ເມືອງອຸທຸມພອນ ກວາດລ້າງແກ້ງຊື້-ຂາຍ ສິ່ງທີ່ຜິດກົດໝາຍ

ເຈົ້າໜ້າທີ່ ປກສ ເມືອງອຸທຸມພອນ ແຂວງສະຫວັນນະເຂດ ໄດ້ຈັບກຸມ ແລະ ສຶກສາອົບຮົມກຸ່ມແກ້ງຄ້າຂາຍສິ່ງເສບຕິດ ແລະ ລັກລົດ ຈໍານວນ 31 ຄົນ ລວມທັງຍຶດພາຫະນະ ໄດ້ຈໍານວນ 32 ຄັນ.

ໃນວັນທີ 30 ສິງຫາ ທີ່ຜ່ານມາ, ຫ້ອງການ ປກສ ເມືອງອຸທຸມພອນ ແຂວງ ສະຫວັນນະເຂດ ສາມາດກວາດສ້າງແກ້ງທີ່ມີການເຄື່ອນໄຫວມົ້ວສຸມຢາເສບຕິດ, ສຶກສາອົບຮົບ ຜູ້ທີ່ຂາຍນໍ້າ ແລະ ໃບກະທ່ອມ ຈໍານວນ 23 ຄົນ, ຈັບກຸມແກ້ງລັກລອດຈັກ ແລະ ຊື້ຂາຍຊັບສິນທີ່ບໍ່ຖືກຕ້ອງ 8 ຄົນ ເປັນຄົນຕ່າງປະເທດ 2 ຄົນ ທີ່ເຂົ້າເມືອງຜິດກົດ ໝາຍ ພ້ອມຂອງກາງລົດຈັກ 30 ຄັນ ແລະ ລົດກະເບາະ 2 ຄັນ. 

ເຈົ້າໜ້າທີ່ ໄດ້ດໍາເນີນການຈັບກຸມ ແລະ ປັບໃໝ ສ່ວນວ່າລົດຈັກທີ່ເຈົ້າໜ້າທີຈັບຍຶດມາໄດ້ນັ້ນ ໃຫ້ປະຊາຊົນເອົາຫຼັກຖານມາພິສູດເອົາລົດຂອງຕົນ ທີ່ຖືກລັກໄປ.

ເຈົ້າໜ້າທີ່ເມືອງ ອຸທຸມພອນ ນາງ ນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 11 ກັນຍາ ວ່າ:

“ເພິ່ນກໍຍັງບໍ່ທັນໄດ້ໃຫ້ຂໍ້ມູນຊັດໝົດໄດ໋ ເພາະວ່າ ມັນຕ້ອງໄດ້ນໍາຄືນກ່ຽວກັບຕົວທະບຽນລົດອີ່ຫຍັງຫັ້ນນ່າ ແມ່ນ ເຂົາຕ້ອງຈັບ ແລ້ວກໍທັງປັບໃໝ່ ແລ້ວກໍຈໍາຄຸກຫັ້ນແຫຼະ ແຕວ່າ ຈໍານວນຕົວເລກລະອຽດຫັ້ນເພິ່ນ ກໍບໍ່ໃຫ້ໝົດ ເພາະວ່າ ບາງອັນເປັນຈໍານວນທີີຕ້ອງປິດລັບ. ໂອ ຕົວນີ້ຍັງບໍ່ທີເດີ ຫາກແຕ່ວ່າກໍໄດ້ຍິນຢູ່ວ່າ ມີທາງຈີນພ້ອມແດ່ຫັ້ນນ່າ.”

ສະເພາະຢາເສບຕິດປະເພດ ນໍ້າກະທ່ອມ ຫຼື ໃບກະທ່ອມ ລວມເຖິງ ການຂາຍນັ້ນ ກໍຖືວ່າ ຍັງມີຢູ່ຫຼາຍພາຍໃນເຂດ ເມືອງອຸທຸມພອນ.

ຊາວບ້ານເມືອງອຸທຸມພອນ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 11 ກັນຍາ ວ່າ: 

“ຄັນວ່າ ໃນເມືອງນີ້ ກໍມີ ມີຕາມປະສາຕົວເມືອງຫັ້ນແຫຼະ ເວົ້າສະເພາະພາຍໃນບ້ານ ກໍມີຢູ່ແຕ່ວ່າ ກໍສ່ວນໜ້ອຍ ເພາະວ່າ ໄວລຸ້ນ ຫຼືວ່າ ເຍົາວະຊົນອີ່ຫຍັງ ສ່ວນຂະເຈົ້າ ກໍບໍ່ຄ່ອຍອັນນັ້ນປານໃດ ມັນບໍ່ຄ່ອຍມີຫຼາຍຫັ້ນນ່າ ຄັນວ່າ ກວມໝົດຕົວເມືອງ ມັນກໍວ່າ ຄັນຊິເວົ້າວ່າຫຼາຍ ມັນກໍໜ້າຈະຫຼາຍຢູ່ຫັ້ນແຫຼະ ຄັນວ່າເລື່ອງກະທ່ອມແດ່.”

