ເຂດເສຖກິຈພິເສດ ສາມຫຼ່ຽມຄຳ ຈຸດ ໂຄວິດ-19 ຣະບາດ ໃນແຂວງບໍ່ແກ້ວ

ໄຊຍາ
2021-05-28
Share
ເຂດເສຖກິຈພິເສດ ສາມຫຼ່ຽມຄຳ ຈຸດ ໂຄວິດ-19 ຣະບາດ ໃນແຂວງບໍ່ແກ້ວ ພະນັກງານ ໃນເຂດເສຖກິດພິເສດ ສາມຫຼ່ຽມຄໍາ ແຂວງບໍ່ແກ້ວ ທີ່ ພາກັນມາກວດຫາ ເຊື້ອພຍາດໂຄວິດ-19
ນັກຂ່າວພົລເມືອງ

ຕົ້ນຕໍຂອງການແຜ່ຣະບາດ ເຊື້ອພຍາດໂຄວິດ-19 ຂອງແຂວງບໍ່ແກ້ວ ຈຸດສູນກາງຢູ່ທີ່ເຂດ ເສຖກິຈພິເສດ ສາມຫລ່ຽມຄຳ. ເຂດ ດັ່ງກ່າວນີ້ກ່ອນປີໃໝ່ລາວ ຍັງເປີດໃຫ້ການບໍຣິການ ບໍ່ວ່າຈະເປັນສະຖານບັນເທີງ ແລະ ເຂດຄ້າຂາຍຜູ້ຄົນກໍຍັງເຂົ້າ-ອອກ ຕາມ ປົກກະຕິ. ພະນັກງານທັງລາວ, ໄທຍ, ພະມ້າ ແລະຈີນ ກໍຍັງເຮັດວຽກຢູ່ໃນເຂດນີ້.

ເຫດການການແຜ່ຣະບາດ ມາເກີດຂຶ້ນເມື່ອວັນທີ 27 ເມສາ 2021 ແຂວງບໍ່ແກ້ວ ກໍພົບກໍຣະນີທຳອິດວ່າຕິດເຊື້ອ ໂຄວິດ-19 ເຊິ່ງ ທາງການແຂວງບໍ່ແກ້ວ ໄດ້ຢັ້ງຢືນວ່າແມ່ນໄດ້ ສັມພັດ ໃກ້ຊິດກັບ ກໍຣະນີ ທີ 59, ດັ່ງເຈົ້າໜ້າທີ່ ຣະດັບສູງ ຂອງຄະນະສະເພາະກິຈ ແຂວງບໍ່ແກ້ວ ໄດ້ກ່າວຢັ້ງຢືນຕົ້ນເຫດ ຂອງການຣະບາດຕໍ່ ເອເຊັຽເສຣີ ເມື່ອສັປດາທີ່ຜ່ານມາວ່າ:

"ພໍມາຮອດວັນທີ 27 ເມສາ 2021 ນີ້ ແຂວງບໍ່ແກ້ວແມ່ນພົບກໍຣະນີ ຜູ້ຕິດເຊື້ອ ກໍຣະນີທຳອິດ ຂອງແຂວງບໍ່ແກ້ວ ເຊິ່ງ ພວກເຮົາກໍ ສືບສວນ-ສອບສວນ ຜູ້ສັມພັດໃກ້ຊິດຕ່າງໆ ໃນກໍຣະນີຜູ້ນຳເຊື້ອ ມາແຜ່ກໍຍັງເປັນກໍຣະນີມາຈາກ ນະຄອນຫຼວງວຽງຈັນເນາະ ເຊິ່ງວ່າ ເປັນຜູ້ສັມພັດໃກ້ຊິດ ກັບ ກໍຣະນີ."

