ຄົນງານລາວ ເຮັດວຽກຢູ່ ໂຄງການສີທັນດອນ ຍັງບໍ່ໄດ້ເງິນເດືອນ

ມາຮອດປັດຈຸບັນ, ຄົນງານລາວ ຈຳນວນໜຶ່ງ ທີ່ເຮັດວຽກ ໃຫ້ແກ່ໂຄງການກໍ່ສ້າງຕ່າງໆ ຫຼາຍໜ້າວຽກ ໃນເຂດໂຄງການພັດທະນາ ເຂດເສດຖະກິດໃໝ່ ສີທັນດອນ ທີ່ເມືອງໂຂງ ແຂວງຈຳປາສັກ ຍັງບໍ່ໄດ້ຮັບເງິນເດືອນ ຈາກນາຍຈ້າງເທື່ອ ເຖິງແມ່ນວ່າ ຄົນງານຫຼາຍຄົນ ໄດ້ພາກັນໄປ ທວງຖາມຄ່າຈ້າງກໍຕາມ, ແຕ່ກໍຍັງບໍ່ໄດ້ຮັບຄຳຕອບ ແນວໃດເທື່ອ. ດັ່ງຄົນງານລາວ ທ່ານໜຶ່ງ ທີ່ຂັບລົດບັນທຸກ ຢູ່ໃນໂຄງການພັດທະນາ ເຂດເສດຖະກິດໃໝ່ ສີທັນດອນ ກ່່າວຕໍ່ວິທຍຸເອເຊັຽເສຣີ ໃນວັນທີ 27 ສິງຫາ ນີ້ວ່າ:

“ເງິນຂ້ອຍເອງນີ້ ກໍຍັງບໍ່ໄດ້ໄລ່. ເງິນເຊົ່າລົດນີ້ ໂຕໃຫ້ມາແລ້ວນີ້, ຊິປະມານ 10% ນີ້ແຫຼະ, ຍັງ 90. ພວກກຳມະກອນ ມາເຮັດຕຶກ ພວກອັນນີ້ໆ ກະຍັງບໍ່ທັນໄດ້ເງິນດຽວນີ້. ຈີນເພິ່ນຫັ້ນ ກໍໜີ, ມັນບໍ່ຈັກຊິໄປໂຮມ ຊິໄປຮຽນອີ່ສັງດອກ.”

ໃນຂະນະດຽວກັນ ຄົນງານອີກທ່ານໜຶ່ງ ກ່າວວ່າ ທັງຕົນເອງ ແລະ ຄົນງານລາວ ອີກຫຼາຍຄົນ ຍັງບໍ່ທັນໄດ້ເງິນຄ່າຈ້າງ ຈາກນາຍຈ້າງ ທີ່ເປັນຄົນຈີນເທື່ອ ຈຶ່ງເຮັດໃຫ້ຫຼາຍຄົນ ໄດ້ພາກັນອອກຈາກວຽກໄປແລ້ວ. ແຕ່ເມື່ອຈະໄປທວງຖາມ ຂໍເງິນຄ່າຈ້າງ ພັດບໍ່ສາມາດຕິດຕໍ່ໃຜໄດ້ ເນື່ອງຈາກນາຍຈ້າງ ໄດ້ມິດງຽບ ແລະ ອອກຈາກເຂດນີ້ໄປແລ້ວ ຈຳນວນໜຶ່ງ ຍ້ອນມີບັນຫາ ທາງດ້ານການເງິນ ແລະ ທັງເປັນໄລຍະ ລະດູຝົນແດ່. ດັ່ງທ່ານກ່າວວ່າ:

“ໄປເຈິກັບໂຕເອງແລ້ວ ມັນຍາກ ເຮັດນຳຄົນຈີນລະຍາກ. ໄດ້, ກະໄດ້ນຳຫຼັງ, ຫັ້ນນ່າ. ຄືຕອນເຮົາຕ້ອງການ ແລ້ວມັນບໍ່ໄດ້, ບໍ່ແມ່ນເຂົາຊິເບີກໃຫ້ ເດືອນຕໍ່ເດືອນນ່າ. ເປັນຍ້ອນຊ່ວງຝົນ ແລະ ເປັນຍ້ອນເງິນແນ່, ເຂົາກະປິດ.”

