ບໍລິຄຳໄຊໃຫ້ ຈີນ ປູກກ້ວຍ ເພີ້ມ

ຈໍາປາທອງ
2019-05-16
ອີແມວລ໌
ຄໍາເຫັນ
Share
ພິມ
ພື້ນທີ່ ທີ່ກໍາລັງກະຕຽມເພື່ອ ສວນປູກກ້ວຍ ຂອງນັກລົງທຶນຈີນ ແຂວງວຽງຈັນ
ພື້ນທີ່ ທີ່ກໍາລັງກະຕຽມເພື່ອ ສວນປູກກ້ວຍ ຂອງນັກລົງທຶນຈີນ ແຂວງວຽງຈັນ
ຮູບພາບຈາກ : ນັກຂ່າວພົລເມືອງ

ທາງການ ແຂວງບໍລິຄຳໄຊ ອະນຸມັດໃຫ້ ບໍຣິສັດ VS ຂອງຈີນ ທີ່ຮຸ້ນສ່ວນກັບ ນັກລົງທຶນລາວ ສຳປະທານປູກກ້ວຍ ຢູ່ເມືອງບໍລິຄັນ, ໃນ ເນື້ອທີ່ເກືອບເຖິງ 500 ເຮັກຕາ ໂດຍໃຫ້ເຫດຜົນວ່າ ໄດ້ຜ່ານ ການພິຈາຣະນາເຫັນພ້ອມ ຈາກຄນະນຳແຂວງ ແລະພາກສ່ວນກ່ຽວຂ້ອງ ແລ້ວ, ເຖິງແມ່ນວ່າປະຊາຊົນ ບໍ່ເຫັນດີນຳກໍຕາມ, ດັ່ງເຈົ້າໜ້າທີ່ພາກສ່ວນກ່ຽວຂ້ອງ ແຂວງບໍລິຄຳໄຊ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 16 ພຶສພານີ້ວ່າ:

"ກໍອະນຸມັດຕັ້ງແຕ່ເທິງພຸ້ນ ໄດ້ແລ້ວ ເພິ່ນຈຶ່ງມາ ລົງມາເຮັດ ເພາະວ່າ ໂຕນີ້ຣັຖບານເພິ່ນອະນຸຍາດແລ້ວ ກໍໄດ້ທາງຂັ້ນເທິງ ທາງກະສິກັມ ປ່າໄມ້ແຂວງ ເຮົາກໍໄດ້ຕົກລົງໃຫ້ເພິ່ນ ເຂົ້າມາສໍາປະທານ 6 ປີ ເພາະວ່າຂັ້ນເທິງ ເພິ່ນອະນຸຍາດ."

ທ່ານເວົ້າວ່າ ເມື່ອບໍ່ເທົ່າໃດມື້ມານີ້ ທາງແຂວງ ປະຊຸມກັນວ່າ ຈະໃຫ້ບໍຣິສັດດັ່ງກ່າວ ປູກກ້ວຍຫລືບໍ່, ແຕ່ດຽວນີ້ທາງແຂວງໄດ້ອະນຸມັດ ໃຫ້ ປູກແລ້ວ. ການອະນຸມັດນັ້ນມີຂຶ້ນ ພາຍຫລັງໄດ້ຮັບຄວາມເຫັນພ້ອມ ຈາກຜແນກກະສິກັມ ແລະປ່າໄມ້ແຂວງ ແລະຂແນງການທີ່ກ່ຽວຂ້ອງ ແລະ ທາງບໍຣິສັດ ກໍຍອມໃຫ້ທາງການ ເປັນຕົ້ນຂແນງປູກຝັງ, ຂແນງສາທາຣະນະສຸຂ ແລະຜແນກກະສິກັມ ແລະປ່າໄມ້ ໄປກວດກາ ການນຳໃຊ້ສານເຄມີ ຢູ່ໃນສວນກ້ວຍ ຕລອດຣະຍະເວລາ ທີ່ມີການປູກກ້ວຍນັ້ນ.

ເຈົ້າໜ້າທີ່ ທ່ານດຽວກັນນີ້ ກ່າວຕື່ມອີກວ່າ ຫາກກວດພົບວ່າ ມີການໃຊ້ສານເຄມີ ໃນສວນກ້ວຍເກີນມາຕຖານ ແລະທາງບໍຣິສັດ ບໍ່ປະຕິບັດ ຕາມສັນຍາ ກໍຈະຍົກເລີກ ການສັມປະທານນັ້ນເລີຍ. ມີຫາງສຽງຂອງປະຊາຊົນ ຢູ່ບ້ານທ່າເຮືອ ແລະ ບ້ານຫາດຍື້ນ ທີ່ສ່ວນຫຼວງຫຼາຍບໍ່ ເຫັນດີ ໃຫ້ປູກກ້ວຍ ແຕ່ເຮັດຫຍັງບໍ່ໄດ້ ດັ່ງທີ່ທ່ານ ກ່າວວ່າ:

