ປີການທ່ອງທ່ຽວລາວ 2018

ມະນີຈັນ
2017-12-22
ອີແມວລ໌
ຄໍາເຫັນ
Share
ພິມ
ຈຸດນຶ່ງທີ່ດຶງດູດ ນັກທ່ອງທ່ຽວ ຕ່າງປະເທດກໍແມ່ນ ວັດວາອາຣາມ
ຈຸດນຶ່ງທີ່ດຶງດູດ ນັກທ່ອງທ່ຽວ ຕ່າງປະເທດກໍແມ່ນ ວັດວາອາຣາມ
Courtesy of Jeff Hirschberg

ທາງການສປປລາວ ປະກາດປີທ່ອງທ່ຽວລາວ 2018 ໂດຍບໍ່ມີສິ່ງດຶງດູດ ຫລືກະຕຸ້ນໃຫ້ຜູ້ຄົນ ເປັນຕົ້ນນັກທ່ອງທ່ຽວ ຕ່າງປະເທດ ຢາກ ເດີນທາງ ເຂົ້າມາທ່ຽວ ລາວຫລາຍຂຶ້ນ ແຕ່ຢ່າງໃດ ຍ້ອນວ່າ ສິ່ງຮອງຮັບຕ່າງໆ ທີ່ກ່ຽວຂ້ອງກັບ ການທ່ອງທ່ຽວ ປະເຊີນກັບບັນຫາ ຫຍູ້ງຍາກຫລາຍຢ່າງ ເປັນຕົ້ນກໍແມ່ນໂຮງແຮມ ບ້ານພັກ ບໍ່ມີແຂກເຂົ້າຢູ່ ພໍເທົ່າໃດ. ຢູ່ແຂວງຕ່າງໆ ຈໍານວນແຂກ ມາທ່ຽວຫລຸດລົງ ເຊັ່ນດຽວກັນກັບ ຮ້ານອາຫານ ກໍບໍ່ມີຜູ້ຄົນເຂົ້າ. ຖນົນຫົນທາງ ກໍບໍ່ຮັບປະກັນ ສໍາລັບ ນັກທ່ອງທ່ຽວ.

ຫາກເວົ້າເຖິງເມືອງ ວັງວຽງ ແຂວງວຽງຈັນ ຊຶ່ງເປັນບ່ອນທີ່ນັກທ່ອງທ່ຽວ ນິຍົມກັນໄປທ່ຽວ ຕາມຄໍາເວົ້າຂອງ ເຈົ້າຂອງຮ້ານອາຫານລາວ ທ່ານນຶ່ງແລ້ວແມ່ນວ່າ ທຸຣະກິດ ຂນາດນ້ອຍ ເປັນໂຮງແຮມ ບ້ານພັກ ຮ້ານອາຫານ ຕ້ອງໄດ້ປິດກິຈການ ຫຼາຍແລ້ວ ແຕ່ປີ 2016 ມາ ຍ້ອນນັກທ່ອງທ່ຽວ ໂດຍສະເພາະ ນັກທ່ອງທ່ຽວໄທ ແລະຈາກປະເທດ ອາຊຽນອື່ນໆ ກໍເຂົ້າມາທ່ຽວໜ້ອຍລົງ ບໍ່ຄືແຕ່ກ່ອນ. ແຕ່ປັດຈຸບັນ ມີນັກທ່ອງທ່ຽວຈີນ, ເກົາຫລີ ເຂົ້າມາຫລາຍ ແຕ່ສ່ວນໃຫຍ່ ພວກເຂົາບໍ່ເຂົ້າມາໃຊ້ ບໍຣິການ ໂຮງແຮມ ບ້ານພັກ ຮ້ານອາຫານ ຮ້ານກິນດື່ມ ຂນາດນ້ອຍ ຂອງຄົນລາວ:

"ບ້ານພັກ ເຂົາມາເຊົ່າໂຮງແມໃຫຍ່ໆ ເຂົາເອົາຄົນເຂົາມາເປັນທົວ ແລ້ວກະເປັນງວດຂອງເຂົາ ຮ້ານອາຫານຂອງເຂົາ ທຸກຢ່າງທົວເຂົາ ເຂົາມີຮຸ້ນສ່ວນ ທົວເຂົາ ອີ່ຫຍັງກະແມ່ນຂອງເຂົາ ເກົາຫລີທຸກຢ່າງຄົບວົງຈອນ ມີແຕ່ວ່າພວກທີ່ເຮັດນໍາເກົາຫລີນັ້ນ ໄດ້ເງິນ. ຂະເຈົ້າໄປ ບໍ່ລອດແລ້ວ ມັນບໍ່ມີແຂກ ເພາະວ່າຈີນກັບເກົາຫລີ."