ສ່ວນຜູ້ປະກອບການທຸລະກິດ ຢູ່ເມືອງໂຂງ ນາງໜຶ່ງ ກໍຢືນຢັນວ່າ ຫຼາຍບໍລິສັດ ທີ່ຮັບເໝົາວຽກກໍ່ສ້າງ ໃນເຂດນີ້ ແມ່ນໄດ້ຕິດຄ້າງ ການຈ່າຍເງິນຄ້າຈ້າງ ໃຫ້ແກ່ຄົນງານລາວແທ້ ແລະ ຄັນຄົນງານລາວ ໄປທວງຖາມ ກໍຈະຖືກທຳຮ້າຍຮ່າງກາຍ ຈຶ່ງບໍ່ມີໃຜກ້າ ໄປທວງຖາມເງິນຄ່າຈ້າງອີກ. ດັ່ງຍານາງກ່າວວ່າ:

“ຕິດໜີ້ເຂົາຕະພຶດຕະພືໝົດ ໄປຖາມໜີ້ ມັນກະຟັນເພິ່ນ, ຄຶດເອົາໄດ໋. ເງິນກຳມະກອນ ບໍ່ແມ່ນເງິນພະນັກງານ ບໍ່ໄດ້ຈ່າຍໃຫ້ເຂົາ 2 ວັນ, ຫັ້ນນ່າ ເຂົາຊິເອົາເງິນມາແຕ່ໄສລ້ຽງຊີບ. ໂຄງການແນວອື່ນໆອີກ ໜອງປາບໍ່, ໝູ່ບ້ານຈັດສັນບໍ່.”

ກ່ຽວກັບເລື້ອງນີ້, ວິທຍຸເອເຊັຽເສຣີ ໄດ້ຕິດຕໍ່ໄປຫາ ຜະແນກແຮງງານ ແລະ ສະຫວັດດີການສັງຄົມ ແຂວງຈຳປາສັກ ເພື່ອສອບຖາມຂໍ້ມູນເພີ່ມຕື່ມ, ແຕ່ເຈົ້າໜ້າທີ່ ທ່ານໜຶ່ງ ກ່າວພຽງແຕ່ວ່າ ຍັງບໍ່ທັນມີຄົນງານລາວ ມາຮ້ອງຮຽນ ບັນຫາດັ່ງກ່າວເທື່ອ ຈຶ່ງຍັງບໍ່ສາມາດ ອອກຄຳເຫັນໄດ້.

ໃນຂະນະທີ່ ເມື່ອບໍ່ດົນມານີ້, ໂຄງການພັດທະນາ ເຂດເສດຖະກິດໃໝ່ ສີທັນດອນ ກໍໄດ້ຈ່າຍເງິນຄ່າຊົດເຊີຍ ແບບລ່ວງໜ້າ ໃຫ້ແກ່ຊາວບ້ານ ຈຳນວນ 108 ຄອບຄົວ ທີ່ຖືກຜົນກະທົບ ດ້ານທີ່ດິນ ຈາກໂຄງການຕ່າງໆ ທີ່ຢູ່ໃນເຂດດັ່ງກ່າວ ລວມມູນຄ່າທັງໝົດ ຫຼາຍກວ່າ 72 ຕື້ກີບ ແລະ 5.7 ລ້ານໂດ່ລ້າຣ໌ສະຫະຣັຖ ເປັນຕົ້ນ ໂຄງການສະໜາມກ໊ອຟ, ໂຄງການຕຶກແຄນຄູ່, ໂຄງການສາງສິນຄ້າ ແລະ ອື່ນໆ ພາຍຫຼັງທີ່ໄດ້ຕິດຄ້າງ ເປັນເວລາດົນເຕີບ, ເຊິ່ງຊາວບ້ານ ທີ່ໄດ້ຮັບຄ່າຊົດເຊີຍ ດັ່ງກ່າວນັ້ນ ຕ່າງກໍຮູ້ສຶກພໍໃຈ ແລະ ບໍ່ໄດ້ຮ້ອງຂໍ ຄ່າຊົດເຊີຍຕື່ມອີກ. ດັ່ງຊາວບ້ານ ທ່ານໜຶ່ງ ທີ່ຫາກໍໄດ້ຮັບຄ່າຊົດເຊີຍ ກ່າວວ່າ:

“ໂອ, ດິນໂຕຖືກໂຄງການ ແມ່ນດິນຢູ່ເຂດທົ່ງນາ ດິນທົ່ງນາ ແມ່ນດິນຂ້ອຍ. ໂຕນີ້ມັນເປັນດິນໃນບ້ານ ທາງລົງຄອນພະເພັງເດ້, ເປັນດິນແມ່. ເພິ່ນກະເຮັດຕຶກແຄນຄູ່, ຫັ້ນເດ້.”

