5 ແຂວງ ທີ່ຣົຖໄຟຜ່ານ, ຕ້ອງສັກວັກຊິນ ເຂັມ 3

ຈຳປາທອງ
2021.12.28
Share on WhatsApp
Share on WhatsApp
5 ແຂວງ ທີ່ຣົຖໄຟຜ່ານ, ຕ້ອງສັກວັກຊິນ ເຂັມ 3 ຜູ້ໂດຍສານ ທັງຊາວລາວ ແລະ ຕ່າງປະເທດ ຕໍ່ແຖວລໍຖ້າຊື້ປີ້ ແລະ ລໍຖ້າຂຶ້ນຣົຖໄຟ ຈຳນວນຫຼາຍ ຈົນເກີດຄວາມແອອັດ ທີ່ສະຖານີຫຼວງພຣະບາງ ໃນນະຄອນຫຼວງພຣະບາງ ແຂວງຫຼວງພຣະບາງ (TS), ເດືອນທັນວາ 2021.
RFA

ທາງການລາວ ກໍານົດໃຫ້ 5 ແຂວງ ຄືນະຄອນຫຼວງວຽງຈັນ, ແຂວງວຽງຈັນ, ຫຼວງພຣະບາງ, ອຸດົມໄຊ ແລະແຂວງຫຼວງນໍ້າທາ ທີ່ຣົຖໄຟລາວ-ຈີນຜ່ານ ສັກວັກຊິນປ້ອງກັນໂຄວິດ-19 ເຂັມທີ 3 ກ່ອນແຂວງອື່ນໆ ເນື່ອງຈາກເປັນແຂວງເປົ້າໝາຍຂອງການທ່ອງທ່ຽວ ທີ່ທາງການຈະເປີດປະເທດໃນໄລຍະທໍາອິດ ໃນມື້ວັນທີ 1 ມົກກະຣາ 2022 ທີ່ຈະມາເຖິງນີ້.

ທີ່ຜ່ານມາ ກໍໄດ້ມີການສັກວັກຊິນປ້ອງກັນໂຄວິດ-19 ເຂັມທີ 3 ນີ້ໃຫ້ບຸກຄະລາກອນການແພດ ແລະເຈົ້າໜ້າທີ່ດ່ານສາກົນ ແລະໄດ້ເຣີ່ມສັກໃຫ້ປະຊາຊົນຈໍານວນນຶ່ງແລ້ວ ເປັນຕົ້ນຢູ່ນະຄອນຫຼວງວຽງຈັນ ໂດຍທີ່ບໍ່ມີຜູ້ໃດມີຜົລຂ້າງຄຽງຮຸນແຮງ, ມີພຽງເປັນໄຂ້, ປວດຕົນໂຕ, ກິນຢາແກ້ໄຂ້ ອາການກໍດີຂຶ້ນ ອີງຕາມ ຄໍາເວົ້າຂອງເຈົ້າໜ້າທີ່ການແພດ ໃນນະຄອນຫຼວງວຽງຈັນ ທ່ານນຶ່ງ ທີ່ຂໍສງວນຊື່ ແລະຕໍາແໜ່ງ ຕໍ່ວິທຍຸເອເຊັຽເສຣີໃນ ມື້ວັນທີ 27 ທັນວານີ້.

“ຣົຖໄຟແລ່ນຜ່ານ ກໍໄດ້ເປີດປະເທດເດ ເພິ່ນກໍຢາກໃຫ້ໄດ້ສັກຢາຫຼາຍໆ ເຂົາເຈົ້າກໍມາສັກຫຼາຍເດ ບໍ່ເຫັນເປັນຫຍັງເດລະ ແຕ່ເຂົາເຈົ້າກໍມີແຕ່ໄຂ້ ໜາວສັ່ນເລັກນ້ອຍ ບາງຄົນກໍໂທມາຫາ ລະບອກກິນຢາແກ້ ໄຂ້ພາຣາບໍ່ສອງເມັດ ແລ້ວເຂົາເຈົ້າກໍເຊົາ.
ປັດຈຸບັນ ຢູ່ນະຄອນຫຼວງວຽງຈັນ ກໍຍັງມີບັນຫາ ຂາດເຂີນບຸກຄະລາກອນການແພດ, ບໍ່ພຽງພໍຄືເກົ່າຢູ່ ຍ້ອນແຕ່ລະມື້ທີ່ຜ່ານມາ ມີຄົນຕິດເຊື້ອໂຄວິດ-19 ຫຼາຍ. ທາງການແກ້ໄຂບັນຫານີ້ ໂດຍໃຫ້ຜູ້ຕິດເຊື້ອທີ່ມີເງື່ອນໄຂ ປິ່ນປົວເອົາເອງຢູ່ເຮືອນໄດ້, ຫາກຈໍາເປັນກໍສາມາດຕິດຕໍ່ກັບແພດ ແລະໝໍໄດ້ທຸກເວລາ ໂດຍມີເລກໂທຣະສັບໃຫ້. ສໍາລັບແພດ ແລະໝໍຢູ່ຕາມໂຮງໝໍສນາມ ກໍໄດ້ໝຸນວຽນປ່ຽນເວນຍາມກັນຄືເກົ່າ ດັ່ງທີ່ທ່ານກ່າວວ່າ:

ກະແມ່ນແຫລະ ກະຂາດ ບໍ່ພໍ ແບບພະນັກງານໜຸ່ມ ມັນຢາກໜ້ອຍແບບວ່າຜູ້ແກ່ຫັ້ນຫຼາຍ ກະຂາດແຄນ ບໍ່ພຽງພໍ ບາງຄົນກະລົງບ້ານແດງ ລົງປິ່ນປົວ ບາງຄົນກະລົງກວດແຕ່ລະບ້ານ ແລະເຂົາເຈົ້າກໍໃຫ້ເບີແມ່ນຫຍັງຫັ້ນລະ ແລະໃຫ້ຕິດຕາມຢູ່ບ້ານ ຄະນະບ້ານກະເບິ່ງນໍາ. 

ຢູ່ແຂວງບໍ່ແກ້ວ ເວົ້າເຣື່ອງບຸກຄະລາກອນການແພດ ເຈົ້າໜ້າທີ່ສາທາຣະນະສຸຂ ຜູ້ຂໍສງວນຊື່ ແລະຕໍາແໜ່ງ ທ່ານນຶ່ງ ຢູ່ແຂວງນີ້ເວົ້າວ່າ ກໍພໍມີພະນັກງານການແພດ ປະຈໍາໂຮງໝໍຢູ່ ບໍ່ເຖິງຂັ້ນໄດ້ຂໍໝໍມາຊ່ອຍ.

“ກະມີຢູ່ ພະນັກ ງານມັນກະມີປະຈໍາຢູ່ຫັ້ນແຫລະ ເຮົາກໍບໍ່ໄດ້ເຖິງຂັ້ນນັ້ນ ວ່າຈະຕ້ອງໄດ້ຂໍຄົນມາຊ່ອຍ ເຮົາກໍປະຕິບັດຕາມລະບຽບກະຊວງວາງອອກຫັ້ນແຫລະ ເຣື່ອງມາຕຖານການເຂົ້າປິ່ນປົວຄົນເຈັບນອນໂຮງໝໍຄືຈັ່ງໃດ ເຮົາກໍປະຕິບັດຕາມລະບຽບຂອງສູນການຫັ້ນ.    

ແລະຢູ່ແຂວງອຸດົມໄຊ ຊຶ່ງເປັນແຂວງນຶ່ງທີ່ທາງຣົຖໄຟລາວ-ຈີນຜ່ານ ທາງການແຂວງກໍໄດ້ເຣີ່ມສັກວັກຊິນປ້ອງກັນໂຄວິດ-19 ເຂັມທີ 3 ໃຫ້ແພດ, ໝໍ ແລະເຈົ້າໜ້າທີ່ດ່ານມາໄລຍະນຶ່ງແລ້ວ ແລະປັດຈຸບັນ ກໍໄດ້ເຣີ່ມສັກໃຫ້ປະຊາຊົນ ໂດຍທີ່ຍັງບໍ່ມີຜູ້ໃດເກີດຜົລຂ້າງຄຽງຮຸນແຮງ, ມີແຕ່ເປັນໄຂ້ໜ້ອຍນຶ່ງ ດັ່ງເຈົ້າໜ້າທີ່ສາທາຣະນະສຸຂແຂວງອຸດົມໄຊ ຜູ້ຂໍສງວນຊື່ ແລະຕໍາແໜ່ງທ່ານນຶ່ງ ກ່າວຕໍ່ວິທຍຸເອເຊັຽເສຣີໃນມື້ວັນທີ 27 ທັນວານີ້ວ່າ:

ສັກເຂັມ 3 ແລ້ວ ກໍມີໄຂ້ມີຫຍັງໜ້ອຍນຶ່ງຫັ້ນແຫລະ ປົກກະຕິ ເພາະການປະຕິກິລິຍາຂອງຢາເດ ເພາະເພິ່ນຈະເປີດທ່ອງທ່ຽວ ບູລິມະສິດທີ່ຈະຕ້ອງໄດ້ສັກກ່ອນ ເພາະວ່າມັນເປັນແຂວງທາງຣົຖໄຟມັນຜ່ານ.

