ໂຄວິດ-19 ສືບ​ຕໍ່ຣະ​ບາດ, ປ​ະ​ຊາ​ຊົນ ຍັງ​ຖືເບົາ

ມາເຖິງປັດຈຸບັນ ການຣະບາດຂອງໂຄວິດ-19 ຢູ່ນະຄອນຫຼວງວຽງຈັນ ຍັງບໍ່ມີແນວໂນ້ມວ່າ ຈະຫລຸດລົງໄດ້ງ່າຍ ຍ້ອນບໍ່ປະຕິບັດມາຕການປ້ອງກັນ ທີ່ທາງການວາງອອກຢ່າງເຄັ່ງຄັດ. ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາຣະນະສຸຂ ຖແລງຕໍ່ສື່ມວນຊົນ ໃນມື້ວັນທີ 22 ພຶສຈິກາ ນີ້ວ່າ ກວດພົບຜູ້ຕິດໂຄວິດ-19 ໃໝ່ຕື່ມອີກ 999 ຄົນ ຢູ່ 16 ແຂວງຂອງລາວ. ໃນນັ້ນຕິດຫຼາຍກວ່າໝູ່ແມ່ນຢູ່ນະຄອນຫຼວງວຽງຈັນ 407 ຄົນ, ຮອງລົງມາກໍແມ່ນຫຼວງພຣະບາງ 123 ຄົນ, ແຂວງວຽງຈັນ 99 ຄົນ.

ການທີ່ຍັງມີຄົນຕິດເຊື້ອ ໂຄວິດ-19 ຫຼາຍຢູ່ນະຄອນຫຼວງວຽງຈັນ ຄືແນວນີ້ ເຈົ້າໜ້າທີ່ ທີ່ກ່ຽວຂ້ອງຢູ່ນະຄອນຫຼວງວຽງຈັນ ຜູ້ຂໍສງວນຊື່ ແລະຕໍາແໜ່ງ ກ່າວຕໍ່ ວິທຍຸເອເຊັຽເສຣີ ໃນມຶເວັນທີ 22 ພຶສຈິກາ ນີ້ວ່າ ສາເຫດໃຫຍ່ ກໍເປັນຍ້ອນຄົນບໍ່ປະຕິບັດ ຕາມມາຕການປ້ອງກັນ ທີ່ທາງການວາງອອກ, ຜູ້ມີຄວາມສ່ຽງບໍ່ໄດ້ກັກໂຕ ຍັງຢູ່ຮ່ວມກັນກັບຄອບຄົວ, ມີການໄປ ມາຫາສູ່ຊຸມແຊວກັນ:

“ມີິການຊຸມແຊວໄປມາຫາສູ່ກັນ ຮູ້ວ່າໂຕຢູ່ກຸ່ມສ່ຽງ ຍັງໄປເລາະສາລະເວຢູ່ ປິດບັງແບບບໍ່ຍາກອີ່ຫຍັງຫັ້ນນ່າ. ກຸ່ມສ່ຽງມັນບໍ່ຟັງຄວາມນີ້ນ່າ ກະອຸກໃຈ ຍັງໃຊ້ຊີວິດປົກຕິຢູ່ ກະພີ່ນ້ອງຢູ່ນໍາເຮືອນນໍາຊານນັ້ນເດ໋ ເອົາໄປເອົາມາຕິດກັນໄປໝົດແລ້ວ ຫັ້ນລະຍາກຫຼາຍດຽວນີ້ນ່າ.”

