ສະຖານະການໂຄວິດ-19 ຣະບາດ ເພີ່ມຂຶ້ນທຸກມື້

ທາງການລາວ ກວດພົບຜູ້ຕິດໂຄວິດ-19 ໃໝ່ຕື່ມ ໃນມື້ວັນທີ 10 ພຶສຈິການີ້ 1,140 ຄົນ. ໃນຈໍານວນນັ້ນ ຕິດຢູ່ນະຄອນຫຼາຍວງວຽງຈັນ 671 ຄົນ ແລະບໍ່ມີແນວໂນ້ມວ່າຈະຫລຸດລົງ. ທາງການໄດ້ສົ່ງເຈົ້າໜ້າທີ່ທີ່ກ່ຽວຂ້ອງ ໄປສົມທົບກັບເຈົ້າໜ້າທີ່ບ້ານ ແລະຮຽກຮ້ອງໃຫ້ປະຊາຊົນຮ່ວມມື ໃນການຄວບຄຸມ ແລະປ້ອງກັນໂຄວິດ-19 ເພື່ອເຮັດໃຫ້ຈໍານວນຄົນຕິດເຊື້ອນີ້ຫລຸດລົງ.

ດຣ. ຣັດຕະນະໄຊ ເພັດສຸວັນ ຫົວໜ້າກົມຄອບຄຸມພະຍາດຕິດຕໍ່ ກະຊວງສາທາຣະນະສຸຂ ຕາງໜ້າຄະນະສະເພາະກິດ ປ້ອງກັນໂຄວິດ-19 ກ່າວໃນພິທີຖແລງຂ່າວຕໍ່ສື່ມວນຊົນໃນມື້ວັນທີ 10 ພຶສຈິການີ້ວ່າ:

“ສໍາລັບນະຄອນຫຼວງວຽງຈັນນັ້ນ ການຕິດເຊື້ອໃນຊຸມຊົນແມ່ນສູງກວ່າ 500 ກໍຣະນີ ເປັນຫຼາຍວັນແລ້ວ. ການຣະບາດແມ່ນຍັງບໍ່ມີທ່າອ່ຽງ ທີ່ຈະຫລຸດລົງເທື່ອ ແລະຕ້ອງໄດ້ສືບຕໍ່ ສະພາບການຢ່າງໃກ້ຊິດ ດັ່ງນັ້ນກອງປະຊຸມ ກໍແມ່ນໄດ້ຕົກລົງເອກພາບ ແມ່ນຈະໄດ້ຈັດສົ່ງທີມງານ ໂດຍສົມທົບກັບອໍານາດປົກຄອງທ້ອງຖິ່ນ ລົງແກ້ໄຂການຣະບາດໃນບ້ານແດງ ເອົາຫົວໜ່ວຍຄອບຄົວເປັນການຢຸດຢັ້ງ.”

ເບື້ອງຕົ້ນ ທາງການລາວໄດ້ໃຫ້ເຈົ້າໜ້າທີ່ ເຂັ້ມງວດກັບຄອບຄົວ ທີ່ສໍາພັດໃກ້ສິດ ກັບຜູ້ຕິດເຊື້ອໂຄວິດ-19 ຄືຕ້ອງໄດ້ກັກໂຕ ຕາມມາຕການປ້ອງກັນໂຄວິດ-19, ຫ້າມບໍ່ໃຫ້ອອກຈາກເຮືອນໄປເດັດຂາດ ຈົນຄົບກໍານົດ 14 ມື້ ຍ້ອນຢ້ານເຊື້ອໄປຕິດຄົນອື່ນໆ ດັ່ງເຈົ້າໜ້າທີ່ອໍານາດການປົກຄອງບ້ານ ຢູ່ເມືອງຫາດຊາຍຟອງ ນະຄອນຫຼວງວຽງຈັນ ທ່ານນຶ່ງ ກ່າວໃນມື້ດຽວກັນນີ້ວ່າ:

“ແມ່ນແລ້ວ ຢູ່ບ້ານເຮົານັ້ນໄດ້ແຕ່ໜ່ວຍສະເພາະກິດ ເຮັດວຽກງານປ້ອງກັນໂຕນີ້ ໂດຍສະເພາະ. ສໍາລັບຄອບຄົວຜູ້ທີ່ມີການຕິດເຊື້ອເນາະ ພະຍາຍາມຮັກສາຄວາມປອດພັຍ ບໍ່ໃຫ້ກຸ່ມສ່ຽງຫັ້ນອອກມາເຄື່ອນໄຫວຂ້າງນອກ ຮັກສາໂຕຢູ່ໃນເຮືອນ ແລະກໍບໍຣິການຊ່ວຍເຫລືອຊື້ອາຫານ ກະຫ້າມເດັດຂາດບໍ່ໃຫ້ມີການຊຸແຊວ ຈັດງານປະເພນີອື່ນໆ”

ອີງຕາມຄໍາເວົ້າຂອງເຈົ້າໜ້າທີ່ບ້ານ ຢູ່ເຂດເມືອງໄຊທານີ ນະຄອນຫຼວງວຽງຈັນ ຕໍ່ວິທຍຸເອເຊັຽເສຣີ ໃນມື້ວັນທີ 10 ພຶສຈິການີ້, ເຈົ້າໜ້າທີ່ບ້ານຢູ່ຫຼາຍບ້ານ ໄດ້ພະຍາຍາມເຂັ້ມງວດໃນການກວດກາທຸກຢ່າງ, ແຕ່ກໍຍັງພົບບັນຫາຫຍຸ້ງຍາກ ໃນເຣື່ອງຈໍານວນຄົນ ກວດກາເວນຍາມບໍ່ພຽງພໍ:

“ອີງໃສ່ຊ່ວງນີ້ ກະການຣະບາດຂອງບ້ານເຮົາ ມັນກໍຫຼາຍາຍເດ໋ເນາະ ກໍາລັງເຈົ້າໜ້າທີ່ອ້າຍນ້ອງ ກໍຍັງເຫລືອຢູ່ 5-6 ຄົນ ເຫລືອນັ້ນເຂົາເຈົ້າກະໄດ້ສັມຜັດ ຜູ້ທີ່ວ່າຢູ່ໃກ້ຊີດ ຜູ້ທີ່ມີຄວາມສ່ຽງ ເຂົາເຈົ້າກໍບໍ່ໄດ້ມາແຫຼາຍະ ເຂົາເຈົ້າກະກັກໂຕເອງ ສໍ່າກັນກັບຜູ້ຕິດເຊື້ອພຸ້ນລະພວກນີ້ນະ.”    

ແລະສິ່ງສໍາຄັນ ແມ່ນທາງການ ຍັງເນັ້ນໃຫ້ຜູ້ທີ່ຍັງບໍ່ທັນໄດ້ ສັກວັກຊີນປ້ອງກັນໂຄວິດ-19 ຮີບຟ້າວໄປສັກ  ແລະທັງມີການຄົ້ນຄວ້າ ເຣື່ອງການສັກວັກຊີນນັ້ນ ໃຫ້ກຸ່ມຄົນອາຍຸແຕ່ 12-17 ປີນໍາດ້ວຍ:

“ຕ້ອງເລັ່ງໃສ່ຜູ້ທີ່ຍັງບໍ່ໄດ້ສັກ ວັກຊີນນີ້ ຕ້ອງໃຫ້ໄປສັກ ກະມີຄວາມຄຸ້ມກັນເຮົາມັນກະໄດ້ສູງເນາະ ຖ້າວ່າເຮົາຕິດແລ້ວກະປິ່ນປົວແລ້ວກໍເຊົາ ມັນຈະບໍ່ໄປລົງປອດລົງຫຍັງຫັ້ນນ່າ ດຽວນີ້ເດີເຣື່ອງອາຍຸ 12-17 ນີ້ຫັ້ນເພິ່ນຍັງຄົ້ນຄວ້າຢູ່ ກໍຈະໄວໆແຫຼາຍະໂຕນີ້ນ່າ.”

