ເຂື່ອນໄຊຍະ ຮັບປະກັນ ບໍ່ສ້າງ ຜົລກະທົບ

ທ່ານ ທະນະວັດ ຕີວິດສະວະເວດ, ກັມມະການຜູ້ຈັດການ ບໍຣິສັດ ໄຊຍະບູຣີ ພາວເວີ ແລະ ກັມມະການຜູ້ຈັດການ ບໍຣິສັດ CK POWER, ໄດ້ກ່າວຕໍ່ສື່ມວນຊົນ ທັງພາຍໃນ ແລະ ຕ່າງປະເທສ ໃນໂອກາດພາ ສື່ມວນຊົນ ໄປທັສນະສຶກສາ ເຂື່ອນໄຊຍະບູຣີ ເນື່ອງຈາກ ຖືກກ່າວຫາວ່າ ເປັນຕົ້ນເຫດກັກນໍ້າ ເຮັດໃຫ້ແມ່ນໍ້າຂອງ ບົກແຫ້ງ ເມື່ອວັນທີ 23 ກໍໍຣະກະດາ ວ່າ ເຂື່ອນ ໄຊຍະບູຣີ ໄດ້ເຮັດການສຶກສາ ປະເມີນຜົລກະທົບ ຕໍ່ ສິ່ງແວັດລ້ອມ ແລະ ສັງຄົມ ເຊິ່ງເປັນໄປ ຕາມຣະບຽບການ ຂອງຄນະກັມມາທິການ ແມ່ນໍ້າສາກົລ ບໍ່ມີບັນຫາເຣື່ອງ ຜົລກະທົບ ຂ້າມ ພົມແດນ.

"ເຣື່ອງສິ່ງແວດລ້ອມ ເປັນເຣື່ອງທີ່ ທາງໄຊຍະບູຣີເອງ ແລ້ວກໍບໍຣິສັດ CK POWER ຈຳກັດມະຫາຊົນ ໃຫ້ຄວາມສຳຄັນ ເປັນອັນດັບ 1 ເລີຍ ເຊິ່ງຢູ່ໃນການດູແລ ຂອງຄນະກັມມະການ ແມ່ນໍ້າຂອງ ຫຼື MRC ເຊິ່ງໄດ້ກຳນົດຫຼັກເກນ ເຣື່ອງສິ່ງແວດລ້ອມ ໄວ້ໃຫ້ທຸກໂຄງການ ໃນແມ່ນໍ້າຂອງ ອັນຫຼັກໆ ແມ່ນທາງດ້ານສິ່ງແວດລ້ອມ ຄືເຣື່ອງຝຸ່ນຕົມ ແລ້ວກໍປາ."

ທ່ານ ທະນະວັດ ກ່າວຕື່ມວ່າ ເຂື່ອນໄຊຍະບູຣີ ມີປະຕູ ຣະບາຍຝຸ່ນຕົມ ທັງໝົດ 11 ບານ ທີ່ສາມາດຣະບາຍຝຸ່ນຕົມ ທັງສອງຣະດັບ ຄືມີ ປະຕູຣະບາຍນໍ້າ ຣະດັບໜ້ານໍ້າ ຈຳນວນ 7 ບານ ເຮັດໜ້າທີ່ ຣະບາຍ ຝຸ່ນຕົມຂນາດນ້ອຍ ແລະ ອີກ 4 ບານ ຈະຢູ່ໃນຣະດັບເລິກ ໃຕ້ນໍ້າ ເພື່ອໃຊ້ຣະບາຍນໍ້າ ໄປພ້ອມ ກັບຣະບາຍຝຸ່ນຕົມ ຂນາດໃຫຍ່.

ສ່ວນເຣື່ອງປາ ກໍມີຊ່ອງທາງ ປາເຂົ້າຫຼາຍຊ່ອງທາງ ເພື່ອຮອງຮັບ ການຜ່ານຂອງຝູງປາ ຕລອດແນວໂຄງສ້າງ ຂອງເຂື່ອນ ທັງໃນສວນຕາມ ກະແສນໍ້າ ທວນກະແສນໍ້າ ເພື່ອໃຫ້ຝູງປາ ຂຶ້ນວາງໄຂ່ ຂຍາຍພັນ.

ຕໍ່ການຊີ້ແຈງ ດັ່ງກ່າວ, ທ່ານ ມົນຕຣີ ຈັນທະວົງ ຈາກ ກຸ່ມເສຣີພາບ ແມ່ນໍ້າຂອງ ປະເທດໄທ ກ່າວຕໍ່ ນັກຂ່າວ ອ​າ​ຣ໌ ແອັ​ຟ ເອ (RFA) ໃນວັນທີ 24 ກໍຣະກະດາວ່າ. ການສຶກສາ ຜົລກະທົບ ຂ້າມພົມແດນ ບໍ່ໄດ້ລົງເລິກ ໄປເຖິງ ໄທ, ກັມພູຊາ ແລະ ວຽດນາມ ໄລຍະ ຂອງການສືກສາ ພຽງ 10 ກິໂລແມັດ ເທົ່ານັ້ນ.

