ການຂໍໜັງສືຜ່ານແດນ ຍັງມີຄວາມຫຍຸ້ງຍາກ ຫຼາຍທີ່ສຸດ

ໃນໄລຍະບໍ່ດົນມານີ້ ຊາວລາວຈໍານວນນຶ່ງ ຕ້ອງໄດ້ລໍຖ້າການເຮັດໜັງມືຜ່ານແດນ ເປັນເວລາດົນ ແລະ ຕ້ອງໄດ້ຈ່າຍຄ່າທໍານຽມ ຫລາຍກ່ວາອັດຕຣາທີ່ທາງການກໍານົດ ເນື່ອງຈາກຍັງມີກຸ່ມນາຍໜ້າ ເຂົ້າໄປສ້າງຄວາມຫຍຸ້ງຍາກ.

ດັ່ງ ຊາວນະຄອນຫລວງວຽງຈັນ ທີ່  ຕ້ອງການ ເຮັດໜັງສືຜ່ານແດນ ເພື່ອເດີນທາງໄປເຮັດທຸຣກິຈ ໃນຕ່າງປະເທດ ນາງນຶ່ງກ່າວຕໍ່  ວິທຍຸເອເຊັຽ ເສຣີ ໃນມື້ວັນທີ 23 ມີນາ 2023 ນີ້ວ່າ: 

“ດ່ວນເນາະ ດ່ວນພາຍໃນ 5 ມື້ ຊິໄດ້ຢູ່ພາຍໃນ 5 ມື້ ໄດ້ໄວໄດ້ຊ້າ ກໍແລ້ວແຕ່ຫັ້ນນ່າ ມັນ 4,000,000 ປະກອບພ້ອມມາແລ້ວ ໄດ້ເຂົ້າສໍາພາດເລີຍ ບໍ່ໄດ້ຖ້າ ຄົນຫລາຍຈັ່ງໃດກໍບໍ່ໄດ້ຖ້າ ມາແລ້ວກໍໄດ້ຍ່າງເຂົ້າສໍາພາດເລີຍ 4,000,000 ສ່ວນອີກກໍຣະນີນຶ່ງແມ່ນ 1,500,000 ແບບວ່າບໍ່ດ່ວນບໍ່ຫຍັງຫັ້ນນ່າ ຖ້າແບບຖ້າອອນລາຍນ໌ແມ່ນຫຍັງກໍປະມານ ຄືວ່າ 5 ເດືອນນີ້ ເດືອນ 4 ນີ້ ຄິວເຕັມແລ້ວ ຄືວ ຫວ່າງນີ້ຄືປະມານວັນທີ 6 ເດື ນ 5.” 

ທ່ານກ່າວຕື່ມວ່າ ສໍາລັບຜູ້ທີ່ຕ້ອງການເດີນທາງ ໄປເຮັດວຽກຢູ່ປະເທດໄທຍ ແລະປະເທດເກົາຫລີໃຕ້ ແບບຜ່ານລະບົບ MOU ນັ້ນ ທາງການລາວ ແລະ ພາກສ່ວນທີ່ກ່ຽວຂ້ອງ ກໍໄດ້ດໍາເນີນການລັດຄີວ ໃຫ້ຄົນກຸ່ມດັ່ງກ່າວນີ້ນໍາ ເຮັດໃຫ້ຜູ້ທີ່ຕ້ອງການເຮັດໜັງສື ເດີນທາງກຸ່ມອື່ນໆ ເປັນຕົ້ນ ນັກທຸຣກິຈ, ຜູ້ທີ່ຕ້ອງການໄປເຮັດວຽກຢູ່ ປະເທດໄທຍ ດ້ວຍວີຊ້າທ່ອງທ່ຽວ ແລະ ຜູ້ທີ່ຕ້ອງການເຮັດໜັງສືຜ່ານແດນ ລ່ວງໜ້າ ຈໍາເປັນຕ້ອງລໍຖ້າເປັນເວລາດົນ. 

ອີງຕາມຂໍ້ກໍານົດກົມກົງສຸນ ກະຊວງການຕ່າງປະເທດ ລະບຸວ່າ ສໍາລັບຜູ້ທີ່ຕ້ອງການ ເຮັດໜັງສືຜ່ານແດນແບບບາງ ຢູ່ນະຄອນຫລວງວຽງຈັນ ຈະມີຄ່າໃຊ້ຈ່າຍຢູ່ປະມານ 450,000 ກີບ/ຫົວ ສ່ວນຕ່າງແຂວງຈະມີຄ່າໃຊ້ຈ່າຍ 500,000 ກີບ/ຫົວ.

