ເນື້ອທີ່ຄຸກລາວ 0.7 ແມັດກາເລ້ ຕໍ່ນັກໂທດ 1 ຄົນ

ສະພາບຄຸກຢູ່ປະເທດລາວໂດຍທົ່ວໄປ ຍັງມີຄວາມແອອັດກັນຫຼາຍ - ຫ້ອງຂັງຂະໜາດ 4x8 ແມັດ ຈະມີນັກໂທດນອນຢູ່ ຢ່າງໜ້ອຍ 40-50 ຄົນ.

ເມື່ອສະເລັ່ຍແລ້ວເນື້ອທີ່ຢູ່ໃນຫ້ອງຂັງ ກັບ ຈໍານວນນັກໂທດ ນັ້ນ ປະມານ 0.7 ແມັດກ້າເລ້ ຕໍ່ນັກໂທດຄົນນຶ່ງ ເທົ່ານັ້ນ.

ອາດີດນັກໂທດຄົນນຶ່ງ ໄດ້ໃຫ້ສໍພາດຕໍ່ເອເຊັຽເສຣີ ວ່າ:

“ຄຸກນີ້ 8X4 ແມັດກາເລ້ ຊິຢູ່ປະມານ 50 ຄົນ ບາດນີ້ຄຸກນີ້ ມັນຊິເປັນແບບວ່າ ບໍ່ມີປ່ອງອ້ຽມ ບໍ່ມີປະຕູ ປະຕູຫັນເຂົາຈອດເຫຼັກຕາໜ່າງໃສ່ນ່າ ຖ້າວ່າພໍ່ແມ່ບໍ່ໄດ້ໄປຄໍ້າປະກັນຖືວ່າເຈົ້າຕາຍ. ຫ້ອງຂັງ ຂະໜາດ 8x4 ແມັດ ຢູ່ພາຍໃນຄຸກນັ້ນ ບາງບອນທີ່ຖືວ່າມີສະພາບດີ ຈະມີນັກໂທດນອນຢູ່ປະມານ 40 ຄົນ ແລະ ເຂົາເຈົ້າຈະນອນຮຽງກັນເທົ່ານັ້ນ.”

ອາອີດນັກໂທດອີກຄົນນຶ່ງ ໄດ້ກ່າວຕໍ່ເອເຊັຽເສຣີ ວ່າ:

“ຕອນນ້ອງຍັງຢູ່ປະມານ 5,000 ຄົນ ປະມານ 5,000-6,000 ຄົນ ມີສະລະວັນ ເຊກອງ ຈໍາປາສັກ ມານີ້ ຄະດີເຂົາຕັດສິນແລ້ວ ເຂົາກະສົ່ງມາ ໃນຫ້ອງນີ້ 40 ຄົນ ຊໍ່ານອນໄດ້.”

ນອກຈາກນີ້ ເຈົ້າໜ້າທີ່ຕໍາຫຼວດບາງຄົນທີ່ເຮັດວຽກຢູ່ຄຸກ ນັ້ນ ກໍໄດ້ເງິນນໍານັກໂທດ ຫຼື ຍາດພີ່ນ້ອງຂອງນັກໂທດ.

ນັກໂທດ ຜູ້ທີ່ມີຖານະດີ ກໍມີອາຫານການກິນທີ່ດີ, ແຕ່ ຜູ້ທີ່ບໍ່ມີຖານະດີ ກໍຕ້ອງກິນແຕ່ເຂົ້າອັດຕາທີ່ທາງເຈົ້າໜ້າທີ່ເບີກໃຫ້ເທົ່ານັ້ນ.

ເຈົ້າໜ້າທີ່ທ່ານນຶ່ງ ໃຫ້ສໍພາດຕໍ່ເອເຊັຽເສຣິີ ວ່າ:

“ຕໍາຫຼວດເຈົ້າໜ້າທີ່ເຂົາແຫ່ງໄດ້ເງິນນໍາຜູ້ຖືກຄຸມຂັງຫັ້ນແຫຼວ ມັນເປັນແຕ່ໃດມາດອກສະໄໝໃດ ທຸກມື້ນີ້ແຫ່ງສະບາຍຫາເງິນໃຫ້ເຈົ້າໜ້າທີ່ ກະກິນນໍານັກໂທດ.” 

ຢູ່ແຕ່ລະແຂວງໃນປະເທດລາວ ກໍມີຄຸກ, ແຕ່ສ່ວນຫຼາຍສະພາບຄຸກກໍມີຄວາມແອອັດ ແລະ ມີສະພາບເປື້ອນເປີ້ ອີງຂໍ້ມູນຈາກອາດີດນັກໂທດ.

