ຄົນງານລາວຖືພາຢູ່ໄທຍ ຕິດໂຄວິດ-19 ໂຮງໝໍ ບໍ່ມີຕຽງ ໃຫ້ນອນ

ສິດນີ
2021-08-03
Share
ຄົນງານລາວຖືພາຢູ່ໄທຍ ຕິດໂຄວິດ-19 ໂຮງໝໍ ບໍ່ມີຕຽງ ໃຫ້ນອນ ນາງປີ ຊາວລາວ ອາຍຸ 35 ປີ ຈາກ ແຂວງສາລະວັນ ຖືພາໄດ້ 7 ເດືອນ, ຕິດໂຄວິດ-19 ປັດຈຸບັນ ນາງຍັງຕ້ອງລໍຖ້າ ໄປປິ່ນປົວຢູ່ໂຮງໝໍ
RFA

ນາງປີ ແມ່ຍິງລາວ ອາຍຸ 35 ປີ ຈາກແຂວງສາລະວັນ ຖືພາໄດ້ 7 ເດືອນ ແລ້ວຕິດໂຄວິດ-19 ໃນປັດຈຸບັນ ນາງຍັງບໍ່ໄດ້ຮັບການ ປິ່ນປົວ ຈາກທ່ານໝໍໄທຍເທື່ອ ແລະ ຍັງລໍຖ້າ ເຈົ້າໜ້າທີ່ໄທຍ ເອົາຣົຖມາຮັບນາງ ໄປປິ່ນປົວຢູ່ ເນື່ອງຈາກວ່າ ນາງຢ້ານຈະອອກ ລູກກ່ອນກຳນົດ ອີກທັງ ນາງມີປວັດຫຼຸລູກ ໃນການຖືພາກ່ອນໜ້ານີ້. ດັ່ງນາງກ່າວຕໍ່ ເອເຊັຽ ເສຣີ ໃນມື້ວັນທີ 3 ສິງຫາ ນີ້ວ່າ.

”ຂໍຄວາມຊ່ອຍເຫຼືອ ຢ້ານແບບວ່າ ຄອດກ່ອນກຳນົດ ຢ້ານເປັນອາການໜັກກວ່ານີ້ ຢ້ານແຍ້ແລ້ວ ບໍ່ມີຕຽງນອນບໍ່ມີທີ່ຮັກສາ ອີ່ຫຍັງ ຈັ່ງຊີ້ນ່າ ເພາະວ່າ ປົກກະຕິແລ້ວ ຕອນໄປຝາກທ້ອງນ່າ ໝໍກໍຢ້ຳວ່າ ຢ້ານຄອດກ່ອນກຳນົດ ເພາະວ່າ ຣົກເກາະຕ່ຳແຮງຫັ້ນນ່າ ພໍເປັນໂຄວິດ-19 ນີ້ ມັນກໍຍິ່ງກັງວົນໜັກຂຶ້ນຫັ້ນນ່າ.”

ນາງກ່າວຕື່ມວ່າ ນາງມີອາການໄຂ້ສູງ ຄ້າຍກັບໄຂ້ຫວັດ ຕັ້ງແຕ່ວັນທີ 25 ກໍຣະກະດາ ຜ່ານມາ ຈຶ່ງຊື້ຢາພາຣາມາກິນເພື່ອບັນເທົາ ອາການໄຂ້ ແຕ່ກໍບໍ່ເຊົາ ຈົນຮອດວັນທີ 2 ສິງຫາ ນາງເລີຍຕັດສິນໃຈ ໄປຊື້ເຄື່່ອງກວດໂຄວິດ-9 ມາກວດເອງຈຶ່ງຮູ້ວ່າຕິດໂຄວິິດ-19 ແລ້ວກໍໄດ້ໄປໂຮງໝໍເອກຊົນ ເພື່ອເຂົ້າປິ່ນປົວ ແຕ່ທາງໂຮງໝໍພັດບໍ່ກວດໃຫ້ນາງ ເນື່ອງຈາກວ່າ ນາງບໍ່ມີປະກັນສັງຄົມໃນໂຮງໝໍນັ້ນ.

Pregnant-Lao-worker.jpg
ຄົນງານລາວ ທີ່ຖືພາ 7 ເດືອນ ຕິດເຊື້ອ COVID-19 ຕ້ອງໄດ້ດູແລຕົນເອງ ຢູ່ຫ້ອງພັກ ໂດຍສາມີຊາວໄທຍ ຂອງນາງ ໃນຣະຫວ່າງ ທີ່ລໍຖ້າໄປໂຮງໝໍ ຢູ່ ໄທຍ.

