ໂຄໂຣນາ ສືບຕໍ່ຄຸກຄາມ ຫຼາຍປະເທດ

ມະນີຈັນ
2020-02-10
ອີແມວລ໌
ຄໍາເຫັນ
Share
ພິມ
ປະຊາຊົນຈີນ ຕ່າງກໍປ້ອງ ກັນໂຕເອງ ຈາກເຊື້ອ ໄວຣັສ ໂຄໂຣນາ ສາຍພັນໃໝ່ ທີ່ກໍາລັງຣະບາດ ຢູ່ນີ້.
ປະຊາຊົນຈີນ ຕ່າງກໍປ້ອງ ກັນໂຕເອງ ຈາກເຊື້ອ ໄວຣັສ ໂຄໂຣນາ ສາຍພັນໃໝ່ ທີ່ກໍາລັງຣະບາດ ຢູ່ນີ້.
GREG BAKER / AFP

ເຊື້ອໄວຣັສ ໂຄໂຣນາ ສາຍພັນໃໝ່ ສືບຕໍ່ຄຸກຄາມ ຜູ້ຄົນຈີນ ແລະ ໃນໂລກ ຢູ່ຕໍ່ໄປ ພາຍຫລັງ ທ່ານໝໍຈີນ ເປັນຜູ້ທໍາອິດ ເປິດເຜີຍ ກ່ຽວກັບ ການຣະບາດ ຂອງເຊື້ອໂຣຄ ທີ່ວ່ານີ້ ເສັຽຊີວິດໄປ ແລະ ປະເທດຕ່າງໆ ເອົາມາຕການ ເຂັ້ມງວດ ໃນການສະກັດກັ້ນ ເພື່ອບໍ່ໃຫ້ ແຜ່ຂຍາຍ ເຂົ້າມາປະເທດຕົນໄດ້.

ເຈົ້າໜ້າທີ່ ສືບສວນສອບສວນ ຂອງພັກຄອມມິວນິສຈີນ ເບິ່ງຄືນ ເຖິງຄໍາເຕືອນ ຂອງທ່ານໝໍ ຄົນດັ່ງກ່າວ ທີ່ຖືກຕໍາຣວດຂົ່ມຂູ່ ພາຍຫລັງທີ່ ທ່ານໄດ້ເຕືອນເຖິງ ຄວາມວິຕົກກັງວົນ ກ່ຽວກັບ ເຊື້ອໄວຣັສ ສາຍພັນໃໝ່ ແລະ ໃນທີ່ສຸດ ໄດ້ເສັຽຊີວິດຍ້ອນ ຊຶ່ງມວນຊົນ ເວົ້າເຖິງກັນນັ້ນ.

ຄໍາປະກາດ ດັ່ງກ່າວ ຂອງພັກຄອມມິວນິສ ຈີນ ເມື່ອວັນທີ 7 ກຸມພານີ້ ມີຂຶ້ນ ຂນະທີ່ ຊາວຈີນ ຜູ້ເສັຽຊີວິດຍ້ອນ ເພີ່ມຂຶ້ນເຖິງ 636 ຄົນ ເປັນຢ່າງໜ້ອຍ ແລະ ມີຜູ້ຕິດເຊື້ອ ເກີນ 31 ພັນ 200 ຄົນ ໃນທົ່ວໂລກ. ເຮືອທ່ອງທ່ຽວ ປະເຊີນ ບັນຫາ ໜັກຂຶ້ນ ຂນະທີ່ ຍີ່ປຸ່ນຣາຍງານ ຜູ້ຕິດເຊື້ອຣາຍໃໝ່ 41 ກໍຣະນີ ຢູ່ຫ້ອງກັກກັນ ກວດພຍາດ ໃນເຮືອນັ້ນ, ອີງຕາມຣາຍງານຂ່າວ AP.