ຢູ່ແຂວງໄຊຍະບູລີ ກໍເປັນທໍານອງດຽວກັນນັ້ນ ເຈົ້າໜ້າທີ່ດ້ານການທ່ອງທ່ຽວແຂວງ ເຜີຍວ່າຄົນຈີນເລີ່ມເຂົ້າມາສັມປະທານ ເຮັດທຸຣະກິດ ໂຮງແຮມ ບ້ານພັກ ແລະຮ້ານອາຫານ ຫລັງຈາກ ທີ່ມີນັກທ່ອງທ່ຽວຈີນ ເລີ່ມເຂົ້າມາແວ່ພັກຫລາຍ. ພວກເຂົາ ບໍ່ຄ່ອຍໃຊ້ບໍຣິການ ໂຮງແຮມບ້ານພັກ ຮ້ານອາຫານ ຂອງຄົນລາວ ຫາກເຂົ້າຮ້ານຂອງຄົນຊາດເຂົາເອງ.

ແລະແຂວງຫລວງພຣະບາງ ຢູ່ເມືອງຫລວງພະບາງ ຊຶ່ງເປັນເມືອງມໍຣະດົກໂລກ ກໍມີບັນຫາທີ່ຄືກັນນັ້ນ. ນັກທ່ອງທ່ຽວ ສ່ວນຫລາຍ ມາເປັນກຣຸບທົວ ຊຸດລະຫລາຍສິບຄົນ ຈາກຈີນ ຈາກເກົາຫລີ ຊຶ່ງມັກເຂົ້າໄປພັກ ໃນໂຮງແຮມ ບ້ານພັກທີ່ໃຫຍ່, ເຮັດໃຫ້ ໂຮງແຮມ ບ້ານພັກ ຮ້ານອາຫານຂນາດນ້ອຍ ຈໍານວນນຶ່ງ ຕ້ອງໄດ້ປິດກິຈການລົງ. ສ່ວນທີ່ເຫລືອ ເພື່ອຄວາມຢູ່ລອດ ກໍຕ້ອງໄດ້ ສ້າງສິ່ງຈູງໃຈ ນັກທ່ອງທ່ຽວ ຮວມທັງຫລຸດຄ່ານັ້ນລຸດຄ່ານີ້ຢູ່ຕລອດ. ຕາມຄໍາເວົ້າຂອງເຈົ້າຂອງ Guesthouse ເມືອງຫລວງພຣະບາງ ທ່ານນຶ່ງ ຕໍ່ RFA:

"ຫລຸດລົງຫລາຍ ຄັນວ່າເຮົາບໍ່ມີໂປຣໂມເຊິນ ມັນບໍ່ມີເລີຍ ເຮົາກະທຸກໃຈຫລາຍ ກະຕ້ອງຫາວິທີ ບ່ອນອື່ນເຂົາກະບໍ່ມີຄືກັນ ກະໝາຍເຖິງເຮົາ ບໍ່ມີແຂກ ມາຢູ່ນີ້ລະ ຜົລກະທົບຈາກ ສະພາບໂດຍກົງ ໂຮງແຮມໃຫຍ່ໆ ຂະເຈົາມັນມີ."