"ສວນກ້ວຍຄົນຈີນຫັ້ນຫວະ ກໍມີສ່ວນໜ້ອຍແຫລະ ທີ່ເຫັນດີນຳເຂົາ ຄັນວ່າບໍ່ມີການປູກ ກໍແຮງເຫັນດີ ເພາະວ່າ ມັນເວົ້າເຣື່ອງ ການນໍາໃຊ້ ນໍ້າແລະດິນ ຢ້ານສານເຄມີນັ້ນແຫລະ ໂຕໜັກ ແຕ່ປູກແທ້ ເຂົາກໍຕ້ອງປູກແຫລະ ເພາະວ່າເຂົາໄດ້ທຶນກ້າເບັ້ຽ ເຮັດຫຍັງ ຄົບໝົດແລ້ວນະ ຍັງແຕ່ປຸກຕູບເຂົານີ້ແຫຼະ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາທ່ານ ບຸນຂວງ ຄຳບຸນເຮືອງ ຮອງຣັຖມົນຕຣີ ກະຊວງກະສິກັມ ແລະປ່າໄມ້ ເພື່ອຂໍໃຫ້ທ່ານ ຊີ້ແຈງເຮື່ອງນີ້. ໄດ້ຮັບຄໍາຕອບຈາກທ່ານວ່າ ທາງກະຊວງຍັງສັ່ງຫ້າມເດັດຂາດ ບໍ່ໃຫ້ມີການປູກກ້ວຍໃໝ່ ໂດຍອີງຕາມຄໍາສັ່ງ ຂອງນາຍົກ ຣັຖມົນຕຣີ ປີ 2017:

"ບໍ່ໄດ້ໃຫ້ ເຮົາປະຕິບັດຕາມຄຳສັ່ງຂອງນາຍົກປີ 2017 ພຸ້ນແຫຼະ ຍຸຕິໝົດກ້ວຍຫອມນີ້ນະ ມີແຕ່ວ່າໂຕເກົ່າທີ່ຍັງຄ້າງຄາຫັ້ນ ທີ່ຍັງຕິດຄ້າງ ທີ່ຍັງຕິດຄ້າງນໍາການສໍາປະທານຫັ້ນ ໃຫ້ປະຕິບັດຕາມກະສິກໍາສະອາດ ໂຕໃໝ່ເດັດຂາດເລີຍບໍ່ອະນຸຍາດໄດ້.”

ເຣື່ອງການອະນຸມັດ ໃຫ້ປູກກ້ວຍໃໝ່ ນອກຈາກ ແຂວງບໍລິຄຳໄຊແລ້ວ ແຂວງ ອຸດົມໄຊ ກໍໄດ້ອະນຸມັດ ໃຫ້ນັກລົງທຶນຈີນ ປູກໃນເນື້ອທີ່ ເກືອບເຖິງ 700 ເຮັກຕາ; ຢູ່ບ້ານ ປາກກວາງ ເມືອງປາກງື່ມ ທາງນະຄອນຫຼວງວຽງຈັນ ກໍອະນຸມັດໃຫ້ປູກ ໃນເນື້ອທີ່ ເກືອບເຖິງ 200 ເຮັກຕາ ແລະ ຢູ່ແຂວງ ຜົ້ງສາລີ ກໍອະນຸມັດ ໃຫ້ບໍຣິສັດຈີນປູກຕໍ່ 1,000 ເຮັກຕາ ທັ້ງໆທີ່ປະຊາຊົນ ຢູ່ເຂດດັ່ງກ່າວ ມີຄວາມກັງວົນຫຼາຍ ນໍາເຣື່ອງການໃຊ້ສານເຄມີ ທີ່ສົ່ງຜົນກະທົບຕໍ່ສິ່ງແວດລ້ອມ ແລະສຸຂພາບ ຂອງພວກເຂົາເຈົ້າ.

ຄໍາເຫັນ (1)
Share

777

ຈາກ ປາກຊັນ

ຂໍອະນຸຍາດ ນຳບັນດາ ທ່ານ ຂໍູມູນນີ້ບໍ່ຮູວ່າທ່ານ ໄດ້ມາແຕ່ໃສ ແຕ່ໃນນາມ ປະຊາຊົນ ຢູ່ແຂວງບໍລິຄຳໄຊ ຂ້າພະເຈົ້າ ຂໍຢັ້ງຢືນວ່າ ຂໍມູນນີ້ແມ່ນບໍ່ມີຄວາມຈິງ ແລະ ແຕ່ລະພາກສ່ວນອາດຈະຮູ້ດີ ຕາມລະບຽບກົດໝາຍແລ້ວແຂວງ ບໍມີສິດອະນຸຍາດເຖິງ 500 ຮຕ ແຂວງມີສິດອະນຸຍາດ ໄດ້ແຕ່ 150 ຮຕ ແຕ່ຕ້ອງໄດ້ປະຕິບັດ ຕາມລະບຽບກົດໝາຍ ຢ່າງເຂັ້ມງວດ ຈຶ່ງອະນຸຍາດໄດ້ ສະນັ້ນ, ຂ້າພະເຈົ້າ ຂໍຮຽກຮ້ອງມາຍັງບັນດາທ່ານ ທີ່ຈະເອົາຂໍ້ມູນລົງຄວນຮູ້ລາຍລະອຽດຄັກແນ່ ເພາະມັນເປັນການເຮັດໃຫ້ປະຊາຊົນຈຳນວນໜຶ່ງ ເຂົ້າໃຈຜິດ ແລະ ຂໍຮ້ອງໃຫ້ຜູ້ທີ່ເອົາຂ່າວລົງ ຊ່ວຍແກ້ຂ່າວຄືນດ້ວຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 22, 2019 08:28 AM

ເຕັມຫນ້າ