ບໍ່ແກ້ວ ປິດເສຖກິຈພິເສດ ຄົນຈີນຕິດໂຄວິດ-19

ເຈົ້າໜ້າທີ່ ແຂວງບໍ່ແກ້ວ ໄດ້ເອົາປະຊາຊົນ ຈຳນວນ 349 ຄົນ ຢູ່ເຂດເສຖກິຈພິເສດ, ເມືອງຕົ້ນເຜິ້ງ ແຂວງບໍ່ແກ້ວ ມາກວດຫາ ໂຄວິດ-19 ພາຍຫຼັງທີ່ຮູ້ຂ່າວວ່າ ມີຄົນຈີນ ອາຍຸ 26 ປີ ທີ່ເຮັດວຽກ ຢູ່ເຂດດັ່ງກ່າວ ຕິດໂຄວິດ-19. ດັ່ງເຈົ້າໜ້າທີ່ສະເພາະກິຈ ແລະ ປ້ອງກັນໂຄວິດ-19 ແຂວງບໍ່ແກ້ວ ນາງນຶ່ງ ທີ່ຂໍສງວນຊື່ ແລະ ຕຳແໜ່ງ ໄດ້ກ່າວຕໍ່ຜູ້ສື່ຂ່າວ ວິທຍຸ ເອເຊັຽ ເສຣີ ໃນວັນທີ 21 ມົກກະຣາ ນີ້ວ່າ:

“ເກີດອຸບັດຕິເຫດ ລາວເຈັບໜັກ ລະແມ່ນສົ່ງໄປປົວຢູ່ຈີນ. ເບື້ອງຕົ້ນ ຈີນເພິ່ນແຈ້ງມາວ່າ ໃຫ້ຜົລບວກ, ແຕ່ວ່າບໍ່ມີເອກະສານ ເປັນທາງການເນາະ, ທາງແຂວງພວກເຮົາ ກະບໍ່ນິ້ງນອນໃຈ. ເຂດພິເສດ ເພິ່ນກະໄດ້ເກັບໂຕຢ່າງ ໂຄວິດ ກວດຢູ່ໃນເຂດຫັ້ນແລ້ວ ແມ່ນ 305 ຄົນ, ໃກ້ຊິດແທ້ໆ ແມ່ນ 44 ຄົນ. ພວກເຮົາໄດ້ເກັບໂຕຢ່າງ 2 ຄັ້ງ, ກະຖືວ່າລົບໝົດ.”

ໃນເບື້ອງຕົ້ນ ຄົນຈີນທີ່ຕິດໂຄວິດ-19 ນີ້ ປະສົບອຸບັດຕິເຫດ ຣົດຈັກລົ້ມເອງ ແລ້ວຖືກສົ່ງໄປປິ່ນປົວຢູ່ປະເທດຈີນ ແລະ ຫຼັງຈາກນັ້ນ ໂຮງໝໍຢູ່ປະເທດຈີນ ໄດ້ກວດພົບວ່າ ຜູ້ກ່ຽວຕິດເຊື້ອໂຄວິດ-19 ແລ້ວເຈົ້າໜ້າທີ່ຈີນ ໄດ້ສົ່ງຂ່າວມາຫາ ເຈົ້າໜ້າທີ່ລາວ ຢູ່ແຂວງ ບໍ່ແກ້ວ, ອີງຕາມການຣາຍງານ ໃນພິທີຖແລງຂ່າວ ຂອງທ່ານ ຄຳຜະຫຍາ ພິມປັນຍາ, ຮອງເຈົ້າແຂວງ ແຂວງບໍ່ແກ້ວ ໃນວັນທີ 19 ມົກກະຣາ ນີ້.

ເຈົ້າໜ້າທີ່ສະເພາະກິຈ ຄວບຄຸມ ແລະ ປ້ອງກັນໂຄວິດ-19 ແຂວງບໍ່ແກ້ວ ຍັງກ່າວຕື່ມວ່າ ເມື່ອຮູ້ແນວນັ້ນ ທາງເຂດເສຖກິຈພິເສດ 3 ຫຼ່ຽມຄຳ ຈຶ່ງໄດ້ສັ່ງປິດເຂດ ຕັ້ງແຕ່ວັນທີ 12 ມາ 25 ມົກກະຣາ ນີ້ ເພື່ອກັກໂຕ ບໍ່ໃຫ້ຄົນເຂົ້າ-ອອກ ແລະ ໃນວັນທີ 24 ມົກກະຣາ ເຈົ້າໜ້າທີ່ມີກຳນົດ ຈະກວດຫາເຊື້ອ ຊ້ຳອີກເທື່ອນຶ່ງ.

