ທາງການເຂັ້ມງວດ ໂຄງການ ພັທນາ

ສິດນີ
2019-02-05
ອີແມວລ໌
ຄໍາເຫັນ
Share
ພິມ
ເສັ້ນທາງທີ່ສ້າງບໍ່ແລ້ວໃນນະຄອນຫຼວງວຽງຈັນ
ເສັ້ນທາງທີ່ສ້າງບໍ່ແລ້ວໃນນະຄອນຫຼວງວຽງຈັນ
RFA

ເມື່ອຫລັງໆມານີ້ ອຳນາດ ການປົກຄອງ ນະຄອນຫລວງວຽງຈັນ ແລະຫລາຍແຂວງໃນລາວ, ໄດ້ຮຽກຮ້ອງໃຫ້ຣັຖບານພິຈາຣະນາໂຄງການ ທີ່ສ້າງໄປແລ້ວຈ່າຍເງິນໃຫ້ຕາມຫຼັງ ຫຼືໂຄງການບໍ່ຜ່ານສະພາ ທີ່ນັກທຸຣະກິດໄດ້ລົງທຶນສ້າງ ໃນລະຍະຜ່ານມາ, ເປັນຕົ້ນການສ້າງໂຄງຮ່າງ ພື້ນຖານ, ຖນົນຫົນທາງ ແລະສາທາຣະນຸປະໂພກ ປະເພດຕ່າງໆ, ບາງໂຄງການກໍ່ສ້າງແລ້ວ ບາງໂຄງການກໍສ້າງ ຍັງບໍ່ທັນແລ້ວ, ແລະ ຫລາຍໂຄງການກໍຖືກຍົກເລີກ ແລະບໍ່ໄດ້ມາຕຖານ ແຕ່ຕ້ອງການເງິນ ທີ່ລົງທຶນນັ້ນຄືນ.

ໃນລະຍະຜ່ານມາ, ໃນຊ່ວງຣັຖບານຊຸດເກົ່າ ບັນດາແຂວງຕ່າງໆ, ໄດ້ອະນຸມັດໂຄງການຕ່າງໆໃຫ້ນັກລົງທຶນສ້າງໄປກ່ອນ, ແລ້ວຣັຖບານ ຈະຈ່າຍໃຫ້ຕາມຫລັງໂດຍບໍ່ຜ່ານສະພາ ຍ້ອນບໍ່ມີເງິນ, ຊຶ່ງບາງໂຄງການກໍສ້າງສຳເຣັດ ແລະບາງໂຄງການກໍຍັງສ້າງບໍ່ແລ້ວ, ຊຶ່ງຣັຖບານ ຊຸດປັດຈຸບັນສັ່ງໃຫ້ຍົກເລີກຫມົດ, ແຕ່ຂະເຈົ້າຕ້ອງການເງິນຄືນ. ດັ່ງນັ້ນຫລາຍແຂວງ, ຕ້ອງການຢາກໃຫ້ຣັຖບານຍື່ນໃຫ້ສະພາພິຈາຣະນາ ໃນເຣື້ອງນີ້.

ໂຄງການດັ່ງກ່າວ ທັງຫມົດນີ້ ບໍ່ມີການປະມູນ, ການປະເມີນຣາຄາການກໍ່ສ້າງສູງກວ່າ ທີ່ທາງການຄາດຫມາຍ ແລະມາຕຖານ ການກໍ່ສ້າງ ກໍບໍ່ໄດ້ມາຕຖານ ຍ້ອນຂາດການກວດກາ. ຫລາຍໂຄງການຜູ້ກໍ່ສ້າງ ຫລຸດຄ່າໃຊ້ຈ່າຍ ເພື່ອຢາກໄດ້ກຳໄຣຫລາຍ ຈຶ່ງເຮັດໃຫ້ມາຕຖານ ການກໍ່ສ້າງຂີ້ຮ້າຍ ແລະເປ່ເພງ່າຍ, ເປັນຕົ້ນຖນົນຫົນທາງ ຂົວແລະຕຶກອາຄານ ຂອງຣັຖບານ, ເຮັດໃຫ້ມີຊ່ອງໂວ່ ໃນການສໍ້ຣາສບັງຫຼວງ ຫລາຍຂຶ້ນ.

ອຳນາດການປົກຄອງ ນະຄອນຫລວງວຽງຈັນ ແລະບັນດາແຂວງ ໄດ້ຍື່ນເຣື້ອງນີ້ເພື່ອພິຈາຣະນາ, ໃນກອງປະຊຸມປະຈຳເດືອນ ຂອງຄນະ ຣັຖບານວ່າງອາທິດທີ່ຜ່ານມາ ເພື່ອຂໍໃຫ້ສນັບສນູນຍື່ນໃຫ້ ສະພາພິຈາຣະນາ ເພື່ອກຸ່ມຜູ້ທີ່ລົງທຶນໄປແລ້ວ ໃນໂຄງການເຫລົ່ານັ້ນ ຖືກຈ່າຍ ເງິນຄືນ.

