ຂ.ຢູນານຂອງຈີນຊຸກຍູ້ໃຫ້ມີ ຣົຖໄຟ ຜ່ານລາວ

ເຈົ້າຫນ້າທີີ່ ຣະດັບ ສູງ ທີ່ ແຂວງ ຢູນານ ກ່າວວ່າງ ຫລັງໆ ມານີ້ ວ່າ ທາງການ ແຂວງ ຢູນານ ສືບຕໍ່ ຊຸກຍູ້ ໃຫ້ມີການ ສ້າງ ເສັ້ນ ທາງ ຣົຖໄຟ ຄວາມໄວສູງ ຜ່ານລາວ ໄປ ປະເທດ ອາຊຽນ ເພື່ອ ຍົກຣະດັບ ການ ເຕີບໂຕ ໂຄງຮ່າງ ພື້ນຖານ ການ ຄົມມະນາຄົມ ຂ້າມ ແດນ ການຄ້າ ການ ທ່ອງທ່ຽວ ແລະ ການ ລົງທຶນ ຣະ ຫວ່າງ ກັນ ໃຫ້ ຫລາຍຂື້ນ.

ທ່ານ ເຊັງຮາ ຜູ້ທຳ ຫນ້າທີ່ ແທນ ເຈົ້າ ແຂວງ ຢູນານ ກ່າວໃນ ແຜນການ ເຮັດວຽກ ຕໍ່ ກອງປະຊຸມ ຈຳປີ ສະພາ ປະຊາຊົນ ປະຈຳ ແຂວງ ຢູນານ ວ່າ  ທາງການ ແຂວງ ຢູນານ ຈະເລີ້ມ ການ ກໍ່ສ້າງ ໂຄງຮ່າງ ພື້ນຖານ ການ ຄົມມະນາຄົມ ໃນບັນດາ ແຂວງ ທີ່ ຕິດກັບ ປະເທດ ເພື່ອນບ້ານ ໃນນັ້ນ ຮ່ວມດ້ວຍ ເສັ້ນ ທາງ ຄົມມະນາຄົມ ຂົນສົ່ງ ເຄືອຂ່າຍ ໄຟຟ້າ ການ ສົ່ງຂໍ້ມູນ ຂ່າວສານ ສູນເກັບ ສີນຄ້າ ແລະ ກົນໄກ ປະເພດ ຕ່າງໆ.

ຣັຖບານ ຈີນ ໄດ້ ຮ່າງ ແຜນການ ສ້າງ ເສັ້ນທາງ ຣົຖໄຟ ຄວາມ ໄວສູງ ສາມ ສາຍ ໃນປີ 2013 ເພື່ອ ເຊື່ອມຕໍ່ ນະຄອນ ຂຸນຫມິງ ແຂວງ ຢູນານ ໄປຍັງ ລາວ ວຽດນາມ ກຳພູຊາ ພະມ້າ ໄທ ມາເລເຊັຽ ແລະ ສີງກະໂປ. ທ່ານ ເວົ້າວ່າ ແຂວງ ຢູນານ ຈະຊຸກຍູ້ ໃຫ້ ແຜນການ ດັ່ງກ່າວ ຂອງ ຣັຖບານ ເລີ້ມສ້າງ ໃນ ປີນີ້ ຢ່າງນ້ອຍ ສອງສາຍ ໃນ ຈຳນວນ ສາມສາຍ ໃນນັ້ນ ຮ່ວມດ້ວຍ ເສັ້ນທາງ ທີ່ ເຊື່ອມ ຈາກ ເມືອງ ຊູລີ ໄປ ເມືອງ ບໍ່ເຕັນ ແຂວງ ຫລວງ ນ້ຳທາ ຂອງລາວ.