ຕາມທີ່ຮອງເຈົ້າແຂວງ ແຂວງບໍ່ແກ້ວ ຣາຍງານນັ້ນ ຄົນຈີນຜູ້ນີ້ ເຄີຍເດີນທາງໄປ ປະເທດພະມ້າ, ແຂວງທ່າຂີ້ເຫຼັກ ໃນໄລຍະ ເດືອນພຶສຈິກາ 2020 ແລະ ພື້ນທີ່ດັ່ງກ່າວ ເປັນພື້ນທີ່ ທີ່ມີການຣະບາດ ຂອງໂຄວິດ-19 ແລະ ລາວໄດ້ເດີນທາງ ເຂົ້າມາ ປະເທດລາວ ໃນວັນທີ 26 ພຶສຈິກາ 2020. ເມື່ອເປັນແນວນັ້ນ, ເຈົ້າໜ້າທີ່ ກໍໄດ້ກວດກາທຸກຄົນ ພາຍໃນເຂດເສຖກິຈພິເສດແລ້ວ, ແຕ່ກໍຍັງບໍ່ພົບ ຄົນຕິດໂຄວິດ-19 ແລະ ເຈົ້າໜ້າທີ່ ຕາມຊາຍແດນ ກໍໄດ້ເຂັ້ມງວດ ກວດກາຄັກແນ່ ທັງທາງນ້ຳ ແລະ ທາງບົກ ເພື່ອປ້ອງກັນບໍ່ໃຫ້ມີການຣະບາດ ຂອງໂຄວິດ-19 ຢູ່ພາຍໃນແຂວງບໍ່ແກ້ວ. ດັ່ງເຈົ້າໜ້າທີ່ ເຂດເສຖກິຈພິເສດ ທ່ານນຶ່ງ ທີ່ຂໍສງວນຊື່ ແລະ ຕຳແໜ່ງ ກ່າວໃນວັນທີ 21 ມົກກະຣາ ນີ້ວ່າ:

“ເພິ່ນກະຖແລງຂ່າວໄປລະເດ ບໍ່ຕິດຈັກຄົນດອກ ເພິ່ນກວດໝົດ. ເຣື່ອງຊາຍແດນນີ້ປິດແທ້ ບໍ່ໃຫ້ເຮືອຂ້າມໄປຂ້າມມາປ້ອງກັນເນາະ ລະກະເຂັ້ມງວດເຂົ້າ ຢ້ານຄົນລັກໄປລັກມາ ລະມາຕິດຕໍ່ປະເທດເຮົາ. ທາງລາວເຮົາກະຢ້ານຫຼາຍໄດ໋ ເພາະວ່າປະເທດລາວ ການປິ່ນປົວ ມັນກະເຄື່ອງມື ມັນກະບໍ່ທັນສມັຍແນ່ເນາະ, ມັນກະຣະມັດຣະວັງໂຕນີ້ແຫຼະ.”

ທ່ານກ່າວຕື່ມວ່າ ຫາກຄົບກຳນົດ ການກັກໂຕ 14 ມື້ ຫຼືເຖິງວັນທີ 25 ມົກກະຣາ ແລ້ວບໍ່ມີຜູ້ຕິດເຊື້ອ, ທາງເຂດເສຖກິຈພິເສດ ກໍຈະເປີດປົກກະຕິ. ກ່ອນຈະມີການປິດ ເຂດເສຖກິຈ ພິເສດ ນັ້ນ, ທາງການແຂວງບໍ່ແກ້ວ ໄດ້ສົ່ງໂຕຄົນຈີນ ທີ່ປະສົບອຸບັດຕິເຫດ ຣົດຈັກລົ້ມ ຜ່ານດ່ານບໍ່ເຕັນ ແຂວງຫຼວງນ້ຳທາ ເພື່ອສົ່ງໄປປິ່ນປົວຢູ່ປະເທດຈີນ.

ຂະນະດຽວກັນ, ເຈົ້າໜ້າທີ່ ແຂວງຫຼວງນ້ຳທາ ກໍໄດ້ເຂັ້ມງວດຄັກແນ່ ເພື່ອປ້ອງກັນໂຄວິດ-19 ແລະ ປ້ອງກັນ ການລັກລອບເຂົ້າມາ ຂອງຄົນຈີນ ແລະ ໃນທ້າຍເດືອນທັນວາ 2020 ມາຮອດເດືອນມົກກະຣາ ນີ້ ກໍສາມາດຈັບຄົນຈີນ ທີ່ລັກລອບເຂົ້າມາ ໄດ້ປະມານ 10 ປາຍຄົນ ແລະ ໄດ້ສົ່ງກັບປະເທດແລ້ວ. ດັ່ງເຈົ້າໜ້າທີ່ສະເພາະກິຈ ຄວບຄຸມ ແລະ ປ້ອງກັນໂຄວິດ-19 ແຂວງຫຼວງນ້ຳທາ ເວົ້າວ່າ:

“ມັນມີຄົນຈີນ ມີປະມານຈັກ 10 ກວ່ານີ້ແຫຼະ ແບບອັນພວກຄົນຊົນເຜົ່າສ່ວນນ້ອຍ ນີ້ນ່າ ຈະລັກໄປຫາກັນ, ຫັ້ນນ່າ. ໄທເຮົາກະ ເອົາມາ, ຈັບ, ກວດ, ຜັກດັນເຂົາເຈົ້າກັບ.”