ແຕ່ ທ່ານ ທອງລຸນ ສີສຸລິດ ນາຍົກຣັຖມົນຕຣີລາວ ກ່າວວ່າ ບໍ່ເປັນຂອງງ່າຍ ທີ່ຈະພິຈາຣະນາເຫັນພ້ອມ ໃນໂຄງການທີ່ບໍ່ຜ່ານສະພາ, ທີ່ເຮັດໄປແລ້ວຈ່າຍເງິນຕາມຫຼັງ ທ່ານວ່າ ຫຼາຍໂຄງການບໍ່ໄດ້ມາຕຖານ ແລະປະເມີນຄ່າໂຄງການສູງເກີນໄປ, ດັ່ງທ່ານກ່າວຕອນນຶ່ງວ່າ:

"ຜ່ານມາ, ແຜນການໄປພໍແຜນການ, ງົບປະມານໄປພໍງົບປະມານ, ແຜນການອອກ ແຕ່ງົບປະມານບໍ່ອອກ, ບໍ່ສນອງໄດ້ກໍຕາມ ເຮັດໄປ ກອ່ນ, ປີ 2019 ນີ້ຊິບໍ່ເຮັດແລ້ວໃດ໋, ພວກເຮົາຊິໃຫ້ອີງໃສ່ງົບປະມານທີ່ມີ, ເພື່ອຈັດສັນໂຄງການຕ່າງໆ ເພາະດຽວນີ້ ຕິດຫນີ້ເຂົາຫລາຍ ແລະຄຸນນະພາບການລົງທຶນ, ໃນລະຍະທີ່ຜ່ານມາຕ່ຳທີ່ສຸດ, ເພາະວ່າໄປຢາຍໃສ່ໂຄງການຕ່າງໆ ໃຫ້ໄດ້ເລີ້ມຕົ້ນ."

ທ່ານຍັງກ່າວເພີ້ມວ່າ, ໂຄງການດັ່ງກ່າວບໍ່ໄດ້ຜ່ານຫລາຍຂັ້ນຕອນ, ແລະການປະເມີນໃນການລົງທຶນກໍສູງເກີນໄປ, ແລະໂຄງການຕ່າງໆ ເຫລົ່ານັ້ນ ກໍບໍ່ຜ່ານການປະມູນໂດຍທົ່ວໄປ. ທ່ານກ່າວເພີ້ມວ່າ:

"ຣັຖບານຊິເນັ້ນໃສ່ການລົງທຶນຂອງຣັຖໃຫ້ມີຄຸນນະພາບສູງຂື້ຶ້ນ, ຂ້າພະເຈົ້າໄດ້ເວົ້າກັບຄນະຣັຖບານແລ້ວ, ເປັນເອກພາບກັນແລ້ວ, ໃຫ້ທ້ອງຖິ່ນ ແລະກະຊວງຕ່າງໆ, ໄປປັບກ່ຽວກັບໂຄງການເຫລົ່ານີ້, ອັນນີ້ ເປັນການປະຢັດຕົ້ນທຶນ ແບບມີປະສິດທິພາບ ສູງ."

ກະຊວງແຜນການແລະການລົງທຶນ ປະຕິເສດທີ່ຈະໃຫ້ຂໍ້ມູນວ່າ, ໂຄງການທີ່ບໍ່ຜ່ານສະພານັ້ນມີຈັກໂຄງການແທ້ໆ ແລະມູນຄ່າໃຊ້ຈ່າຍ ຫລາຍປານໃດ, ແຕ່ຕ້ອງການຢາກໃຫ້ຣັຖບານພິຈາຣະນາ, ຊຶ່ງຝ່າຍຣັຖບານກໍໄດ້ຣາຍງານ ຕໍ່ກອງປະຊຸມສະພາ ວ່າງຫລັງໆມານີ້ວ່າ, ຣັຖບານສາມາດປະຢັດເງິນໄດ້ເຖິງ 419 ລ້ານໂດລາ ຈາກໂຄງການທີ່ປະເມີນຣາຄາສູງເກີນໄປ.

ຫຼາຍແຂວງມີບັນຫາ, ໃນການຈ່າຍເງິນຄືນໃຫ້ນັກລົງທຶນຜູ້ທີ່ສ້າງໂຄງການເຫລົ່ານັ້ນ ທີ່ຍັງບໍ່ໄດ້ເງິນຄືນ, ຊຶ່ງໃນປັດຈຸບັນ ຣັຖບານໄດ້ ເຂັ້ມງວດ ຕໍ່ໂຄງການດັ່ງກ່າວ ແລະຈະມີການກວດສອບຢ່າງເຄັ່ງຄັດ, ໃນອະນາຄົດຈະບໍ່ອະນຸຍາດໂຄງການເຫຼົ່ານີ້ອີກ.

