ຊາວບ້ານ ລຳ​ບາກ ໄລ​ຍະ ລ໊ອກດາວ

ສິດນີ
2021-09-27
Share
ຊາວບ້ານ ລຳ​ບາກ ໄລ​ຍະ ລ໊ອກດາວ ທາງການ ປິດການເຂົ້າ-ອອກ ຕາມທ້ອງຖນົນ ໃນຫຼວງວຽງຈັນ ຕາມມາຕການປ້ອງກັນ ໂຄວິດ-19. (TS)
RFA

ຊາວບ້ານ ຢູ່ນະຄອນຫຼວງວຽງຈັນ ໂດຍສະເພາະ ຄົນທີ່ເຊົ່າຫ້ອງແຖວ ແລະ ຫໍພັກ ໄດ້ຮັບຄວາມລຳບາກຫຼາຍ ຈາກການ ປິດບ້ານ ປິດເມືອງ ຢາກໃຫ້ພາກສ່ວນກ່ຽວຂ້ອງ ຊ່ອຍເຣື່ອງ ອາຫານການກິນ ຍ້ອນຖືກໃຫ້ຢຸດວຽກ ໂດຍບໍ່ມີກຳນົດ ເຮັດໃຫ້ບໍ່ມີຣາຍໄດ້. ດັ່ງ ຊາວບ້ານ ຢູ່ນະຄອນຫຼວງວຽງຈັນ ທ່ານນຶ່ງ ກ່າວຕໍ່ເອເຊັຽເສຣີ ໃນວັນທີ 27 ກັນຍານີ້ວ່າ:

“ກະຫາກິນກັນລຳບາກຫັ້ນແຫຼ້ວ ໄປຫາເງິນຫາຄຳຈັ່ງຊີ້ກໍບໍ່ໄດ້ແລ້ວ ໂຕນີ້ມັນຕ້ອງມີຜົລເນາະ ກໍແມ່ນເວົ້າເຣື່ອງໂຈນ, ເຣື່ອງສິນຊັບ ຂີ້ລັກງັດແງະ ເພາະຄົນໄປຊອກຫາບໍ່ໄດ້ເດ ສິນຄ້າຫັ້ນ ເປັນຕົ້ນແມ່ນ ສວຍໂອກາດຂຶ້ນ ຄັນວ່າຂຶ້ນລາຄາສິນຄ້າແລ້ວ ມັນເປັນການ ຊ້ຳເຕີມ ກໍຢາກໃຫ້ພາກຣັຖເພິ່ນຊ່ອຍຫັ້ນແຫຼ້ວ ແລະເຂົາເຈົ້ານອນຢູ່ຫໍພັກ ເຮືອນເຊົ່າ ທີ່ບໍ່ມີບ່ອນຊອກຢູ່ຫາກິນ ໃນຍາມວິກິດຈັ່ງຊີ້.”

ຊາວບ້ານອີກຄົນນຶ່ງ ຢູ່ນະຄອນຫຼວງວຽງຈັນ ກ່າວວ່າ ກຸ່ມຄົນທີ່ໄດ້ຮັບຜົລກະທົບຫຼາຍກວ່າໝູ່ ສ່ວນຫຼາຍຈະເປັນ ກຸ່ມທີ່ພັກ ຢູ່ຫ້ອງ ແຖວ ດັ່ງທ່ານເວົ້າວ່າ:

”ຄົນທີ່ເຂົາຢູ່ຫ້ອງແຖວຕຶກ ເຂົາບໍ່ມີທຶນທີ່ຊັບປອດໂຕເອງ ເພາະວ່າເຂົາກິນເດືອນຕໍ່ເດືອນຫັ້ນນ່າ ເພາະເຂົາເມືອບ້ານກໍບໍ່ໄດ້ ເຮັດຫຍັງ ກໍບໍ່ໄດ້ ກໍຕ້ອງລຳບາກ ກະສົງສານເຂົາຫັ້ນ ບໍ່ມີໃຜສົ່ງໃຫ້ເຂົາເດ ບາງຄົນກໍຍັງຮຽນຢູ່ ກະທຳງານໄປນຳຮຽນໄປນຳ ກໍຣະນີແຕ່ລະຄົນ ບໍ່ຄືກັັນເນາະ.”

