ຣັຖບານລາວວ່າເຂື່ອນຖືກຕ້ອງ ທຸກ ຂັ້ນຕອນ

ຖ້າມກາງ ຄຳ ຮຽກຮ້ອງ ຈາກ ກຸ່ມ ອະນຸຮັກ ທັມມະຊາດ ແລະ ປະຊາຊົນ ທ້ອງຖິ່ນ ໃນ ໂຄງການ ເຂື່ອນ ດອນ ສະໂຮງ ທາງ ການ ລາວ ເວົ້າວ່າ ຕົນໄດ້ ໃຫ້ ຄວາມ ຮ່ວມມື ແບບ ສ້າງສັນ ແລະ ຜົລ ປໂຍດ ຮ່ວມກັນ ທຸກຢ່າງ ກັບ ປະເທດ ໃກ້ຄຽງ ແລະ ພາກສ່ວນ ກ່ຽວຂ້ອງ ໃນ ໂຄງການ ເຂື່ອນ ດອນ ສະໂຮງ ເພື່ອ ໃຫ້ ບັນລຸ ເປົ້າໝາຍ ການພັທນາ ທີ່ ຍືນຍົງ ໃນ ປະເທດ ອ່າງ ແມ່ນ້ຳຂອງ.

ຣັຖບານ ລາວ ໄດ້ ສຶກສາ ສຳຣວດ ການພັທນາ ໂຄງການ ເຂື່ອນ ນໍ້າລິນ ດອນ  ສະໂຮງ ຂນາດ 260 ເມກາວັດ ມາເປັນ ເວລາ 8 ປີ ແລະ ໄດ້ ປະຕິບັດ ຕາມ ຂັ້ນຕອນ ຂໍ້ຕົກລົງ ທຸກ ຢ່າງ ໃນ ສັນຍາ ແມ່ ນ້ຳຂອງ ດັ່ງການ ແຈ້ງການ, ການ ປຶກສາ ຫາລື ລ່ວງຫນ້າ ແລະ ໄດ້ໃຫ້ ເວລາ  ແກ່ ປະເທດ ເພື່ອນບ້ານ ກວ່າ ນື່ງ ປີ  ໃນການ ໂອ້ລົມ ກັນ ແລະ ປະເມີນ ຜົລ ກະທົບ ຈາກ ໂຄງການ ດັ່ງກ່າວ.

ກຸ່ມ ນັກ ວິຊາການ ຈາກ ຄນະ ກັມມາທິການ ແມ່ນ້່ຳຂອງ ກໍໃຫ້ ການ ຢືນຢັນ ວ່າ ເຂື່ອນ ດອນ ສະໂຮງ ຖ້າ ສ້າງແລ້ວ ຈະ ບໍ່ສົ່ງຜົລ ກະທົບ ຂ້າມແດນ ໄປສູ່ ປະເທດ ເພື່ອນບ້ານ ບໍ່ວ່າ ຈະ ເປັນເຣື້ອງ ຄຸນນະພາບ ຂອງນ້ຳ ຣະບົບ ນິເວດ ການໄຫລ ຂອງນ້ຳ ດີນຕະກອນ ຫລື ສິດ ເສຣິພາບ ໃນ ການ ເດີນ ເຮືອ. ຜົລກະທົບ ໃນ ຊ່ວງການ ສ້າງ ເຂຶ່ອນ ຈະຖືກ ຄວບຄຸມ ໂດຍ ເທັກໂນ ໂລຈີ ທີ່ ທັນສມັຍ.

ທາງການ ລາວ ໄດ້ໃຫ້ ຄວາມ ສຳຄັນ ຕໍ່ການ ຂຶ້ນລົງ ຂອງປາ ເປັນ ບັນຫາ ທີ່ ຫນ້າ ເປັນຫວ່ງ. ໃນການ ແກ້ໄຂ ບັນຫາ ດັ່ງ ກ່າວ ກຸ່ມ ກໍ່ສ້າງ ເຂື່ອນ ຈະ ເຈາະຮູນ້ຳ ທີ່ ໃກ້ກັບ ຮູ ສະໂຮງ ໃຫ້ເລິກ ແລະ ກວ້າງ  ກວ່າເກົ່າ ເພື່ອໃຫ້ ປາ ສາມາດ ລອຍ ຂື້ນລົງ ໄດ້ ຕຣອດປີ ຮ່ວມທັງ  ຈະທຸບມ້າງ ສິ່ງ ກີດຂວາງ ບ່ອນປາ ຂຶ້ນລົງ ແລະ ຈະມີ ໂຄງ ການ ອະນຸຮັກ ພັນປາ ການ ລ້ຽງປາ ກະຊັງ ເພື່ອໃຫ້ ຊາວບ້ານ ສາມາດ ຫາປາ ໄດ້ ຕລອດປີ. ຈຳນວນ ປາ ຈະຫລາຍ ກວ່າເກົ່າ ຈະບໍ່ ໜ້ອຍລົງ ຍ້ອນ ໂຄງການ ເຂື່ອນ ດອນສະໂຮງ.