ອີກສາເຫດນຶ່ງ ທີ່ເຮັດໃຫ້ໂຄວິດ-19 ແພ່ຣະບາດຫຼາຍ ແມ່ນເປັນຍ້ອນທາງການຍັງຈໍາກັດ ຈໍານວນຜູ້ສ່ຽງໄປກວດຫາເຊື້ອ ຊຶ່ງບາງບ່ອນ ເຈົ້າໜ້າທີ່ຈະກວດໃຫ້ບໍ່ເກີນ 100 ຄົນຕໍ່ມື້ ແລະການສົ່ງຕົວຢ່າງໄປໃຫ້ ສູນວິເຄາະຊ້າ ກ່ອນຈະຮູ້ ເຮັດໃຫ້ປະຊາຊົນ ຈໍານວນນຶ່ງທີ່ຢູ່ໃນກຸ່ມສ່ຽງນັ້ນ ບໍ່ໄດ້ກວດ ແລະໄປສໍາພັດໃກ້ຊິດກັບຄົນໃນຄອບຄົວ ແລະຄົນໃນຄອບຄົວມີຄວາມສ່ຽງ ທີ່ຈະຕິດ ໂຄວິດ-19 ຖ້າຫາກຜູ້ສ່ຽງນັ້ນຕິດເຊື້ອ ດັ່ງທ່ານໝໍ ຜູ້ຂໍສງວນຊື່ ແລະຕໍາແໜ່ງ ທີ່ໄດ້ໄປກວດຫາເຊື້ອ ໂຄວິດ-19 ໃຫ້ປະຊາຊົນ ກ່າວຕໍ່ວິທຍຸເອເຊັຽເສຣີໃນມື້ດຽວກັນນີ້ວ່າ:

“ເພິ່ນວ່າບໍ່ໃຫ້ກາຍ 100% ຫັ້ນນ່າ ພວກເຮົາກໍຕ້ອງມີຈໍານວນຈໍາກັດ ຄືມີ C1 ກັບ C2 ກະໃຫ້ລໍຖ້າ C1 ກວດກ່ອນເນາະ ຖ້າວ່າ C1 ກວດພົບເຮົາຈຶ່ງແນະນໍາ C2 ມາກວດຕໍ່ຫັ້ນນ່າ ແບບບໍ່ໄດ້ສັມຜັດໂດຍກົງ ເຮົາຈະບໍ່ກວດໃຫ້ ຕ້ອງເອົາພວກສັມຜັດ C1 ກ່ອນ ຄືເຮົາໄປປະ ມານ 8 ໂມງເຄິ່ງເນາະ ປະມານ 10 ໂມງເຄິ່ງ ເຮົາກໍຕ້ອງໄດ້ຢຸດ ເພາະວ່າຕ້ອງໄດ້ມາ ຈັດຕຽມເຄື່ອງຕຽມຫຍັງໄປສົ່ງ ຢູ່ຫລັກ 3 ຫັ້ນນ່າ.”

ນອກຈາກນັ້ນ ກໍຍັງມີປະຊາຊົນຈໍານວນນຶ່ງ ໄດ້ຊື້ເຄື່ອງກວດ ໂຄວິດ-19 ແບບໄວ ທາງສື່ສັງຄົມອອນລາຍນ໌ ໄປກວດດ້ວຍຕົນເອງ ຊຶ່ງຫຼາຍຄົນກໍເຮັດບໍ່ຖືກວິທີ ແລະກໍມີບາງຄົນ ທີ່ໄດ້ກວດພົບ ດ້ວຍຕົວເອງ ແຕ່ບໍ່ຍອມກັກໂຕ ຢ່າງຈິງຈັງ ເຮັດໃຫ້ເຊື້ອແພ່ຣະບາດ ດັ່ງເຈົ້າໜ້າທີ່ ທີ່ກ່ຽວຂ້ອງ ຢູ່ນະຄອນຫຼວງວຽງຈັນທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 22 ພຶສຈິການີ້ວ່າ:

“ຍົກຕົວຢ່າງ ຄືຫວ່າງນຶ່ງນີ້ ເຂົາ ເຈົ້າໄປກວດເອງເນາະ ຫລັງຈາກຮູ້ແລ້ວ ເພິ່ນພັດບໍ່ໄປກວດໂຮງໝໍສູນກາງ ແລ້ວເພິ່ນວ່າປົວເອງ. ບາດນີ້ປົວເອງແລ້ວບໍ່ກັກຕົວ ແລ້ວຍັງໄປບ່ອນນັ້ນບ່ອນນີ້ຢູ່ ແຕ່ວ່າກິນຢາຢູ່ ແຕ່ໂຕນີ້ນີ່ໂຕເອງສິເຊົາ ແຕ່ໝູ່ຄູ່ມັນພັດໄປຕິດ.”

