ເຂດເສດຖະກິດພິເສດ ສາມຫຼ່ຽມຄຳ ຈະກວາດລ້າງແກ້ງຄອລເຊັນເຕີ້ເລີ່ມ 26 ສິງຫານີ້

ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງແຂວງບໍ່ແກ້ວ ປະກາດມາດຕະການເດັດຂາດກວາດລ້າງແກ້ງຄອລເຊັນເຕີ້ ຜູ້ຝ່າຝືນລັກລອບເຄື່ອນໄຫວຕອບແຊັດ ຫຼື ສໍ້ໂກງທາງໂທລະຄົມ ຈະຖືກດຳເນີນຄະດີຕາມລະບຽບກົດໝາຍ ຢ່າງເຂັ້ມງວດ ແລະ ເດັດຂາດນັບແຕ່ວັນທີ 26 ສິງຫາ 2024 ເປັນຕົ້ນໄປ. ດັ່ງເຈົ້າໜ້າທີ່ຄຸ້ມຄອງເຂດເສດຖະກິດ ພິເສດສາມຫຼ່ຽມຄຳ ທ່ານກ່າວຕໍ່ວິທຍຸເອເຊັຽເສຣີວັນທີ 26 ສິງຫາ ນີ້ວ່າ:

“ເຮົາກໍ່ດໍາເນີນຕາມກົດໝາຍຫັ້ນແຫຼະ ເພາະວ່າເຮົາກໍ່ໄດ້ປະກາດແຈ້ງການ ໄປແລ້ວເດ້ແຕ່ວ່າບາງບໍລິສັດເນາະຍັງມີການເຄື່ອນໄຫວ ຫັ້ນນ່າຢາກບໍ່ຢາກຖ້າກ່ອນສິດຳເນີນຄະດີ ຕ້ອງໄດ້ຈັບຕົວຈິງມີຫຼັກຖານເຈົ້າໜ້າທີ່ ກໍ່ລົງຕ້ເອງໄດ້ລົງໄປກວດຢ່່າງເຂັ້ມງວດຫັ້ນນ່າ.”

ການກວດລ້າງແກ້ງຄອລເຊັນເຕີ້ ທີ່ຜ່ານມາບໍ່ໄດ້ແຈ້ງໄປຍັງຫົວໜ່ວຍທຸລະກິດ ວ່າຈະມີຕຳຫຼວດລົງກວາດລ້າງຈຶ່ງເຮັດໃຫ້ຕຳຫຼວດລາວ ແລະຈີນມ້າງກຸ່ມແກ້ງສໍ້ໂກງທາງໂທລະຄົມ ໄດ້ຈຳນວນຫຼາຍເທື່ອດັ່ງປະກົດໃຫ້ເຫັນໃນຂ່າວພາຍໃນ ແລະ ຕ່າງປະເທດ. ຫຼ້າສຸດນີ້ຄະນະຄຸ້ມຄອງເຂດເສດຖະກິດ ພິເສດສາມຫຼ່ຽມຄຳຈະສືບຕໍ່ ຕິດຕາມການລັກລອບເຄື່ອນໄຫວຕອບແຊັດຕື່ມ. ດັ່ງເຈົ້າໜ້າທີ່ຜູ້ຮູ້ຈັກວຽກດັ່ງກ່າວທ່ານກ່າວວ່່າ:

“ບໍ່ແມ່ນແຕ່ 26 ເດ້ກາງເດືອນເພິ່ນຕະຫຼອດເດ້ ບໍ່ໄດ້ແຈ້ງເປັນທາງການແລ້ວເດ້ ລົງໂລດໂຕທີ່ເພິ່ນແຈ້ງການມາມັນກໍ່ໄລຍະໜຶ່ງແລ້ວເດ້ ກໍ່ຕິດຕາມຢູ່ເດ້ກໍ່ເຮົາແຈ້ງໄປແລ້ວ ເຈົ້າບໍ່ຟັງຂ້ອຍຂ້ອງກໍ່ລົງຫັ້ນແຫຼະ.”

