ຄົນງານລາວໃນປະເທດ ຍັງຖືກນາຍຈ້າງເອົາປຽບ

ຈຳປາທອງ
2022.01.20
Share on WhatsApp
Share on WhatsApp
ຄົນງານລາວໃນປະເທດ ຍັງຖືກນາຍຈ້າງເອົາປຽບ ພິທີປິດຝຶກອົບຮົມສີມີແຮງງານ ສ້ອມແປງ ຣົຖຈັກ, ແຂວງໄຊສົມບູນ, ວັນທີ 1 ສິງຫາ 2016.
ຮູບພາບ: ພແນກແຮງງານ ແລະ ສວັດດີການສັງຄົມ ແຂວງໄຊສົມບູນ

ມາຮອດປັດຈຸບັນ ຄົນງານລາວຈໍານວນຫລາຍ ທີ່ເຮັດວຽກຢູ່ພາຍໃນປະເທດ ຍັງຖືກນາຍຈ້າງເອົາລັດເອົາປຽບດ້ວຍຫລາຍຮູບແບບ ແລະສິດທິຂອງພວກເຂົາເຈົ້າ ກໍຍັງບໍ່ຖືກປົກປ້ອງເທົ່າທີ່ຄວນ ເຖິງແມ່ນວ່າ ທາງການລາວຈະໄດ້ປະກາດໃຊ້ກົດໝາຍວ່າດ້ວຍແຮງງານເພື່ອປົກປ້ອງສິດຂອງພວກເຂົາເຈົ້າມາແລ້ວກໍຕາມ. ການບໍ່ໄດ້ຮັບເງິນເດືອນຈາກນາຍຈ້າງ ກໍເປັນບັນຫາທີ່ມັກເກີດຂຶ້ນ ກັບຄົນງານໃນພາກອຸດສາຫະກໍາ ທັງທີ່ບໍ່ມີສີມືແຮງງານ ຫລືມີສີມືແຮງງານໜ້ອຍ, ອີງຕາມຄໍາເວົ້າຂອງເຈົ້າໜ້າທີ່ ຜແນກແຮງງານ ແລະສວັດດິການສັງຄົມ ຜູ້ບໍ່ປະສົງອອກຊື່ ແລະຕໍາແໜ່ງ ຕໍ່ວິທຍຸເອເຊັຍເສຣີໃນມື້ວັນທີ 20 ມົກກະຣານີ້.

ພວກທີ່ເຮັດວຽກ ໂດຍທີ່ນາຍຈ້າງບໍ່ຈ່າຍເນາະ ອັນທີ່ 2 ມາກໍ ເງິນເດືອນເຂົາບໍ່ຈ່າຍຕາມປົກຕິ ຕາມທີ່ສັນຍາກັນໄວ້ເນາະ ອໍໂຕນີ້ຈະເວົ້າເຣື່ອງເປັນກັມກອນ ຢູ່ທັງໃນຣະບົບແລະນອກຣະບົບ ກໍມີເບິດເນາະ ໂຮງງານກໍມີເນາະ ຫລືໄປເຮັດວຽກຢູ່ຕາມຮ້ານຄ້່ບໍ່ ຫລືວ່າເປັນເດັກເສີບທົ່ວໆໄປ.

ທ່ານກ່າວຕື່ມວ່າ ບັນຫາການຂູດຮີດແຮງງານ ໂດຍສະເພາະການບໍ່ຈ່າຍຄ່າແຮງງານຕາມ ສັນຍານັ້ນ ເກີດຂຶ້ນກັບຄົນງານ ທັງທີ່ເຮັດວຽກໃນລະບົບ ແລະນອກລະບົບ. ເວົ້າສະເພາະກໍຣະນີຄົນງານເພດຊາຍ ແມ່ນມັກເກີດຂຶ້ນກັບຜູ້ທີ່ເຮັດວຽກເປັນກໍາກອນກໍ່ສ້າງ ແລະຄົນງານໃນພາກການກະເສດ. ສ່ວນຄົນງານເພດຍິງ ມັກເກີດຂຶ້ນກັບຜູ້ທີ່ເຮັດວຽກເປັນຄົນງານໃນໂຮງງານຕັດຫຍິບ ຫລື ບໍລິການຕາມຮ້ານອາຫານຕ່າງໆ.