ປັດຈຸບັນ ຢູ່ປະເທດລາວ ມີຄຸກໃຫຍ່ ຢູ່ 2 ແຫ່ງ ຄື ແຫ່ງທີ 1 ແມ່ນ ຄຸກພາກກາງ ຕານປ່ຽວ ຫຼື ຄຸກບ້ານຕານປ່ຽວ ຕັ້ງຢູ່ ເມຶອງທຸລະຄົມ ແຂວງວຽງຈັນ ສາມາດ ຮອງຮັບຄົນໄດ້ 8,000​-9,000 ຄົນ ແຕ່ ຍັງເຈົ້າໜ້າທີ່ບໍ່ໄດ້ເປີດເຜີຍວ່າ ມີຈໍານວນນັກໂທດຢູ່ໃນຄຸກແຫ່ງດັ່ງກ່າວຈັກຄົນ.

ຄຸກແຫ່ງທີ່ 2 ແມ່ນ ຄຸກບັງລຽງ ຢູ່ເມືອງປະທຸມພອນ ແຂວງ ຈໍາປາສັກ ທີ່ມີນັກໂທດປະມານ 5,000​ ຄົນ ອີງຕາມຂໍ້ມູນຈາກນັກອາດີດນັກໂທດຜູ້ທີ່ເຄີຍຖືກຂັງຢູ່ໃນຄຸກດັ່ງກ່າວ.  

ເຖິງຢ່າງໃດ ກໍຕາມ, ທີ່ຜ່ານມາ ຢູ່ໃນກອງປະຊຸມສະພາແຫ່ງຊາດ ທ່ານເຈົ້າໜ້າທີ່ກະຊວງປ້ອງກັນຄວາມສະຫງົບ ໄດ້ຢຶນຢັນຕໍ່ສື່ມວນຊົນລາວ ວ່າ ເຄີຍມີກໍລະນີ ນັກໂທດເສັຍຊີວິດ 21 ຄົນ ຍ້ອນສະພາບຄຸກທີ່ແອອັດ.

ນອກຈາກນີ້, ນັກໂທດຍັງຕິດພະຍາດວັນນະໂຣກ, ເປັນໄຂ່ເປັນບວມ ຊຶ່ງເປັນອາການຂາດສານອາຫານ ແລະ ຕິດພະຍາດອື່ນໆອີກ.

ຈໍານວນນັກໂທດ ມີຫຼາຍກວ່າ ຈໍານວນຄຸກທີ່ຈະຮອງຮັບໄດ້ ຍ້ອນວ່າ ປະເທດລາວ ຂາດງົບປະມານ ອີງຕາມຂໍ້ມູນຈາກເຈົ້າໜ້າລະດັບສູງກະຊວງປ້ອງກັນຄວາມສະຫງົບ ທີ່ໄດ້ອະພິປາຍຢູ່ກອງປະຊຸມສະພາໃນປີ 2023.

ໃນປີ 2023 ທີ່ຜ່ານມາ, ທາງການລາວ ໄດ້ໃຫ້ອະໄພຍະໂທດນັກໂທດປະມານ 1,800 ຄົນ ໂດຍສະເພາະນັກໂທດທີ່ຖືກຈັດຢູ່ໃນນັກໂທດທີ່ມີການພະພຶດທີ່ດີ ຕາມລັດຖະດໍາລັດຂອງປະທານປະເທດ ສະບັບເລກທີ 219/ປປທລົງວັນທີ 21 ພະຈິກ 2023, ແຕ່ ຢູ່ປະເທດລາວ ຍັງບໍ່ມີນັກໂທດການເມືອງຄົນໃດ ໄດ້ຮັບການອະຍະໂທດ.

ນອກຈາກນີ້ ຍັງມີຄຸກໂພນທັນ ທີ່ກັກຂັງນັກໂທດທີ່ກ່ຽວຂ້ອງກັບຄະດີແພ່ງ ແລະ ສ່ວນຫຼາຍຜູ້ທີ່ຖືກກັກຂັງຢູ່ຄຸກດັ່ງກ່າວ ຈະມີຖານະຄອບຄົວດີ ສ່ວນວ່າ ຄຸກໂພນຕ້ອງ ແມ່ນຄຸກສໍາກັກຂັງຄົນຕ່າງປະເທດ ແຕ່ ກໍມີນັກໂທດລາວບາງຄົນ ກໍຖືກກັກຂັງຢູ່ທີ່ນັ້ນ ອີງຕາມຂໍ້ມູນຈາກອາດີດນັກໂທດຕ່າງຄົນປະເທດຄົນນຶ່ງ ທີິ່ເຄີຍຕິດຄຸກໂພນຕ້ອງ.