານສາກົນວັງເຕົ່າ, ລະ ຫວ່າງນະຄອນປາກເຊ ແລະເມືອງປາກຊ່ອງ ທີ່ໜ້າຈະຍົກເລີກການເກັບຄ່າ

ຜ່ານທາງດັ່ງດຽວກັນ.

“ແມ່ນໆ ຫຼາຍຄົນກໍດີໃຈ ໂຕສະເພາະເດີນທາງຮອດຈໍາປາສັກ ດ່ານຕໍ່ເຂດຍັງເກັບຄືເກົ່າ ເພີ່ນໜ້າຈະມີແຜນຍົກເລີກໝົດນີ້ແຫຼະ ຈັ່ງວ່າລໍເບິ່ງຄືກັນ ຈັກເພີ່ນຊິມີແຜນແນວໃດ ບໍ່ແນ່ໃຈຄືກັນ.”

ແລະປະຊາຊົນ ຢູ່ແຂວງນີ້ອີກຜູ້ໜຶ່ງ ກໍເວົ້າໃນທໍານອງດຽວກັນນັ້ນວ່າ ດີໃຈ ທັງພະນັກງານ ທີ່ທຽວໄປເຮັດການຢູ່ປາກເຊ ແລະຢາກໃຫ້ມີການຍົກເລີກການເກັບຄ່າຜ່ານທາງທຸກເສັ້ນທາງ ທັງທາງແຕ່ປາກເຊ ຫາດ່ານສາກົນວັງເຕົ່າ-ຊ່ອງເມັກ ນໍາດ້ວຍ.

“ກະດີໃຈຢູ່ ແຕ່ວ່າສະເພາະແຕ່ພະນັກງານ ທີ່ເຂົາເຈົ້າທຽວທາງຫັ້ນຄູ່ມື້ນະ ທຽວເຂົ້າມາເຮັດວຽກຢູ່ປາກເຊ ເຂົາເຈົ້າກະດີໃຈ ເຫັນດີນໍາ ດີສຸດແທ້ຢາກໃຫ້ເຮັດທາງປາກເຊ-ຊ່ອງເມັກພີ້ແຫຼະ ທາງຊ່ອງເມັກຫາປາກເຊຫັ້ນ ກໍເກັບຄືເກົ່າ.”

ຜູ້ປະກອບການລົດນໍາທ່ຽວ ຢູ່ແຂວງຈໍາປາສັກຄົນໜຶ່ງເວົ້າວ່າ ການຍົກເລີກການ ເກັບເງິນຄ່າຜ່ານທາງນັ້ນ ມີຄວາມສະດວກໃຫ້ນັກທ່ອງທ່ຽວ ທີ່ເດີນທາງໄປວັດພູ ຈໍາປາສັກ ຫຼາຍກວ່າ ເພາະຊາວບ້ານ ສ່ວນໃຫຍ່ ມັກໃຊ້ເສັ້ນທາງອື່ນ ທີ່ບໍ່ໄດ້ເສຍຄ່າໄປ ແລະວ່າ ສ່ວນເສັ້ນທາງອື່ນ ຍັງບໍ່ຍົກເລີກເທື່ອ.

“ເກັບທາງນີ້ມັນຫຼາຍປີແລ້ວຕິ ເພີ່ນກະຍົກເລີກທາງວັດພູຈໍາປາສັກ ແມ່ນທາງອື່ນຍັງເກັບຄືເກົ່າ ທາງໄປກັບກໍ 37 ພັນ (ກີບ) ຍົກເວັ້ນທາງເມືອວັດພູຈໍາປາສັກ ເພີ່ນຍົກເລີກ.”

ພະນັກງານນໍາທ່ຽວ ຢູ່ແຂວງຈໍາປາສັກຜູ້ໜຶ່ງເວົ້າວ່າ ເປັນຫ່ວງນໍາວ່າ ພາຍຫຼັງໄດ້ຍົກເລີກສັນຍາສໍາປະທານ ກັບບໍລິສັດເອກະຊົນແລ້ວ ໄດ້ມອບເສັ້ນທາງນັ້ນ ໃຫ້ແຂວງເປັນຜູ້ຄຸ້ມຄອງ ຊຶ່ງອາດຈະມີບັນຫາເລື່ອງງົບປະມານ ສ້ອມແປງທາງນັ້ນ ຍ້ອນໄລຍະທີ່ຜ່ານມາ ແມ່ນບໍລິສັດສໍາປະທານ ເປັນຜູ້ບູລະນະ ສ້ອງແປງ.

“ເວົ້າເລື່ອງວ່າໄລຍະຍາວຫັ້ນ ການບູລະນະເສັ້ນທາງ ມັນຊິໄດ້ສໍ່າໃດ ເຮົາກະບໍ່ຮູ້ນໍ ເວລາເງິນບໍ່ໄດ້ເກັບນໍ ບໍລິສັດເຂົາກໍບໍ່ໄດ້ບູລະນະຮັກສາ ມັນກໍຕ້ອງປະໃຫ້ພາກລັດຖະບານເປັນຜູ້ດູແລຫັ້ນນະ ບາດນີ້ເຮົາບໍ່ຮູ້ວ່າ ຖະໜົນຕໍ່ຈາກໄປນີ້ ມັນຊິດີຄືເກົ່າບໍ່ ຄືປະເດັນທີ່ພວກເຮົາຕ້ອງເບິ່ງຕໍ່ໄປ ດີແມ່ນດີແທ້ສໍາລັບການທ່ອງທ່ຽວ ຄືບໍ່ໄດ້ເສຍເງິນນໍ.”

ບໍລິສັດ ດວງດີກໍ່ສ້າງຂົວ-ທາງ ຈໍາກັດຜູ້ດຽວ ໄດ້ກໍ່ສ້າງທາງ 14A ໃນປີ 2008 ແລະໄດ້ເປີດໃຊ້ໃນເດືອນທັນວາ 2011, ອາຍຸສໍາປະທານ ຮອດປີ 2032. ແຕ່ຍ້ອນຄວາມຫຍຸງຍາກທາງດານເສດຖະກິດ ແລະການເງິນ ຂອງແຂວງຈໍາປາສັກ ທາງແຂວງຈຶ່ງໄດ້ຫາລືກັບທາງບໍລິສັດ ເພື່ອຍົກເລີກສັນຍາຮັບເໝົາສໍາປະທານ ກິດຈະການເກັບເງິນຄ່າຜ່ານທາງ ແລະບໍ່ເກັບເງິນຄ່າຜ່ານທາງ ເພື່ອຫຼຸດຜ່ອນຄ່າໃຊ້ຈ່າຍ ຂອງປະຊາຊົນ, ພະນັກງານລັດ ລວມທັງນັກທ່ອງທ່ຽວ ທີ່ໃຊ້ເສັ້ນທາງນັ້ນນໍາດ້ວຍ.