ສຳປະທານ ໂຄງການຂຸດຄົ້ນຖ່ານຫິນ ທີ່ສາລະວັນ

ບໍລິສັດ ຈຸງຢາອີຊີ  ຊີມັງລາວ ຈຳກັດຜູ້ດຽວ ເຊິ່ງເປັນຂອງ ນັກລົງທຶນຈີນ ກໍາລັງຢູ່ໃນຂັ້ນຕອນ ການເຈລະຈາ ການເຊັນສັນຍາ ສໍາປະທານ ໂຄງການຂຸດຄົ້ນຖ່ານຫິນ ເນື້ອທີ່ 400 ເຮັກຕາຣ໌ ຢູ່ເຂດບ້ານສ້ອຍທົ່ງ ແລະ ບ້ານຫ້ວຍງົວ ເມືອງຕະໂອ້ຍ ແຂວງສາລະວັນ, ໂດຍຄາດວ່າ ຈະເຊັນສັນຍາສໍາເລັດ ພາຍໃນ ເດືອນພະຈິກນີ້, ດັ່ງເຈົ້າໜ້າທີ່ ພະແນກພະລັງງານ ແລະ ບໍ່ແຮ່ ແຂວງສາລະວັນ ທ່ານໜຶ່ງ ກ່າວຕໍ່ ວິທຍຸ ເອເຊັຽ ເສຣີ ໃນວັນທີ່ 1 ພະຈິກ 2024 ນີ້ວ່າ:

“ໂອ… 400 ເຮັກຕາຣ໌ ກໍາລັງຊິ ເຊັນສັນຍາສໍາປະທານຂຸດ ກະຄາດວ່າ ຈະໃນທ້າຍໆປີນີ້ ນິ່ແຫຼະ ຄືຊິແມ່ນເດືອນໜ້າ ເດືອນ 11 ເດືອນນີ້ ນີ່ແຫຼະ ໂຕ 400 ຫັ້ນແຫຼະ ເຂົາທົດລອງແລ້ວ ແມ່ນໆ ຜ່ານບົດ EIA ແລ້ວເດ້.”

ກ່ອນໜ້ານີ້ ລັດຖະບານລາວ ກໍໃຫ້ບໍລິສັດ ຈຸງຢາອີຊີ ຊີມັງລາວ ທົດລອງ ຂຸດຄົ້ນຖ່ານຫິນ ໃນເຂດບ້ານຫ້ວຍງົວ ແລະ ບ້ານສ້ອຍທົ່ງ ມາກ່ອນແລ້ວ ປະມານ 200 ປາຍເຮັກຕາຣ໌ ເມື່ອທົດລອງ ຂຸດຄົ້ນແລ້ວ ມີຜົນຕອບແທນ ດ້ານເສດຖະກິດ ບໍລິສັດ ກໍສໍາປະທານ ຂຸດຄົ້ນຕໍ່ ສໍາລັບທີ່ດິນ ທີ່ໃຫ້ສໍາປະທານ ໃນເຂດບ້ານສ້ອຍທົ່ງ ແລະ ບ້ານຫ້ວຍງົວນັ້ນ ເປັນທີ່ດິນ ຂອງລັດ ທີ່ອາດມີ ປະຊາຊົນ ໄປເຮັດໄຮ່ປູກເຂົ້າ ໃນບໍລິເວນ ດັ່ງກ່າວ.

ສ່ວນຖ່ານຫິນ ທີ່ຂຸດຄົ້ນ ໄດ້ຈາກ ໂຄງການນີ້ ຈະນໍາໄປປ້ອນໂຮງງານຊີມັງ ຂອງບໍລິສັດ ຈຸງຢາອີຊີ ຊີມັງລາວ ທີ່ຕັ້ງຢູ່ພາຍໃນ ແຂວງສາລະວັນ, ອີງຕາມຄໍາເວົ້າ ຂອງເຈົ້າໜ້າທີ່ ພະແນກ ຊັບພະຍາກອນ ທໍາມະຊາດ ແລະ ສິ່ງແວດລ້ອມ ແຂວງສາລະວັນ ກ່າວວ່າ:

“ໂຕນີ້ ກໍາລັງຜ່ານ ແຜນຄຸ້ມຄອງສິ່ງແວດລ້ອມ ວ່າງທິດກ່ອນໆ ຢູ່ສູນກາງເນາະ ມັນເປັນ ດິນລັດເນາະ ດິນພວກບໍ່ແຮ່ ນີ່ນ່າ ຢູ່ເຂດບ້ານ ລັດຖະບານ ກໍອະນຸມັດ ບໍ່ທີ່ຫ້ວຍງົວຫັ້ນ ໃຫ້ຂຸດຄົ້ນ ພວກແຂວງເຮົາບໍ່ໄດ້ອະນຸມັນເນາະ ມັນຂຶ້ນກັບ ຂັ້ນສູນກາງ ເພິ່ນຄຸ້ມຄອງ.”

