2 ບ້ານ ມ.ນາຊາຍທອງ ໄດ້ຄ່າ ຊົດເຊີຍ

ສຸພັດຕາ
2019-01-18
ອີແມວລ໌
ຄໍາເຫັນ
Share
ພິມ
ໂຄງການສ້າງທາງຣົດໄຟ ລາວ-ຈີນ ທີ່ ຕັດຜ່ານ ເມືອງນາຊາຍທອງ ນະຄອນຫຼວງວຽງຈັນ
ໂຄງການສ້າງທາງຣົດໄຟ ລາວ-ຈີນ ທີ່ ຕັດຜ່ານ ເມືອງນາຊາຍທອງ ນະຄອນຫຼວງວຽງຈັນ
RFA

ຊາວບ້ານແຈ້ງສະຫວ່າງ, ຊາວບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ ເປັນສອງບ້ານທຳອິດ ທີ່ໄດ້ຮັບຄ່າຊົດເຊີຍ ຈາກໂຄງການກໍ່ສ້າງທາງຣົດໄຟລາວ-ຈີນ ຊຶ່ງຄນະໄກ່ເກັ່ຽສິ່ງກີດຂວາງ ຂອງໂຄງການກໍ່ສ້າງ ທາງຣົດໄຟ ໄດ້ໃຫ້ຄ່າຊົດເຊີຍ ສອງບ້ານ ດັ່ງກ່າວ ໃນມື້ວັນທີ່ 11 ມົກກະຣາ ນີ້ເປັນເງິນທັງໝົດປະມານ 17 ຕື້ກີບ, ດັ່ງເຈົ້າໜ້າທີ່ ເມືອງນາຊາຍທອງ ນາງນຶ່ງກ່າວຕໍ່ວິທຍຸເອເຊັຽ ເສຣີ ໃນວັນທີ 18 ມົກກະຣາ ນີ້ວ່າ:

“ໄດ້ໝົດແລ້ວ ແຈ້ງສະຫວ່າງນະ ນໍ້າເຢັນກະໄດ້ແລ້ວ ໄດ້ຄົບຖ້ວນໝົດ ບໍ່ມີປັນຫາຫຍັງແລ້ວ ຂະເຈົ້າເຫັນດີ ເອກກະພາບໝົດ ປະຊາຊົນ ບໍ່ໄດ້ຂັດຂ້ອງຫຍັງນະ ເງິນຄຳກະໄດ້ໝົດ.”

ນາງກ່າວຕື່ມວ່າ ເວົ້າສະເພາະຜູ້ໄດ້ຮັບຜົນກະທົບ ຈາກໂຄງການນີ້ ຢູ່ບ້ານແຈ້ງສະຫວ່າງ ມີຈຳນວນປະມານ 20 ຄອບຄົວ ສ່ວນຢູ່ບ້ານ ຫ້ວຍນໍ້າເຢັນ ບໍ່ຮູ້ຈຳນວນຄອບຄົວແນ່ນອນ. ຫຼັັງຈາກໄດ້ເງິນຄ່າຊົດເຊີຍແລ້ວ ຫຼາຍຄອບຄົວກໍໄດ້ເອົາໄປຊື້ດິນບ່ອນໃໝ່ ເພື່ອປຸກເຮືອນໃໝ່ຢູ່ ຍ້ອນເຮືອນບ່ອນເກົ່າ ຖືກໂຄງການມ້າງຖິ້ມ ເຖິງຢ່າງໃດກໍຕາມໂຄງການນີ້ ບໍ່ໄດ້ເອົາທີ່ດິນປູກຝັງ ຂອງຊາວບ້ານແຕ່ຢ່າງໃດ.

ນາງກ່າວຕື່ມອີກວ່າ ຢູ່ເມືອງນາຊາຍທອງ ຂນະນີ້ ຍັງເຫຼືອຜູ້ໄດ້ຮັບຜົນກະທົບອີກ 21 ບ້ານມີ 300 ປາຍຄອບຄົວ ທີ່ຍັງລໍຖ້າຄ່າຊົດເຊີຍ ຈາກໂຄງການສ້າງທາງຣົດໄຟ ລາວ-ຈີນ ນີ້ຢູ່ ຊຶ່ງທາງໂຄງການ ຈະທະຍອຍຈ່າຍຄ່າຊົດເຊີຍເລື້ອຍໆ ຈົນຄົບທຸກ ຄອບຄົວ ພາຍໃນປີນີ້.

ປະຊາຊົນ ທີ່ໄດ້ຮັບຜົນກະທົບຈາກໂຄງການ ສ້າງທາງຣົດໄຟ ລາວ-ຈີນ ມີທັງໝົດ 167 ບ້ານ 13 ເມືອງ ຜ່ານແຂວງຫຼວງນໍ້າທາ, ອຸດົມໄຊ, ຫຼວງພຣະບາງ, ວຽງຈັນ ແລະ ນະຄອນຫຼວງວຽງຈັນ.

ມາຮອດປັດຈຸບັນ ໂຄງການນີ້ ໄດ້ຈ່າຍຄ່າຊົດເຊີຍໃຫ້ປະຊາຊົນແລ້ວ 5 ເມືອງ ໄດ້ແກ່ ເມືອງຫຼວງນໍ້າທາ ແຂວງຫຼວງນໍ້າທາ 20 ຄອບຄົວ, ເມືອງໄຊ ແຂວງອຸດົມໄຊ 13 ຄອບຄົວ, ເມືອງຫີນເຫີບ ແຂວງວຽງຈັນ 21 ຄອບຄົວ ເມືອງໂພນໂຮງ ແຂວງວຽງຈັນ ບໍ່ຣະບຸຈຳນວນ ຄອບຄົວ ແລະຫຼ້າສຸດນີ້ ແມ່ນເມືອງນາຊາຍທອງ ນະຄອນຫຼວງວຽງຈັນ.

ເຕັມຫນ້າ