ທາງດ້ານເຈົ້າໜ້າທີ່ ເມືອງໂຂງ ທ່ານໜຶ່ງ ກ່າວວ່າ ສຳລັບການຊົດເຊີຍລ່ວງໜ້າ ແກ່ຊາວບ້ານ ທີ່ຖືກໂຄງການຕ່າງໆ ກໍຖືວ່າສຳເລັດແລ້ວ ທຸກຄອບຄົວ ແລະ ໂຄງການກໍ່ສ້າງ ຫຼາຍແຫ່ງ ກໍມີຄວມຄືບໜ້າເລື້ອຍໆ, ເຊິ່ງຄາດວ່າ ຫຼາຍໂຄງການ ຈະເປີດໃຫ້ບໍລິການ ໃນທ້າຍປີ 2026 ເປັນຕົ້ນໄປ. ດັ່ງທ່ານກ່າວວ່າ:

“ແມ່ນໆ ເພິ່ນໄລ່ເງິນຊົດເຊີຍຫັ້ນແລ້ວ ພວກທີ່ຕິດໂຄງການອີ່ຫຍັງ ກະຈ່າຍໝົດທຸກພາກສ່ວນແລ້ວ. ກ່ຽວກັບເປີດບໍລິການບໍ ເພິ່ນວ່າທ້າຍປີ 2026 ຈະເປີດໃຊ້ບໍລິການ.”

ໃນໂອກາດ ທີ່ຈ່າຍຄ່າຊົດເຊີຍ ໃຫ້ແກ່ຊາວບ້ານ ເມື່ອບໍ່ດົນມານີ້, ທ່ານ ສົມບູນ ເຮືອງວົງສາ, ຮອງເຈົ້າແຂວງ ແຂວງຈຳປາສັກ ໄດ້ກ່າວຕໍ່ສື່ມວນຊົນວ່າ ຊາວບ້ານ 108 ຄອບຄົວດັ່ງກ່າວ ແມ່ນມີຄວາມສະໝັກໃຈ ແລະ ເຕັມໃຈຮັບເອົາ ເງິນຄ່າຊົດເຊີຍລ່ວງໜ້າ ຕາມພື້ນຖານການຄິດໄລ່ ຢ່າງລະອຽດ ຈາກຄະນະກຳມະການ ທີ່ກ່ຽວຂ້ອງ ແລະ ຈະມີການຄິດໄລ່ ຄ່າຊົດເຊີຍ ໃຫ້ແກ່ຊາວບ້ານຕື່ມອີກ ຄັນມີການກວດພົບວ່າ ອັດຕາການຄິດໄລ່ ຕ່ຳກວ່າຄວາມເປັນຈິງ.

ເຂດພັດທະນາ ເສດຖະກິດໃໝ່ ສີທັນດອນ ມີເນື້ອທີ່ທັງໝົດ 9,846 ເຮັກຕ້າຣ໌, ກວມເອົາເນື້ອທີ່ດິນ ເຂດບ້ານທ່າຄໍ້, ບ້ານທ່າມ່ວງ, ບ້ານບຶງງາມ, ບ້ານເສັດເຕົາເຫຼັກ, ບ້ານເສັດສະຫວັນ ແລະ ບ້ານນາໜອງເຫ້ຍ. ໃນນັ້ນ, ມີຄອບຄົວ ຖືກຜົນກະທົບ 108 ຄອບຄົວ, ເນື້ອທີ່ດິນ ຖືກຜົນກະທົບ 1,575 ຕອນ, ເນື້ອທີ່ດິນ ທີ່ຖືກຜົນກະທົບ ທັງໝົດ 2,099 ເຮັກຕ້າຣ໌.