ຄົນງານຮຽກຮ້ອງໃຫ້ ປັບປຸງທີ່ພັກ-ສະຫວັດດີການ ຢູ່ເຂດເສດຖະກິດພິເສດບໍ່ເຕັນ

ຄົນງານລາວຈໍານວນນຶ່ງ ໄດ້ຮຽກຮ້ອງ ໃຫ້ຄະນະຜູ້ບໍລິຫານ ເຂດເສດຖະກິດພິເສດ ບໍ່ເຕັນແດນງາມ ແຂວງຫລວງນ້ໍາທາ ປັບປຸງບ່ອນພັກຄົນງານ ໃຫ້ໄດ້ມາດຕະຖານ, ຖືກຫລັກອະນາໄມ ເນື່ອງຈາກວ່າ ບ່ອນພັກ ຂອງກຸ່ມຄົນງານກໍ່ສ້າງ ຫລື ແຄ້ມກໍ່ສ້າງ ທີ່ຄົນງານລາວ ເຂົ້າໄປເຮັດວຽກກໍ່ສ້າງ ກັບ ບໍລິສັດ ຜູ້ຮັບເໝົາ ຊາວຈີນ ນັ້ນ ມີສະພາບແອອັດ ຮ້ອນເອົ້າ, ບໍ່ມີຫ້ອງນ້ໍາ, ສະພາບແວດລ້ອມບໍ່ດີ ແລະ ບໍ່ມີສິ່ງອໍານວຍຄວາມສະດວກ ສະບາຍ ພື້ນຖານຫຍັງເລີຍ ເຊິ່ງເຮັດໃຫ້ ສະຫວັດດີພາບ ການເປັນຢູ່ຂອງກຸ່ມຄົນງານກໍ່ສ້າງ ມີຄວາມຫຍຸ້ງຍາກ-ລໍາບາກ ມີຄວາມສ່ຽງສູງ ທີ່ຈະເກີດເປັນພະຍາດ ຫລື ເກີດອຸບັດຕິເຫດ ຮຸນແຮງ.

ດັ່ງ ຄົນງານລາວ ທ່ານນຶ່ງ ກ່າວຕໍ່ ວິທຍຸ ເອເຊັຍເສຣີ ໃນວັນທີ 14 ສິງຫາ ນີ້ວ່າ:

“ມັນກະແຕ່ເປັນບາງບ່ອນໃນນັ້ນ ຂ້ອຍຫັ້ນນອນຢູ່ ເປັນແຄ້ມຄົນງານ ແບບເປັນຄື ຕູ້ຄອນແທນເນີ້ ແບບເປັນສອງຊັ້ນ ກາງເວັນນີ້ ມັນກະຮ້ອນ ມັນເອົ້າແລ້ວ ເປັນຫ້ອງນ້ໍາ ພວກທໍາມະຊາດເລີຍ. ບາງບ່ອນ ມັນກະມີແອ ມີຫຍັງນ່າ ບາງບ່ອນ ເຮົາກະຖືກບ່ອນບໍ່ດີ” 

   ຄົນງານລາວ ອີກທ່ານນຶ່ງ ທີ່ເຮັດວຽກ ໃນເຂດເສດຖະກິດພິເສດ ບໍ່ເຕັນແດນງາມ ແຂວງຫລວງນ້ໍາທາ ກ່າວວ່າ ຖ້າເຂົ້າໄປເຮັດວຽກຢູ່ ສາງກັບມ້ຽນສິນຄ້າ ນໍາເຂົ້າ-ສົ່ງອອກ ຂອງບໍລິສັດຈີນ ເປັນໄລຍະ ປະມານ 3 ປີແລ້ວ ປັດຈຸບັນ ໄດ້ຮັບສະເພາະ ເງິນເດືອນ ເທົ່ານັ້ນ ບໍ່ມີສະຫວັດດີການສັງຄົມ ແຕ່ຢ່າງໃດ. 

   ສະນັ້ນແລ້ວ ເພື່ອຄວາມສະເໝີພາບ ກະຮຽກຮ້ອງໃຫ້ ທາງການລາວ ແລະພາກສ່ວນທີ່ກ່ຽວຂ້ອງ ສົ່ງເສີມໃຫ້ບໍລິສັດຈີນ ຫລື ບໍລິສັດຜູ້ລົງທຶນ ໃນເຂດດັ່ງກ່າວ ເພີ່ມສະຫວັດດີການສັງຄົມ ໃຫ້ກັບກຸ່ມຄົນງານ ເພື່ອຄຸນນະພາບຊີວິດ ທີ່ດີຂຶ້ນ ໂດຍສະເພາະຄົນງານ ເກີດມີອາການເຈັບ-ເປັນ ຂຶ້ນມາ ຈະໄດ້ເກີດຄວາມສະບາຍໃຈ ບໍ່ມີຄວາມກັງວົນວ່າ ຈະຕ້ອງຈ່າຍຄ່າປິ່ນປົວ ດ້ວຍຕົວເອງ.