ອີງຕາມ ການຣາຍງານຂອງ ດຣ. ຣັດຕະນະໄຊ ເພັດສຸວັນ ໃນມື້ວັນທີ 22 ພຶສຈິການີ້, ສາເຫດຂອງການຕິດເຊື້ອ ໂຄວິດ-19 ຄືປັດຈຸບັນ ຍັງບໍ່ສາມາດຮັກສາ ຕາມມາຕການ ທີ່ຄະນະສະເພາະກິດ ໄດ້ວາງອອກ ເນື່ອງຈາກຫຼາຍຄົນ ຢູ່ຮ່ວມກັນເປັນຄອບຄົວ ຫຼືສະຖານທີ່ເຮັດວຽກ, ການຈັດງານທາງປະເພນີ ເປັນຕົ້ນ ງານດອງ, ງານອອກກໍາ, ເຮືອນບຸນ, ເຮືອນດີ, ງານສົ່ງສະການ ຊຶ່ງຍາກທີ່ຈະປະຕິບັດ ໄລຍະຫ່າງ, ໃສ່ຜ້າອັດປາກອັດດັງ ແລະລ້າງມື ຮວມທັງຍັງມີຄົນ ທີ່ມີຄວາມສ່ຽງ ມາຮ່ວມງານນໍາດ້ວຍ.

ພ້ອດຽວກັນນັ້ນ ກໍຍັງມີຄົນລາວ ຈໍານວນນຶ່ງຂ້າມນໍ້າຂອງໄປ ປະເທດໄທຍແບບຜິດກົດໝາຍຢູ່. ເວລາຖືກຈັບສົ່ງກັບຄືນມາ ກໍມີຄວາມສ່ຽງເຣື່ຶອງ ໂຄວິດ-19, ຄືໃນມື້ວັນທີ 18 ພຶສຈິກາ ນີ້ ຕໍາຣວດໄທຍຢູ່ແຂວງອຸບົນ ກໍຈັບຄົນລາວໄດ້ 8 ຄົນ, ຢູ່ໃກ້ຊາຍແດນ ກົງກັນຂ້າມກັບເມືອງສອງຄອນ ແຂວງສວັນນະເຂດ ຊຶ່ງສ່ວນໃຫຍ່ເປັນຄົນ ແຂວງສວັນນະເຂດ ລັກລອບໄປໄທຍ ເພື່ອຫາວຽກງານເຮັດ ຢູ່ບາງກອກ. ທັງໝົດຖືກຕັ້ງຂໍ້ຫາ ເຂົ້າເມືອງຜິດກົດໝາຍ ຊຶ່ງເບື້ອງຕົ້ນ ຈະຖືກຕໍາຣວດໄທຍສົ່ງຂຶ້ນສານ ເພື່ອພິຈາຣະນາຄະດີ, ຈະຖືກຈໍາຄຸກ ຫຼືຖືກສົ່ງກັບປະເທດລາວ ດັ່ງເຈົ້າໜ້າທີ່ ຕໍາຣວດໄທຍ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເນື່ອງຈາກຊາຍແດນ ມັນຍາວຫຼາຍ ມັນມີປ່າ ມີເຂົາ ຊອກລີ້ຊ່ອນຕົວ ຄໍ່າໆມືດໆ ເຂົາກໍຈະຂ້າມ ເພາະວ່າເຂົາຢາກເຂົ້າມາ ທໍາງານ ປະເທດເຮົາເລີ່ມມີງານ ເຂົາກໍຢາກເຂົ້າມາ ເຂົາກໍຕ້ອງມີນາຍຈ້າງແລ້ວ ນາຍຈ້າງອາດເວົ້າ ຂ້າມມາເລີຍ ດຽວກໍຈະມີແນວທາງຂຶ້ນ ທະບຽນແລ້ວ.”