ຂະນະທີ່ ຊາວບ້ານ ຢູ່ບ້ານຫ້ວຍງົວ ທ່ານໜຶ່ງກ່າວວ່າ ທີ່ດິນເຮັດໄຮ່ເຮັດສວນ ຂອງປະຊາຊົນ ບາງຕອນຢູ່ບ້ານຫ້ວຍງົວນັ້ນ ຖືກໂຄງການດັ່ງກ່າວນີ້ ກວມເອົາແທ້ ສ່ວນເລື່ອງ ການຊົດເຊີຍນັ້ນ ລາວກໍບໍ່ຮູ້ຄັກແນ່ວ່າ ຊາວບ້ານ ໄດ້ຮັບການຊົດເຊີຍແລ້ວ ຫຼື ບໍ່. ຂະນະທີ່ ດິນໃນເຂດບ້ານສ້ອຍທົ່ງ ຖືວ່າ ເປັນດິນຂອງລັດທັງໝົດ ສ່ວນການໃຫ້ ສໍາປະທານທີ່ດິນ ເນື້ອທີ່ 400 ເຮັກຕາຣ໌ນີ້ ຊາວບ້ານສ່ວນຫຼາຍ ກໍຍັງບໍ່ທັນຮູ້ ກ່ຽວກັບ ໂຄງການດັ່ງກ່າວເທື່ອ:

“ແມ່ນໆ ບ້ານຫ້ວຍງົວນີ່ ມັນຈະຖືກ ດິນປະຊາຊົນນີ້ ມັນຖືກ ແຕ່ດິນໄຮ່ດິນສວນ ເປັນບາງບ່ອນ ບາງຕອນຫັ້ນນ່າ ໂຕນີ້ ເຮົາກໍຍັງບໍ່ຮູ້ຈັກ ຫັ້ນນ່າ ຢ້ານບໍ່ໄດ້ດອກ ຄ່າຊົດເຊີຍຫັ້ນ ກະບ້ານສ້ອຍທົ່ງນີ້ ດິນໄຮ່ດິນສວນ ກໍບໍ່ຖືກ ເພາະມັນຢູ່ເທິງພູ ສ່ວນຫຼາຍ ບໍ່ຖືກເຂດປະຊາຊົນ ເພາະວ່າ ເຂົາກໍວ່າ ເປັນດິນລັດ.”

ດ້ານຊາວບ້ານ ຢູ່ບ້ານດູບ ທ່ານໜຶ່ງກ່າວວ່າ ເຂດບ້ານຫ້ວຍງົວ ບ້ານສ້ອຍທົ່ງ ແມ່ນຢູ່ຫ່າງຈາກ ເຂດເທດສະບານ ເມືອງຕະໂອ້ຍ ປະມານ 20 ປາຍກິໂລແມັດ ຊາວບ້ານສ່ວນຫຼາຍ ມີອາຊີບ ເຮັດໄຮ່ ເຮັດສວນມັນຕົ້ນ ໂດຍບໍລິສັດນີ້ ໄດ້ເຂົ້າມາ ເລີ່ມທົດລອງ ຂຸດຄົ້ນ ຕັ້ງແຕ່ ປະມານ ປີ 2017-2018 ແລ້ວ ແລະ ອາດມີ ເນື້ອທີ່ ສໍາປະທານບາງສ່ວນ ທີ່ຖືກດິນໄຮ່ດິນສວນແທ້:

“ສິບປາຍຕິເບາະ 17-18 ເຂົາຂຸດຄົ້ນ ໂອ… ບາງເທື່ອຢູ່ ຄັນວ່າ ດິນໄຮ່ດິນຫຍັງ ກໍຄືຊິແມ່ນຢູ່ ຂອງມັນໃກ້ໃສ່ບ້ານເດ້ ເພາະວ່າ ມັນຢູ່ເທິງ ພູເຂົາເຮັດ ຫາກກໍຕິດກັບ ບ້ານເຂົາ ໃກ້ໆບ້ານ.”

ປະເທດລາວ ມີການສົ່ງອອກຖ່ານຫິນ ຜ່ານດ່ານສາກົນລະໄລ ແຂວງສາລະວັນ ແຕ່ຕົ້ນປີ 2024 ມາຮອດເດືອນກໍລະກົດ ໄດ້ປະມານ 1 ລ້ານກວ່າໂຕນ, ສະເພາະ ໃນ 6 ເດືອນ ຕົ້ນປີ 2024 ມີຈໍານວນ ລົດຂົນສົ່ງ ຖ່ານຫິນ ອອກໄປ ປະເທດຫວຽດນາມ ແລ້ວ 17,300 ຄັນ ສະເລ່ຍ 150-200 ຄັນຕໍ່ມື້, ອີງຕາມການລາຍງານ ຂອງທ່ານ ດາວວົງ ພອນແກ້ວ ເຈົ້າແຂວງ ແຂວງສາລະວັນ ໃນມື້ວັນທີ່ 20 ເດືອນມິຖຸນາ 2024 ນີ້.