ຂະນະທີ່ ການເຮັດໜັງສືຜ່ານແດນ ແບບໜາ ຢູ່ນະຄອນຫລວງວຽງຈັນ ຈະມີຄ່າໃຊ້ຈ່າຍ 600,000 ກີບ/ຫົວ ສ່ວນຕ່າງແຂວງຈະມີຄ່າໃຊ້ຈ່າຍ 700,000 ກີບ/ຫົວ ທັງນີ້ ຈະໃຊ້ໄລຍະເວລາປະມານ 10-15 ວັນ (ບໍ່ຮວມວັນພັກຣາຊການ) ແຕ່ບັນດານາຍໜ້າ ພັດເກັບຄ່າທໍານຽມ ຫລາຍກ່ວາອັດຕຣາ ທີ່ທາງການກໍານົດ.

ດັ່ງນາຍໜ້າ ຜູ້ເຮັດໜັງສືຜ່ານແດນ ຢູ່ນະຄອນຫລວງວຽງຈັນ ທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນມື້ດຽວກັນນີ້ວ່າ:

“ຂອງເຮົາເປັນຜູ້ແລ່ນເອກສານຫັ້ນນ່າ ໂຕນີ້ຈະຕ້ອງໄດ້ເສັຍ ໃຫ້ຜູ້ຮັບແລ່ນເອກສານ ແມ່ນໆ ແບ່ງສັນ ກັບຄ່າທໍານຽມ ຄ່າທໍານຽມຢູ່ໃນທາງເຮັດ ພາສປອດ ຫັ້ນນ່າ ຂອງກົມກົງສູນຫັ້ນນ່າ ຄົນລະຢ່າງກັນ ໂຕເຮັດດ່ວນ ເປັນໂຕເລຂຂອງເຮົາຈະຮັບຮວມ ຄົບເລີຍ 2,600,000 ຣວມທຸກຢ່າງເລີຍ ຂອງເຮົາຄົນວຽງ ເຮົາຮັບແລ່ນຢູ່ວຽງຫັ້ນນ່າ.” 

ທີ່ຜ່ານມາ ບັນດານາຍໜ້າ ໄດ້ສະເນີເງື່ອນໄຂ ໃຫ້ຜູ້ທີ່ຕ້ອງການເຮັດໜັງສືຜ່ານແດນ ແບບຮີບດ່ວນ ເປັນຕົ້ນ ຖ້າຕ້ອງການສັມພາດ ແລະ ເຮັດໜັງສືຜ່ານແດນ ພາຍໃນ 3 ມື້ ຈະຕ້ອງຈ່າຍຄ່າບໍຣິການ 2,000,000 ກີບ/ຫົວ ຮັບພາຍໃນ 7 ມື້ ຕ້ອງຈ່າຍ 1,5000,00ກີບ/ຫົວ, ຮັບພາຍໃນ 10 ມື້ ຕ້ອງຈ່າຍ 1,200,000 ກີບ/ຫົວ ແລະ ຮັບພາຍໃນ 21 ມື້ ຕ້ອງຈ່າຍ 1,000,000 ກີບ/ຫົວ ອີງຕາມຣາຍງານໜັງສືພິມລາວພັທນາ ທີ່ໄດ້ລົງຮິບໂຮມຂໍ້ມູນສຖານທີ່ໂຕຈິງ ໃນວັນທີ 9 ກຸມພາ 2023, ເຖິງແມ່ນວ່າ ສູນຮັບຄໍາຮ້ອງໜັງສືຜ່ານແດນ ຂອງປະເທດລາວ ຈະເປີດໃຫ້ບໍຣິການຢູ່ 6 ແຂວງ ເປັນຕົ້ນ ແຂວງອຸດົມໄຊ, ຊຽງຂວາງ, ໄຊຍະບູຣີ, ຄໍາມ່ວນ, ສວັນນະເຂດ ແລະແຂວງຈໍາປາສັກ ແຕ່ເນື່ອງຈາກທາງກົມກົງສູນ ຍັງບໍ່ເປິດໃຫ້ບໍຣິການ ຈອງຄີວອອນລາຍນ໌ໄດ້ ສະນັ້ນ ຈຶ່ງເຮັດໃຫ້ຄົນລາວຕ່າງແຂວງ ປະສົບຄວາມຫຍຸ້ງຍາກ ໃນການເຮັດໜັງສື ເດີນທາງ ຍ້ອນບໍ່ສາມາດຈອງຄີວລ່ວງໜ້າໄດ້.