"ຂ້າພະເຈົ້າ ຄິດວ່າ ຕ້ອງໄປຖາມ MRC ວ່າ ອ້າງແບບນີ້ MRC ສາມາດອອກໜັງສືີ ຮັບຮອງໄດ້ບໍ່ ວ່າ ເຂື່ອນໄຊຍະບູຣີ ໄດ້ສ້າງຕາມທີ່ MRC ກຳນົດ ໄວ້ຄົບຖ້ວນ ຖືກຕ້ອງ ແຕ່ວ່າຂໍ້ມູນ ຈາກການທົດລອງແທ້ ນັ້ນມັນລົງໄປ ບໍ່ຮອດ 10 ກິໂລແມັດ ເພາະສະນັ້ນ ຂອບເຂດ ຂອງການສຶກສາແທ້ ເຂົາບໍ່ໄດ້ ສຶກສາຂ້າມພົມແດນ ເພາະສະນັ້ນ ຜົລການສຶກສາ ມັນກໍມີຜົລກະທົບ ຂ້າມພົມແດນ ມັນບໍ່ເປັນເຫດຜົລ ທີ່ຈະມາ ອ້າງໄດ້ວ້າບໍ່ມີ ຜົລກະທົບ ຂ້າມພົມແດນ."

ໃນຂນະທີ່ ທ່ານ ອານຸລັກ ກິດຕະຄຸນ, ເຈົ້າໜ້າທີ່ຄນະກັມມາທິການ ແມ່ນໍ້າຂອງ ຫຼື MRC ໄດ້ກ່າວຕໍ່ RFA ເມື່ອເດືອນພືສພາ ຜ່ານມາ ວ່າ ເຂື່ອນທຸກເຂື່ອນ ທີ່ສ້າງກັ້ນ ແມ່ນໍ້າຂອງ ມີຜົລກະທົບ ຢູ່ແລ້ວ, ໂດຍສະເພາະ, ແມ່ນເຣື່ອງປາ ແລະ ນໍ້າຖ້ວມ ແຕ່ເຣື່ອງຜົລກະທົບ ຂ້າມພົມແດນ ຍັງບໍ່ໝັ້ນໃຈເທື່ອ.

"ຕາມການປະເມີນ ຂອງເຮົານີ້ ເພາະວ່າ ເຂື່ອນ ນີ້ມັນຢູ່ເທີງ ວຽງຈັນ ເນາະ ສຳລັບ ກັມພູຊາ ກັບ ວຽດນາມ ຜົລກະທົບ ອາດຈະບໍ່ໄວໆ ເນາະ ແຕ່ວ່າ ມັນສິສະສົມແລ້ວ ກໍໄລຍະຍາວ ສະນັ້ນ ເຮົາກໍບໍ່ໝັ້ນໃຈເທື່ອ ວ່າ ມັນສິມິຜົລກະທົບ ຫຼາຍຊໍ່າໃດ ຫຼື ໜ້ອຍຊໍ່າໃດ ແຕ່ແນ່ນອນວ່າ ມັນມີ ຜົລກະທົບ ເຣື່ອງນໍ້າຖ້ວມເບາະ ເຣື່ອງບັນຫາ ການປ່ອຍນໍ້າ ອັນນີ້ ຜູ້ສ້າງ ກໍຕ້ອງເບີ່ງ ສຶກສາດີໆ."

ປັດຈຸບັນ ເຂື່ອນໄຊຍະບູຣີ ໄດ້ທົດລອງ ຜລິດໄຟຟ້າ ໄປແລ້ວ 6 ເຄື່ອງ ຈາກທັງໝົດ 7 ເຄື່ອງ ແລະ ໃນກາງເດືອນສີງຫານີ້ ຈະມີການ ທົດລອງ ຜລິດໄຟຟ້າ ອີກທັງໝົດ 7 ເຄື່ອງ ກ່ອນທີ່ ຈະຜລິດຂາຍ ໃຫ້ໄທ ໃນເດືອນຕຸລາ ປີ 2019 ນີ້.

ເຂື່ອນໄຊຍະບູຣີ ເຣີ້ມກໍສ້າງ ມາແຕ່ປີ 2012 ມີ 5 ບໍຣິສັດ ຮ່ວມລົງທືນ ໃນນັ້ນ ບໍຣິສັດ CK Power Public Company Limited ຖືຫຸ້ນ 37,5%, ບໍຣິສັດ NATEE SYNERY 25.0%, ບໍ​ຣິ​ສັດ​ຜ​ລິ​ຕ​ໄຟ​ຟ້າ​ຈຳ​ກັດ​ມະ​ຫາ​ຊົນ (ໄທ) 12.5%, ບໍຣິສັດຜ​ລິ​ຕ​ໄຟ​ຟ້າ​ລາວມະ​ຫາ​ຊົນ ຫຼື EDL-Gen 20% ແລະ ບໍຣິສັດ PT Construction and Irrigation SOLE 5% ຮວມມູນຄ່າ ການກໍ່ສ້າງ 4,300 ລ້ານໂດລາ ສະຫຣັຖ.

ເຂື່ອນໄຊຍະບູຣີ ໄດ້ຮັບສັມປະທານ ຈາກຣັຖບານລາວ 31 ປີ. ໄຟຟ້າ 95% ຂາຍໃຫ້ ການໄຟຟ້າຝ່າຍຜລິຕແຫ່ງປະເທດໄທ ແລະ 5% ຂາຍໃຫ້ ຣັຖວິສາຫະກິຈ ໄຟຟ້າລາວ.