ຍີ່ປຸ່ນ ຢືນຢັນວ່າ ຜູ້ຕິດເຊື້ອຣາຍໃໝ່ ໃນບ່ອນກັກກັນ ໃນເຮືອສໍາຣານ Diamond Princess ມີ 41 ກໍຣະນີ. ເຮືອ ທີ່ມີຜູ້ໂດຍສານເກືອບ 3 ພັນ 700 ຄົນນີ້ ພ້ອມລູກເຮືອ ທີ່ຍັງຖືກກັກກັນ ເພື່ອກວດເຊື້ອພຍາດ ເປັນເວລາ 14 ມື້. ນາຍົກຣັຖມົນຕຣີ ຍີ່ປຸ່ນ Shinso Abe ເວົ້າວ່າ ເຮືອຕ່າງປະເທດລໍານຶ່ງ ຄືເຮືອ Holland America’s Westerdam ຈະບໍ່ຖືກ ອະນຸຍາດ ເຂົ້າມາຍີ່ປຸ່ນ. ທ່ານສົງໃສວ່າ ຈະມີ ຄົນຕິດເຊື້ອ ຢູ່ໃນເຮືອລໍານັ້ນ.

ນາງ Mie Matsubara ເຈົ້າໜ້າທີ່ ອົງການທ່ອງທ່ຽວ ຕ່າງປະເທດເວົ້າວ່າ ທຸກຄົນ ບໍ່ຮັບເຮືອລໍານີ້. ເຮືອລໍານີ້ ມີຜູ້ໂດຍສານ 2 ພັນປາຍຄົນ ແລ່ນຢູ່ນອກເກາະ Okinawa ໄປຫາທ່າເຮືອ ອື່ນຢູ່. ຢ່າງໜ້ອຍ ມີເຮືອສໍາຣານ ອື່ນອີກ 4 ລໍາ ເປັນເຮືອຕ່າງປະເທດ 2 ລໍາ ແລະເຮືອ ທີ່ຄົນຍີ່ປຸ່ນ ເປັນຜູ້ຈັດການ 2 ລໍາ ກໍາລັງມຸ້ງໜ້າ ມາສູ່ຍີ່ປຸ່ນ ໃນທ້າຍເດືອນນີ້. ຣັຖມົນຕຣີ ການຄົມນາຄົມ ຍີ່ປຸ່ນ ຮຽກຮ້ອງ ໃຫ້ທາງການທ່າເຮືອ ໃນທົ່ວປະເທດ ບໍ່ຮັບ ເຮືອສໍາຣານນັ້ນ. ຢູ່ຈີນ ຫາກເວົ້າເຖິງເຣື່ອງ ມາຕການ ຕ້ານເຊື້ອໂຣຄນັ້ນແລ້ວ ຂ່າວກໍຣາຍງານວ່າ ເມືອງ Wuhan ໄດ້ສ້າງໂຮງໝໍໃໝ່ຂຶ້ນ 2 ແຫ່ງປິ່ນປົວ ຜູ້ຕິດເຊື້ອ ຊຶ່ງແຫ່ງທີ 2 ຄາດວ່າ ຈະເປີດຮັບຄົນເຈັບໄດ້ ໃນວັນພະຫັດນີ້.

ແລະຍັງມີ ອີກຈໍານວນຫລາຍ ຢູ່ເຂດກັກກັນກວດພຍາດ. ທ້າວ Chen Jiaxin ວັຍ 22 ປີ ເວົ້າຕໍ່ຂ່າວ AP ວ່າພໍ່ ຂອງເຂົາລົ້ມປ່ວຍ ເມື່ອວັນທີ 28 ມົກຣາຜ່ານມາ ແຕ່ຕ້ອງໄດ້ກັບຄືນ ເຮືອນ ຍ້ອນບໍ່ມີໂຮງໝໍໃດ ຮັບເອົາ. ເມື່ອລາວເອີ້ນ ຣົດໂຮງໝໍມາ ພາຍຫລັງ ພໍ່ຂອງລາວ ມີໄຂ້ຂຶ້ນສູງ ໃນເຊົ້າວັນພະຫັດ ແຕ່ລາວ ໄດ້ຮັບຄໍາຕອບວ່າ ມີເຖິງ 400 ຄົນ ຍັງຄອງຖ້າ ກ່ອນລາວແລ້ວ. ພວກເຮົາ ກໍຖືກບອກ ໃຫ້ຄອຍຖ້າ ແລ້ວຖ້າອີກ, ທ້າວ Chen ເວົ້າ.

