ຜູ້ປະສົບພັຍເຂື່ອນແຕກ ເຊັນຮັບ ຄ່າຊົດເຊີຍ

ອະວາຣີ
2019-07-10
Share
F-Sanamxay ຊີວິດໃນຄອບຄົວ ຢູ່ເມືອງສະໜາມໄຊ
ຮູບພາບຈາກ : ນັກຂ່າວພົລເມືອງ

ປະຊາຊົນຜູ້ປະສົບພັຍ ສັນເຂື່ອນເຊປຽນ-ເຊນ້ຳນ້ອຍ ແຕກ ສ່ວນຫລາຍ ໄດ້ເຊັນຮັບເອົາຄ່າຊົດເຊີຍ 50 ສ່ວນຮ້ອຍ ຂອງຜົນເສັຍຫາຍ ທັງໝົດແລ້ວ ແຕ່ເງິນແທ້ໆນັ້ນ ຍັງບໍ່ທັນໄດ້ເທື່ອ ມີແຕ່ເຊັນເອກກະສານຊື່ໆ ແລະຄາດວ່າ ອາດຈະໄດ້ເງິນໃນໄວໆນີ້, ຕາມຄຳເວົ້າຂອງ ຜູ້ປະສົບພັຍ ເຂື່ອນແຕກຄົນນຶ່ງ ຢູ່ບ້ານຊົ່ວຄາວບ້ານຫິນລາດ ເມືອງສະຫນາມໄຊ ແຂວງອັດຕະປື ທີ່ໄດ້ໃຫ້ສຳພາດກ່ຽວກັບ ເຣື່ອງນີ້ ກັບວິທຍຸເອເຊັຽເສຣີ ເມື່ອວັນທີ່ 9 ເດືອນ ກໍຣະກະດາ ປີ 2019 ນີ້ວ່າ:

“ເພິ່ນໃຫ້ແມ່ໄປເຊັນເອົາແລ້ວເດ໋ ເຊັນເອົາ 50 ເປີເຊັນ ແຕ່ວ່າເພິ່ນຍັງບໍ່ທັນເວົ້າວ່າ ຈະໃຫ້ມີໃດຍັງບໍ່ຮູ້ຊ້ຳ ເພາະວ່າມັນບໍ່ແຈ້ງປານໃດ ຂໍ້ມູນ ມັນມີບັນຫາແນວນັ້ນແຫລະ ເງິນຊິບໍ່ອອກມາໄວ ເພາະມີບັນຫາ. ໃນເຮືອນແມ່ນີ້ ເງິນຊົດເຊີຍແມ່ຫັ່ນຮ້ານສ້ອມ ຂອງແມ່ມີຄົບໝົດ ເພິ່ນໃຫ້ ແມ່ແຕ່ 30 ລ້ານ ກະບໍ່ພໍ ເຄື່ອງຂອງແມ່ມັນຫລາຍ ມູນຄ່າມັນກໍກວ່າແຫລະ 30 ລ້ານ ຊິໃຫ້ 50 ເປີເຊັນກ່ອນ ແຕ່ໂຕ 50 ເປີເຊັນ ຈັກວ່າ ເດືອນໃດປີໃດ ຈຶ່ງຈະໄດ້.”

ແຕ່ຜູ້ປະສົບພັຍເຂື່ອນແຕກ ບາງຄອບຄົວ ຍັງບໍ່ຍອມເຊັນຮັບເອົາຄ່າຊົດເຊີຍ ຄັ້ງທຳອິດນີ້ເທື່ອ ເພາະພວກເຂົາເຈົ້າເຫັນວ່າ ຄ່າຊົດເຊີຍ ໜ້ອຍກວ່າຜົນເສັຽຫາຍຫລາຍ, ດັ່ງຜູ້ປະສົບພັຍຄົນນຶ່ງ ຢູ່ບ້ານໃໝ່ ໄດ້ກ່າວກັບ ວິທຍຸເອເຊັຽເສຣີ ໃນມື້ວັນທີ 10 ເດືອນ ກໍຣະກະດາ ປີ 2019 ນີ້ວ່າ:

“ອ້າຍບໍ່ໄດ້ເຊັນໃນໝົດບ້ານ ຍັງເຫລືອຄອບຄົວອ້າຍ ທີ່ຍັງບໍ່ໄດ້ເຊັນ; ອັນນີ້ກໍຍ້ອນວ່າ ມັນບໍລົງລອຍກັນແລ້ວ ເຂົາຕັດຊັບສິນຫລາຍຢ່າງ ຂໍ້ມູນກໍບໍ່ແຈ້ງ ເພິ່ນເອົາຂໍ້ມູນມືດມາໃຫ້ເຊັນ ກໍເລີຍບໍ່ເຊັນ ໝາຍຄວາມວ່າ ເພິ່ນເອົາແຕ່ອົງການຈັດຕັ້ງ ເຂົ້າໄປເບິ່ງ ແລ້ວຕັດຊັບສິນເຮົາ ແລ້ວມາໃຫ້ເຮົາເຊັນບາດນີ້ ບໍ່ຮູ້ວ່າໂຕເລກ ຈະໄດ້ຊ່ຳໃດ ເມື່ອມາໃຫ້ເຊັນ ຈຶ່ງຮູ້ວ່າໄດ້ຊ່ຳນັ້ນ ມັນບໍ່ເໝາະສົມ ມາເບິ່ງເຄື່ອງຂອງເຮົາ ຖືກຕັດຫລາຍຣາຍການ.”