ເຈົ້າໜ້າທີ່ໂຮງໝໍເອກຊົນ ທີ່ນາງປີ ໄປກວດເຊື້ອກ່າວວ່າ ຕາມປົກກະຕິຖ້າຜູ້ໃດມີປະກັນສັງຄົມ ຢູ່ໂຮງໝໍກໍສາມາດກວດໄດ້ເລີຍ ສ່ວນ ກໍຣະນີຂອງນາງປີນັ້ນ ແມ່ນເປັນຄົນຕ່າງດ້າວ ທີ່ບໍ່ມີປະກັນສັງຄົມ ແລະ ປະເມີນວ່າ ອາດບໍ່ມີເງິນຈ່າຍຄ່າປິ່ນປົວ ໂຄວິດ-19 ຢູ່ ໂຮງໝໍ 1 ແສນບາດ ຢ່າງຕ່ຳຈຶ່ງບໍ່ໄດ້ກວດໂຄວິດ ໃຫ້ນາງ ພ້ອມທັງແນະນຳ ໃຫ້ນາງໄປກວດຢູ່ ໂຮງໝໍຣັຖ ເພື່ອໃຫ້ສາມາດຫາຕຽງ ໃຫ້ນາງ ຮັບການປິ່ນປົວໄດ້.

“ຖ້າຈະກວດກໍຕ້ອງມາລໍຖ້າຄິວ ຕັ້ງແຕ່ຕິີ 3 ຕີ 4 ແຈກ ບັດຄິວ 7 ໂມງເຊົ້າ ມື້ນຶ່ງຮັບກວດ ໂຄວິດ-19 ບໍ່ເກີນ 300 ຄົນຕໍ່ມື້ ຖ້າເກີດນາງປີ ມາກວດແລ້ວບໍ່ມີປະກັນສັງຄົມ ຈະຕ້ອງໄດ້ ເສັຽຄ່າໃຊ້ຈ່າຍເປັນແສນ.”

ສ່ວນເຈົ້າໜ້າທີ່ ຈາກສູນບໍຣິການ ສາທາຣະນະສຸຂໄທຍ ໜ່ວຍ 24 ເຊິ່ງເປັນໜ່ວຍງານຮັບຜິດຊອບ ກໍຣະນີຜູ້ຕິດໂຄວິດ-19 ໃນເຂດ ທີ່ນາງປີ ອາສັຍຢູ່ກ່າວວ່າ ທາງສູນບໍ່ສາມາດຮັບ ກໍຣະນີ ນາງປີ ໄດ້ ເນື່ອງຈາກວ່າ ນາງບໍ່ມີເອກສານຢັ້ງຢືນ ຈາກທາງການແພດ ວ່ານາງຕິດເຊື້ອໂຄວິດ-19 ຈຶ່ງມີພຽງແຕ່ສົ່ງເຂົ້າ ສົ່ງຢາ ໃຫ້ນາງເທົ່ານັ້ນ.

“ນາງປີ ບໍ່ໄດ້ກວດໂຄງວິດ-19 ແບບມີຜົລຢັ້ງຢືນ ຈາກ ທ່ານໝໍວ່າ ຕິດໂຄວິດ ກໍຄືຈະຕ້ອງບໍ່ໄດ້ຮັບເຣື່ອງ ແຕ່ນາງຈະມີແຕ່ພັກດ່ຽວ ຢູ່ເຮືອນ ກໍຄືສົ່ງເຂົ້າ ສົ່ງຢາ ໃຫ້ທີ່ຫ້ອງພັກ ກໍຈະມີແບບນັ້ນ.”

ເຖິງຢ່າງໃດກໍຕາມ ເຈົ້າໜ້າທີ່ ມູລນິທິ ຕ້ານໂຣຄເອດ ຜູ້ທີ່ເຂົ້າໄປຊ່ອຍເຫຼືອ ກໍຣະນີ ນາງປີ ຢ່າງຈິງຈັງກ່າວວ່າ ນາງປີ ໄດ້ຮັບຢາ ຕ້ານໄວຣັສ ໂຄວິດ-19, 2 ວັນແລ້ວ ພາຍຫຼັງທີ່ມູລນິທິ ໄດ້ຮັບການຕິດຕໍ່ ການຊ່ອຍເຫຼືອ ຕັ້ງແຕ່ວັນທີ 2 ສິງຫາ ຜ່ານມາ.

ພ້ອມດຽວກັນນັ້ນ ທາງມູລນິທິ ກໍໄດ້ແນະນຳນາງ ໃຫ້ລໍຖ້າຢູ່ຫ້ອງພັກ ກ່ອນຈະໄດ້ຕຽງ ເພື່ອຮັບການປີ່ນປົວ ຢູ່ໂຮງໝໍ, ກຸ່ມທ່ານໝໍ ນາງ ພຍາບານ ແລະ ມູລນິທິກໍໄດ້ ຕິດຕາມອາການ ຂອງນາງຢ່າງໃກ້ຊິດ ຍ້ອນກໍຣະນີຂອງນາງ ເປັນກໍຣະນີ ສີແດງ.