ແຕ່ຢູ່ຕາມສື່ສັງຄົມອ໋ອນລາຍນ໌ ຍັງມີການເປີດຮັບສະມັກພະນັກງານຕອບແຊັດ ແລະ ມີຄົນຫຼາຍສັນຊາດສະມັກໄປເຮັດວຽກນັ້ນຍ້ອນນາຍໜ້າ ຮັບປະກັນວ່າຈະບໍ່ຕົກວຽກເນື່ອງ ຈາກບໍລິສັດຕອບແຊັດທີ່ຍັງເປີດດຳເນີນການເປັນບໍລິສັດ ຂອງຈີນຂະໜາດໃຫຍ່ ແລະ ໄດ້ເສັຍເງິນສິນບົນໃຫ້ເຈົ້າໜ້າທີ່ລາວແລ້ວ. ສ່ວນການກວາດລ້າງແກ້ງຄອລເຊັນເຕີ້ ແມ່ນສີ້ນສຸດລົງຕັ້ງແຕ່ວັນທີ 25 ສິງຫາ ທີ່ຜ່ານມາເຊິ່ງຕຳຫຼວດ ລາວ-ຈີນ ກໍ່ກີນລ້ຽງກັນຈົບແລ້ວ. ດັ່ງພະນັກງານຕອບແຊັດໃນເຂດເສດຖະກິດ ພິເສດສາມຫຼ່ຽມຄຳທ່ານກ່າວວ່າ:

“ກໍ່ຮັບຄົນເຂົ້າວຽກປົກກະຕິຫັ້ນແຫຼະ ແຕ່ວ່າບໍລິສັດອື່ນນີ້ຮູ້ວ່າປິດຫຼາຍແລ້ວຕຶກຂອງຂ້ອຍນີ້ແມ່ນຕຳຫຼວດບໍ່ໄດ້ເຂົ້າກວດເດ້ ພວກຂ້ອຍຫັ້ນເສັຍເງິນໃຫ້ກັບລັດເນາະ ດຽວນີ້ກວດແລ້ວໄປໝົດແລ້ວ ມັນເລີ່ມແຕ່ວັນທີ 9 ເດືອນ 8 ແລ້ວຈົນຮອດວັນທີ 25 ເວົ້າໄປຈັ່ງຊັ້ນແຫຼະຈ່າຍເງິນແລ້ວເຂົາກໍ່ປິດປາກ ຄັນຕຳຫຼວດຈີນນີ້ເວົ້າບໍ່ໄດ້ຕຳຫຼວດສາກົນນີ້ອອກຕັ້ງແຕ່ວັນທີ 25 ແລ້ວກີນລ້ຽງແລ້ວເຂົ້າກໍ່ອອກແລ້ວກ.”

ສ່ວນພະນັກງານຕອບແຊັດ ໃນເຂດເສດຖະກິດພິເສດສາມຫຼ່ຽມຄໍາ ອີກທ່ານໜຶ່ງກ່າວຜ່ານບົດສົນທະນາສ່ວນຕົວວ່າບໍລິສັດຕອບແຊັດ ຂອງຄົນຈີນທີ່ຕົນເອງເຮັດວຽກຍັງມີເປີດຮັບສະມັກ ພະນັກງານຕອບແຊັດຍ້ອນບໍລິສັດມີເອກະສານ ແລະ ເສັຍພາສີອາກອນໃຫ້ທາງການລາວຢ່າງຖືກຕ້ອງ ແລະ ສ່ວນຫຼາຍທີ່ເລືອກມາເຮັດວຽກຕອບແຊັດ ກໍ່ຍ້ອນວ່າມີເປົ້າໝາຍດຽວກັນຄືມີວຽກແລະມີເງິນ. ດັ່ງທ່ານກ່າວວ່າ:

“ທາງຫົວຫນ້າເພິ່ນມີເອກະສານເສັຍອາກອນ. ທາງໃນກະຍັງມີຫລາຍຕຶກຍັງເຮັດຕອບແຊັດ ຢູ່ໃຜກະມາຫາເງິນ. ຖ້າຂາດວຽກກະຂາດເງິນໃຜກະຢາກເຮັດວຽກຖ້າເຮົາບໍ່ມີວຽກເງິນກະບໍ່ມີ.”