ເຈົ້າໜ້າທີ່ໄດ້ປະກາດໃຫ້ຊາວບ້ານເຂົ້າມີເບິ່ງລົດຈັກ ໂດຍສະເພາະຜູ້ທີ່ມີລົດຈັກທີ່ຖືກລັກໄປ. ຊາວບ້ານ ເມືອງອຸທຸມພອນ ອີກທ່ານນຶ່ງ ໄດ້ກ່າວວ່າ:

“ເຂົາກໍຈັບໄດ້ໝົດແລ້ວ ຈັກມື້ນີ້ຫັ້ນນ່າແລ້ວ ເຂົາກໍປະກາດໃຫ້ຄົນໄປເອົາໝົດແລ້ວລົດຫັ້ນ ເຂົາຈັບໄດ້ໝົດແລ້ວ ປະມານ 10-20 ຄັນ ພຸ້ນແຫຼະ ອັນນີ້ກະໄດ້ຍິນແຕ່ເຂົາປະກາດວ່າ ໃຫ້ໄປເບິ່ງລົດຈັກ ລົດຈັກໃຜເສັຍຫັ້ນນ່າ ເຂົາຈັບໄດ້ແລ້ວ ແຕ່ເຂົາລັກຢູ່ໃສບໍ່ຮູ້.”

ການລັກລົດຈັກ ໃນຕົວເມືອງ ອຸທຸມພອນ ນັ້ນເກີດຂຶ້ນມາເປັນໄລຍະເວລານຶ່ງແລ້ວ ເຮັດໃຫ້ເກີດຫາງສຽງຈົ່ມຂອງຊາວບ້ານ ແລະ ກ່ອນໜ້ານີ້ ຢູ່ໃນຕົວເມືອງ ກໍມີການຈັດງານເທດສະການຕ່າງໆ ຈຶ່ງເກີດມີພວກສວຍໂອກາດລັກລົດ.

ຊາວເມືອງອຸທຸມພອນ ອີກທ່ານນຶ່ງ ໄດ້ກ່າວວ່າ:

“ປະມານເດືອນຫຼັງ ແມ່ນເພາະວ່າ ມັນມີເທດສະການເພິ່ນເປີດປໍ້ານໍ້າມັນໃໝ່ ຫັ້ນນ່າ ແລ້ວເພິ່ນຈັດຄອນເສີດແລ້ວ ລົດອີ່ຫຍັງຊິ ເຮົາກໍບໍ່ຮູ້ສຶກປານໃດ.”

ຊາວບ້ານເມືອງອຸທຸມພອນ ອີກທ່ານນຶ່ງ ກ່າວວ່າ ລາວເຫັນຂ່າວກ່ຽວກັບກຸ່ມແກ້ງລັກລົດຈັກໃນສື່ສັງຄົມອອນລາຍ:

“ໄດ້ຍິນຢູ່ ເຂົາວ່າ ລົດຈັກລັກຫຼາຍຫັ້ນນ່າ ເຂົາວ່າ ມັນເປັນກຸ່ມເປັນແກ້ງຫັ້ນແຫຼະ ເຫັນວ່າ ຂະເຈົ້າອອກເຟສຫັ້ນແຫຼະແມ່ນບໍ່ ເຮົາກໍຍັງບໍ່ເຂົ້າໃຈຕົວນີ ຕ້ອງພະແນກກ່ຽວຂ້ອງຫັ້ນແຫຼະ ບໍ່ຮູ້ດອກຕົວນີ້.”

ປັດຈຸບັນ ການໃຊ້ຢາເສບຕິດ ການຊື້-ຂາຍ ນໍ້າ ແລະ ໃບກະທ່ອມ ໄດ້ແຜ່ລະບາດ ຢ່າງຕໍ່ເນື່ອງໃນລາວ ທັງຢູ່ໂຕເມືອງ ແລະ ຊົນນະບົດ ຊຶ່ງກໍ່ໃຫ້ເກີດຄວາມຮຸນແຮງ, ອາດສະຍາກໍາ, ຄວາມບໍ່ໝັ້ນຄົງທາງສັງຄົມ ແລະ ເປັນໄພຮ້າຍແຮງຕໍ່ເຍົາວະຊົນ ທີ່ເປັນອະນາຄົດຂອງຊາດ

ສ່ວນກໍລະນີ ການລັກລົດຈັກ ກໍເກີດຂຶ້ນຢ່າງຕໍ່ເນື່ອງ ເປັນຕົ້ນ ໃນວັນທີ 26 ມິຖຸນາ 2024  ກໍມີການລັກລົດຈັກປະຊາຊົນ ທີ່ຈອດຢູ່ ແຄມທາງເຂດບ້ານວັດຈັນ ເມືອງຈັນທະບູລີ ນະຄອນຫລວງຫລວງວຽງຈັນ.