ເມືອງດັກຈຶງຕຽມເປີດ ດ່ານສາກົລ

ໄຊຍາ
2021-02-26
Share
ເມືອງດັກຈຶງຕຽມເປີດ ດ່ານສາກົລ ດ່ານສາກົລ ລາວ-ວຽດນາມ ເມືອງດັກຈຶງ ຈະເປີດໃຊ້ຢ່າງເປັນ ທາງການ ເມື່ອການລະບາດ ຂອງລົດລົງ.
ພາບປະກອບ: ນັກຂ່າວພົລເມືອງ

ແຂວງເຊກອງໄດ້ຈັດພີທີເປີດ ດ່ານສາກົລ ດ່ານດັກຕະອອກ-ນາມຢາງ ທີ່ເມືອງດັກຈຶງ ຢ່າງເປັນທາງການເມື່ອວັນທີ 24 ກຸມພາ 2021 ຜ່ານມາ. ປັຈຈຸບັນດ່ານດັ່ງກ່າວຍັງບໍ່ໄດ້ເປີດ ບໍຣິການທົ່ວໄປ. ເນື່ອງມາຈາກຍັງຕ້ອງປະຕິບັດ ຕາມມາຕການປ້ອງກັນ ເຊື້ອພຍາດໂຄວິດ-19 ຂອງຄະນະສະເພາະກິຈ ປະຈຳເດືອນກຸມພາ. ດັ່ງເຈົ້າໜ້າທີ່ຂແນງການ ທີ່ກ່ຽວຂ້ອງ ຜູ້ຂໍສງວນຊື່ໄດ້ກ່າວຕໍ່ RFA ເມື່ອຕົ້ນສັປດາຜ່ານມາວ່າ:

"ເປີດເປັນທາງການ ເມື່ອວັນທີ 24 ເດືອນ 3 ຕາມເພີິ່ນກະຕຽມ ທັງສອງປະເທດເຮົາ, ເປີດດ່ານສາກົລພີທີມອບຮັບເລີຍແຕ່ວ່າ ຜ່ານມານີ້ຍັງອີງຕາມຄຳສັ່ງ ຂອງນາຍົກ ກະຊວງເພິ່ນກໍແຈ້ງມາເດ້ ໃຫ້ສືບຕໍ່ປິດດ່ານເອົາອີງຕາມສະພາບໂຕຈີງ ຂອງພຍາດນີ້ແຫຼະ."

ເຈົ້າໜ້າທີ່ປະຈຳດ່ານ ດັກຕະອອກ-ນາມຢາງ ໄດ້ກ່າວວ່າ ດ່ານແຫ່ງນີ້ຄາດວ່າຈະເປີດໃຊ້ ໃນເດືອນມີນາ ຖ້າວ່າສະພາບຂອງເຊື້ອ ພຍາດໂຄວິດ-19 ຜ່ອນລົງ. ແຕ່ກໍອີງຕາມ ມາຕການຜ່ອນຜັນ ຂອງຄະນະສະເພາະກິຈ.

"ເປີດນໍາໃຊ້ແຕ່ວ່າຊ່ວງນີ້ໄລຍະໂຄວິດນີ້ເດ, ຄັນບ່ອນເພິ່ນກໍເປີດແຕ່ດ່ານ 12 ແຕ່ວ່າຕາມແຜນເພິ່ນແມ່ນຢູ່ໃນເດືອນທີ 3 ຄັນວ່າ ສະພາບການບ້ານເມືອງ ປົກກະຕິ, ເປີດຂົນສົ່ງໄດ້ ເລີຍນີ້ມັນກໍອີງຕາມ ມາຕການຜ່ອນຜັນ ຂອງຄະນະສະເພາະກິຈເພິ່ນ ນັ້ນແຫຼະກໍສິແມ່ນນໍາໃຊ້ ຂົນສົ່ງສິນຄ້າ."

ທ່ານໄດ້ກ່າວຕື່ມວ່າ ເມື່ອກ່ອນດ່ານດັ່ງກ່າວ ເປັນພຽງດ່ານທ້ອງຖິ່ນ, ພໍມາຮອດປີ 2019 ທັງສອງຝ່າຍລາວ-ວຽດນາມ ຕົກລົງກັນ ຍົກຣະດັບກໍ່ສ້າງໃຫ່ດ່ານດັ່ງກ່າວເປັນດ່ານສາກົລ ເຊິ່ງຮູ້ຈັກກັນໂດຍທົ່ວໄປວ່າ ດ່ານດັກຕະອອກ-ນາມຢາງ.