ເຈົ້າໜ້າທີ່ທີ່ເຮັດວຽກກ່ຽວກັບກົດໝາຍວ່າດ້ວຍແຮງງານນາງນຶ່ງ ເວົ້າໃນມື້ດຽວກັນນີ້ວ່າ ຄົນງານລາວຈໍານວນຫລາຍ ຖືກນາຍຈ້າງບັງຄັບໃຫ້ເຮັດວຽກເກີນເວລາ ທີ່ກົດໝາຍວ່າດ້ວຍແຮງງານກໍານົດ ໂດຍບໍ່ໄດ້ຮັບຄ່າແຮງງານເພີ່ມ ຫລືບໍ່ຄົບຕາມຈໍານວນ ທີ່ນາຍຈ້າງ ແລະລູກຈ້າງ ໄດ້ຕົກລົງກັນໄວ້.

ຢູ່ນໍາໂຮງງານນີ້ກໍ ການເອົາລັດເອົາປຽບນີ້ກໍຈະແມ່ນເຣື່ອງ ການເຮັດ OT ບໍ່ ໃຫ້ຂະເຈົ້າເຮັດກາຍໂມງ ໂດຍທີ່ວ່າບໍ່ໄດ້ຄ່າຈ້າງທີ່ເໝາະສົມ ບໍ່ຈ່າຍຄ່າແຮງງານ ໃຫ້ເປັນເດືອນຈັ່ງຊີ້ ແລ້ວກໍເກັບຄ່າແຮງງານນັ້ນໄວ້ ວັນເວລາທີ່ຂະເຈົ້າຂໍຈັ່ງຊີ້ ຂະເຈົ້າຈະໄດ້ຕາມທີ່ເງິນເດືອນຂອງຂະເຈົ້າບໍ່.

ແລະວ່າ ທີ່ຜ່ານມາ ຄົນງານລາວຈໍານວນຫລາຍ ບໍ່ມີຄວາມຮູ້ກ່ຽວກັບກົດໝາຍວ່າດ້ວຍແຮງງານ ແລະສວັດດິການສັງຄົມຕ່າງໆ ທີ່ພວກເຂົາເຈົ້າຄວນຈະໄດ້ຮັບ ໂດຍສະເພາະ ຊົນເຜົ່າໃນເຂດຫ່າງໄກ ທີ່ໄດ້ຍ້າຍເຂົ້າມາເຮັດວຽກຢູ່ໃນຕົວເມືອງ, ເຂດອຸດ ສາຫະກໍາ ຍ້ອນບໍ່ຮູ້ພາສາລາວດີ. ເມື່ອຖືກຂູດຮີດແຮງງານ ພວກເຂົາເຈົ້າກໍບໍ່ສາມາດເຂົ້າເຖິງຂະບວນການຍຸຕິທໍາໄດ້ພໍເທົ່າໃດ.

ອີງຕາມກົດໝາຍວ່າດ້ວຍແຮງງານ ມາດຕຣາ 51, ເວລາເຮັດວຽກປົກຕິ ຈະຕ້ອງບໍ່ກາຍ 6 ມື້ຕໍ່ອາທິດ, ເຮັດວຽກບໍ່ກາຍ 8 ຊົ່ວໂມງຕໍ່ມື້, ມີເວລາພັກຜ່ອນບໍ່ຫລຸດ 60 ນາທີ. ແລະມາດຕຣາ 114 ຣະບຸວ່າ ມື້ປົກກະຕິ ຫາກມີການເຮັດວຽກເພີ່ມໂມງ ລະຫວ່າງ 17:00 ໂມງຫາ 22:00 ໂມງ ນາຍຈ້າງຈະຕ້ອງຈ່າຍຄ່າແຮງງານ ເພີ່ມຈາກອັດຕຣາຈ້າງງານປົກຕິ 150%. ສ່ວນການເຮັດວຽກລະຫວ່າງ 22:00 ໂມງຫາ 6:00 ໂມງ ຕ້ອງຈ່າຍເພີ່ມ 200%. ແລະມາດຕຣາ 115 ຣະບຸວ່າ ມື້ພັກປະຈໍາອາທິດ ແລະມື້ພັກທາງຣັຖການ ຫາກມີການເຮັດວຽກເພີ່ມໂມງ ລະຫວ່າງ 6:00 ໂມງ ຫາ 16:00 ໂມງ ຕ້ອງຈ່າຍຄ່າແຮງງານເພີ່ມ 250%, ລະຫວ່າງ 16:00​ ໂມງຫາ 22:00 ໂມງ ຕ້ອງຈ່າຍຄ່າຈ້າງແຮງງານເພີ່ມ 300% ແລະລະຫວ່າງ 22:00 ໂມງຫາ 6:00 ໂມງຕ້ອງຈ່າຍເພີ່ມ 350%.

