ມ.ເຊໂປນ ສັ່ງໃຫ້ໂຮງງານ ເຈັ້ຽ ແກ້ໄຂ ນໍ້າເສັຽ

ສຸພັດຕາ
2018-05-24
ອີແມວລ໌
ຄໍາເຫັນ
Share
ພິມ
ພາຍໃນເຂດໂຮງງານຜລິດເຈັ້ຽ ຂອງບໍຣິສັດຈີນ Sun Paper ທີ່ເມືອງເຊໂປນ ແຂວງສວັນນະເຂດ
ພາຍໃນເຂດໂຮງງານຜລິດເຈັ້ຽ ຂອງບໍຣິສັດຈີນ Sun Paper ທີ່ເມືອງເຊໂປນ ແຂວງສວັນນະເຂດ
Screen captured : https://www.facebook.com/100014901078715/videos/381074079065958/?story_fbid=381075645732468&id=100014901078715

ຜແນກຊັພຍາກອນທັມຊາຕ ແລະສິ່ງແວດລ້ອມ ແຂວງສວັນນະເຂດ ຮ່ວມກັບພາກສ່ວນກ່ຽວຂ້ອງ ເມືອງເຊໂປນ ສັ່ງໃຫ້ໂຮງງານຜລິດເຈັ້ຽ ຊັນເປເປີ້ (SUN PAPER) ຂອງຈີນ ຢຸດປ່ອຍນໍ້າເສັຽລົງຫ້ວຍອາລອງ ທີ່ເຮັດໃຫ້ປາຕາຍ ຈຳນວນຫຼວງຫຼາຍ ແລະມີປະຊາຊົນ 2 ຄົນ ເກີດອາກອນຖອກທ້ອງ ຍ້ອນເອົາປາຈາກຫ້ວຍດັ່ງກ່າວໄປບໍຣິໂພກ ແລະເຈົ້າໜ້າທີ່ຍັງໄດ້ມີຄຳສັ່ງ ໃຫ້ເຈົ້າຂອງໂຮງງານ ເລັ່ງຈັດການເຣື້ອງ ຣະບົບຕ່າງໆ ໃຫ້ຮຽບຮ້ອຍ, ດັ່ງເຈົ້າໜ້າທີ່ຜແນກ ໄດ້ກ່າວຕໍ່ວິທຍຸ ເອເຊັຍເສຣີ ໃນວັນທີ 24 ພຶສພາ ນີ້ວ່າ:

“ຂແນງສິ່ງແວດລ້ອມພວກເຮົາ ໄດ້ລົງໄປແນະນຳ ໃຫ້ທາງບໍຣິສັດ ຕ້ອງແກ້ໄຂປັນຫາ ລະຍະທີ່ໂຮງງານ ບໍ່ໄດ້ທຳການຜລິດ ການກໍ່ສ້າງ ລະບົບຕ່າງໆ ຍັງບໍ່ທັນສຳເລັດ ໃຫ້ໂຮງງານບໍ່ໃຫ້ປ່ອຍນໍ້າອອກ ໃນຊ່ວງທີ່ຝົນຕົກເພາະມັນຈະເປັນຜົນໃຫ້ນໍ້າ ທີ່ແຊ່ໄມ້ວິກຫັ້ນລົງໄປເນາະ ບໍລິສັດເຂົາກໍ່ຮັບປາກ ເຂົາບໍ່ໄດ້ປ່ອຍໂດຍຕົງ.”

ທ່ານກ່າວຕື່ມວ່າ ບັນຫານໍ້າເສັຽໄຫຼລົງຫ້ວຍນັ້ນ ເກີດຈາກຝົນຕົກແຮງ ເຮັດໃຫ້ນໍ້າແຊ່ໄມ້ວິກ ທີ່ກອງໄວ້ຢູ່ບໍຣິເວນເດີ່ນ ຂອງໂຮງງານແລະ ເຮັດໃຫ້ສານເຄມີ ຈາກໄມ້ດັ່ງກ່າວ ໄຫຼລົງໃສ່ຫ້ວຍ, ປັດຈຸບັນ ໂຮງງານດັ່ງກ່າວ ກຳລັງຢູ່ໃນລະຍະການກໍ່ສ້າງ ຊຶ່ງ ເຈົ້າຂອງໂຮງງານ ຮັບປາກວ່າ ຈະສຳເຣັດໃນຕົ້ນເດືອນໜ້າ ແລະເມື່ອເຮັດການຜລິດເຈັ້ຽ ກໍຈະມີອ່າງບຳບັດໄວ້ຮອງຮັບນໍ້າເສັຽ ເພື່ອປ້ອງກັນຜົລກະທົບຕໍ່ ສິ່ງແວດລ້ອມນຳດ້ວຍ.

ເຈົ້າຂອງໂຮງງານກ່າວວ່າ ສ່ວນຂ່າວທີ່ປະຊາຊົນຮ້ອງຮຽນ ວ່າມີງົວຕາຍ 15ໂຕ ຕາຍຍ້ອນສານເຄມີ ໃນຫ້ວຍນັ້ນ ບໍ່ແມ່ນຂໍ້ມູນຈິງແທ້ ແຕ່ຢ່າງໃດ ເພາະຈາກການກວດກາ ແລ້ວພົບວ່າ ງົວຈຳນວນດັ່ງກ່າວ ຕາຍກ່ອນລະຍະທີ່ນໍ້າເສັຽໄຫຼລົງຫ້ວຍ ຊຶ່ງ ເຈົ້າໜ້າທີ່ກໍກຳລັງ ກວດສອບເພີ້ມຕື່ມ ວ່າງົວຕາຍຍ້ອນພຍາດຫຍັງແທ້.

ກ່ຽວກັບບັນຫານີ້ ເຈົ້າໜ້າທີ່ຣາຍງານຕື່ມວ່າ ຈາກການເອົາຕົວຢ່າງນໍ້າເສັຽ ທີ່ໄຫຼລົງຫ້ວຍນັ້ນ ມາວິຈັຍພົບວ່າ ເປັນນໍ້າສີແດງ ແລະມີທາດ ອ໋ອກຊີເຈັ້ນ ທີ່ລະລາຍໃນນໍ້າ ມີຣະດັບຕໍ່າກວ່າມາຕຖານ ທີ່ກົດໝາຍກຳນົດໃຫ້ ສ່ວນຕົວຢ່າງນໍ້າຫ້ວຍທີ່ເປື້ອນ ສານເຄມີນັ້ນ ກຳລັງຢູ່ໃນ ຂັ້ນຕອນ ຂອງການວິຈັຍຢູ່.

ເຕັມຫນ້າ