ທາງດ້ານເຈົ້າໜ້າທີ່ຄະນະຄຸ້ມຄອງ ເຂດເສດຖະກິດພິເສດສາມຫຼ່ຽມຄໍາ ຜູ້ດຽວກັນກັບຂ້າງເທີງກ່າວວ່າສຳລັບຄວາມກັງວົນໃຈ ທີ່ກຸ່ມແກ້ງສໍ້ໂກງຢູ່ເຂດເສດຖະກິດພິເສດ ຈະບໍ່ໝົດໄປນັ້ນແມ່ນໄດ້ປະກອບຄຳເຫັນຢູ່ໃນກອງປະຊຸມ ດຳເນີນການລຶບລ້າງກຸ່ມແກ້ງສໍ້ໂກງທາງໂທລະຄົມ ຂ້າມຊາດຢູ່ເຂດເສດຖະກິດພິເສດສາມຫຼ່ຽມຄຳແລ້ວ ເຊິ່ງຂື້ນຢູ່ກັບວ່າຕຳຫຼວດປະຈຳເຂດຈະປະຕິບັດຕໍ່ກຸ່ມແກ້ງດັ່ງກ່າວໄດ້ໝົດຫຼືບໍ່. ດັ່ງຍານາງກ່າວວ່າ.

“ເຮົາກໍ່ຕ້ອງປະສານນໍາພາກສ່ວນທີ່ກ່ຽວຂ້ອງ ປະສານນໍາເຈົ້າໜ້າທີ່ຕໍາຫຼວດແດ່ຫັ້ນນ່າ ເຂົາເຈົ້າຈະມີລະບຽບແນວນັ້ນແນວໃດຢູ່ໃນຂົງເຂດນັ້ນ ແມ່ນຢູ່ເຮົາເຂົ້າຮ່ວມເນາະແຕ່ເຮົາມີຄວາມເຫັນຢູ່ກອງປະຊຸມຫັ້ນແຕ່ວ່າເຂົາເຈົ້າຊິແຈ້ງແນວນັ້ນແນວໃດຢູ່ເຂດພິເສດຫັ້ນນ່າກໍ່ຂື້ນຢູ່ກັບນໍາເຂົາເຈົ້າຫັ້ນນ່າ.”

ເຖິງຢ່າງໃດກໍ່ຕາມຄະນະຄຸ້ມຄອງ ເຂດເສດຖະກິດພິເສດສາມຫຼ່ຽມຄຳ ຍັງແຈ້ງໃຫ້ທຸກຫົວໜ່ວຍທຸລະກິດຕ້ອງໄດ້ຮັບການອະນຸຍາດ ຈາກເຈົ້າໜ້າທີ່ທາງການຈຶ່ງເຄື່ອນໄຫວ ປະກອບອາຊີບໄດ້ພ້ອມທັງໃຫ້ຈ່າຍເງິນເດືອນ, ເງິນປັນຜົນກຳໄລໃຫ້ຄົນງານຂອງຕົນຢ່າງຄົບຖ້ວນ. ພ້ອມກັນນັ້ນບໍ່ໃຫ້ກັກໜັງສືຜ່ານແດນ ແລະເອກະສານ ທີ່ເປັນຂອງສ່ວນຕົວຂອງຄົນງານ. ຖ້າບໍ່ປະຕິບັດຈະຖືກປັບໃໝ ແລະ ຮັບຜິດຊອບຕາມກົດໝາຍ.

ນອກຈາກນັ້ນຂໍ້ມູນຂອງປີ 2024 ພາກສ່ວນທີ່ກ່ຽວຂ້ອງກັກໂຕຜູ້ຖືກຫາທີ່ ຢູ່ໃນກຸ່ມແກ້ງເຄືອຂ່າຍສໍ້ໂກງທາງໂທລະຄົມຢູ່ເຂດເສດຖະກິດ ພິເສດສາມຫຼ່ຽມຄຳໄດ້ທັງໝົດ 2,160 ຄົນ ລວມ 15 ສັນຊາດ. ໃນນັ້ນເປັນຄົນສັນຊາດຈີນຫຼາຍກ່ວາໝູ່ມີເຖິງ 1,317 ຄົນ ຮອງລົງມາກໍ່ເປັນຄົນສັນຊາດລາວ 275 ຄົນ.