ການກໍສ້າງດ່ານແຫ່ງນີ້ໄດ້ໃຊ້ເວລາ ພຽງສອງປີກໍສຳເຣັດ, ຈາກນັ້ນວັນທີ 24 ກຸມພາ ດ່ານແຫ່ງນີ້ກໍໄດ້ມີພີມອບຮັບຢ່າງເປັນ ທາງການແຕ່ຍັງບໍ່ທັນໄດ້ເປີດໃຊ້ ຍ້ອນຕ້ອງປະຕິບັດ ຕາມມາຕການປີິດດ່ານ ຂອງຄະນະສະເພາະກິຈ ຄວບຄຸມເຊື້ອພຍາດໂຄວິດ-19.

ປະຊາຊົນໄດ້ໃຫ້ຄວາມເຫັນວ່າ ການເປີດດ່ານສາກົລ ເປັນເຣື່ອງທີ່ດີຕໍ່ເສຖກິຈ, ເນື່ອງຈາກ ເຊກອງເປັນແຂວງນ້ອຍ ຖ້າເປີດດ່ານ ຈະມີຄົນເຂົ້າ-ອອກ ຫຼາຍຂຶ້ນ.

"ສ່ວນໂຕເພິ່ນສິເປີດພາກຣັຖ ເພິ່ນກໍຕ້ອງແນ່ນອນແຫຼະວ່າ ມັນເຣີ້ມເບົາບາງລົງ ເຮົາຄິດວ່າມັນດີແຫຼະ ເພາະວ່າຄົນກໍເຂົ້າ-ອອກ ໄດ້ພາຍໃນແຂວງ ເຮົາກໍບໍ່ຫຼາຍຖ້າເຂົ້າມາໄດ້ ກໍສະບາຍກວ່າເກົ່າ."

ສູນຂໍ້ມູນຂ່າວສານທາງການຄ້າ ຂອງລາວ ໄດ້ຣາຍງານເມື່ອວັນທີ 8 ມົກຣາ 2020 ວ່າ ດ່ານສາກົລດັກຕະອອກ ຕັ້ງຢູ່ທາງຫຼວງ ເລກ 16ບີ, ເຊື່ອມແຂວງເຊກອງ ທີ່ເມືອງດັກຈຶງກັບ ດ່ານນາມຢາງ ແຂວງກວາງນຳ ຂອງວຽດນາມ. ເຊິ່ງສາມາດເດີນທາງຕໍ່ໄປຍັງທ່າເຮືອ ນະຄອນດານັງ ຂອງປະເທດວຽດນາມໄດ້. ໂດຍເສັ້ນທາງເຊື່ອມແລວ ເສຖກິຈ ຕາເວັນອອກ- ຕາເວັນຕົກ ( ໄທຍ, ລາວ, ວຽດນາມ ) ທີ່ສັ້ນທີ່ສຸດ, ສາມາດເດີນທາງຈາກ ດ່ານຊ່ອງເມັກ ແຂວງອຸຸບົລຣາຊທານີ ຂອງໄທຍ ໄປຍັງນະຄອນດານັງ ດ້ວຍໄລຍະທາງ 441 ກິໂລແມັດ.

ການຍົກຣະດັບດ່ານ ດັກຕະອອກ-ນາມຢາງ ຂຶ້ນເປັນດ່ານສາກົລ ຈະເຮັດໃຫ້ແຂວງເຊກອງ ທີ່ເປັນແຂວງນ້ອຍມີການພັທນາທາງ ເສຖກິຈ, ການຄ້າ, ການລົງທຶນ ແລະ ການຄົມມະນາຄົມ ຂົນສົ່ງເພີ່ມຂຶ້ນຫຼາຍ.

ຈຸດທີ່ຕັ້ງດ່ານສາກົລ ດັກຕະອອກ-ນາມຢາງ ຫ່າງຈາກເທສບານເມືອງເຊກອງ 120 ກິໂລແມັດ, ການເດີນທາງໄປເມືອງດັກຈຶງ ປັຈຈບັນມີຂົວແຫ່ງໃໝ່ ໄດ້ຖືກສ້າງຂຶ້ນຂ້າມແມ່ນໍ້າ ເຊກອງ. ມາຮອດປີ 2020 ປະເທດລາວມີດ່ານຊາຍແດນ ສາກົລ 26 ແຫ່ງ ເຊັ່ນ. ໄທຍ 11 ແຫ່ງ, ວຽດນາມ 8 ແຫ່ງ, ຈີນ 5 ແຫ່ງ, ພະມ້າ ແລະ ກັມພູຊາ 1 ແຫ່ງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