ຂ່າວຄືບໜ້າຣັຖມົນຕຣີ ການເງິນ

ສົມເນ
2016-01-14
ອີແມວລ໌
ຄໍາເຫັນ
Share
ພິມ
ທ່ານ ພູເພັດ ຄໍາພູນວົງ ອະດີດ ຣັຖມົນຕຣີ ກະຊວງການເງິນ ສປປ ລາວ
ທ່ານ ພູເພັດ ຄໍາພູນວົງ ອະດີດ ຣັຖມົນຕຣີ ກະຊວງການເງິນ ສປປ ລາວ
LNTV News

ໃນ ກໍຣະນີ ທ່ານ ພູເພັດ ຄໍາພູນວົງ ແລະ ພະນັກງານ ກະຊວງ ການເງິນ ອີກ 4 ຄົນ ກໍາລັງຖືກ ກວດສອບ ກ່ຽວກັບ ການສໍ້ຣາສ ບັງຫຼວງ ເຣື້ອງອອກ ພັນທະບັດ ແລະໂຄງການ ບໍ່ມີຕົວຕົນ ຢູ່ແຂວງ ອຸດົມໄຊ ນັ້ນ, ຫລ້າສຸດ ຄືວ່າ: ທ່ານ ພູເພັດ ຄໍາພູນວົງ ກໍາລັງ ຖືກກັກຕົວ ຫລື ກັກ ບໍຣິເວນ ຢູ່ຫ້ອງການ ກວດກາ ຂອງຄນະ ກໍາມະການ ກົມການເມືອງ ສູນກາງ ພັກ ທີ່ຕັ້ງຢູ່ ຫລັກ 6 ທາງຫລັງ ພິພິດຕະພັນ ໄກສອນ ພົມວິຫານ. ຕາມການ ເປີດເຜີຍ ຂອງ ເຈົ້າໜ້າທີ່ ກະຊວງ ການເງິນ ທ່ານນຶ່ງ ທີ່ ບໍ່ ປະສົງ ອອກຊື່ ໃນວັນທີ 9 ມົກກະຣາ ຜ່ານມາ. ເຈົ້າໜ້າທີ່ ເວົ້າວ່າ ທ່ານ ພູເພັດ ຖືກ ສັ່ງຫ້າມ ບໍ່ໃຫ້ ເດີນທາງອອກ ນອກປະເທດ ໃນຣະຫວ່າງ ທີ່ມືການ ສອບສວນ.

ທ່ານ ພູເພັດ ຄໍາພູນວົງ ເຄີຍມີຕໍາແໜ່ງ ເປັນ ຜູ້ວ່າການ ທະນາຄານ ແຫ່ງ ສປປ ລາວ, ແລະ ຖືກຍ້າຍໄປ ຮັບ ຕໍາແໜ່ງ ຣັຖມົນຕຣີ ກະຊວງ ການເງິນ ໄດ້ ປະມານ 2 ປີ ຫລັງຈາກ ນັ້ນ ກໍຖືກປົດ ຕໍາແໜ່ງ ໃນ ເດືອນ ມິນາ ປີ 2014 ແລະ ຖືກຍ້າຍໄປ ຮັບໜ້າທີ່ ຢູ່ ຫ້ອງວ່າການ ຣັຖບານ.

ໃນຊ້ວງ ທີ່ ທ່ານ ພູເພັດ ຖືກປົດ ຕໍ່າແໜ່ງ ຈາກ ຣັຖມົນຕຼີ ກະຊວງ ການເງິນ ນັ້ນ ກໍມີຂ່າວ ວ່າ ທ່ານ ຖືກປົດ ຕໍາແໜ່ງ ແບບ ບໍ່ເປັນທັມ ຍ້ອນວ່າ ໄປຂັດຜົນ ປະໂຫຍດ ຜູ້ທີ່ມີ ຕໍາແໜ່ງ ສູງກວ່າ ແຕ່ວ່າ ແຫລ່ງຂ່າວ ທີ່ໃກ້ຊິດ ຄອບຄົວ ຂອງ ທ່ານ ພູເພັດ ໄດ້ກ່າວຕໍ່ ເອເຊັຽ ເສຣີ ວ່າ, ໃນສະໄໝ ທີ່ ທ່ານ ພູເພັດ ເປັນ ຣັຖມົນຕຣີ ກະຊວງ ການເງິນ ໄດ້ມີການ ອະນຸມັດ ງົບປະມານ ນອກແຜນ ຫຼາຍໂຄງການ ຈົນເຮັດໃຫ້ ບໍ່ມີເງິນ ເຫລືອ ຢູ່ໃນຄັງເງິນ ແຫ່ງຊາດ ແລະ ບໍ່ມີເງິນ ຢູ່ໃນ ທະນາຄານ ກາງ.

ສ່ວນ ພະນັກງານ 4 ຄົນ ຮວມທັງ ເລຂາ ຂອງ ທ່ານ ພູເພັດ ທີ່ ເປັນຄົນໃກ້ຊິດ ກັບ ທ່ານ ພູເພັດ ປັດຈຸບັນ ແມ່ນ ຖືກກັກຂັງ ຢູ່ ຄຸກ ໂພນທັນ ເມືອງ ສີສັດຕະນາກ ນະຄອນຫຼວງ ວຽງຈັນ, ແລະ ຍັງມີ ເຈົ້າແຂວງ ອຸດົມໄຊ ອີກຄົນນຶ່ງ ທີ່ ກໍາລັງຖືກ ສືບສວນ ຢູ່.

ຄໍາເຫັນ (3)
Share

ຄ.ນະຄຳມ່ວນ

ຈາກ ທ່າແຂກ

ຣັຖມົນຕຣີການເງິນ ບໍ່ແມ່ນລູກຄີງແທ້ໆ ຂອງພັກ-ລັດ ສປປລາວ ສະນັ້ນ ຈຶ່ງເປັນການຕົບຍູງເພື່ອຈູງໃຈ ພວກຄົນເບິ່ງ, ຕົວຫົວໂປ່ແທ້ໆ ເຂົາບໍ່ສາມາດແຕະຕ້ອງໄດ້ ໂດຍເດັດຂາດ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 19, 2016 05:47 PM

ຕ້ານກຸ່ມຄົນບໍ່ດີ

ຈາກ ລາວ

ດີແລ້ວ ຜູ້ມີຄວາມຜິດຕໍ່ຊາດ ຕ້ອງ ຮັບຜິດຊອບ ໃນຄວາມເສຍຫາຍ. ຢາກໃຫ້ກວດສອບຍ້ອນຫລັງ ນາຍົກ ສະໃໝ່ກ່ອນ ສະໃໝ່ປັດຈຸບັນ ແລະ ປະທານປະເທດ ບາງເທື່ອ ຈະພົບສິ່ງບໍດີຕື່ມ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2016 11:42 PM

Louk Lao Luagprabang

ຈາກ Chiang Mai

Corruption in Laos not just some officials but all levels from the lowest to the highest. Why Phak Lat target a few officials only? If these people have the right to seek for a lawyer to defense their case the fire will be big over Laos.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2016 11:42 PM

ເຕັມຫນ້າ