ຊາວບ້ານຢູ່ນະຄອນຫຼວງວຽງຈັນອີກ ທ່ານນຶ່ງເວົ້າວ່າ ຖ້າຫາກບ້ານໃດເປັນເຂດພື້ນທີ່ສີແດງ ບັນດາກັມມະກອນຕ່າງໆ ຍິ່ງໄດ້ຮັບ ຜົລກະທົບ ເພາະທາງໜ່ວຍງານ ພາກຣັຖ ແລະ ພາກເອກຊົນ ໄດ້ປິດກິຈການໝົດ ແນ່ນອນວ່າ ຈະເຈົ້າບໍ່ໄດ້ຮັບເງິນເດືອນ:

“ຢູ່ບ້ານໃດທີ່ວ່າ ເປັນບ້ານແດງຈັ່ງຊີ້ ທາງອົງການສຳນັກງານ ຂະເຈົ້າໃຫ້ຢຸດວຽກໃດ ໂດຍບໍ່ໄດ້ຄິດໄລ່ເງິນໃຫ້ ເພາະເປັນພະນັກງານ ບໍຣິສັດ ກໍມີສ່ວນ ເປັນກັມມະກອນໂຮງງານກໍມີສ່ວນ ໝົດທຸກວຽກເລີຍກະທົບໂຕນີ້ ຜູ້ໃດທີ່ຕົກຢູ່ບ້ານແດງ ກໍໄດ້ຍຸດຕິ.”

ທາງການລາວ ກໍຍັງບໍ່ມີການຊ່ອຍເຫຼືອກຸຸ່ມຄົນເຫຼົ່ານີ້ ແຕ່ຢ່າງໃດ ພ້ອມດຽວກັນນີ້ ທາງການນະຄອນຫຼວງວຽງຈັນ ກໍໄດ້ຕຽມຂຍາຍ ໂຮງໝໍປິ່ນປົວຜູ້ຕິດເຊື້ອ ເພີ່ມອີກ 2 ແຫ່ງ ນຶ່ງ ຢູ່ທີ່ມະຫາວິທຍາລັຍດົງໂດກ ສາມາດຮອງຮັບຜູ້ປ່ວຍໄດ້ 600 ປາຍຄົນ ແລະ ສອງ ແມ່ນຢູ່ມັທຍົມຕົ້ນ ສີເກີດ ສາມາດຮອງຮັບໄດ້ 200 ປາຍຄົນ.

ສາເຫດທີ່ມີການຂຍາຍເພີ່ມຕື່ມ ຍ້ອນພົບວ່າ ມີຜູ້ຕິດເຊື້ອໂຄວິດ-19 ໃນຊຸມຊົນເພີ່ມຂຶ້ນ ຢ່າງງຕໍ່ເນື່ອງ ໂດຍສະເພາະໃນໂຮງງານ ຕ່າງໆ ເປັນຕົ້ນ ໂຮງງານຕັດຫຍິບ ສີເກີດ ທີ່ມີຄົນງານປະມານ 2 ພັນປາຍຄົນ ໃນນັ້ນກໍຍັງມີກຸ່ມສ່ຽງ ແລະຜູ້ສຳຜັດໃກ້ຊິດ ອີກ ຈຳນວນນຶ່ງ ຖືກກັກໂຕຢູ່. ດັ່ງເຈົ້າໜ້າທີ່ສາທາຣະນະສຸຂ ທ່ານນຶ່ງເວົ້າວ່າ:

“ແມ່ນແລ້ວຕຽມປິ່ນປົວວ່າຊັ້ນສະ ເພາະວ່າ ສະຖານທີ່ມັນກວ້າງແລະມັນເໝາະສົມ ສ່ວນຫຼາຍ ມັນພະນັກງານຢູ່ສີເກີດຕິດເພີ່ມຂຶ້ນ ມັນຈຳນວນພະນັກງານຢູ່ສີເກີດ ມັນມີ 2 ພັນປາຍ ຈຳນວນຄົນ ມັນຫຼາຍ ມັນມີທ່າອ່ຽງເພີ່ນຂຶ້ນ ຄັນຖ້າມັນບໍ່ພຽງພໍ ເພິ່ນກໍຈະຊອກ ຈຸດອື່ນອີກຫັ້ນນ່່າ.”