ທ່ານໄດ້ກ່າວຕື່ມວ່າ ຄົນທີ່ອາສັຍຢູ່ໃນເຂດ ແລະ ທໍາມາຄ້າຂາຍ ບວກໃສ່ກັບປະຊາກອນ ເມືອງຕົ້ນເຜິ້ງທັງໝົດກໍປະມານ 70-80 ພັນຄົນ ຢູ່ໃນບໍຣິເວັນເຂດເສຖກິຈພິເສດ ສາມຫລ່ຽມຄຳ, ເຊິ່ງກໍເປັນຊຸມຊົນໃຫຍ່ນຶ່ງ ຂອງແຂວງບໍ່ແກ້ວ.

ປັຈຈຸບັນເຂດນີ້ເປັນເຂດພື້ນທີ່ສີແດງ ແລະ ກະຊວງສາທາຣະນະສຸຂ ກໍໄດ້ສົ່ງແພດໝໍຈາກນະຄອນຫຼວງວຽງຈັນ ມາປະຈຳການ.

ເມື່ອບໍ່ມາດົນມານີ້ ທາງແພດ-ໝໍ ຈາກຈີນ ກໍໄດ້ເດີນທາງມາແຂວງບໍ່ແກ້ວ ແລະ ເຂົ້າມາແກ້ໄຂບັນຫາ ໃນເຂດເສຖກິຈພິເສດສາມ ຫລ່ຽມຄຳ. ໂດຍສະເພາະແມ່ນເລັ່ງໃສ່ການສັກ ວັກຊິນປ້ອງກັນ ເຊື້ອໂຄວິດ-19 ຂອງຊີໂນຟາມ ໃຫ້ກັບພະນັກງານ ແລະ ຊາວຄ້າຂາຍໃນເຂດ ເສຖກິຈພິເສດສາມຫລ່ຽມຄຳ.

ເຈົ້າໜ້າທີ່ຂອງແຂວງບໍ່ແກ້ວ ອີກທ່ານນຶ່ງໄດ້ກ່າວວ່າ ສາເຫດຫລັກຂອງການຕິດເຊື້ອ ເມືອງຕົ້ນເຜິ້ງກໍມາຈາກເຂດເສຖກິຈພິເສດ ສາມຫລ່ຽມຄຳ. ຕົ້ນຕໍຂອງການແຜ່ເຊື້ອ ກໍມາຈາກ ຜູ້ເຮັດວຽກບໍຣິການ ໃນຮ້ານອາຫານ, ຮ້ານບັນເທີງຕ່າງໆ.

"ສາເຫດຫລັກຂອງການຕິດເຊື້ອເມືອງຕົ້ນເຜິ້ງ. ຄັນເວົ້າແຫລະກະ ສລຸບຫັ້ນນ່າ ກະຄືວ່າແຂວງບໍ່ແກ້ວ ກໍຄືເມືອງຕົ້ນເຜິ້ງ ເຂດ ເສຖກິຈພິເສດສາມຫລ່ຽມຄຳ ຕົ້ນຕໍ່ຂອງການຕິດເຊື້ອ ກໍມາຈາກກຸ່ມຄົນ ທີ່ເຮັດບໍຣິການ ໃນຮ້ານອາຫານ, ໃນຮ້ານບັນເທີງຕ່າງໆ."

ທ່ານໄດ້ກ່າວຕື່ມວ່າ ຍ້ອນຫຍັງຍອດສະສົມຜູ້ຕິດເຊື້ອ ໃນແຂວງບໍ່ແກ້ວຈຶ່ງເພີ່ມຂຶ້ນສູງ ຍ້ອນວ່າໃນໄລຍະຜ່ານມາ ທາງແພດ-ໝໍ ໄດ້ກວດຫາເຊື້ອໃນເຂດ ເສຖກິຈພິເສດໃນສອງ ຮູບແບບ, ແບບທີນຶ່ງແມ່ນກວດທາງບຸກຄົນ ກໍຄືພະນັກງານຢູ່ເຂດມີເທົ່າໃດ ແມ່ນກວດໃຫ້ໝົດ. ຜ່ານມາກໍກວດໄປປະມານ 50 ພັນ ປາຍຄົນ.

