ມ.ເຊໂປນບໍ່ໄດ້ຮັບງົປສຶກສາ

ເຈົ້າໜ້າທີ່ ຫ້ອງການ ເມືອງ ເຊໂປນ ແຂວງ ສວັນນະເຂດ ເປີດເຜີຍ ວ່າ ທາງເມືອງ ບໍ່ໄດ້ ຮັບ ງົບປະມານ ເພື່ອມາ ບໍຣິຫານ ການ ສຶກສາ ມາ ຕັ້ງແຕ່ ປີ 2014 ຈຶ່ງ ບໍ່ມີເງິນ ຊື້ ອຸປກອນ ການຮຽນ ການສອນ ແລະ ໃຊ້ ຄ່ານ້ຳ ຄ່າໄຟ ຈົນໄດ້ ກູ້ຢືມ ເງິນ ມາ ໃຊ້ຈ່າຍ:

"ເງິນ ບໍຣິຫານ ແຕ່ ປີ 2014 ກໍ ຍັງບໍ່ໄດ້ ນໍ ເງິນຄ້າງ 40 ກວ່າ ລ້ານ ມັນມີ ເງິນ ດັດສົມ ເງິນ ບໍຣິຫານ ຊື້ ອຸປກອນ ຊື້ ນ້ຳມຶກ ແລ້ວ ກໍມີ ເງິນ ກອງປະຊຸມ ແລ້ວ ກໍມິ ເງິນ ລົງ ວຽກ ແລ້ວ ກໍເງິນ ບາງອັນ ມັນໄດ້ ຕິດໜີ້ ເດ້ ບາງອັນ ມັນຍັງຄ້າງ ໜີ້ ຢູ່ເດ້ ໄດ້ແລ້ວ ໄປ ຖົມຄືນ ມັນມີ ບາງອັນ ບາງບ່ອນ ຕິດ ໜີ້ ໄດ້ເດ້".

ທ່ານ ເວົ້າວ່າ ເງິນ ບໍຣິຫານ ປະມານ 40 ກວ່າ ລ້ານ ກີບ ເປັນ ຈຳນວນ ເງິນ ທີ່ ທາງເມືອງ ໄດ້ ສເນີຕໍ່ ກະຊວງ ສຶກສາ ທິການ ແລະ ກິລາ ແລະ ທາງ ກະຊວງ ກໍ່ວ່າ ຈະ ໃຫ້ ແຕ່ ຈົນມາ ເຖິງ ປັດຈຸບັນ ກໍຍັງ ບໍ່ທັນ ໄດ້ ຮັບ ຂນະທີ່ ທາງເມືອງ ຕ້ອງໄດ້ ຕິດໜີ້ ຢູ່ ຕໍ່ໄປ.

ທ່ານເວົ້າ ຕື່ມ ອີກ ວ່າ ຢາກໃຫ້ ທາງ ສູນກາງ ເຂົ້າໃຈ ຄວາມ ຈຳເປັນ ຂອງ ເມືອງ ແລະ ຂໍໃຫ້ ຊ່ວຍ ແກ້ໄຂ ບັນຫາ ນີ້ ຢ່າງ ຮີບດ່ວນ ຊຶ່ງ ທີ່ ຜ່ານມາ ທາງ ເມືອງ ກໍໄດ້ ສເນີ ຂຶ້ນ ໄປແລ້ວ ຫລາຍ ຄັ້ງ. 6 ເດືອນ ຕົ້ນ ສົກປີ 2014-15 ເມືອງ ເຊໂປນ ເກັບ ຣາຍຮັບ ໄດ້ ພຽງ 3 ຕື້ 480 ລ້ານ ກີບ ຄື ເກັບໄດ້ ພຽງ 35% ຂອງ ແຜນການ ຊຶ່ງ ອາຈ ເປັນ ສ່ວນນຶ່ງ ທີ່ ເຮັດໃຫ້ ທາງເມືອງ ມີ ບັນຫາ ການເງິນ ທັງ ສຳລັບ ບໍຣິຫານ ການ ສຶກສາ ແລະ ການ ເບີກຈ່າຍ ເງິນ ເດືອນ ໃຫ້ ພະນັກງານ ແລະ ຣັຖກອນ.

ປັດຈຸບັນ ເມືອງ ເຊໂປນ ສາມາດ ຈ່າຍ ເປັນຄ່າ ເງິນ ເດືອນ, ເງິນ ອຸດໜູນ ໃຫ້ ພະນັກງານ ຣັຖກອນ ໄດ້ ພຽງ 3 ຕື້ 700 ລ້ານ ກີບ ຄື ໄດ້ພຽງ 41% ຂອງ ຈຳນວນ ເງິນ ທັງໝົດ.