ປະຊາຊົນຢູ່ແຂວງຜົ້ງສາລີຜູ້ນຶ່ງ ເວົ້າຕໍ່ວິທຍຸເອເຊັຍເສຣີໃນມື້ວັນທີ 20 ມົກກະຣານີ້ວ່າ ທີ່ຜ່ານມາ ທາງການລາວໄດ້ອະນຸຍາດໃຫ້ບໍຣິສັດຕ່າງປະເທດ ໂດຍສະເພາະບໍຣິສັດເອກກະຊົນຈີນ ເຂົ້າມາດໍາເນີນທຸຣະກິດຢູ່ລາວ ຊຶ່ງບໍຣິສັດຈີນນີ້ ຈະມີຫົວໜ້າເປັນຄົນຈີນ ແລະເປີດຮັບສມັກເອົາຄົນງານລາວ ເຂົ້າໄປເຮັດວຽກ. ເມື່ອຄົນງານລາວເຮັດວຽກງານິດພາດ ບໍ່ຖືກໃຈ ກໍມັກຖືກຄົນຈີນທໍາຮ້າຍຮ່າງກາຍ ໂດຍບໍ່ໄດ້ຮັບການຄຸ້ມຄອງທາງກົດໝາຍ.

ແຮງງານບາງເທື່ອນີ້ກໍ ໄປທໍາງານເນາະ ບາງເທື່ອກໍຜິດພາດ ແລ້ວກໍມີການໂຕ້ຖຽງ ເກີດທຸບຕີນະດຽວນີ້ ທຸບຕີຕ່ອຍຕີ ບາດເຈັບສາຫັດ ດຽວນີ້ນີ໋ຄະດີດັ່ງກ່າວນີ້ ກໍຍັງບໍ່ໄດ້ໄກ່ເກັ່ຽສໍາເຣັດ ນະດຽວນີ້ ຢູ່ຕາມບໍຣິສັດທັມດານີ້ແຫລະ ສ່ວນຫລາຍເປັນບໍຣິສັດຕ່າງປະເທດນີ້ເຂົ້າມານີ້ ການຄຸ້ມຄອງກົດໝາຍລາວເຮົາ ຍັງບໍ່ທັນໜັກແໜ້ນ.

ເຈົ້າໜ້າທີ່ທີ່ເຮັດວຽກກ່ຽວກັບກົດໝາຍວ່າດ້ວຍແຮງງານອີກທ່ານນຶ່ງ ກໍເວົ້າວ່າ ປັດຈຸບັນ ກະຊວງແຮງງານ ແລະສວັດດິການສັງຄົມ ແລະພາກສ່ວນທີ່ກ່ຽວຂ້ອງ ຢູ່ໃນລະຫວ່າງການຮວບ ຮວມຂໍ້ມູນ ກ່ຽວກັບບັນຫາການຂູດຮີດແຮງງານ ຢູ່ພາຍໃນລາວ ເພື່ອນໍາໃຊ້ເຂົ້າໃນການແກ້ໄຂກົດໝາຍວ່າດ້ວຍແຮງງານ ເພື່ອຄຸ້ມຄອງສິດທິຂອງຄົນງານລາວ ບໍ່ໃຫ້ຖືກເອົາລັດເອົາປຽບຈາກນາຍຈ້າງ ແລະປ້ອງກັນບໍ່ໃຫ້ພວກເຂົາເຈົ້າ ຕົກເປັນເຫຍື່ອຂອງການຄ້າມະນຸດ ເນື່ອງຈາກການຂູດຮີດແຮງງານ ແມ່ນເປັນອີກກໍຣະນີນຶ່ງ ທີ່ເຂົ້າຂ່າຍການຄ້າມະນຸດ, ດັ່ງທີ່ທ່ານກ່າວວ່າ:

ໂຕນີ້ ຂູດຮີດແຮງງານເຮົານີ້ ອັນນີ້ເຮົາກໍຈະເປັນການຄ້າມະນຸດ ຄືກັນ ໂຕນີເຮົາກໍາລັງຈະປັບປຸງ ກົດໝາຍໃໝ່ຂຶ້ນໃໝ່ ເພາະວ່າເຮົາເຫັນບັນຫາທີ່ມັນເກີດຂຶ້ນ ແລ້ວກໍຊ່ອງຫວ່າງຂອງກົດໝາຍມັນຍັງມືຢູ່ລະ.