ອັນທີສອງແມ່ນກວດຕາມປວັດ ຜູ້ຕິດເຊື້ອໃນຕອນຕົ້ນ ກໍເຫັນວ່າມີຜູ້ຕິດເຊື້ອ ເພີ່ມຂຶ້ນສູງມາໃນໄລຍະຫລັງຜູ້ຕິດເຊື້ອເຣີ່ມຫລຸດ ລົງຕາມລຳດັບ. ເຊິ່ງສອງຮູບແບບນີ້ ກໍເປັນການ ຂັດກອງຜູ້ຕິດເຊື້ອ ອອກຈາກຊຸມຊົນໄດ້ໂດຍໄວ ເຊິ່ງຂັ້ນຕອນນີ້ທາງ ຄະນະ ສະເພາະກິຈ ແຂວງບໍ່ແກ້ວ ພ້ອມດ້ວຍໝໍ ຈາກສູນກາງ ແລະ ຈາກຈີນກໍໄດ້ປະຕິບັດ ຂັ້ນຕອນນີ້ສຳເຣັດ ໄປແລ້ວ.

ຈາກນັ້ນແມ່ນສັກຢາປ້ອງກັນເຊື້ອ ໂຄວິດ-19 ຂອງ ຊີໂນຟາມ ໃຫ້ພະນັກງານໃນເຂດ ແລະ ປະຊາຊົນໃນເຂດເມືອງຕົ້ນເຜິ້ງ ແລະ ເມືອງອື່ນໆ ເຊິ່ງມີຈຸດບໍຣິການ ປະມານ 5 ຈຸດພາຍໃນແຂວງ.

ຕາມແຫລ່ງຂ່າວຂອງນັກຂ່າວ ຊາຍແດນປະເທດໄທຍ ເຂດເມືອງຊຽງແສນ ແຂວງຊຽງຮາຍ ໄດ້ຣາຍງານເມື່ອວັນທີ 17 ພຶສພາ ວ່າ:

ການຣະບາດເຊື້ອໂຄວິດ-19 ໃນເມືອງຕົ້ນເຜິ້ງ ແຂວງບໍ່ແກ້ວ ນັ້ນພົບວ່າພາຍໃນໂຄງການຄິງໂຣມັນ ກໍຄືເຂດເສຖິກຈພິເສດສາມ ຫລ່ຽມຄຳ ໂດຍເຣີ່ມມາຕັ້ງແຕ່ ວັນທີ 22 ເມສາ ເປັນຕົ້ນມາພົບຜູ້ຕິດເຊື້ອ 284 ຄົນ, ເປັນຄົນຈີນ 81 ຄົນ, ຄົນລາວ 138 ຄົນ, ຄົນພະມ້າ 33 ຄົນ ແລະ ຄົນໄທຍ 7 ຄົນ.

ໂດຍຣາຍງານໄດ້ຣະບຸຕື່ມວ່າ ເຂດເສຖກິດພິເສດ ສາມຫລ່ຽມຄຳ ໄດ້ປະກາດປິດ ຫລື ລ໊ອກດາວເຣີ່ມຕັ້ງແຕ່ວັນທີ 06 ພຶສພາ ເປັນຕົ້ນມາ ແລະ ມີການຣະດົມ ການສັກວັກຊິນ ປ້ອງກັນໂຄວິດ-19 ຂອງ ຊີໂນຟາມ ຈາກປະເທດຈີນ ໃຫ້ກັບຄົນງານທີ່ຢູ່ໃນເຂດ ແລ້ວຈຳນວນ 233 ຄົນ.