ເຣື່ອງການສັກວັກຊີນ ປ້ອງກັນໂຄວິດ-19 ໃຫ້ກຸ່ມຄົນອາຍຸ 12-17 ປີ ເຈົ້າໜ້າທີ່ກະຊວງສາທາຣະນະສຸຂທ່ານນຶ່ງ ຜູ້ຂໍສງວນຊື່ ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນ ມື້ວັນທີ 10 ພຶສຈິກາ ນີ້ວ່າ ທາງການຍັງຄົ້ນຄວ້າກັນຢູ່ ຊຶ່ງຍັງບໍ່ຮູ້ວ່າ ຈະສັກວັກຊີນຍີ່ຫໍ້ໃດໃຫ້ ແຕ່ກໍໄດ້ສັກໃຫ້ກຸ່ມຄົນອາຍຸ 17 ປີໄປແລ້ວ ເປັນຍີ້ຫໍ້ ຊີໂນຟາມ(Sinopharm) ແລະແອສຕຣາເຊນິກ້າ (AstraZeneca):

“ຍັງມີແຕ່ 17 ປີຂຶ້ນເມືອເດີ ກະລົມໆກັນຢູ່ນີ້ ຄົ້ນຄວ້າຢູ່ເດີ ເຮົາກໍຍັງບໍ່ຮູ້ເທື່ອດອກ ຟັງໄປນໍາກັນນີ້ແຫຼາຍະ ໃຜກໍຢາກຈະສັກໝົດແຫຼາຍະ.”

ກ່ຽວກັບເຣື່ອງວັກຊີນ ທ່ານ ບຸນແຝງ ພູມມະໄລສິດ ຣັຖມົນຕຣີ ກະຊວງສາທາຣະນະສຸຂ ເປີດເຜີຍວ່າ ພາຍໃນເດືອນນີ້ ຣັຖບານຈີນ ຈະມອບວັກຊີນປ້ອງກັນໂຄວິດ-19 ໃຫ້ແກ່ຣັຖບານລາວເພີ່ມອີກ 2,500,000 ໂດສ. ທີ່ຜ່ານມາ ຣັຖບານລາວ ໄດ້ພະຍາຍາມທີ່ຈະຄວບຄຸມ ເຊື້ອໂຄວິດ-​19 ບໍ່ໃຫ້ຂຍາຍເພີ່ມສູງຂຶ້ນ, ແຕ່ມາຮອດມື້ນີ້ ກໍຍັງບໍ່ສາມາດຄວບຄຸມໄດ້ ກົງກັນຂ້າມ ໂຄວິດ-19 ຣະບາດເພີ່ມຫຼາຍຂຶ້ນ.

ເພື່ອແກ້ໄຂບັນຫາດັ່ງກ່າວ ທ່ານ ພັນຄໍາ ວິພາວັນ ນາຍົກຣັຖມົນຕຣີ ໄດ້ກ່າວຕໍ່ກອງປະ ຊຸມສມັຍສາມັນເທື່ອທີ 2 ຂອງສະພາແຫ່ງຊາດຊຸດທີ 9 ເຖິງມາຕການແກ້ໄຂ ການຣະບາດຂອງເຊື້ອໂຄວິດ-19 ໂດຍຈະເນັ້ນໃສ່ 3 ເຣື່ອງຄື ຮອດທ້າຍປີນີ້ ສຸມໃສ່ໃຫ້ປະຊາຊົນ ໄດ້ສັກວັກຊີນປ້ອງກັນໂຄວິດ-19 50% ຂຶ້ນໄປ ແລະທັງເພີ່ມການຫາວັກຊີນ, ອຸປກອນການແພດ ແລະຢາປົວ ທີ່ມີຄຸນນະພາບ, ສະຖານທີ່ກັກຕົວ, ສະຖານທີ່ປິ່ນປົວ ເພື່ອໃຫ້ປະຊາຊົນ ເຂົ້າເຖິງໄດ້ຢ່າງສເມີພາບ ແລະສຶກສາອົບຮົມໃຫ້ປະຊາຊົນ ເຂົ້າໃຈທຸກວິທີການ ໃນການປ້ອງກັນ ແລະໃຫ້ປ່ຽນການໃຊ້ຊີວິດ ແບບເກົ່າ ເປັນການໃຊ້ຊີວິດແບບໃໝ່ ເພາະຕ້ອງໄດ້ທໍາມາຫາກິນ ແລະພັທນາເສຖກິດ.