ຂ່າວຣາຍງານ ເມື່ອຕອນແລງ ຂອງວັນທີ 9 ກຸມພານີ້ວ່າ ວັນທີ 8 ກຸມພາ ຢູ່ຈີນ ມີຜູ້ເສັຽຊີວິດ ຈາກເຊື້ອໄວຣັສ ໂຄໂຣນາ ສາຍພັນໃໝ່ ເພີ່ມອີກ 89 ຄົນ ຊຶ່ງມື້ກ່ອນນັ້ນ ເສັຽຊີວິດ 86 ຄົນ ຄືເພີ່ມຂຶ້ນ 3 ຄົນ ຕາມຕົວເລຂ ຈາກໜ່ວຍງານສຸຂພາບຈີນ.

ມາເຖິງວັນທີ 9 ກຸມພານີ້ ຜູ້ເສັຽຊີວິດ ຈາກເຊື້ອໄວຣັສ ດັ່ງກ່າວ ຢູ່ປະເທດຈີນ ມີທັງໝົດ 811 ຄົນ ຖ້າຮວມໃສ່ ຜູ້ເສັຽຊີວິດ ໃນທົ່ວໂລກ ແມ່ນເປັນ 813 ຄົນ ເທົ່າກັບຈໍານວນຜູ້ເສັຽຊີວິດ ຈາກເຊື້ອ ໄວຣັສ SARS ທີ່ຣະບາດ ເມື່ອປີ 2002-2003 ຊຶ່ງອົງການອະນາມັຍໂລກ ໄດ້ຮວບຮວມ ສະຖິຕິໄວ້.

ຄະນະກັມມາທິການ ສຸຂພາບ ແຫ່ງຊາດຈີນ ເປີດເຜີຍ ຈໍານວນ ຜູ້ຕິດເຊື້ອໄວຣັສນັ້ນ ສະເພາະ ວັນເສົາວັນທີ 8 ກຸມພາ ມື້ດຽວ ມີ 2 ພັນ 656 ຄົນ ຄືຫລຸດລົງ ມາຈາກ 3 ພັນ 385 ຄົນທີ່ຕິດເຊື້ອ ໃນມື້ ກ່ອນຄືກັນສຸກ ຂນະທີ່ ຈໍານວນຜູ້ຕິດເຊື້ອໃນປະເທດຈີນ ແຜ່ນດິນໃຫຍ່ ທັງໝົດມີ 37 ພັນ 198 ຄົນ. ຖ້າເວົ້າໃນທົ່ວໂລກ ແມ່ນຕິດເຊື້ອ 37 ພັນ 552 ຄົນ. ແລະ ມີຜູ້ປິ່ນປົວ ເຊົາແລ້ວ 2152 ຄົນ.

ແລະຕາມຣາຍງານ ຂ່າວ RFA ຜແນກ ພາສາຈີນ ແມນດາຣີນ ແລະ ແຄນ​ເທີ​ນິ​ສ, ກໍຣະນີ ຜູ້ຕິດເຊື້ອ ທີ່ຖືກຢືນຢັນ ມື້ຕໍ່ມື້ ແມ່ນຫຼຸດລົງປະມານ 20 ເປີເຊັນ ຫາກທຽບໃສ່ ການຕິດເຊື້ອຣາຍໃໝ່ ທີ່ມີຣາຍງານ ມື້ຕໍ່ມື້ ກ່ອນໜ້ານີ້ ຄືຜູ້ຕິດເຊື້ອ ຣາຍໃໝ່ ມີປະມານ 2,656 ຄົນໃນ 24 ຊົ່ວໂມງ ມາຮອດຕອນທ່ຽງຄືນ ຂອງວັນເສົາ ຊຶ່ງ 24 ຊົ່ວໂມງ ກ່ອນນັ້ນ ຜູ້ຕິດເຊື້ອ ຣາຍໃໝ່ ມີເຖິງ 3,399 ຄົນ.

ສໍາລັບຢູ່ລາວ ຖ່າມກາງ ຄວາມສົງສັຍ ຂອງມວນຊົນ ຕໍ່ຄວາມສາມາດ ຂອງທາງການ ໃນການຮັບມື ກັບການຣະບາດ ຂອງເຊື້ອ ໄວຣັສ ໂຄໂຣນາ ສາຍພັນໃໝ່ນີ້ ທາງການລາວ ກໍຍັງຢືນຢັນວ່າ ບໍ່ມີຜູ້ຕິດເຊື້ອ ພຍາດອັກເສບປອດ ຈາກເຊື້ອ ຈຸລະໂຣຄ ສາຍພັນໃໝ່ ຫລື ໄວຣັສ ໂຄໂຣນາ 2019 ແລະ ທັງວ່າ ມີຄວາມສາມາດ ໃນການກວດ ແລະ ປ້ອງກັນ ເຊື້ອພຍາດ ສາຍພັນໃໝ່ ນີ້ໄດ້.