ຕໍ່ການລ໊ອກດາວ ເຂດເສຖກິຈພິເສດສາມຫລ່ຽມຄຳ ຄົນງານທີ່ເຮັດວຽກ ໃນເຂດດັ່ງກ່າວ ໄດ້ກ່າວຕໍ່ພວກເຮົາວ່າ, ຫາກໍເຮັດ ວຽກໄດ້ສອງເດືອນ ກໍມາເກີດເຫດການນີ້ຂຶ້ນ. ທາງນາຍຈ້າງ ກໍໄດ້ຢຸດເຊົາກິຈການຊົ່ວຄາວ ແຕ່ບໍ່ໄດ້ແຈ້ງເຕືອນ ຫຍັງພ້ອມທັງ ຍັງບໍຮູ້ວ່າຈະໄດ້ເງິນ ຄ່າແຮງງານ ສຳລັບເດືອນເມສາ ບໍ່ເພາະຕົນ ກໍຖືກກັກໂຕໃນເຂດນີ້. ຕອນນີ້ເງິນກະ ບໍ່ມີທາງນາຍຈ້າງ ກໍບໍ່ວ່າແນວໃດຈຶ່ງໄດ້ວິງວອນໃຫ້ ທາງແຂວງບໍ່ແກ້ວ ເຂົ້າມາຊ່ອຍແກ້ໄຂບັນຫານີ້.

ແຕ່ກໍບໍ່ແມ່ນນາຍຈ້າງໝົດ ທຸກກໍເປັນພຽງແຕ່ນາຍຈ້າງບາງຄົນ ທີ່ບໍ່ຮັບຜິດຊອບ ຕໍ່ເຫດການທີ່ເກີດຂຶ້ນນີ້. ສ່ວນຂ່່າວຄົນງານ ທີ່ຫລັ່ງອອກຈາກເມືອງຕົ້ນເຜິ້ງ ນັ້ນຫຼ້າສຸດທາງ ການໄດ້ອອກມາປະຕິເສດແລ້ວວ່າ ບໍ່ແມ່ນຄົນງານຈາກເຂດເສຖກິຈພິເສດ ສາມຫລ່ຽມຄຳ. ຄົນງານເຫລົ່ານີ້ ເປັນຄົນງານຢູ່ໃນພາກກະສິກັມ ສ່ວນຫລາຍຈະເຮັດວຽກຢູ່ສວນກ້ວຍ, ສວນໝາກຖົ່ວ, ສວນໝາກໂມ ຂອງຜູ້ປະກອບການຈີນ ໃນເມືອງຕົ້ນເຜີ້ງ.

"ໃນວັນທີ 20-21 ພຶສພາ ມີແຮງງານຢູ່ເມືອງຕົ້ນເຜິ້ງ ອອກມາ, ແຕ່ພວກເຮົາຢາກໃຫ້ເຂົ້າໃຈ ວ່າແຮງງານດັ່ງກ່າວເປັນແຮງງານ ທີ່ໄປອອກແຮງງານ ຢູ່ສວນໝາກຖົ່ວ, ຢູ່ສວນ ໝາກໂມ ແລະ ຢູ່ສວນກ້ວຍຂອງຜູ້ປະກອບການຫັ້ນ."

ທ່ານໄດ້ກ່າວຕື່ມວ່າ ຄົນງານເລົ່ານີ້ ບໍ່ແມ່ນຄົນງານຖາວອນ ເປັນຕາມຣະດູການການຜລິດ. ເມື່ອຄົນງານຮູ້ວ່າວັນທີ 20 ພຶສພາ ຈະມີການເປີດ ລ໊ອກດາວ ຈຶ່ງເຮັດໃຫ້ຄົນງານເລົ່ານັ້ນ ຕ້ອງການກັບບ້ານຕົນເອງ. ໂດຍອົງການປົກຄອງເມືອງຕົ້ນເຜິ້ງ ແລະ ຜແນກແຮງງານ ແລະ ສວັດດີການສັງຄົມ ໄດ້ລົງເກັບກໍາຂໍ້ມູນ ແລະ ຈັດສັນຂຶ້ນບັນຊີ ຮວມແລ້ວມີຄົນງານ 661 ຄົນ. ໃນນີ້ ກໍມີຄົນງານ ທີ່ຢູ່ພາຍໃນແຂວງ ປະມານ 500 ຄົນ ທີ່ມາຈາກ ເມືອງຜາອຸດົມ, ເມືອງປາກທາ, ເມືອງຫ້ວຍຊາຍ ແລະ ເມືອງເມິງ.

