ບໍຣິສັດຈີນ ຈະສ້າງນິຄົມ ອຸດສາຫະກັມ ຢູ່ທ່າແຂກ-ໜອງບົກ
2023.03.28
ພິທີເຊັນບົດບັນທຶກ ຄວາມເຂົ້າໃຈ ຄວາມເປັນໄປໄດ້ ໃນການພັດທະນາໂຄງການ ສ້າງນິຄົມ ອຸດສາຫະກັມ ໝູນວຽນ ອັດສະຣິຍະ ອາຊິໂປຕາສ ຢູ່ເມືອງທ່າແຂກ ແລະ ເມືອງໜອງບົກ ແຂວງຄຳມ່ວນ. ນະຄອນຫຼວງວຽງຈັນ ວັນທີ່ 24 ມີນາ 2023.
ຮູບພາບຈາກ: Pathedlao
ບໍຣິສັດ ຊິໂນ-ອາກຣີໂປຕາສ ຈຳກັດ ຂອງນັກລົງທຶນຈີນ ໄດ້ເຊັນບົດບັນທຶກ ຄວາມເຂົ້າໃຈ ກັບ ກະຊວງແຜນການ ແລະ ການລົງທຶນ ເພື່ອສ້າງໂຄງການນິຄົມ ອຸດສາຫະກັມໝູນວຽນ ອັດສະຣິຍະ ອາຊີ-ໂປຕາສ ສາກົລ ໃນເນື້ອທີ່ 2,000 ເຮັກຕ້າຣ໌ ຢູ່ເມືອງທ່າແຂກ ແລະ ເມືອງໜອງບົກ ແຂວງຄຳມ່ວນ.
ການເຊັນບົດບັນທຶກ ຄວາມເຂົ້າໃຈ ໄດ້ມີຂຶ້ນໃນວັນທີ 24 ມີນາ 2023 ຫຼັງຈາກໄດ້ມີການກະກຽມຄວາມພ້ອມ ທາງດ້ານຕ່າງໆ ມາເປັນເວລາປະມານ 1 ປີ, ອີງຕາມການຣາຍງານ ຂອງສື່ມວນຊົນລາວ ໃນວັນທີ 27 ມານີ ທີ່ຜ່ານມາ. ໂຄງການນີ້ ກຳລັງຢູ່ລະວ່າງການດໍາເນີນການ ກໍ່ສ້າງ, ແຕ່ເຈົ້າໜ້າທີ່ ກ່ຽວຂ້ອງປະຕິເສດ ທີ່ຈະໃຫ້ຣາຍລະອຽດໄດ້.
ເຈົ້າໜ້າທີ່ ກະຊວງແຜນການ ແລະ ການລົງທຶນ ໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 28 ມີນາ ວ່າ:
“ຂໍ້ມູນກ່ຽວກັບໂຄງການ ເພິ່ນເຊັນສັນຍາກັນແລ້ວ ເພິ່ນກະໜ້າຈະເຣີ່ມໂຕນີ້ມັນ ເປັນຂໍ້ມູນລັບພາຍໃນເພາະ ເຮົາບອກບໍ່ໄດ້.”
ພ້ອມດຽວກັນນີ້ ວິທຍຸ ເອເຊັຽເສຣີ ກໍໄດ້ຕິດຕໍ່ໄປຫາຜແນກ ແຜນການ ແລະ ການລົງທຶນ ແຂວງຄຳມ່ວນ ເພື່ອສອບຖາມຂໍ້ມູນ ເພີ່ມຕື່ມ ແຕ່ເຈົ້າໜ້າທີ່ຢູ່ຜແນກການດັ່ງກ່າວ ປະຕິເສດທີ່ຈະໃຫ້ສັມພາດ ຍ້ອນວ່າ ໂຄງການນີ້ ຂຶ້ນກັບກະຊວງແຜນການ ແລະ ການລົງທຶນ.
