ຂາດການບັງຄັບໃຊ້ກົດໝາຍ ຢ່າງຈິງຈັງກັບຜູ້ເອົາສິນຄ້າ ໜີພາສີເຂົ້າປະເທດ

ທາງການລາວ ຍັງຂາດມາດຕະການ ກວດກາ ການລັກລອບນໍາເຂົ້າສິນຄ້າໜີພາສີ, ການຄ້າຂາຍນອກລະບົບ ຕາມເຂດຂາຍແດນ ຈົນສົ່ງຜົນກະທົບຕໍ່ຜູ້ປະ ກອບການລາວ. ມີການລັກລອບ ສິນຄ້າຈີນ ແລະ ສິນຄ້າໄທ ເຂົ້າມາ ຈົນສົ່ງຜົນກະທົບຕໍ່ຜູ້ປະກອບການພາຍໃນ ຂາຍສິນຄ້າບໍ່ໄດ້ ໃນຂະນະທີ່ລັດຖະບານ ກໍຍັງບໍ່ສາ ມາດເກັບລາຍຮັບຈາກການນໍາເຂົ້າສິນຄ້າໄດ້ຕາມເປົ້າໝາຍ.  

ເຈົ້າໜ້າທີ່ຜູ້ທີ່ຮູ້ເຫດການ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 26 ກັນຍາ ວ່າ:

“ບາງຫົວໜ່ວຍກະລັກລອບຫັ້ນແຫຼະ ມັນມີແບບ ຊາຍແດນທາງນ້ອຍ ທາງໃຫຍ່ ເຂົາລັກຄ້າຂາຍກັນຫັກມີດອກ ຫຼັກໆ ແທ້ໆ ກະເຂົ້າມາຫາທາງດ້ານ ຫັ້ນແຫຼະຫຼາຍແທ້ ເລື່ອງພາສີ ບໍ່ມີຜູ້ດວກສອບ ມັນກະແນວນັ້ນແຫຼະ ແນວຜະລິດເອງນີ້ບໍ່ໄດ້ຂາຍ ຈີນນີ້ເປັນແນວນັ້ນໝົດ.”

ທ່ານ ກ່າວຕື່ມວ່າ ການລັກລອບ ນໍາເຂົ້າສິນຄ້າໜີພາສີ ການຄ້າຂາຍນອກລະບົບ ຫຼາຍຮູບແບບ ຕາມເຂດຊາຍແດນ ສ່ວນຫຼາຍ ທີ່ພົບເຫັນ ຈະເປັນເຄື່ອງອຸປະໂພກ ບໍລິໂພກ ເປັນຕົ້ນ ສິນຄ້ານໍາເຂົ້າໜີພາສີ ຢູ່ແຂງພາກເໜືອ ສ່ວນຫຼາຍຈະພົບສິນຄ້າ ປະເພດຢາສູບ, ເຄື່ອງດື່ມມືນເມົາ ແລະ ຜັກ ໝາກໄມ້ ບາງປະເພດ ທີ່ນໍາເຂົ້າມາຈາກປະເທດຈີນ, ສ່ວນແຂວງພາກກາງ ແລະ ພາກໃຕ້ ຈະພົບເຫັນຢາສູບໄຟຟ້າ, ແປ້ງນົວ, ແຟບຊັກເຄື່ອງ, ເຄື່ອງດື່ມທີ່ມີທາດເຫຼົ້າ, ເຄື່ອງສໍາອາງ, ຜັກແລະ ໝາກໄມ້ ທີ່ລັກລອບມາຈາກປະເທດໄທ. 

ປັດໃຈທີ່ເຮັດໃຫ້ ມີການລັກລອບ ນໍາເຂົ້າສິນຄ້າໜີພາສີ, ການຄ້າຂາຍນອກລະບົບຫຼາຍຮູບແບບ ຕາມເຂດຊາຍແດນ ກະຍ້ອນວ່າ ມີເຈົ້າໜ້າທີ່ພາສີ ປະຈໍາດ່ານສາກົນ, ປະຈໍາດ່ານປະເພນີ ແລະ ເຈົ້າໜ້າທີ່ແຂວງ ບາງກຸ່ມ ຂາດມາດຕະການ ກວດກາທີ່ເຂັ້ມງວດ ແລະ ເຈົ້າໜ້າທີ່ບາງຄົນ ກະສວຍໃຊ້ໜ້າທີ່ຕໍາແໜ່ງຮັບເງິນສິນບົນ ຈາກບຸກຄົນ ທີ່ນໍາເຂົ້າສິນຄ້າເຫຼົ່ານັ້ນ.

ເຈົ້າໜ້າທີ່ຈະເກັບພາສີການນໍາຜູ້ທີ່ເຂົ້າສິນຄ້າເຂົ້າມາຂາຍໃນປະເທດ ແຕ່ ໃນກໍລະນີ ປະຊາຊົນນໍາຊື້ມາຊົມໃຊ້ພາຍໃນຄົວເຮືອນ ເຈົ້າໜ້າທີ່ຈະບໍ່ເກັບ.

ເຈົ້າໜ້າທີ່ແຂວງໄຊຍະບູລີ ໄດ້ກ່າວວ່າ: 

“ການລັກລອບຫຼາຍ ຢູ່ໃສກະຄືກັນໝົດແຫຼະ ກະແລ້ວແຕ່ ຄັນວ່າ ມັນເປັນສິນຄ້າຂາຍເນາະ ຂະເຈົ້າກະໄດ້ເສັຍພາສີ ຄັນວ່າ ຂະເຈົ້າເອົາຊົມໃຊ້ກະຖືວ່າ ບໍ່ໄດ້ເສັຍເນາະ ບາງເທື່ອອາດຈະມາດ້າມເລັກດ້າມໜ້ອຍ ເຮົາກະປະເລີຍ ຢູ່ໃສກະຄືກັນໝົດອ້າຍ ອາດຊິເປັນແນວນີ້ໝົດເນາະ.”