ໃນຂນະດຽວກັນ ໃນມື້ນີ້ ກະຊວງສາທາຣະນະສຸຂລາວ ກໍໄດ້ກວດພົບເຫັນຜູ້ຕິດເຊື້ອເພີ່ມອີກ 622 ກໍຣະນີ ຈາກຜົລການກວດເຊື້ອ ຂອງວັນທີ 26 ກັນຍາ ທັງໝົດ 6,066 ໂຕຢ່າງ. ໃນນັ້ນ ພົບຜູ້ຕິດເຊື້ອໃນຊຸມຊົນ 610 ຄົນ ຢູ່ນະຄອນຫຼວງວຽງຈັນ 315 ຄົນ, ບໍ່ແກ້ວ 11 ຄົນ, ຫຼວງນ້ຳທາ 3 ຄົນ, ຫຼວງພຣະບາງ 35 ຄົນ ແຂວງວຽງຈັນ 13 ຄົນ, ແຂວງຄຳມ່ວນ 152 ຄົນ, ສວັນນະເຂດ 7 ຄົນ ແລະຈຳປາສັກ 59 ຄົນ.

ດັ່ງ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມ ພຍາດຕິດຕໍ່ ກະຊວງສາທາຣະນະສຸຂ ແລະ ຕາງໜ້າຄະນະສເພາະກິຈ ປ້ອງກັນໂຄວິດ-19 ກ່າວໃນພິທີຖແລງຂ່າວ ຕໍ່ສື່ມວນຊົນ ໃນວັນທີ 27 ກັນຍານີ້ວ່າ:

“ພວກເຮົາໄດ້ກວດວິເຄາະທັງໝົດ 6,066 ຄົນ ແມ່ນກວດພົບຜູ້ຕິດເຊື້ອໃໝ່ 622 ຄົນ ຊຶ່ງເປັນກໍຣະນີນຳເຂົ້າ ມີພຽງທັງໝົດ 12 ຄົນ ສ່ວນທີ່ເຫຼືອນັ້ນ ແມ່ນການຕິດເຊື້ອໃນຊຸມຊົນ ຊຶ່ງມີໂຕເລຂສູງເຖິງ 610 ຄົນ.”

ການຕິດເຊື້ອໂຄວິດ-19 ໃນຊຸມຊົນ ຖືວ່າ ນະຄອນຫຼວງວຽງຈັນ ມີໂຕເລຂສູງກວ່າໝູ່ ຮອງລົງມາແມ່ນ ແຂວງຄຳມ່ວນ ກວດພົບເຫັນ ຜູ້ຕິດເຊື້ອໃນໂຮງງານຜລິດເກືອ ໄຄ່ຫຍວນ ແຕ່ເຈົ້າໜ້າທີ່ກ່ຽວຂ້ອງ ໄດ້ມີມາຕການໃຫ້ໂຮງງານດັ່ງກ່າວ ຮັບຜິດຊອບແລ້ວ ໂດຍໃຫ້ ສ້າງສະຖານທີ່ກັກໂຕ ເພື່ອປ້ອງກັນການແຜ່ຣະບາດ ພ້ອມທັງມີເຈົ້າໜ້າທີ່ແພດ ຊ່ອຍດູແລໃນໂຮງງານ ເພື່ອບໍ່ໃຫ້ເຊື້ອ ແຜ່ລາມໄປ ສູ່ຊຸມຊົນໃນວົງກວ້າງ.

ຫຼ້າສຸດ ຄະນະສະເພາະກິຈປ້ອງກັນໂຄວິດ-19 ຂັ້ນສູນກາງ ໄດ້ຣາຍງານວ່າ ມາຮອດປັດຈຸບັນ ປະເທດລາວ ມີຜູ້ໄດ້ຮັບການກວດ ຫາເຊື້ອທັງໝົດ 530,473 ຄົນ ມີຜູ້ຕິດເຊື້ອສະສົມ ທັງໝົດ 22,441 ຄົນ ປິ່ນປົວເຊົາແລ້ວ 17,154 ຄົນ ກຳລັງປິ່ນປົວຢູ່ 5,271 ຄົນ ແລະເສັຽຊີວິດ 16 ຄົນ.

ສ່ວນການສັກວັກຊິນ ປ້ອງກັນໂຄວິດ-19 ມາຮອດປັດຈຸບັນ ມີຜູ້ໄດ້ຮັບກາສັກວັກຊິນແລ້ວ ໂດຍແຍກເປັນ ເຂັມທີນຶ່ງ ຈຳນວນ 2,929,260 ຄົນ ແລະ ເຂັມທີສອງ ຈຳນວນ 2,012,302 ຄົນ.

Anonymous says:
Sep 29, 2021 12:10 AM

ໃຜມີເຟສລັດຖະບານແນ່ ຂ້ອຍຍາກແທົກເພີ່ນມາເບີ່ງ😂

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