ມີການດຳເນີນການ ລົງມືກໍ່ສ້າງໂຄງການດັ່ງກ່າວ ທີ່ຫ່າງຈາກໃຈກາງເມືອງທ່າແຂກ ປະມານ 6 ກິໂລແມັດ ແຕ່ຊາວຍັງບໍ່ຮູ້ຣາຍລະອຽດ ກ່ຽວກັບຂັ້ນຕອນການກໍ່ສ້າງ ແລະ ຍັງບໍ່ມີຂໍ້ມູນວ່າ ໄປກວມເອົາທີ່ດິນຂອງຊາວບ້ານແນວໃດ.
ຊາວບ້ານ ຢູ່ເມືອງທ່າແຂກ ທ່ານນຶ່ງ ໄດ້ກ່າວ ວິທຍຸຕໍ່ເອເຊັຽເສຣີ ວ່າ:
“ແມ່ນ ກຳລັງເຣີ່ມແດ່ ເມືອງທ່າແຂກເນາະ ມີສັມປະທານຫຼາຍ ມັນມີຫຼາຍປະເທດ ເຂົາເຂົ້າມາລົງທຶນຢູ່ໃນນີ້ແລ້ວ ມັນສັມປະທານກະຫຼາຍ.”
ຄົນຈີນທີ່ເຂົ້າມາເຮັດໂຄງການ ໄດ້ມາເຊົ່າເຮືອນຂອງປະຊາຊົນ ຢູ່ເຂດເມືອງໜອງບົກ. ຊາວບ້ານເມືອງໜອງບົກ ໄດ້ກ່າວວ່າ:
“ຢູ່ປະມານ 6 ຫຼັກ ເຂົາເຈົ້າລົງມືເຮັດແລ້ວໄດ໋ ລົງມາເປັນປີ 2 ປີແລ້ວ ຢູ່ເຮືອນເຮົານີ້ກະພວກຈີນມາເຊົ່າປະຈຳຢູ່ກະມີ ເຂົາເຈົ້າເຮັດມາດົນແລ້ວໄດ໋.”
ຊາວບ້ານທີ່ຢູ່ໃກ້ກັບໂຄງການດັ່ງກ່າວ ກໍໃຫ້ຂໍ້ມູນວ່າ ໂຄງການເຂດອຸດສາຫະກັມແຫ່ງນີ້ ຍັງບໍ່ໄດ້ຖືກເນື້ອທີ່ດິນຂອງເຂົາເຈົ້າ. ຊາວບ້ານອີກ ທ່ານນຶ່ງ ໄດ້ກ່າວວ່າ:
“ໂອ ບໍ່ຖືກທີ່ດິນເຮົາບໍ່ຖືກ ບໍ່ຖືກໂຄງການ ມັນດິນແມ່ນດິນໂຄງການ ສ່ວນຫຼາຍມັນກະບໍ່ຖືກ ມັນຢູ່ຄົນລະບ່ອນ ຢູ່ຄົນລະເຂດ ດິນເທດສະບານເຮົານີ້ບໍ່ຖືກ.”
ໂຄງການນີ້ ໄດ້ຕັ້ງຢູ່ເຂດສັມປະທານ ຂອງຣັຖບານ ເພື່ອຮອງຮັບບໍຣິສັດຕ່າງໆ ທີ່ຈະເຂົ້າມາສ້າງໂຮງງານອຸດສາຫະກັມ ແລະ ບໍຣິສັດເຫຼົ່ານັ້ນ ຕ້ອງເສັຽຄ່າສັມປະທານໃຫ້ຣັຖ.
ຊາວບ້ານອີກຄົນນຶ່ງໄດ້ກ່າວວ່າ:
“ໂຕທີ່ກຳລັງຊິສ້າງໃໝ່ເອີ ອັນນີ້ລະສາຍພູຂຽວ 6 ກິໂລແມັດ ມັນດິນຂອງເຂົາສັມປະທານ ລະໃຜຢາກໄປເຮັດເຂດຂອງເຂດ ຂອງເພິ່ນສຳປະທານແລ້ວ ມີແຕ່ເຈົ້າຢາກມາຕັ້ງໂຮງງານໄປເສັຽຄ່າສັມປະທານໃຫ້ເພິ່ນ.”
