ຄົນງານລາວ ຖືກຜູ້ຄຸມງານຄົນຈີນຕີ

ອຸ່ນແກ້ວ
2021-10-21
Share
ຄົນງານລາວ ຖືກຜູ້ຄຸມງານຄົນຈີນຕີ ຮ້ານຄ້າຂາຍ ຂອງຊາວຈີນ ໃນພາກເໜືອ ສປປ ລາວ
Mek/fb

ເກີດ​ເຫດ ຜູ້​ຄຸມ​ງານ​ຄົນ​ຈີນ​ທຳ​ຮ້າຍ ​ຄົນ​ງານລາວ ໃນ​ວັນ​ທີ 17 ຕຸ​ລາ ທີ່​ຜ່ານ​ມາ ຢູ່​ບ້າ​ນ​ນ້ຳ​ພາວ ເມືອງວັງ​ວຽງ ແຂວງວຽງ​ຈັນ ຍ້ອນ​ຄົນງານ​ລາວ​ ພ​ຍາ​ຍາມ ລັກ​ເຄື່ອງ​ໂຮງ​ງານ ​ຂອງ​ຄົນ​ຈີນ.

ຄົນ​ງານດັ່ງ​ກ່າວ ອາ​ຍຸ​ປະ​ມານ 22 ປີ ຖືກ​ຜູ້​ຄຸມ​ງານ​ຄົນ​ຈີນ ເຕະ ແລະຖີບ ໃນ​ຂະ​ນະ​ທີ່ມືຂອງ​ຄົນ​ງານ​ດັ່ງ​ກ່າວ ຖືກ​ເຊືອກ​ມັດ​ຢູ່, ແຕ່​ຄົນ​ລາວ ຈຳ​ນວນນຶ່ງ ຢາກ​ໃຫ້​ພາກ​ສ່ວນ​ກ່ຽວ​ຂ່ອງ ​ດໍ​າ​ເນີນ​ຄະ​ດີ​ກັບ​ຜູ້​ຄຸມ​ງານ​ຄົນ​ຈີນ​ດັ່ງ​ກ່າວ. ຊາວ​ບ້ານ ນ້ຳ​ພາວ ເມືອງວັງ​ວຽງ ໄດ້​ກ່າວ​ຕໍ່ ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 19 ຕຸ​ລາ ວ່າ: 

ກໍບໍ່ຖືກໄດ໋ ຕ້ອງສົ່ງເຈົ້າໜ້າທີ່ ບໍ່ຕ້ອງທຳຮ້າຍຮ່າງກາຍໄດ໋ ຕໍ່ໄປນີ້ ກໍຄືງຽບເລີຍ ບໍ່ຮູ້ທາງແບບມັນໄປທາງໃດ ເຂົາສົ່ງເຈົ້າໜ້າທີ່ບໍ່ ຫຼືບໍ່ສົ່ງ ໃຫ້ເຈົ້າໜ້າທີ່ ດໍາເນີນການກັບຄົນຕ່າງຊາດ ບໍ່ຄວນທຳຮ້າຍຮ່າງກາຍ ກໍສົ່ງເຈົ້າໜ້າທີ່ຢ່າງດຽວ ເສັຽຫາຍເທົ່າໃດ ແບບໃຫ້ທາງບ້ານຮັບຜິດຊອບ ຖ້າບໍມີຄ່າເສັຽ ກໍໃຫ້ຮັບໂທລະກໍແລ້ວ.”

ຄົນ​ງານທີ່​ເຮັດ​ວຽກຢູ່ ບໍ​ຣິ​ສັດຂອງ​ຄົນ​ຈີນ ພາຍ​ໃນ​ປະ​ເທດ​ລາວ ສ່ວນ​ຫຼາຍ​ເປັນ​ຄົນ​ງານ​ລາວ ໃນ​ຂ​ະນະ​ທີ່​ຜູ້​ຄຸມ​ງານ​ເປັນ​ຄົນ​ຈີນ. ທີ່​ຜ່ານ​ມາ ກໍ​ເຄີຍ​ມີ​ຜູ້​ຄຸມ​ງານ​ຄົນ​ຈີນ ເລືອກ​ໃຊ້​ວິ​ທີ​ການ​ລົ​ງ​ໂທດ ​ຄົນ​ງານ​ລາວ ທີ່​ພ​ຍາ​ຍາມ​ລັກ​ເຄື່ອງ ແທນ​ທີ່​ຈະ​ແຈ້ງ ​ເຈົ້າ​ໜ້າ​ທີ່​ຕຳ​ຣວດ ຊຶ່ງ​ຊາວ​ບ້ານ​ເຫັນ​ວ່າ ການ​ກະ​ທຳ​ແບບນີ້ ບໍ່​ຖື​ກ​ຕ້ອງ ແລະບໍ່​ຖືກ​ກົດ​ໝາຍ. ຊາວ​ບ້ານ​ອີກ ທ່ານ​ນຶ່ງ ໄດ້​ກ່າວຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 19 ຕຸ​ລາ ວ່າ:

ຢູ່ລາວນີ້ ມັນເກີດຂຶ້ນບ່ອຍຄັ້ງ ຢູ່ລາວເຮົານີ້ປ່ອຍໃຫ້ ຄົນຕ່າງຊາດຫັ້ນນ່າເນາະ ເຂົ້າມາຢູ່ໃນເມືອງລາວເຮົາ ມາໃຊ້ສິດທິ ຂົ່ມເຫັງຄົນລາວເຮົາ ບໍ່ໃຫ້ກຽຄົນລາວເຮົາ ເລີຍຫັ້ນເນາະ ທີ່ວ່າມາເຮັດທຸຣະກິຈ ປະເທດລາວ ແລ້ວກໍມາທຳຮ້າຍ ຮ່າງກາຍຂອງຄົນລາວ ແບບທີ່ວ່າແນວໃດບໍ່ຮູ້ແຫຼະ ຄືວ່າ ມັນບໍ່ມີສິດທິ ບໍ່ມີກົດໝາຍຄຸ້ມຄອງບໍ່ ແນວໃດເຮົາກໍຍັງເວົ້າຢູ່.”

ຫຼັງ​ຈາກ​ມີ​ຊາວ​ລາວ ຈຳ​ນວນ​ນຶ່ງ ໄດ້​ເຫັນ​ຄ​ລິບວີ​ດີ​ໂອ ເຫດ​ການ​ດັ່ງ​ກ່າວ ຜ່ານ​ສື່​ສັງ​ຄົມ​ອອນ​ລາຍນ໌ ກໍ​ຮຽກ​ຮ້ອງ​ໃຫ້ ​ພາກ​ສ່ວນ​ກ່ຽວ​ຂ້ອງ ສອບ​ສວນ​ຄະ​ດີ​ດັ່​ງກ່າ​ວ. ຊາວ​ບ້ານ ທ່ານ​ນຶ່ງ ໄດ​ກ່າວ​ຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 19 ຕຸ​ລາ ວ່າ:

ກໍແຕ່ວ່າ ຄັນວ່າ ເຂົາເຈົ້າກະທຳຜິດແທ້ເນາະ ກໍຢາກໃຫ້ສົ່ງກັບປະເທດ ກໍບໍ່ຢາກໃຫ້ເຂົ້າມາລາວອີກຫັ້ນນ່າ ມາຄວບຄຸມພວກທີ່ວ່າ ມາທຳຮ້າຍຮ່າງກາຍ ໃຫ້ພາກແຮງງານລາວນີ້ ຊີ້ນ່າ ຢາກໃຫ້ມີມາຕການເດັດຂາດຫັ້ນແຫຼະ ກ່ຽວກັບການດຳເນີນຄະດີ ເຮົານີ້ຍັງບໍ່ຮູ້ວ່າ ທາງການ ເພິ່ນດຳເນີນຄະດີແບບໃດ​.”

ໜ່ວຍ​ງານ​ກ່ຽວ​ຂ້ອງ ​ກຳ​ລັງ​ກວດ​ກາ​ວີ​ດີ​ໂອ ຄົນ​ຈີນ​ຕີຄົນ​ລາວ ແລະ ບຸກ​ຄົນ​ຢູ່​ໃນ​ພາບ​ວີ​ດີ​ໂອ​ນັ້ນ ແມ່ນ​ໃຜ. ເຈົ້າ​ໜ້າ​ທີ່​ທ້ອງ​ຖິ່ນ ເມືອງວັງ​ວຽງ ໄດ້​ກ່າວ​ວ່າ:

ຈະແມ່ນລິບເກົ່າ ຫຼື ຄລິບໃໝ່ ຍັງບໍ່ຮູ້ຊັດເຈນເນາະ ມີແຕ່ເຫັນທາງການເພິ່ນຖາມວ່າ ມີຄົນລົງເຟບຸກເນາະ ຈະເປັນຂ່າວແທ້ ຫຼືວ່າຂ່າວປອມ ກໍຍັງບໍ່ທັນຮູ້ເນາະ ເພິ່ນກຳລັງສືບສວນແຫຼະ ກໍມີແຕ່ວ່າ ທາງຂັ້ນເທິງເພິ່ນຈະໄປເຮັດ ແນວໃດເນາະ ແລ້ວບໍ່ຮູ້ຈຸດເກີດເຫດວ່າ ມັນເກີດຢູ່ຈຸດໃດຫັ້ນນ່າ ເຂົາຕີຢູ່ບ່ອນໃດຫັ້ນນ່າ.”

