ສປປລາວ ໄດ້ຮັບເງິນ ຊ່ອຍເຫລືອ ໃນໂຄງການ ພັທນາ ປ່າໄມ້ ແບບຍື່ນຍົງ.
ໂຄງການ ພັທນາ ປ່າໄມ້ ແບບຍືນຍົງ ໃນລາວ ເປັນໂຄງການ ອະນຸລັກ ປ່າໄມ້ ໃນຈຸດປະສົງ ເພື່ອຫລຸດຜ່ອນ ການປ່ອຍ ອາຍເສັຽ ຂື້ນທ້ອງຟ້າ ຈາກ ຫລາຍປະເທດ ໃນຂົງເຂດ ແລະ ໃນໂລກ. ສປປລາວ ມີໂຄງການ ດັ່ງກ່າວນີ້ ໃນເຂດ 4 ແຂວງ ພາກເຫນືອ ຂອງປະເທດ.
ໂຄງການ ດັ່ງກ່າວ ຈະມີການ ປູກຕົ້ນໄມ້ ທົດແທນ ແລະ ການປາບປາມ ກຸ່ມລັກຕັດໄມ້ ຊະຊາຍ ດ້ວຍການ ຝຶກອົບຮົມ ເຈົ້າຫນ້າທີ່ ແລະ ກຸ່ມຊາວບ້ານ ໃນເຂດ ເປົ້າຫມາຍ ແລະ ກໍເປັນພາກສ່ວນ ໃນໂຄງການ ພັທນາ ຊົນນະບົດ ໃນລາວ.
ໂຄງການນີ້ ຈະເລີ້ມຈາກ 4 ແຂວງໄປຮອດ 9 ແຂວງ ໃນຈຳນວນ ແຂວງທັງ ຫມົດ 16 ແຂວງ ຂອງລາວ ໃນພື້ນທີ່ ເປົ້າຫມາຍ 16 ປ່າ ໃນຈຳນວນ 51 ປ່າ ໃນທົ່ວປະເທດ ຫລື ປະມານ 2 ລ້ານ ກວ່າເຮັກຕາ ໃນສັດສ່ວນ 3ສ່ວນ4 ຂອງ ພື້ນທີ່ ທັງຫມົດ ໃນລາວ.
ໂຄງການທັງຫມົດ ເຫລົ່ານີ້ ຕົກເປັນມູນຄ່າ ໃນການໃຊ້ ຈ່າຍເຖິງ 39 ລ້ານ 3 ແສນ 9 ມື່ນໂດລາ ໃນນັ້ນ 19 ລ້ານ ແມ່ນໄດ້ຮັບ ການຊ່ອຍເຫລືອ ຈາກ ອົງການສາກົນ ແລະ 12 ລ້ານ 8 ແສນໂດລາ ແມ່ນການ ຊອ່ຍເຫລືອ ຂອງອົງການ ກອງທຶນ ສຳລັບ ອະນຸລັກ ປ່າໄມ້ ແລະ ການປົກປ້ອງ ອາກາດເສັຽ ແລະ ອີກ 7 ລ້ານ 5 ແສນ ແມ່ນການ ບໍຣິຈາກ ຂອງ ຣັຖບານລາວ ເອງ ຕໍ່ໂຄງການ ດັ່ງກ່າວ ຣັຖບານ ຟິນແລັນ ກໍໃຫ້ການ ຊ່ອຍເຫລືອ ທາງດ້ານ ເທກນິກ ທີ່ຄິດເປັນ ມູນຄ່າ ປະມານ 14 ລ້ານໂດລາ