ຕໍ່ບັນຫາທີ່ວ່າ ເມື່ອຜູ້ປະສົບພັຍເຊັນແລ້ວ ປານໃດ ພວກເຂົາຈຶ່ງຈະໄດ້ເງິນຄ່າຊົດເຊີຍ, ທ່ານ ບຸນໂຮມ ພົມມະສານ ເຈົ້າເມືອງສນາມໄຊ ແຂວງອັດຕະປື ຕອບວ່າ:

“ດຽວນີ້ ກຳລັງດຳເນີນການ ກະບໍ່ຄາຈຸດໃດ ເພາະຕ້ອງໄດ້ເຮັດເອກກະສານ ໃຫ້ລະອຽດ ໂດຍສະເພາະແມ່ນ ການເບີກບັນຊີ ໃຫ້ແຕ່ລະ ຄອບຄົວ ຄອບຄົວ ບໍຣິສັດພັທນາໂຄງການ ຈະໄດ້ໂອນເງິນເຂົ້າບັນຊີ ເຂົາເຈົ້າໂລດ ບໍໄດ້ຈ່າຍຜ່ານຣັດ ຈຳນວນ ຄອບຄົວມັນກໍຫລາຍ 5 ບ້ານ, ສະນັ້ນ ຕ້ອງໄດ້ດຳເນີນເອົາທະນາຄານໄປເປີດບັນຊີ ແລ້ວເບື້ອງບໍຣິສັດ ລົງໄປເຮັດວຽກກັບແຕ່ລະຄອບຄົວ ຮວມກັບຣັດ ມີໜັງສື ເຊັນຢັ້ງຢືນ ຮ່ວມນຳກັນການຮັບຮອງ ເງິນ 50 ເປີເຊັນ ລ່ວງໜ້າ.”

ນອກຈາກຄ່າຊົດເຊີຍ 50 ເປີເຊັນແລ້ວ, ທາງການ ກໍໄດ້ຈັດສັນທີ່ດິນ ໃຫ້ປະຊາຊົນຄອບຄົວລະນຶ່ງຕອນ ກວ້າງ 20 ແມັດ ຍາວ 40 ແມັດ ເພື່ອປຸກເຮືອນຖາວອນ ພາຍໃນສອງສາມປີ ຂ້າງໜ້າ.

ໃນຂນະດຽວກັນ ກໍໄດ້ແຈກຢາຍໜາມໝາກຈັບ ໃຫ້ແຕ່ລະຄອບຄົວ ເພື່ອໄປລ້ອມຮົ້ວດິນຕອນນັ້ນໄວ້ ແລ້ວໃຫ້ປຸກຄອກໄກ່ໃສ່. ອີກບໍ່ດົນ ທາງການຈະເບີກໄກ່ນ້ອຍໃຫ້ ເພື່ອນຳໄປລ້ຽງ ຢູ່ໃນຄອກນັ້ນ.

ສ່ວນທີ່ດິນເພື່ອເພິ້ມພູນຜລິດຜົນ ທາງການໄດ້ຈ້າງບໍຣິສັດ ເອກກະຊົນບຸກເບີກທີ່ດິນ ແລະໄດ້ແບ່ງປັນໃຫ້ ຜູ້ປະສົບພັຍເຂື່ອນແຕກແລ້ວ ແຕ່ຜູ້ປະສົບພັຍ ເວົ້າວ່າດິນທີ່ບຸກເບີກ ແລະແບ່ງປັນໃຫ້ນັ້ນເປັນດິນແຮ່ ປູກຝັງຫຍັງບໍ່ໄດ້ ແລະ ຈົນເຖິງປັດຈຸບັນ ກໍຍັງບໍ່ມີຜູ້ປະສົບພັຍ ຄົນໃດ ໄປປູກຫຍັງເທື່ອ ມີແຕ່ບໍຣິສັດມາແນະນຳ ແລະ ສເນີຈະຊ່ວຍລົງທຶນ ປູກມັນຕົ້ນ ຫລືອ້ອຍ ເພື່ອຂາຍໃຫ້ບໍຣິສັດ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