ປັດ​ຈຸ​ບັນ ການ​ຕິດ​ຕາມເຣື່ອງ​ດັ່ງ​ກ່າວ ຍັງ​ບໍ່​ມີ​ຄວາມ​ຄືບ​ໜ້າ ຍ້ອນ​ວ່າ ຄົນ​ງານ​ລາວ ​ຜູ້​ຖືກ​ທຳ​ຮ້າຍ​ຮ່າງ​ກາຍ ຫຼືຍາດ​ຕິພີ່​ນ້ອງ​ ຂອງ​ຜູ້​ກ່ຽວຍັງ​ບໍ່​ທັນ​​ຮ້ອງ​ຟ້ອງ ເພື່ອ​ໃຫ້​ອຳ​ນາດ​ການ​ປົກ​ຄອງ​ບ້ານ ສົ່ງ​ເຣື່ອງ​ໄປ​ຫາ​ເຈົ້າ​ໜ້າ​ທີ່​ຕຳ​ຣວດ. ເຈົ້າ​ໜ້າ​ທີ່ຕຳ​ຣວດ ແຂວງວຽງ​ຈັນ ໄດ້​ກ່າວ​ວ່າ:

ແຕ່ວ່າ ປັດຈຸບັນນີ້ ຜູ້ກ່ຽວ ຫຼືວ່າຍາດຕິພີ່ນ້ອງ ກໍຍັງບໍ່ທັນມີແນວໃດຮ້ອງຟ້ອງ ຫຼືວ່າສເນີຕໍ່ການຈັດຕັ້ງ ມີແຕ່ສັງຄົມອັບລົງໂຊຊຽວ ບອກອັນນັ້ນ ອັນນີ້ ເຮົາກໍບໍ່ສັງ ບໍ່ຮູ້ວ່າ ຊິຈະດໍເນີນແນວໃດໄດ້ ຄັນວ່າ ມີຂໍ້ມູນວ່າ ຜູ້ນັ້ນ ຜູ້ນີແທ້ ໄດ້ຮັບຂ່າວ ແນວນັ້ນ ແນວນີ້ເທື່ອ ກໍຍາຍາມຮຽກຮ້ອງ ໃຫ້ເຂົາເຈົ້າມາເນີຕໍ່ການຈັດຕັ້ງ ຕໍ່ເຈົ້າໜ້າທີ່ພວກເຮົາ.”

ກ່ອນ​ໜ້ານີ້ ໃນ​ວັນ​ທີ 6 ພື​ສ​ພາ 2021 ກໍ​ເຄີຍ​ເກີດ​ເຫດ​ຜູ້​ຄຸມ​ງານ ​ຄົນ​ຈີນ​ໃນ​ສວນ​ກ້ອຍ​ຊາວ​ຈີນ ຂອງ​ບໍ​ຣິ​ສັດ ມິນ​ຍາງ ຢູ່​ບ້ານ​ໂພນ​ໄຊ ເມືອງ​ຮຸນ ແຂວງ​ອຸ​ດົມ​ໄຊ ຈັບ​ເດັກ​ນ້ອຍ​ຊາວ​ລາວ​ອາ​ຍຸ 14 ປີ ມັດ​ໂຕ ແລ້ວ​ ໃຊ້​ໄມ້​ຕີ​ຫຼາຍ​ບາດ ຍ້ອນ​ຜູ້​ຄຸມ​ງານ​ຄົນ​ຈີນ ບໍ່​ພໍ​ໃຈ ທີ່​ເດັກ​ນ້ອຍ​​ໄປ​ລັກ​ເຄື່ອງ​ ຢູ່​ໃນ​ສວນ​ກ້ວຍ ຊຶ່ງ​ບັນ​ຫາ​ດັ່ງ​ກ່າວ ຄົນ​ລາວ​ຫຼາຍ​ຄົນ ເຫັນ​ວ່າມັນ​ເປັນ​ການ​ ໃຊ້​ຄວາມ​ຮຸນ​ແຮງ ແລະລະ​ເມີດ​ສິດ​ທິ​ເດັກ ແທນ​ທີ່​ຈະ​ສົ່ງມອບ​ເດັກ​ນ້ອຍ​ໃຫ້​ ອຳ​ນາດ​ການ​ປົກ​ຄອງ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