ທ່ານກ່າວຕື່ມວ່າ ໃນໄລຍະນີ້ ຢູ່ປະເທດໄທຍ ທາງການກໍຈະມີນະໂຍບາຍ ໃຫ້ຄົນງານທີ່ເຂົ້າເມືອງແບບຜິດກົດໝາຍ ລົງທະບຽນໃໝ່ ຊຶ່ງກໍອາຈເປັນສາເຫດນຶ່ງ ທີ່ເຮັດໃຫ້ພວກເຂົາລັກລອບເຂົ້າມາ.

ດ່ານສາກົນ ທັງລາວ ແລະໄທຍ ຍັງບໍ່ໄດ້ເປີດ, ຕາມຊາຍແດນຝັ່ງແຂວງສວັນນະເຂດ ມີເຈົ້າໜ້າທີ່ຕໍາຣວດ ທະຫານເວນຍາມຢູ່ຕລອດ, ແຕ່ການກວດກາ ອາຈບໍ່ທົ່ວເຖິງ, ຍັງມີຄົນລັກຂ້າມໄປໄທຍຢູ່ ຕອນເຈົ້າໜ້າທີ່ເຜີ, ເມື່ອຖືກຈັບໄດ້ ກໍຈະຖືກສຶກສາອົບຮົມ ແລະປັບໃໝ ດັ່ງເຈົ້າໜ້າທີ່ ລາວກ່າວວ່າ:

“ພວກເຮົາຍັງບໍ່ໄດ້ເປີດໃຫ້ອອກໄດ້ ມີແຕ່ໃນກໍຣະນີທີ່ຈໍາເປັນ ວຽກທາງຣາຊການໄປໄດ້ ແຕ່ວ່າບຸກຄົນທີ່ໄປຕາມນັ້ນເພິ່ນທັນອະນຸມັດແລ້ວ ລາງເທື່ອມັນກໍຫຼອຍໄປ ຊ່ອງຫວ່າງ ຢູ່ດອນຢູ່ນັ້ນແຫຼະ ເຂົາເຈົ້າຫຼອຍໄປໄດ້ ເຈີກະສິກັກໂຕ ສຶກສາອົບຮົມ ປັບໃໝຕາມ ຣະບຽບ.”

ທາງການລາວ ປະກາດໃນ ມື້ວັນທີ 22 ພຶສຈິກາ ນີ້ວ່າ ກວດພົບຜູ້ຕິດເຊື້ອ ໂຄວິດ-19 ໃໝ່ຕື່ມອີກ 999 ຄົນ. ໃນນັ້ນຕິດໃນຊຸມຊົນ 995 ຄົນ ແລະນໍາເຂົ້າ 4 ຄົນ, ເສັຽຊີວິດຕື່ມອີກ 4 ຄົນ.

ມາເຖິງປັດຈຸບັນ ຢູ່ປະເທດລາວ ມີຜູ້ຕິດເຊື້ອສະສົມ 63,159 ຄົນ, ເສັຽຊີວິດແລ້ວ 132 ຄົນ, ມີຜູ້ໄດ້ສັກວັກຊີນເຂັມທີ 1 ແລ້ວ 3,692,533 ຄົນ, ຄືກວມເອົາປະມານ 50% ຂອງຈໍານວນພົລເມືອງທັງໝົດ ແລະໄດ້ສັກເຂັມທີ 2 ແລ້ວ 3,077,625 ຄົນ ຄືກວມເອົາເກືອບ 42%.