ໃນຂະນະທີ່ຈໍານວນນັກທ່ອງທ່ຽວຕ່າງປະເທດ ຫລຸດລົງຢູ່ນີ້ ທາງການລາວ ກໍໄດ້ປະກາດປີການທ່ອງທ່ຽວລາວ 2018 ໂດຍຫວັງທີ່ຈະ ຕ່າວປີ້ນແນວໂນ້ມ ທີ່ນັກທ່ອງທ່ຽວ ບໍ່ຢາກເຂົ້າມາລາວ ໃຫ້ເຂົ້າມາຫລາຍຂຶ້ນ ເຮັດໃຫ້ນັກທຸຣະກິດ ຫລືຜູ້ປະກອບການ ດ້ານການທ່ອງທ່ຽວ ຂນາດນ້ອຍ ຕ່າງກໍຄົງຝາກຄວາມຫວັງ ໄວ້ນໍາປີທ່ອງທ່ຽວ 2018 ທີ່ທາງການລາວ ໄດ້ປະກາດ ຢ່າງເປັນທາງການ ເມື່ອວັນທີ 28 ຕຸລາ 2017 ນັ້ນ.

ການທ່ອງທ່ຽວລາວ ຕາມຄໍາເວົ້າຂອງທ່ານ ບໍ່ແສງຄໍາ ວົງດາຣາ ຣັຖມົນຕຣີ ກະຊວງຖແລງຂ່າວ ວັທນະທັມແລະທ່ອງທ່ຽວ ຕໍ່ກອງປະຊຸມ ສະພາແຫ່ງຊາດ ເມື່ອເດືອນ ຕຸລາ ທີ່ຜ່ານມາວ່າ ການທ່ອງທ່ຽວລາວ ມີຫລາຍຈຸດທີ່ ເປັນບັນຫາ:

"ການຫລຸດລົງຂອງນັກທ່ອງທ່ຽວ ສາກົລໃນປີ 2016 ແມ່ນມາຈາກຫລາຍປັດໃຈຄື ຣາຄາສິນຄ້າແພງ ແລະຄ່າບໍຣິການຕ່າງໆ ມີຣາຄາແພງ ຖ້າທຽບກັບ ບັນດາປະເທດ ອ້ອມຂ້າງ. ໂຄງຮ່າງພື້ນຖານ ແລະ ສິ່ງອໍານວຍຄວາມສະດວກ ເປັນຕົ້ນແມ່ນ ສາຍການບິນ ໂດຍກົງ ຈາກປະເທດຕລາດ ເປົ້າໝາຍ. ເສັ້ນທາງເຂົ້າສູ່ແຫລ່ງທ່ອງທ່ຽວ ຍັງບໍ່ໄດ້ຮັບ ການປັບປຸງດີຂຶ້ນ ເທົ່າທີ່ຄວນ. ກິຈກັມການທ່ອງທ່ຽວໃໝ່ໆ ບໍ່ທັນຫລາກຫລາຍ. ຄວາມປອດພັຍສໍາລັບ ນັກທ່ອງທ່ຽວ ຍັງບໍ່ທັນຮັບປະກັນດີ ເທົ່າທີ່ຄວນ ຊຶ່ງພາໃຫ້ນັກທ່ອງທ່ຽວ ເສັຽຊີວິດ."

ແຕ່ຕາມບົດຄວາມຂອງທ່ານ Don Ross ທີ່ອອກຜ່ານນິຕິຍະສານ ຣາຍສັບປະດາ TTR ສະບັບວັນທີ 12 ທັນວາ 2017 ແລ້ວແມ່ນວ່າ ປີທ່ອງທ່ຽວ 2018 ທີ່ ສປປລາວ ປະກາດໄປນັ້ນ ຫຍັບໃກ້ເຂົ້າມາທຸກມື້ ໂດຍບໍ່ມີຫຍັງ ທີ່ຈະເຮັດໃຫ້ ປີນັ້ນມີຄວາມ ເປັນພິເສດ ສໍາລັບ ນັກທ່ອງທ່ຽວ ຕ່າງປະເທດ ຊຶ່ງຄົງຕ້ອງໄດ້ຕັ້ງເປັນ ຄໍາຖາມກັນວ່າ ຈະຕ່າວປີ້ນແນວໂນ້ມ ການຫລຸດລົງ ຂອງນັກທ່ອງທ່ຽວ ທີ່ເຂົ້າມາ ທ່ຽວລາວ ນັ້ນໄດ້ຫລືບໍ່.