”ຕອນນີ້ກໍຄືນາງປີ ໄດ້ຢາ ພາວີປິຣາເວັຽ ແລ້ວ ຖ້າເຣື່ອງຕຽງ ຖ້າມີຄວາມຈຳເປັນ ທີ່ຕຽງນາງປີ ຕ້ອງໃຊ້ຕຽງເພື່ອປິ່ນປົວໂຄວິດ-19 ຈະມີທາງທິມ ພຍາບານ ແລະ ທິມໝໍ ກໍຈະລອງ ຊ່ອຍກັນປະສານດູວ່າ ຈະບໍ່ແມ່ນເປັນຕຽງສນາມ ຖ້າເປັນຕຽງສນາມຈະບໍ່ເໝາະ ກັບແມ່ຍິງຖືພາ ຕ້ອງເປັນຕຽງຢູ່ໂຮງໝໍເທົ່ານັ້ນ.”

ຍານາງກ່າວຕື່ມວ່າ ໃນໄລຍະ 1 ເດືອນ ຜ່ານມາ ທາງມູລນິທິ ຕ້ານໂຣຄເອດ ໄດ້ເຂົ້າໄປຊ່ອຍເຫຼືອ ຄົນງານຕ່າງປະເທດ ເປັນຕົ້ນ ລາວ ພະມ້າ ແລະ ກຳພູຊາ ຕິິດເຊື້ອໂຄວິດ-19 ແລ້ວບໍ່ໄດ້ຮັບການປິ່ນປົວ ແລະ ຍັງມີອີກຫຼາຍກໍຣະນີ ທີ່ຄົນຕິດເຊື້ອດັ່ງກ່າວ ຍັງບໍ່ໄດ້ຮັບຕຽງ ເພື່ອເຂົ້າປິ່ນປົວເທື່ອ ໃນນັ້ນສ່ວນໃຫຍ່ ມູລນິທິ ຈະຊ່ອຍເຫຼືອດ້ວຍການ ໃຫ້ຢາ ພາຣາເຊຕາມອນ ເພື່ອຫລຸດຜ່ອນ ອາກາດໄປກ່ອນ ໃນຂນະທີ່ ລໍຖ້າຕຽງໂຮງໝໍຢູ່ ຖ້າຜູ້ມີອາການໄຂ້ແຮງ ແພດກໍຈະເລັ່ງ ໃຫ້ການຊ່ອຍເຫຼຶອ ໃຫ້ໄດ້ຮັບຕຽງ ເພື່ອເຂົ້າ ປິ່ນປົວ ໃຫ້ໄດ້ໄວທີ່ສຸດ.

ອີງຕາມການຣາຍງານ ຂອງສູນບໍຣິຫານ ສະຖານະການ ໂຄວິດ-19 ໃນໄທຍ ມາຮອດວັນທີ 3 ສິງຫາ ໃມີຜູ້ຕິດເຊື້ອໂຄວິດ-19 ໃນໄທຍ ແລ້ວ 18,901 ຄົນ ມີຜູ້ປ່ວຍສະສົມ ທັງໝົດ 623,322 ຄົນ ແລະ ເສັຽຊີວິດຈຳນວນນຶ່ງ.

ຄໍາເຫັນ (1)

ເບິ່ງຄວາມເຫັນທັງໝົດ.

Anonymous says:
Aug 04, 2021 10:51 PM

ລູກເອີ້ຍ ໄດ້ເຫັນຂ່າວແລ້ວ ກໍອົດຄິດເປັນຫ່ວງນຳເຈົ້າບໍ່ໄດ້ ໄປເຈັບໄປປ່ວຍ ຢູ່ບ້ານເພິ່ນແຕ່ ກໍ່ບໍ່ໄດ້ຮັບການປິ່ນປົວ ພະຍາດນີ້ພັດເປັນອັນຕະລາຍແທ້ໆ. ເປັນຫຍັງຄືບໍ່ໄປຫາສະຖານທູດລາວ ໃຫ້ເພິ່ນຊ່ວຍ ທາງການລາວ ກໍຍິນດີໃຫ້ການຊ່ວຍເຫລືອ ແລະ ຮັບຕ້ອນກັບມາລາວ ເຖິງແມ່ນວ່າ ຈະໄປແບບຖືກກົດຫມາຍແລະຜິດກົດຫມາຍເພິ່ນກໍ່ຮັບເອົາໝົດ ຂໍພຽງແຕ່ ບໍ່ໃຫ້ລັກຂ້າມມາເທົ່ານັ້ນ. ຫວັງວ່າ ຄົງຈະໄດ້ເຂົ້າການປິນປົວແລະກັບຄືນມາລາວໃນໄວໆນີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