ເວົ້າເຖິງເຣື່ອງການສັກວັກຊິນປ້ອງກັນໂຄວິດ-19 ເຂັມທີ 3 ຊາວບ້ານຢູ່ແຂວງວຽງຈັນ ຜູ້ນຶ່ງເວົ້າວ່າ ປະຊາຊົນສ່ວນຫຼາຍ ກໍຢ້ານເກີດຜົລຂ້າງຄຽງ ແຕ່ຖ້າຫາກທາງການ ເພິ່ນຢືນຢັນໃນການຮັບປະກັນ ຄວາມປອດພັຍໃຫ້ ກໍພ້ອມທີ່ຈະໄປສັກ.

ຜົລຂ້າງຄຽງນີ້ ສ່ວນຫຼາຍກະຢ້ານຫັ້ນແຫລະ ວ່າຊັ້ນສາ ມັນກະອີງໃສ່ວຽກງານການແພດຫັ້ນລະ ຄັນວ່າມັນສັກລົງໄປ ມັນຮັບປະກັນໄດ້ ກະແຮງດີ.

ແລະຢູ່ແຂວງຫຼວງນໍ້າທາ ປະຊາຊົນຜູ້ນຶ່ງກໍເວົ້າວ່າ ຖ້າຫາກທາງການເພິ່ນແຈ້ງການມາວ່າ ໃຫ້ໄປສັກວັກຊິນປ້ອງກັນໂຄວິດ-19 ເຂັມທີ 3 ຕົນກໍພ້ອມທີ່

ຈະໄປສັກ, ບໍ່ຄິດຢ້ານຄືຕັ້ງແຕ່ກ່ອນ.

ເຂັມ 3 ກະພ້ອມຢູ່ ດຽວນີ້ກະທໍາມະດາ ຄັນຮູ້ແລ້ວກະບໍ່ຢ້ານຄືແຕ່ກີ້ ມັນກະບໍ່ຮ້າຍ ບໍ່ແຮງປານໃດ ທໍາມະດາຫັ້ນໜາ. 

ແຕ່ເຖິງຢ່າງໃດກໍດີ ມາເຖິງປັດຈຸບັນ ທາງການກໍຍັງຈະສຸມໃສ່ສັກວັກຊິນປ້ອງກັນໂຄວິດ-19 ນັ້ນໃຫ້ກຸ່ມເປົ້າໝາຍ ໂດຍສະເພາະປະຊາຊົນ ທີ່ຢູ່ໃນເຂດທ່ອງທ່ຽວໃຫ້ໄດ້ 70% ຂຶ້ນໄປ ແລະສໍາລັບພະນັກງານໂຮງແຮມ, ຮ້ານອາຫານ, ຄົນຂັບຣົຖທ່ອງທ່ຽວ, ພະນັກງານນໍາທ່ຽວ ແລະຜູ້ເຮັດວຽກໃນສະຖານທີ່ທ່ອງທ່ຽວ ແມ່ນຈະຕ້ອງສັກວັກຊິນນັ້ນ ໃຫ້ໄດ້ 95% ຂຶ້ນໄປ.

ອີງຕາມການຖແລງຂ່າວຂອງ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາຣະນະສຸຂ ໃນມື້ວັນທີ 28 ທັນວາ 2021 ນີ້, ມີຜູ້ຕິດເຊື້ອໂຄວິດ-19 ໃໝ່ຕື່ມອີກ 962 ຄົນ ຢູ່ນະຄອນຫຼວງວຽງຈັນ ແລະອີກ 17 ແຂວງຂອງລາວ, ມີຜູ້ເສັຍຊີວິດໃໝ່ 14 ຄົນ. ມາເຖິງປັດຈຸບັນ ມີຜູ້ຕິດເຊື້ອສະສົມ 107,740 ຄົນ, ເສັຍຊີວິດທັ້ງໝົດ 342 ຄົນ. 

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