ແລະເພື່ອປ້ອງກັນ ເຊື້ອໄວຣັສ ສາຍພັນໃໝ່ ທີ່ອາຈຣະບາດ ມາຍັງປະເທດລາວນັ້ນ ທາງການລາວ ກໍໄດ້ແນະນໍາ 10 ວິທີ ທີ່ຄວນເຮັດ ຄືໃສ່ໜ້າກາກ ອະນາມັຍ ທຸກຄັ້ງ ເມື່ອອອກຈາກບ້ານ. ລ້າງມືດ້ວຍສະບູ ຫລື gel ລ້າງມື. ບໍ່ສັມພັດ ໜ້າ, ດັງ, ປາກ ໂດຍບໍ່ຈໍາເປັນ. ຫລີກລ່ຽງ ສະຖານທີ່ ແອອັດ ຫລື ມົລພິດ. ງົດເດີນທາງ ໄປສະຖານທີ່ສ່ຽງ. ຫລີກລ່ຽງ ການໃກ້ຊິດ ກັບຜູ້ປ່ວຍ ມີອາການ ຄ້າຍຄືກັບເປັນໄຂ້ຫວັດ. ບໍ່ໃຊ້ ຂອງສ່ວນຕົວ ຮ່ວມກັບຜູ້ອື່ນ. ໃຊ້ອຸປກອນ ເມື່ອຕ້ອງສັມພັດ ກັບສັດດປ່າ ຫລື ສັດລ້ຽງ. ນອນຫຼັບພັກຜ່ອນ ໃຫ້ພຽງພໍ. ປຸງອາຫານ ໃຫ້ສຸກ ດ້ວຍນໍ້າຮ້ອນ. ແລະລ່າສຸດນີ້ ທາງເຈົ້າໜ້າທີ່ ອົງການ ອະນາມັຍໂລກ ກໍໄດ້ກ່າວ ຜ່ານທາງໂທຣະທັດ ແຫ່ງຊາດລາວ ວ່າ ສິ່ງທີ່ ເປັນພື້ນຖານ ທີ່ພວກເຮົາ ທຸກຄົນ ສາມາດເຮັດໄດ້ ເພື່ອຫຼຸດຜ່ອນ ຄວາມສ່ຽງ ທີ່ຈະຕິດເຊື້ອ ສໍາລັບຕົນເອງ ແລະ ຄອບຄົວຄື:

(ສຽງ)

ລ້າງມື ເປັນປະຈໍາ ດ້ວຍສະບູ ແລະ ນໍ້າ ຫລື gel ລ້າງມື. ຫາກເຈັບ ກໍອັດປາກເວລາໄອ ແລະ ຈາມ ເພື່ອບໍ່ໃຫ້ຕິດຕໍ່ ໄປໃສ່ໝູ່ ແລະ ຄອບຄົວ. ຫາກເຈັບ ຄວນຢູ່ເຮືອນ ບໍ່ຄວນໄປເຮັດວຽກ ແລະ ລູກຂອງເຈົ້າ ກໍບໍ່ຄວນ ໄປໂຮງຮຽນ ຫາກພວກເຂົາ ເຈັບເປັນ ແລະ ເຈົ້າກໍຄວນຢູ່ເຮືອນ ແລະ ຂໍການຊ່ອຍເຫລືອ ຈາກສະຖານທີ່ ສາທາຣະນະສຸຂ ຫລື ໂທສາຍດ່ວນ 166. ຫາກເຮັດ ສິ່ງທີ່ເປັນພື້ນຖານ ທີ່ວ່ານັ້ນ ພວກເຮົາ ກໍຈະ ມີຄວາມປອດພັຍ ແລະ ຊ່ອຍໃຫ້ຄອບຄົວ ບໍ່ຕິດເຊື້ອໂຣຄນັ້ນ.