 ດັ່ງ ຄົນງານລາວ ທ່ານນີ້ ກ່າວຕໍ່ ວິທຍຸ ເອເຊັຍເສຣີ ໃນມື້ດຽວກັນນີ້ວ່າ:

“ຂະເຈົ້າມີແຕ່ໃຫ້ເປັນເງິນເດືອນກະແລ້ວ ຊີ້ນ່າ ບໍ່ມີພວກສະຫວັດດີການ ຄັນວ່າທາງພາກລັດ ທາງຜູ້ໃຫຍ່ ເພິ່ນແກ້ໄຂໄດ້ ປະກັນສັງຄົມ ປະກັນສຸກຂະພາບ ເວລາເຂົ້າໂຮງໝໍຫຍັງ ເຮົາໃຊ້ບັດປະກັນສັງຄົມ” 

   ທາງດ້ານເຈົ້າໜ້າທີ່ ຜະແນກແຮງງານ ແລະ ສະຫວັດດີການສັງຄົມ ແຂວງຫລວງນ້ໍາທາ ກ່າວວ່າ ຄົນງານທີ່ເຮັດວຽກ ຢູ່ໃນເຂດເສດຖະກິດພິເສດ ບໍ່ເຕັນແດນງາມ ສ່ວນຫລາຍ ຈະເປັນວຽກບໍລິການ ເຊັ່ນ ພະນັກງານນວດ, ພະນັກງານ ຮ້ານອາຫານ - ຮ້ານກິນດື່ມ-ຄາລາໂອເກະ, ພະນັກງານໂຮງແຮມ, ພະນັກງານຂາຍສິນຄ້າ ນໍາເຂົ້າຈາກຕ່າງປະເທດ ແລະ ອີກຈໍານວນນຶ່ງ ກະແມ່ນຄົນງານກໍ່ສ້າງ ຕຶກ-ອາຄານຕ່າງໆ ເພາະຢູ່ໃນໄລຍະ ການພັດທະນາເຂດ ດັ່ງກ່າວ. 

   ສ່ວນບັນຫາ ທີ່ພົບເຫັນ ແລະ ຈະຕ້ອງໄດ້ປັບປຸງ ກະແມ່ນເລື້ອງ ບ່ອນພັກເຊົາ ທີ່ຈະຕ້ອງໄດ້ປັບປຸງ ໃຫ້ມີມາດຕະຖານ ເຮັດໃຫ້ເປັນຕາຢູ່ ສະອາດ ບໍ່ສ່ຽງທີ່ຈະເກີດພະຍາດ ລວມເຖິງການເພີ່ມ ສະຫັວດດີການສັງຄົມ ໃຫ້ກັບກຸ່ມຄົນງານ ໃນເຂດດັ່ງກ່າວ ເພື່ອຄວາມສະເມີພາບ ເນື່ອງຈາກໄລຍະຜ່ານມາ ຍັງປະກົດມີ ຄົນງານຈໍານວນນຶ່ງ ຍັງຖືກເອົາປຽບ ເລື້ອງເງິນເດືອນ, ເລື້ອງສະຫວັດດີການຕ່າງໆ ຈາກບໍລິສັດຈີນ. ດັ່ງ ເຈົ້າໜ້າທີ່ ທ່ານນີ້ ກ່າວຕໍ່ວິທຍຸ ເອເຊັຍເສຣີ ໃນມື້ດຽວກັນນີ້ວ່າ:

“(ຄົນງານລາວ) ຫລາຍໆຢູ່ ວຽກສ່ວນຫລາຍກະແມ່ນ ການບໍລິການ ອີ່ຫຍັງນີ້ແຫລະ ພວກກໍ່ສ້າງກະມີຈໍານວນນຶ່ງ ພວກທີ່ໄປຮັບເໝົາ ເປັນກໍາມະກອນ ແມ່ນຫຍັງບໍ່ ຫັ້ນນ່າເນາະ. ບາງເທື່ອ ກະພວກ ໂຊເຟີລົດ ຂະເຈົ້າ ເຂົາລໍຖ້າເອົາເຄື່ອງເຂົ້າຈີນ ແມ່ນຫຍັງນີ້ຫັ້ນນ່າ. ຫລັກໆ ກະແມ່ນກໍາມະກອນ ພວກໄປຮັບເໝົານໍາຄົນຈີນ”

   ຂະນະທີ່ ເຈົ້າໜ້າທີ່ຜະແນກພາຍໃນ ແຂວງຫລວງນ້ໍາທາ ທ່ານນຶ່ງ ກໍຍອມຮັບວ່າ ເຂດດັ່ງກ່າວ ກໍຍັງມີຂໍ້ຫຍຸ້ງຍາກຫລາຍດ້ານ ທີ່ຈະຕ້ອງໄດ້ປັບປຸງ-ແກ້ໄຂແທ້. ດັ່ງ ທ່ານກ່າວຕໍ່ວິທຍຸ ເອເຊັຍເສຣີ ໃນມື້ດຽວກັນນີ້ວ່າ:

“ເພິ່ນກະເວົ້າຫລາຍຫົວຂໍ້ ກ່ຽວກັບອັນ ການຄຸ້ມຄອງເຂດຫັ້ນນ່າ ເພາະວ່າດຽວນີ້ ຢູ່ເຂດຫັ້ນ ກໍາລັງມີການກໍ່ສ້າງຢູ່ ຫັ້ນນ່າ ແລ້ວເພິ່ນເຫັນຕົວຈິງຫັ້ນແຫລະ” 

   ເຂດເສດຖະກິດພິເສດ ບໍ່ເຕັນແດນງາມ ແຂວງຫລວງນ້ໍາທາ ຂອງກຸ່ມນັກລົງທຶນຈີນ ປັດຈຸບັນ ມີບໍລິສັດທັງຈາກພາຍໃນ ແລະ ຕ່າງປະເທດ ເຂົ້າມາລົງທຶນແລ້ວ ເກືອບ 300 ບໍລິສັດ ມີຄົນງານຢູ່ໃນເຂດດັ່ງກ່າວ ປະມານ 2,300 ຄົນ. ໃນນັ້ນ ເປັນຄົນງານລາວ ປະມານ 1,700 ປາຍຄົນ ສ່ວນທີ່ເຫລືອ ແມ່ນຄົນງານຈາກຈີນ, ໄທ, ພະມ້າ, ວຽດນາມ, ກໍາພູຊາ ແລະ ມາເລເຊັຍ. 

    ເມື່ອປີ 2023 ທີ່ຜ່ານມາ ກະຊວງແຮງງານ ແລະ ສະຫວັດດີການສັງຄົມ ພະຍາຍາມຈະເລັ່ງແກ້ໄຂ ບັນຫາຄົນງານ ທັງພາຍໃນ ແລະ ຕ່າງປະເທດ ທີ່ເຮັດວຽກຢູ່ ພາຍໃນເຂດດັ່ງກ່າວ ເພື່ອຂຶ້ນທະບຽນ ແລະ ອອກບັດອະນຸຍາດເຮັດວຽກ ໃຫ້ຖືກຕ້ອງ ຕາມລະບຽບ ກົດໝາຍ ຂອງລາວ ເພື່ອປົກປ້ອງ ສິດ-ຜົນປະໂຍດ ແລະ ສະກັດກັ້ນເຫດອາດຊະຍາກັມ ທີ່ອາດເກີດຂຶ້ນ. 

   ໄລຍະຜ່ານມາ ເຂດເສດຖະກິດພິເສດ ບໍ່ເຕັນແດນງາມ ແຂວງຫລວງນ້ໍາທາ ເຄີຍເກີດເຫດການ ກຸ່ມຄົນງານຈີນຕີກັນ, ຍິງກັນ ຫລື ກຸ່ມຄົນງານ ປະທ້ວງນາຍຈ້າງ ເພາະຖືກເອົາປຽບບາງດ້ານ.

   ນອກຈາກນີ້ ບໍລິສັດຈີນ ທີ່ເຂົ້າມາລົງທຶນ ໃນເຂດດັ່ງກ່າວ ກະບໍ່ມີການເປີດເຜີຍ ຢ່າງຈະແຈ້ງວ່າ ເຂົ້າມາດໍາເນີນ ທຸລະກິດຫຍັງແດ່, ຈ່າຍພາສີ-ອາກອນ ຖືກຕ້ອງ ຫລື ຄວາມໂປ່ງໃສ ຕໍ່ການດໍາເນີນ ທຸລະກິດ ເຊິ່ງສົ່ງຜົນ ໃຫ້ປະເທດລາວ ຂາດຄວາມໜ້າເຊື່ອຖື ໃນການລົງທຶນ ແລະ ຕົກເປັນປະເທດ ທີ່ມີການຟອກເງິນ ແລະ ສະໜອງທຶນ ໃຫ້ແກ່ການກໍ່ການຮ້າຍ ຂອງອົງການຕ້ານ ການຟອກເງິນສາກົນ ໃນກຸ່ມປະເທດ ອາຊີ-ແຟຊີຟິກ ຫລື  Asia Pacific on Anti-Money Laundering (APG) ເພາະຫົວໜ່ວຍ ທຸລະກິດ ສ່ວນຫລາຍ ບໍ່ມີຄວາມໂປ່ງໃສ, ບໍ່ມີການກວດສອບ ແຫລ່ງທີ່ມາ ຂອງເງິນ ໄດ້ຢ່າງຈະແຈ້ງ.