ສ່ວນຄົນງານທີ່ມາຈາກແຂວງອື່ນ ມີປະມານ 100 ຄົນ ຫລາຍກວ່າໝູ່ ແມ່ນແຂວງຜົ້ງສາລີ ມີ 90 ຄົນ ສ່ວນທີ່ເຫຼືອແມ່ນມາຈາກ ແຂວງອຸດົມໄຊ, ຫລວງນໍ້າທາ, ຫລວງພຣະບາງ ແລະ ໄຊຍະບູລີ. ຕໍ່ກັບຄົນງານເລົ່ານີ້ ປັຈຈຸບັນທາງແຂວງບໍ່ແກ້ວ ໄດ້ຕິດຕໍ່ໄປ ຍັງແຂວງປາຍທາງ ໄດ້ໃຫ້ມາຮັບເອົາຄົນງານເລົ່ານີ້ ພາຍຫລັງທີ່ໄດ້ດຳເນີນ ມາຕການປ້ອງກັນເຊັ່ນ ກວດຫາເຊື້ອເປັນລົບ, ອອກເອກສານຢັ້ງຢືນ ແລະ ສົ່ງໄປຍັງຈຸດນັດພົບເພື່ອໃຫ້ແຂວງ ປາຍທາງມາຮັບເອົາໄປ ເຂົ້າສູນກັກບໍຣິເວນ ພາຍໃນແຂວງໃຜລາວ.

ທາງດ້ານການຮອງຮັບການປີ່ນປົວ ຜູ້ຕິດເຊື້ອໂຄວິດ-19 ໃນແຂວງບໍ່ແກ້ວ ເຈົ້າໜ້າທີ່ຄະນະ ສະເພາະກິຈ ໄດ້ກ່າວວ່າ ກໍໄດ້ນໍາໃຊ້ ທັງໂຮງໝໍແຂວງແລະໂຮງໝໍພາກສນາມ ໄປພ້ອມໆກັນ. ເນື່ອງຈາກຕອນນີ້ຍອດສະສົມ ຜູ້ຕິດເຊື້ອເພີ່ມຂຶ້ນ ໂດຍແຂວງບໍ່ແກ້ວ ສ້າງໄວ້ເພື່ອປະມານ 1000 ປາຍຕຽງ.

ປັຈຈຸບັນພວກເຮົາກໍໄດ້ ສົມທົບກັບເຂດເສຖກິຈພິເສດ ສ້າງໂຮງໝໍ ສນາມຂນາດ 800 ຕຽງ ກຳລັງສ້າງຢູ່. ອາທິດໜ້າມັນຈະ ແລ້ວຫລັງນຶ່ງ ສອງຫລັງກ່ອນທັງໝົດ ພວກເຮົາຈະສ້າງ ແມ່ນ 16 ຫລັງ ແລະ ມີ 400 ຫ້ອງສາມາດບັນຈຸໄດ້ 800 ກວ່າຕຽງ.

ທ່ານ ໄດ້ກ່າວຕື່ມວ່ານອກຈາກໂຮງໝໍ ພາກສນາມ ທີ່ສ້າງໃໝ່ທາງແຂວງ ກໍໄດ້ກະຕຽມ ດັດແປງໂຮງໝໍ, ສະໂມສອນຂອງຫ້ອງ ວ່າການແຂວງ, ຣີສອດຢູ່ເມືອງຕົ້ນເຜິ້ງ ເພື່ອເປັນການຮອງຮັບ ການປີ່ນປົວພາຍໃນແຂວງ.