ຂ່າວນຶ່ງອີກ ທີ່ເວົ້າກັນເຖິງຫລາຍ ໃນຂນະນີ້ ຄືກ່ຽວກັບ ທ່ານໝໍ ທີ່ເປັນຜູ້ທໍາອິດ ອອກມາເຕືອນ ເຣື່ອງການຣະບາດ ຂອງເຊື້ອໂຣຄ ສາຍພັນໃໝ່ ດັ່ງກ່າວ ຢູ່ຈີນ ຕັ້ງແຕ່ ທ້າຍເດືອນ ທັນວາ ຜ່ານມາ ແຕ່ກໍຖືກທາງການຈີນ ຕໍານິ ແລະ ກໍເສັຽຊີວິດໄປ ຍ້ອນຕິດເຊື້ອ ໂຣຄນັ້ນ ຜູ້ເປັນແມ່ ຂອງທ່ານໝໍ Li Wenliang ວັຍ 34 ປີ ຊຶ່ງທາງໂຮງໝໍ ສູນກາງເມືອງ Wuhan ເວົ້າຜ່ານ ສື່ສັງຄົມອອນລາຍ ຂອງຕົນ ວ່າ ທ່ານໝໍ Li Wenliang ໂຊກຮ້າຍ ຕິດເຊື້ອ ໃນຣະຫວ່າງ ຕໍ່ສູ້ຕ້ານ ພຍາດປອດອັກເສບ ໂຄໂຣນາ ສາຍພັນໃໝ່. ແລະຜູ້ເປັນແມ່ ອອກມາ ເວົ້າດ້ວຍນໍ້າຕາ ວ່າກ່ອນໜ້ານີ້ ອາການ ຂອງລູກຊາຍ ດີຂຶ້ນ ແຕ່ກັບມາຮ້າຍແຮງລົງ ໃນບໍ່ພໍເທົ່າໃດມື້ ທີ່ຜ່ານມາ ໂດຍບໍ່ຮູ້ສາເຫດ.

ແລະຕາມ ຣາຍງານຂ່າວ ຜູ້ຈັດການ ອອນລາຍ, ຄວາມຕາຍ ຂອງ ດຣ. ຫລີ ເຫວິນລຽງ ຢືນຢັນວ່າ “ຄວາມຈິງ ເປັນສິ່ງບໍ່ຕາຍ ແຕ່ຄົນ ເວົ້າຄວາມຈິງຕາຍ ນັ້ນຄື ບົດຮຽນສໍາຄັນ ສໍາລັບ ຢູ່ປະເທດຈີນ ແລະ ໃນໂລກ ທີ່ມີການລວມສູນອໍານາດ”. ມີການ ເປັນສຽງດຽວກັນ ໃນທົ່ວໂລກ ວ່າ ຖ້າຜູ້ນໍາຈີນ ຍອມຮັບຄວາມຈິງ ເຣື່ອງເຊື້ອ ໄວຣັສ ທີ່ວ່ານັ້ນ ມາຕັ້ງແຕ່ ທ້າຍປີ 2019 ການຣະບາດ ຂອງເຊື້ອໂຣຄນັ້ນ ບໍ່ໜ້າຈະຮຸນແຮງຂນາດນີ້ ເພາະຜູ້ນໍາຈີນ ມີອໍານາດ ໃນການສັ່ງການ ບໍ່ພຽງແຕ່ ສ້າງໂຮງພະຍາບານ ພັນຕຽງໃນ 10 ມື້ ເທົ່ານັ້ນ ແຕ່ ມາຕການອື່ນໆ ອໍານາດສັງຄົມນິຍົມ ຄອມມິວນິສ ກໍສາມາດ ສັ່ງໄດ້ ຊຶ່ງການເສັຽຊີວິດ ຂອງທ່ານໝໍ ຜູ້ນີ້ ຢືນຢັນ ໃຫ້ເຫັນວ່າ ເຊື້ອໄວຣັສນີ້ ເປັນອັນຕຣາຍແທ້ ແລະມາຕການ ຂອງຣັດ ທີ່ໃຊ້ສະກັດກັ້ນ ການຣະບາດ ຂອງເຊື້ອພຍາດນັ້ນ ກໍຊ້າເກີນໄປ.

ເຕັມຫນ້າ