ຜູ້ຕໍານິວິຈານ ພາກັນອະທິບາຍ ໂຄງການປີທ່ອງທ່ຽວລາວວ່າ ເປັນຄວາມພຍາຍາມ ທີ່ຂາດຄວາມລະມັດລະວັງ ຂອງຣັຖບານລາວ ທີ່ຕົວະນັກທ່ອງທ່ຽວໃຫ້ຫລົງຄິດວ່າ ມີສິ່ງກະຕຸ້ນ ແລະ ມີເຫດຜົລພຽງພໍ ທີ່ຈະເສັຽເງິນ ເຂົ້າໄປທ່ຽວ ປະເທດລາວ ໃນປີ 2018 ທີ່ຈະມາເຖິງນີ້.

ນັກໂຄສະນາຊວນເຊື່ອປີທ່ອງທ່ຽວລາວ ບອກພວກທ່ານວ່າ ປີ 2018 ເປັນປີ ໄປທ່ອງທ່ຽວລາວ ແຕ່ບໍ່ໄດ້ອະທິບາຍ ເຖິງຜົລກໍາໄຣ ທີ່ພວກທ່ານຈະໄດ້ຮັບແນວໃດເລີຍ. ຕອນທີ່ຣັຖບານລາວ ເລີ່ມເວົ້າເຖິງການເປີດປີ ທ່ອງທ່ຽວ 2018 ເມື່ອເດືອນ ຕຸລາ ຜ່ານມາ ກໍຄາດກັນວ່າ ຈະມີອັນຜ່ອນຜັນໃດນຶ່ງ ເພື່ອຊຸກຍູ້ການທ່ອງທ່ຽວນັ້ນ. ໄດ້ມີການເວົ້າກັນ ເຖິງເຣື່ອງວີຊາບໍ່ເສັຽຄ່າ ເພື່ອສົ່ງເສີມການທ່ອງທ່ຽວ ເພື່ອໃຫ້ຊາວຕ່າງປະເທດ ມາທ່ຽວລາວ ຫລາຍຂຶ້ນ. ຜູ້ສັງເກດການ ແລະນັກການຕລາດ ດ້ານການ ທ່ອງທ່ຽວ ຕ່າງກໍຮຽກຮ້ອງ ໃຫ້ປີທ່ອງທ່ຽວ ເປັນປີຜ່ອນຜັນ ເຣື່ອງລະບຽບການທີ່ວ່ານັ້ນ. ແຕ່ຈົນມາເຖິງປັດຈຸ ກໍຍັງບໍ່ທັນເຫັນ ສັນຍານນັ້ນເທື່ອ. ຕາມຣາຍງານຂອງ TTR ຈາກບາງກອກ.

ຜູ້ຊ່ຽວຊານບາງຄົນ ເວົ້າວ່າ ຄ່າຜ່ານແດນ ແລະຄ່າລ່ວງເວລາ ອາດຫລຸດລົງ ໃນປີ 2018 ນັ້ນ. ແລະກໍມີການເວົ້າກັນເຖິງ ການຂຍາຍ ເວລາ ເປີດດ່ານຊາຍແດນບາງແຫ່ງ ທີ່ຕິດກັບໄທ. ແຕ່ແລ້ວກໍເປັນການເວົ້າກັນ ແບບທີ່ບໍ່ມີ ແກ່ນສານໃດໆ ຊຶ່ງເປັນໜ້າ ສົງສານສໍາລັບ ຜູ້ປະກອບການທ່ອງທ່ຽວ ຂອງລາວ ທີ່ຈະຕ້ອງໄດ້ ສ້າງສິ່ງດຶງດູດ ເພື່ອສົ່ງເສີມການ ທ່ອງທ່ຽວ.

ແລະຕາມຄໍາເວົ້າຂອງ ຮອງນາຍົກຣັຖມົນຕຣີ ທ່ານ ສອນໄຊ ສີພັນດອນ ຕໍ່ກອງປະຊຸມຂ່າວ ທີ່ນະຄອນຫລວງວຽງຈັນ ໃນພິທີເປີດ ປີ ທ່ອງທ່ຽວ ແລ້ວແມ່ນວ່າ ມີກິຈກັມການທ່ອງທ່ຽວ ສໍາຄັນ 18 ຢ່າງ ໃນແຂວງຕ່າງໆທົ່ວປະເທດ ເພື່ອຊຸກຍູ້ ປີທ່ອງທ່ຽວ 2018 ຂອງຕົນ ຊຶ່ງມີຮວມທັງການ ຈັດງານບຸນປະຈໍາປີຕ່າງໆ ທີ່ມີຊື່ສຽງຂອງລາວ ເພື່ອຄວາມເປັນພິເສດ ຂອງປີທ່ອງທ່ຽວ.