ບໍ່ພຽງແຕ່ສິນຄ້າອຸປະໂພກ ບໍລິໂພກ ເທົ່ານັ້ນ ທີ່ມີການລັກລອບນໍາເຂົ້າຢູ່ຕາມຊາຍແດນ ແຕ່ ສິນຂະໜາດໃຫຍ່ ເປັນຕົ້ນເຄື່ອງໃຊ້ໄຟຟ້າ ແລະ ລົດໃຫຍ່ ກໍຍັງມີການລັກລອບນໍາເຂົ້າມາ.

ນອກຈາກນີ້ ໃນອີກຮູບແບບນຶ່ງ ກໍຄື ບໍລິສັດທີ່ນໍາເຂົ້າສິນຄ້າ ມີການຮ່ວຫົວກັບເຈົ້າໜ້າທີ່ປະຈໍາດ່ານ ໃນການແຈ້ງເສັຍພາສີ ບໍ່ກົງກັນກັບຈໍານວນສິນຄ້າທີ່ຈໍານໍາເຂົ້າມາ ຫຼື ບໍ່ເສັຍພາສີເຕັມ.

ຜູ້ປະກອບການນໍາເຂົ້າກົນຈັກ-ລົດຮັບໃຊ້ການກະເສດ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 26 ກັນຍາ ວ່າ:

“ແມ່ນແຫຼະ ເຮົາວ່າ ບໍລິສັດ ພວກນໍາເຂົ້າສິນຄ້ານ່າໄປເວົ້ານໍາຕໍາຫຼວດຫັ້ນແຫຼະ ຕົກລົງກັນ ແລະ ຊິນໍາເຂົ້າມາ ພາສີບໍ່ຫຼາຍ ກະໃສ່ລາຄາບໍ່ຫຼາຍ ຖ້າວ່າໃສ່ລາຄາສູງ ພາສີກະສູງຫັ້ນແລ້ວ.”

ສໍາລັບສິນຄ້າທີ່ນໍາເຂົ້າຈາກປະເທດຈີນ ຢູ່ຕາມຊາຍແດນ ສ່ວນຫຼາຍເປັນສິນຄ້າທີ່ບໍ່ໄດ້ຄຸນນະພາບ ແຕ່ມີລາຄາຖືກກວ່າ ສິນຄ້າລາວ ແລະ ສິນຄ້າຈາກປະເທດອື່ນໆ​ ນັ້ນເຮັດໃຫ້ລັດຖະບານບໍ່ສາມາດເກັບພາສີໄດ້ຕາມເປົ້າໝາຍ. ໃນຂະນະທີ່ຜະລິດຕະພັນ ຂອງຄົນລາວ ທີ່ຈະສົ່ງອອກໄປປະເທດຈີນ ມີໜ້ອຍ ແລະ ບໍ່ງ່າຍທີ່ຈະສົ່ງອອກໄປປະເທດຈີນ ເພາະທາງການຈີນພະຍາຍາມກີດກັນສິນຄ້າຈາກປະເທດລາວ ໂດຍອ້າງວ່າສິນຄ້າບໍ່ໄດ້ມາດຕະຖານ. ສ່ວນວ່າ ສິນຄ້າຂອງຄົນຈີນ ທີ່ມາລົງທຶນໃນລາວ ເຊັ່ນ ກ້ວຍ, ອ້ອຍ, ມັນຕົ້ນ, ຢາງພາລາ ແລະ ຜັກ ໝາກໄມ້ ສາມາດສົ່ງອອກໄປປະເທດຈີນໄດ້ຕະຫລອດ.

ເຈົ້າໜ້າທີ່ສະມາຄົນຜູ້ຈັດສົ່ງສິນຄ້າ ລະຫວ່າງປະເທດ ຂອງລາວ ນາງນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 26 ກັນຍາ ວ່າ:

“ກັບຈີນນີ້ກະຍາກຢູ່ ກະສ້າງບັນທັດຖານຫຼາຍຢ່າງມາກີດກັ້ນເຮົາຫັ້ນນ່າ ເຜື່ອຊິເຂົ້າບ້ານມັນໄດ້ ກະບໍ່ແມ່ນງ່າຍ ສອງຝ່າຍຕ້ອງໄດ້ເຈລະຈາກັນອີກຫັ້ນນ່າ ການຄ້າທັງສອງປະເທດ ສິນຄ້າບໍ່ໄດ້ຄຸນນະພາບ ສຸຂະອະນາໄມ ຜະລິດອອກຂາຍໃຫ້ຜູ້ອື່ນ.”

ຫຼ້າສຸດນີ້ ຢູ່ກອງປະຊຸມສະໄໝສາມັນຂອງລັດຖະບານ ປະຈໍາເດືອນກັນຍາ 2024, ທ່ານ ສອນໄຊ ສີພັນດອນ ນາຍົກລັດຖບານຕີ ໄດ້ມອບໃຫ້ກະຊວງ ແລະ ອົງການທີ່ກ່ຽວຂ້ອງເອົາໃຈໃສ່ ໃນການຕິດຕາມ-ກວດກາ ແລະ ສະກັດກັ້ນ ການລັກລອບນໍາເຂົ້າສິນຄ້າໜີພາສີ, ການຄ້າຂາຍນອກລະບົບ ທຸກຮູບແບບຕາມເຂດຂາຍແດນ.