ໂຄງການນິຄົມອຸດສາຫະກັມ ໝູນວຽກອັດສະຣິຍະ ອາຊີ-ໂປຕາສ ສາກົລ ມີເນື້ອທີ 2,000 ເຮັກຕ້າຣ໌ ແບ່ງອອກເປັນ 3 ເຂດ ໃຫຍ່ ຄື ເຂດນິຄົມອຸດສາຫະກັມປຸ໋ຍໂປຕາສ, ເຂດນິຄົມອຸດສາຫະກັມອະໂປຕາສ ແລະ ຕົວເມືອງອາຊີ-ໂປຕາສ ເຊິງຄາດວ່າ ຈະໃຊ້ງົບປະມານລົງທຶນປະມານ 4 ຕື້ ໂດລາຣ໌.
ໃນສ່ວນຂອງເຂດ ນິຄົມອຸດສາຫະກັມປຸ໋ຍໂປຕາສ ມີເປົ້າໝາຍເພື່ອໃຫ້ປະເທດລາວ ສາມາດຜລິດປຸ໋ຍໂປຕາສ ເປັນອັນດັບ 1 ຂອງອາຊ້ຽນ ແລະ ອັນດັບ 4 ຂອງໂລກ ໂດຍ ໃນປີ 2023 ຈະໃຫ້ຜລິດປຸ໋ຍໂປຕາສ ຈຳນວນ 3 ລ້ານຕັນ ແລະ ໃນປີ 2025 ຈະເພີ່ມການຜລິດ ເປັນ 5 ລ້ານຕັນ ແລະ ຫຼັງຈາກນັ້ນ ເພີ່ມເປັນ 10 ລ້ານຕັນຕໍ່ປີ.
ສ່ວນໃນເຂດນິຄົມ ອຸດສາຫະກັມ ໂປຕາສ ແມ່ນເປັນເຂດສຳລັບ ໃຊ້ຊັບພະຍາກອນທີ່ຕິດກັບ ແຮ່ເກືອໂປຕາສ, ຖ່ານຫິນ, ແຮ່ບົກຊິດ ແລະ ອື່ນໆ ແລະ ເຂດຕົວເມືອງອາຊີ-ໂປຕາສ ມີເປົ້າໝາຍເພື່ອພັດທະນາເຂດເມືອງທັນສໄມ ທີ່ມີທັງການແພດ, ການສຶກສາ, ການຄ້າ, ກິລາ, ການບໍຣິການ ແລະ ສິ່ງອຳນວຍຄວາມສະດວກອື່ນໆ ອີຕງາມຕາມການຣາຍງານ ຂອງທ່ານ Tong Yonghen ກັມມະການບໍຣິຫານ ແລະ ຜູ້ຈັດການບໍຣິສັດ ຊິໂນ-ອາກຣີ ໂປຕາສ ຈຳກັດ.
ເຖິງຢ່າງໃດກໍຕາມ, ໃນປີ 2022 ທີ່ຜ່ານມາ ບໍຣິສັດ ຊິໂນ-ອາກຣີໂປຕາສ ຈຳກັດ ໄດ້ເຮັດໂຄງການຂຸດຄົ້ນ ບໍ່ເກືອໂປຕາສ ຫຼື ເກືອກາລີ ຢູ່ເມືອງໜອງບົກ ແຂວງຄຳມ່ວນ ແລະ ໄດ້ບຸກເບີກທີ່ດິນ ທຳການກະສິກັມ ຂອງຊາວບ້ານ ເປັນຕົ້ນ ບ້ານ ດົງບູນ, ບ້ານາຄຳ, ບ້ານນາຫຼຸບ, ບ້ານປ່າຕິ້ວ ແລະ ບ້ານຊຽງຫວາ, ແຕ່ ບໍຣິສັດດັ່ງກ່າວ ພັດຈ່າຍຄ່າຊົດເຊີຍໃຫ້ຊາວບ້ານບໍ່ເໝາະສົມ ແລະ ບາງຄອບຄົວ ກໍຍັງບໍ່ທັນໄດ້ຮັບຄ່າຊົດເຊີຍເທື່ອ ໃນຂະນະດຽວກັນ ກໍເອີ້ນເຈົ້າໜ້າທີ່ຕຳຣວດ ມາຈັບຊາວບ້ານ ທີ່ບໍ່ຍິນຍອມຍົກທີ່ດິນໃຫ້ບໍຣິສັດ.