ດັ່ງ ຄົນລາວ ຢູ່ແຂວງໄຊຍະບູຣີ ທີ່ຕ້ອງການເຮັດໜັງສືຜ່ານແດນ ນາງນຶ່ງກ່າວວ່າ: 

“ຢາກໄດ້ດ່ວນ ຄັນວ່າຢາກໄດ້ດ່ວນ ເຮົາຕ້ອງເພີ່ມເອົາຊີ້ນ່າ ດຽວນີ້ເຮົາຢູ່ແຂວງ ໄຊຍະບູຣີ ຍັງຍາກ ກະໄດ້ເຮັດຢູ່ ທາງເບື້ອງແຂວງທາງພີ້ນ່າ ມັນກໍວ່າອີ່ຍາກຫັ້ນນ່າ ເອອ ເຮົາກໍເຮັດໄປແບບທາງການຫັ້ນແລ້ວ ເຮົາກໍເຮັດຕາມຂັ້ນຕອນ ເຮົາກໍແລ່ນບ້ານ ເມືອງ ແຂວງ ເນາະ ຖ້າບາດຊິເຮັດ ມັນກໍເຮັດໄດ້ຢູ່ ແຕ່ວ່າມັນຢາກຊ້າ ເພາະວ່າເຮົາຕ້ອງໄດ້ຝາກເອກສານ ໄປໃຫ້ລາວເຊັນບ້ານເດ້ ເຊັນບ້ານ ເຊັນເມືອງຂອງລາວ ເຊັນແຂວງຂອງລາວ.” 

ກ່ອນໜ້ານີ້ ກົມກົງສູນ ກະຊວງການຕ່າງປະເທດ ໄດ້ທົດລອງນໍາໃຊ້ລະບົບຈອງມື້ນັດຢື່ນເອກສານຄໍາຮ້ອງຂອງໜັງສືຜ່ານແດນ ແບບອອນລາຍນ໌ຈໍານວນ 300 ຄົນ/ມື້ ໃນວັນທີ 20 ກຸມພາ 2023 ແລະ ໄດ້ເປິດໃຫ້ຈອງມື້ ນັດຢ່າງເປັນທາງການ ນັບແຕ່ວັນທີ 6 ມີນາ 2023 ຜ່ານເວັບໄຊຕ໌ຂອງໜ່ວຍງານ ເຊິ່ງການເຮັດໃຫ້ຜ່ານຣະບົບອອນລາຍນ໌ດັ່ງກ່າວນີ້ ສາມາດຢື່ນຄໍາຮ້ອງໄດ້ແຕ່ສະເພາະ ນະຄອນຫລວງວຽງຈັນເທົ່ານັ້ນ ສ່ວນ ແຂວງອື່ນ ຍັງບໍ່ທັນເປີດດໍາເນີນການເທື່ອ

ກ່ຽວກັບເຣຶ່ອງນີ້, ທາງດ້ານກົມກົງສູນ ກະຊວງການຕ່າງປະເທດ ກໍໄດ້ຮັບຮູ້ບັນຫາດັ່ງກ່າວນີ້ແລ້ວ ແຕ່ພັດຍັງບໍ່ສາມາດແກ້ໄຂບັນຫາທີ່ບັນດາ ທີ່ນາຍໜ້າອີກເປັນຈໍານວນຫລາຍ ດໍາເນີນການສະເນີເງື່ອນໄຂ ລັດຄີວໃຫ້ແກ່ພໍ່ແມ່ປະຊາຊົນຢ່າງຕໍ່ເນື່ອງ ອີກຍັງ ຍັງບໍ່ທັນມີແຜນການທີ່ຈະເປິດ ໂກ່ຕ້າ ໃຫ້ບໍຣິການ ຜ່ານລະບົບອອນລາຍນ໌ຕື່ມ.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ຜູ້ບໍ່ປະສົງອອກຊື່ ແລະ ຕໍາແໜ່ງ ທ່ານນຶ່ງກ່າວວ່າ:

“ອອນລາຍນ໌ນີ້ຈອງບັດຄີວຫວາ ອອນລາຍນ໌ນີ້ຫວ່າງ 1,000 ກວ່າຄົນ ຄັນຈອງຄີວອອນລາຍນ໌ກໍປະມານ 45 ວັນໄດ້ ແມ່ນໆ ເດືອນ 4 ເດືອນ 5 ພຸ້ນ ປົກກະຕິຫັ້ນມັນອອກໄດ້ 800 ຫົວຫັ້ນນ່າ ແຕ່ມື້ນຶ່ງມີຄົນສໍາພາດ 1,000 ປາຍ 1,400-1,500 ກໍບໍ່ໄດ້ເພິ່ມ ກໍສ່ໍາເກົ່າຫັ້ນ 800 ທົ່ວປະເທດຫັ້ນ ຄົນ 6 ສູນສັມພາກທົ່ວປະເທດລາວເຮົາ.” 

ກ່ອນໜ້ານີ້ ທ່ານ ອໍາໄພວັນ ຈັນທະວົງ ຕາງໜ້າກົມກົງສຸນ ກະຊວງການຕ່າງປະເທດ ໄດ້ຖະແຫລງຂ່າວວ່າ ພນັກງານກົມກົງສຸນ ມີສ່ວນພົວພັນກັບນາຍໜ້າ ໃນການຮຽກເກັບເງິນນໍາປະຊາຊົນ ທີ່ເຂົ້າມາໃຊ້ບໍຣິການຂໍໃຊ້ໜັງສືຜ່ານແດນ ເກີນອັດຕຣາທີ່ທາງການກໍານົດ ເຊິ່ງພາກຜູ້ກ່ຽວແມ່ນຈະຖືກ ປຕິບັດວິນັຍ ຕາມລະບຽບກົດໝາຍ.

ທ່ານກ່າວຕື່ມວ່າ ມາຮອດປັດຈຸບັນ ຄວາມຕ້ອງການຂໍນໍາໃຊ້ໜັງສືຜ່ານແດນ ຂອງປະຊາຊົນ ມີປຣິມານເກີນຄວາມສາມາດ ໃນການຮອງຮັບໂຕຈິງ ສນັ້ນ ຈຶ່ງເຮັດໃຫ້ການອອກໜັງສືຜ່ານແດນ ຕ້ອງໄດ້ໃຊ້ເວລາດົນ, ບໍ່ສາມາດຕອບສນອງ ໄດ້ຕາມຄວາມຮຽກຮ້ອງຕ້ອງການຂອງປະຊາຊົນ, ການສັມພາດເພື່ອຮິບໂຮມຂໍ້ມູນ ປະສົບຄວາມຊັກຊ້າ ບໍ່ສາມາດເຮັດໃຫ້ ສໍາເຣັດພາຍໃນມື້ ເນື່ອງຈາກກົມກົງສຸນ ສາມາດພິຈຣນາ ໄດ້ພຽງ 300 ຄົນ/ມື້.

ທາງກົມກົງສຸນຈຶ່ງໄດ້ເພີ່ມໂມງຣັຖການ ແຕ່ລະມື້ຮອດ 18 ໂມງ ແລະ ຮັບສັມພາດເກັບຂໍ້ມູນໃຫ້ໄດ້ຫລາຍກ່ວາ 500 ຄົນ/ມື້ ເຊິ່ງຖ້າລວມ 6 ສູນ ຮັບຄໍາຮ້ອງທົ່ວປະເທດ ກໍຈະສາມາດຮອງຮັບໄດ້ 1,700-1,800 ຄົນ/ມື້ ແລະ ເຖິງແມ່ນວ່າ ຈະຮັບສັມພາດໄດ້ເປັນຈໍານວນຫລວງຫລາຍ ແຕ່ການດໍາເນີນການອອກໜັງສືຜ່ານແດນ ຕາມປົກກະຕິ ແມ່ນໄດ້ພຽງແຕ່ 800-900 ຫົວ/ມື້ ເນື່ອງຈາກໜ່ວຍຈັດພິມໜັງສືຜ່ານແດນ ໄດ້ເຮັດວຽກນອກໂມງຈົນຮອດ 21 ໂມງ ໃນແຕ່ລະມື້ ລວມທັງ ວັນເສົາ-ອາທິດ ແຕ່ກໍສາມາດຜລິດໄດ້ແຕ່ພຽງ 1,200-1,300 ຫົວ/ມື້ ເທົ່ານັ້ນ.