ທ່ານວ່າ ເຈົ້າຫນ້າທີ່ແຂວງ, ຜູ້ທີ່ອະນຸຍາດໂຄງການດັ່ງກ່າວ ຈະຖືກຂໍ້ກ່າວຫາຣະເມີດວິນັຍ, ແລະໃຊ້ອຳນາດເກີນຂອບເຂດ, ຣັຖບານ ແລະພັກຣັຖ ຮູ້ດີ ກ່ຽວກັບຫນີ້ສິນ ອັນມະຫາສານຂອງປະເທດ ທີ່ເກີດຈາກໂຄງການເຫລົ່ານີ້.

ອີງຕາມຂໍ້ມູນຈາກ ສະຖາບັນຄົ້ນຄວ້າເສຖກິດແຫ່ງຊາດ, ສປປລາວ ຕິດຫນີ້ຕ່າງປະເທດເຖິງ 60% ຂອງຍອດຜົລຜລິດຮວມຍອດ ຫລື GDP, ດັ່ງນັ້ນ ໂຄງການຕ່າງໆຂອງຣັຖບານ, ໃນອະນາຄົດຕ້ອງເຫັນພ້ອມ ຈາກສະພາກ່ອນຈະສ້າງ.

ແຕ່ນັກວິຊາການເວົ້າວ່າ, ເປັນການຍາກທີ່ຈະປະຕິບັດໄດ້, ຍ້ອນແຂວງແລະຣັຖບານລາວ ຂາດງົບປະມານໃນການພັທນາໂຄງຮ່າງພື້ນຖານ, ເປັນຕົ້ນຖນົນຫົນທາງ, ຂົວ, ໂຮງຫມໍ, ໂຮງຮຽນ, ລະບົບຊົລປະທານ ແລະສາທາຣະນຸປະໂພກ ປະເພດຕ່າງໆ ໃນທົ່ວປະເທດໃນທຸກມື້ນີ້, ຈຶ່ງຈຳເປັນຕ້ອງໃຫ້ນັກລົງທຶນ ສ້າງໄປກ່ອນແລ້ວຈ່າຍຄືນໃຫ້ນຳຫລັງ. ແຕ່ຕ້ອງໄດ້ກວດກາມາຕຖານ ການປະເມີນຄ່າໃຊ້ຈ່າຍ, ແລະໃຫ້ມີ ການປະມູນໂຄງການໂດຍທົ່ວໄປໃຫ້ດີ ແລະຮອບຄອບກັບນັກລົງທຶນ, ຈາກຂັ້ນສູນກາງບໍ່ແມ່ນຈາກທ້ອງຖິ່ນ, ເພື່ອຫຼີກລ້ຽງການສໍ້ຣາສບັງ ຫຼວງ ທີ່ຈະເກີດຂຶ້ນ.

ທ່ານວ່າ ບັນຫາທີ່ຜ່ານມາ, ແມ່ນການສົມຮູ້ຮ່ວມຄິດ ຣະຫວ່າງເຈົ້າຫນ້າທີ່ ໃນເຂດທ້ອງຖີ່ນ ກັບນັກລົງທຶນ, ຈຶ່ງເຮັດໃຫ້ໂຄງການຂາດ ມາຕຖານ ແລະຄ່າໃຊ້ຈ່າຍສຸງເກີນໄປ ຍ້ອນບໍ່ມີການກວດກາ ຈາກສູນກາງ ເຮັດໃຫ້ປະເທດຊາດ ຕິດຫນີ້ຫລາຍຂຶ້ນ, ຈາກໂຄງການ ເຫລົ່ານັ້ນ.

ໂຄງການທີ່ວ່ານັ້ນ ມີຫລາຍໂຄງການ, ໃນນັ້ນຮ່ວມດ້ວຍໂຄງການ ສນາມບິນຫນອງຄ້າງ, ສນາມບິນນານາຊາດ ທີ່ອັດຕະປື, ໂຄງການ ສ້າງຖນົນຫົນທາງ ຫລາຍສາຍໃນຫລາຍແຂວງຂອງລາວ, ສ້າງຕຶກອາຄານຂອງຣັຖບານ ແລະ ສາທາຣະນຸປະໂພກ ປະເພດຕ່າງໆ, ທີ່ຣັຖບານຍັງຕິດຫນີ້ເອກຊົນ ຢູ່ຫລາຍລ້ານໂດລາ.

ຄໍາເຫັນ (2)
Share

(

ໂຕເຈົ້າເອງຂຽນ( Comment)ຂ້ອຍເອງກໍຍັງບໍ່ເຂົ້າໃຈເລີຍວ່າເຈົ້າເວົ້າຫັຍງ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 07, 2019 05:51 AM

khammen

ຈາກ vte

ຂຽນຂ່າວໃຫ້ເຂົ້າໃຈງ່າຍໆແນ່ເດີ, ອ້ານຄືນແນ່ວັກທຳອິດ, ອ່ານເຂົ້າມໃຈຢູ່ບໍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Feb 14, 2019 06:09 AM

ເຕັມຫນ້າ