ຕໍ່ເຫດການດັ່ງກ່າວ, ຊາວບ້ານ ທີ່ດຳຣົງຊີວິຕ ຢູ່ເມືອງຕົ້ນເຜິ້ງ ແຂວງບໍ່ແກ້ວ ທ່ານນຶ່ງເວົ້າວ່າ ພາຍຫຼັງໄດ້ຍິນຂ່າວດັ່ງກ່າວ ກໍຮູ້ສຶກ ຢ້ານວ່າ ອາຈມີການຣະບາດ ຂອງໂຄວິດ-19 ພາຍໃນແຂວງ ຈຶ່ງພາກັນຣະມັດຣະວັງຕື່ມ.

“ກໍມີແຕ່ຂ່າວ ເຮົາກໍຢ້ານໂອ່, ທຸກຄົນມັນກໍຢ້ານໝົດ, ຫັ້ນແຫຼະ. ມັນບໍ່ມີເທື່ອແຫຼະ ຢາວັກຊີນນີ້ນ່າ ປິດແຫຼະ ເຣື່ອງຊາຍແດນຄືກັນ, ໂອ່ຢ້ານແຫຼະ ຄືຍາມມື້ຄືນ. ເມືອງໄທຍ ກໍຍັງປິດ ເນາະ.”

ເຊັ່ນດຽວກັນ, ຊາວບ້ານ ອີກນາງນຶ່ງ ທີ່ອາສັຍຢູ່ເມືອງ ແລະ ແຂວງດຽວກັນກັບຜູ້ກ່ອນໜ້ານີ້ ກໍເວົ້າວ່າ ນາງກໍຮູ້ສຶກຢ້ານຢູ່ ແລະ ເວລາອອກໄປທາງໃດ ກໍປ້ອງກັນໂຕເອງຕລອດເວລາ ດ້ວຍການໃສ່ຜ້າອັດປາກອັດດັງ ແລະ ລ້າງມືທຸກຄັ້ງ ທີ່ສຳຜັດສິ່ງຕ່າງໆ.

“ເອີ່, ກະຢ້ານຫັ້ນແຫຼະ. ວິທີປ້ອງກັນ ໄປຕລາດ ເຂົາກະໃສ່ຜ້າອັດປາກ ຢູ່ເຮືອນເຂົາກະຕົ້ມນ້ຳຮ້ອນ ນ້ຳຫຍັງກິນ. ມີນ້ຳຢາກລ້າງມື ນ້ຳຢາຂ້າເຊື້ອອີ່ຫຍັງ.”

ອີງຕາມຄວາມເວົ້າ ຂອງທ່ານ ຄຳຜະຫຍາ ພິມປັນຍາ ໃນພິທີຖແລງຂ່າວ ເມື່ອວັນທີ 19 ມົກກະຣາ ແລ້ວແມ່ນວ່າ ນັບແຕ່ວັນທີ 11 ຈົນມາເຖິງ ວັນທີ 19 ມົກກະຣາ 2021 ນີ້, ເຂດເສຖກິຈພິເສດ 3 ຫຼ່ຽມຄຳ ໄດ້ດຳເນີນການກວດຫາໂຄວິດ-19 ນຳປະຊາຊົນ ທີ່ອາສັຍຢູ່ໃນເຂດດັ່ງກ່າວ ປະມານ 10,000 ໂຕຢ່າງ ແລະ ໃຫ້ຜົລເປັນລົບທັງໝົດ ແລະ ຍັງສືບຕໍ່ ມາຕການ ປ້ອງກັນໂຄວິດ-19 ຄືເກົ່າ, ໂດຍສະເພາະຊາຍແດນ ທີ່ຕິດກັບປະເທດພະມ້າ ແລະ ໄທຍ ທີ່ຍັງມີການຣະບາດໜັກຢູ່.

ປັດຈຸບັນ, ສະພາບການຕິດໂຄວິດ-19 ຢູ່ໃນລາວ ຖືວ່າບໍ່ມີການຣະບາດແລ້ວ ຍ້ອນບໍ່ມີຜູ້ຕິດເຊື້ອເພີ່ມ ເປັນເວລາຫຼາຍມື້ຕິດຕໍ່ກັນ, ເຊິ່ງຕັ້ງແຕ່ເດືອນມີນາ 2020 ຈົນມາເຖິງ ວັນທີ 21 ເດືອນມົກກະຣາ 2021 ມີຣາຍງານ ຜູ້ຕິດໂຄວິດ-19 ທັງໝົດ 41 ຄົນ. ໃນນັ້ນ, ປິ່ນປົວດີແລ້ວ 40 ຄົນ ແລະ 1 ຄົນ ພວມປິ່ນປົວຢູ່ໂຮງໝໍ 150 ຕຽງ ທີ່ນະຄອນຫຼວງວຽງຈັນ, ອີງຕາມການຣາຍງານ ຂອງກະຊວງສາທາຣະນະສຸຂ.