ຂໍ້ມູນຂອງຜູ້ຕິດເຊື້ອໂຄວິດ-19 ແຂວງບໍ່ແກ້ວ ຍອດສະສົມຜູ້ຕິດເຊື້ອ ໃນວັນທີ 27 ພຶສພາ 492 ຄົນ. ໃນນີ້ເມືອງຕົ້ນເຜິ້ງ 451 ກໍຣະນີ, ເມືອງຫ້ວຍຊາຍ 40 ກໍຣະນີ, ເມືອງປາກທາ 01 ກໍຣະນີ, ເມືອງເມິງ ແລະ ເມືອງຜາອຸດົມ ຍັງບໍ່ພົບຜູ້ຕິດເຊື້ອ. ສ່ວນ ຜູ້ຕິດເຊື້ອກຳລັງປີ່ນປົວມີ 139 ກໍຣະນີ, ຫາຍດີສະສົມ 353 ກໍຣະນີ ແລະ ບໍ່ມີຜູ້ເສັຍຊີວິດ. ດັ່ງເຈົ້າໜ້າທີ່ ປະຕິບັດການຄະນະ ສະເພາະກິຈ ແຂວງບໍ່ແກ້ວໄດ້ກ່າວວ່າ:

"ປັຈຈຸບັນນີ້ໄທ ເຮົາກໍຄວບຄຸມ ໄດ້ກວດເຊື້ອນີ້ບາງ ກໍໄດ້ ປະມານ 100 ປາຍ ບາງເທື່ອກໍໄດ້ 40-50 ເນາະ. ກໍບໍ່ມີຜູ້ຕິດເຊື້ອແລ້ວ ເຝົ້າຣະວັງເປັນປົກກະຕິ ກໍບໍ່ໄດ້ ລົດລະແຕ່ລະຕຶກ ເຮົາກໍໄດ້ຈັດທີມແພດ-ໝໍ ຫັ້ນເຂົ້າເປັນທີມ ເປັນທີມ ເດ້ເນາະ ຍັງໄດ້ຕິດ ຕາມຢູ່ສົມມຸດວ່າ ຍັງມີຜູ້ເປັນໄຂ້ເປັນຫຍັງ ກໍນຳມາກວດຕິດຕາມອາການ."

ສຳລັບການສັກຢາປ້ອງກັນເຊື້ອ ໂຄວິດ-19 ຂອງແຂວງບໍ່ແກ້ວ ຫລ້າສຸດ ວັນທີ 27 ພຶສພາ ເຂັມທີ 1 ສັກໄປ ແລ້ວຈຳນວນ 71,463 ຄົນ ແລະ ເຂັມທີ 2 ສັກໄປແລ້ວຈໍານວນ  7,098 ຄົນ.

ເຖິງແນວໃດກໍຕາມ ເຖິງວ່າຍອດສະສົມຜູ້ຕິດເຊື້ອໃໝ່ ບໍ່ມີໃນໄລຍະວັນທີ 25-27 ພຶສພາ ແຕ່ຄະນະສະເພາະກິຈແຂວງບໍ່ແກ້ວ ກໍຍັງຄົງໃຊ້ມາຕການເຝົ້າຣະວັງ ແລະ ເຂດເສຖກິຈ ພິເສດ ສາມຫລ່ຽມຄຳ ຍັງເປັນພື້ນທີ່ສີແດງ ພ້ອມທັງຍັງຮັກສາມາຕການ ລ໊ອກດາວຈົນກ່ວາໂຕເລກປີ່ນປົວ ຫາຍດີຫລຸດລົງກັບເຂົ້າສູ່ພາວະປົກກະຕິ.

ແຕ່ປັຈຈຸບັນທາງແຂວງ ກໍມີການຜ່ອນຜັນໃຫ້ປະຊາຊົນ ພາຍໃນແຂວງອອກມາທຳມາຫາກິນ ຊື້ຂາຍໄດ້ ແຕ່ຍັງປິດເປັນບາງເຂດ ທີ່ມີຄວາມຊ່ຽງ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