ໃນຈໍານວນ 18 ກິຈກັມ ທີ່ວ່ານັ້ນ ກໍມີບຸນປີໃໝ່ຂອງເຜົ່າຂະມຸ ໃນແຂວງ ອຸດົມໄຊ, ບຸນດອກຝ້າຍທີ່ແຂວງບໍ່ແກ້ວ, ງານຊ້າງທີ່ແຂວງ ໄຊຍະບູລີ, ບຸນວັດພູທີ່ແຂວງ ຈໍາປາສັກ, ບຸນປີໃໝ່ ຢູ່ເມືອງຫລວງພະບາງ ຮວມຢູ່ດ້ວຍ.

ໃນປີທ່ອງທ່ຽວລາວ 2018 ເຈົ້າໜ້າທີ່ທ່ອງທ່ຽວລາວ ເຊື່ອວ່າ ນັກທ່ອງທ່ຽວຕ່າງປະເທດ ຈະເຂົ້າມາທ່ຽວຫລາຍເຖິງ 5 ລ້ານ 2 ແສນຄົນ, ຈະສ້າງຣາຍໄດ້ເຂົ້າປະເທດ 900 ລ້ານໂດລາ ສະຫະຣັຖ. ປີການທ່ອງທ່ຽວນີ້ ຣັຖບານລາວ ໄດ້ມຸ້ງເປົ້າໝາຍໃສ່ 2 ຕລາດໃຫຍ່ ຄືໄທ ແລະຈີນ.

ກ່ອນໜ້ານີ້ ສປປລາວ ໄດ້ຈັດປີທ່ອງທ່ຽວມາແລ້ວ 2 ເທື່ອ ຄືໃນສົກປີ 1999-2000 ແລະສົກປີ 2011-2012. ສໍາລັບປີການ ທ່ອງທ່ຽວ ລາວ ສື່ມວນຊົນທາງການລາວ ເວົ້າວ່າ ງົບປະມານ ສໍາລັບປີທ່ອງທ່ຽວ ມີປະມານ 2 ລ້ານ 8 ແສນໂດລາ ສະຫະຣັຖ.

ແຕ່ເຖິງຢ່າງໃດກໍຕາມ ຕາມຄໍາເວົ້າຂອງຣັຖມົນຕຣີຖແລງຂ່າວວັທນະທັມ ແລະທ່ອງທ່ຽວ ຕອນເປີດປີທ່ອງທ່ຽວ ແລ້ວແມ່ນວ່າຍັງກໍາລັງ ພິຈາຣະນາ ເຣື່ອງງົບປະມານນັ້ນຢູ່ ຂະນະທີ່ນັກທ່ອງທ່ຽວ ຕ່າງປະເທດເຂົ້າມາລາວ ຫລຸດລົງ 10 ເປີເຊັນໃນປີ 2016 ທຽບໃສ່ປີ 2015 ຄືມາມີ 4 ລ້ານ 2 ແສນ 3 ໝື່ນຄົນ. ແລະໃນ 6 ເດືອນຕົ້ນປີ 2017 ນີ້ ກໍລຸດລົງເຖິງ 9 ຈຸດ 7 ເປີເຊັນ ເຖິງແມ່ນວ່າ ຈະຕັ້ງເປົ້າໝາຍ ເອົາໄວ້ວ່າ ປີ 2017 ຈະມີນັກທ່ອງທ່ຽວ ຕ່າງປະເທດເຂົ້າມາເຖິງ 4 ລ້ານ 9 ແສນຄົນ - ຕາມຂ່າວ ເຄພີແອວລ. ແລະທາງການລາວ ຄາດວ່າຈະເຂົ້າມາເຖິງ 7 ລ້ານ 5 ແສນຄົນໃນປີ 2025.

ເຕັມຫນ້າ