ທີ່ຜ່ານມາ ທາງການລາວ ພະຍາຍາມແກ້ໄຂບັນຫາຄົນງານລາວ ທີ່ຖືກນາຍຈ້າງເອົາລັດເອົາປຽບ ແລະບໍ່ສາມາດເຂົ້າເຖິງຂະບວນການຍຸຕິທໍາໄດ້. ແຕ່ຍັງເຮັດໄດ້ບໍ່ພໍເທົ່າໃດ ຍ້ອນໜ່ວຍງານທີ່ກ່ຽວຂ້ອງຂອງທາງການ ຍັງບໍ່ສາມາດຮວບຮວມຈໍານວນຄົນງານລາວ ທີ່ຖືກນາຍຈ້າງເອົາລັດເອົາປຽບໄດ້ຢ່າງຄັກແນ່ເທື່ອ,ອີງຕາມຄາເວົ້າຂອງທ່ານ ຄໍາຈັນ ສີວັນທອງ ຮອງຫົວໜ້າກົມຄຸ້ມຄອງແຮງງານ ຕໍ່ກອງປະຊຸມກ່ຽວກັບສິດທິຂອງຄົນງານກໍ່ສ້າງ ໃນນະ ຄອນຫລວງວຽງຈັນ ຊຶ່ງເປັນສ່ວນນຶ່ງຂອງ “ໂຄງການສນັບສນູນກິຈກໍາຮາກຫຍ້າ ຜ່ານເຄືອຄ່າຍນາຍຈ້າງ ແລະຄົນງານລະຫວ່າງປະເທດ” ໄດ້ຮັບການສນັບສນູນຈາກຣັຖບານຍີ່ປຸ່ນ ຜ່ານມູນນິທິແຮງງານສາກົລແຫ່ງປະເທດຍີ່ປຸ່ນ ເມື່ອວັນທີ 19 ມົກກະຣານີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ຄວາມເຫັນ

Anonymous
Jan 25, 2022 06:14 PM

ກົດໝາຍແຮງງານທີ່ເຮັດອອກມາໃນມາດຕານັ້ນມາດຕານີ້,ໄດ້ຟັງການສັມພາດແລ້ວມີແຕ່ຊີ້ແຈງແລະບົ່ງບອກແຕ່ກ່ວຽກັບຄົນງານໄຫ້ປະຕິບັດເທົ່ານັ້ນ,ແລະບໍ່ໄດ້ບົ່ງບອກແລະໜັກແໜ້ນໃສ່ກຸ່ມທີ່ເປັນຜູ້ຮັບເໝົາຊາວຕ່າງຊາດທີ່ເຂົ່າມາທໍາທຸລະກິດໃນປະເທດແລະມາຊື້ຈ້າງແຮງງານທີ່ເປັນຄົນລາວ,ອັນນີ້ອາດເປັນຊ້ອງວ່າງໄຫ້ຊາວຕ່າງຊາດຈະເຮັດຫຍັງກໍໄດ້ໂດຍທີ່ເຂົາຢາກຈະເຮັດໄຫ້ກັບຄົນລາວ,ຫຼືວ່າກົດໝາຍອາດຈະໜັກແໜ້ນແຕ່ຜູ້ຄຸ້ມຄອງ,ຜູ່ເຜີຍແຜ່ແລະຜົນຂະຫຍາຍຂອງກົດໝາຍບໍ່ເຂົ້າໃຈລຶກຊື້ງຕໍ່ກົດໝາຍ,ມັນກໍເລີຍເປັນວ່າກົດໝາຍຍັງບໍ່ໜັກແໜ້ນນັ້ນເອັງ,ແລະທຸກກອງປະຊຸມຈະໄດ້ມີປັບປຸງ,ດັດແປງຮ່າງກົດໝາຍຢູ່ລຽນຕິດເກືອບຈະທຸກສບັບສຫຼຸບແລ້ວທຸກຢ່າງເໝືອນເດີມບໍ່ມີຫັຍງປ່ຽນແປງ.

ເຕັມຫນ້າ