ຄົນງານລາວຢູ່ໄທຍ ຍາກທີ່ຈະ ໄດ້ປົວໂຄວິດ-19

ພອນ ພູມມີທອນ
2021-07-24
Share
ຄົນງານລາວຢູ່ໄທຍ ຍາກທີ່ຈະ ໄດ້ປົວໂຄວິດ-19 ຄົນງານລາວ ທີ່ຕິດເຊື້ອໂຄວິດ-19 ໃນເຂດຊຸມຊົນ ບາງກອກນ້ອຍ ແຂວງບາງກອກ ປະເທດໄທຍ ທີ່ຍັງບໍ່ໄດ້ຮັບການປິ່ນປົວ.
RFA

ໃນໄລຍະ ທີ່ມີການແຜ່ຣະບາດ ຂອງໂຄວິດ-19 ທຸກຄົນ ໄດ້ຮັບຜົລກະທົບຄືກັນ ບໍ່ວ່າ ຄົນໄທຍ ຫຼື ຄົນຕ່າງຊາດ ແຕ່ກຸ່ມຄົນທີ່ໄດ້ ຮັບຜົລກະທົບ ຫຼາຍກວ່າໝູ່ ແມ່ນຄົນງານຕ່າງຊາດ ທີ່ເຂົ້າມາເຮັດວຽກ ໃນປະເທດໄທຍ ເປັນຕົ້ນ ຄົນລາວ, ພະມ້າ ແລະ ກັມພູຊາ ຍ້ອນບໍ່ມີວຽກເຮັດ ແລະ ບໍ່ສາມາດເຂົ້າເຖິງ ບໍຣິການ ສາທາຣະນະສຸຂ ໄດ້ທັນເວລາ.

ທີ່ຜ່ານມາ ຄົນງານຕ່າງຊາດ ທີ່ມີ ເອກສານຄົບຖ້ວນ ເປັນຕົ້ນ ພາສພອດ ແລະ ໃບອະນຸຍາດເຮັດວຽກ ທີ່ຖືກຕ້ອງ ຕາມກົດໝາຍ ສາມາດເຂົ້າສູ່ ລະບົບປະກັນສັງຄົມ ແລະ ລະບົບປະກັນ ສຸຂພາບ ຂອງໄທຍໄດ້, ແລະ ຄົນກຸ່ມນີ້ສາມາດເຂົ້າເຖິງ ການຮັກສາຕາມ ໂຮງໝໍ ໄດ້ຕາມປົກຕິ. ແຕ່ໃນໄລຍະ ທີ່ສະຖານະການໂຄວິດ-19 ຣະບາດ, ອາດມີ ຂໍ້ຈຳກັດ ໃນການເຂົ້າຮັບ ບໍຣິການ ເປັນຕົ້ນ ບໍ່ສາມາດເຂົ້າເຖິງ ຂໍ້ມູນຂ່າວສານ ແລະ ບໍ່ສາມາດຕິດຕໍ່ ໜ່ວຍງານຣັຖ ໃນໄລຍະ ທີ່ມີມາຕການ ລ໊ອກດາວໄດ້, ດັ່ງຕົວແທນ ນັກເຄື່ອນໄຫວ ດ້ານສິດທິແຮງງານ ຈາກມູລນິທິ ເຄືອຂ່າຍ ສົ່ງເສີມຄຸນພາບ ຊີວິດແຮງງານ (Labor Protection Network: LPN) ກ່າວຕໍ່ ວິທຍຸເອເຊັຍຽເສຣີ ໃນວັນທີ 19 ເດືອນ ກໍຣະກະດາ ນີ້ວ່າ:

“ຢ່າງໃນໄລຍະ ມາຕການ ລ໊ອກດາວ ກະເກີດບັນຫາ ກະຄື ການເຂົ້າເຖິງ ການບໍຣິການ ຂອງໜ່ວຍງານຣາຊການ ເນາະວ່າໄລຍະ ປາຍປີ ທີ່ມີໂຄວິດ ຣະບາດ ກໍຈະມີ ສາຍທີ່ເຂົ້າມາ ໃນເຣື່ອງຄົນຮັບໃຊ້ ຄົນຮັບໃຊ້ ອີຫຍັງຕ່າງໆ ຕິດໂຄວິດ ກັບນາຍຈ້າງເນາະ ຕິດແລ້ວ ກໍຊິຈະໄປກວດໝັອງໃດ? ບໍ່ມີບັດ ຊິໄປ ປິ່ນປົວໄດ້ບໍ່? ອັນນີ້ ຊິເປັນບັນຫາທົ່ວໄປ ທີ່ເຂົ້າມາ.”

ທ່ານກ່າວຕື່ມວ່າ: ເຖິງແມ່ນວ່າ ຄົນງານບາງສ່ວນ ຈະສາມາດເຂົ້າເຖິງ ລະບົບ ສຸຂພາບໄດ້ ແຕ່ຂະເຈົ້າ ກໍບໍ່ໄດ້ຮັບ ການບໍຣິການ ຢ່າງຕໍ່ເນື່ອງ ເປັນຕົ້ນ ເມື່ອເປັນຄົນງານຕ່າງຊາດ ກໍຕ້ອງລໍຖ້າ ຄົນໄທຍ ໄດ້ຮັບສິດທິ ການຮັກສາກ່ອນ ແລະ ເມື່ອຂະເຈົ້າໄດ້ຮັບ ການກວດພົບວ່າ ຕິດເຊື້ອໂຄວິດ-19 ກໍບໍ່ມີໂຮງໝໍ ຫຼື ຕຽງສນາມ ທີ່ສາມາດຮອງຮັບ ໄດ້ທັນເວລາ. ດັ່ງນັ້ນ ຂະເຈົ້າ ຈຶ່ງຕ້ອງກັບ ມາເບິ່ງແຍງຕົວເອງ ທີ່ບ່ອນພັກອາສັຍ ເຊິ່ງອາດຈະແຜ່ເຊື້ອ ໃຫ້ກັບຄອບຄົວ ທີ່ໃກ້ຊິດ ຕໍ່ໄປໄດ້.

ສ່ວນຄົນງານຕ່າງຊາດ ທີ່ເຂົ້າເມືອງ ບໍ່ຖືກກົດໝາຍ ຢູ່ກັບນາຍຈ້າງຊື່ໆ ໂດຍບໍ່ມີ ປະກັນສັງຄົມ ຫຼື ບໍ່ມີ ໃບປະກັນເຮັດວຽກ ຕາມກົດໝາຍ, ຂະເຈົ້າ ກໍບໍ່ສາມາດເຂົ້າເຖິງ ລະບົບບໍຣິການ ດ້ານສຸຂພາບ ໃດໆໄດ້, ດັ່ງຕົວແທນ ມູລນິທິ ກ່າວໃນມື້ດຽວກັນ ນີ້ວ່າ:

“ສິ່ງທີ່ພົບເຫັນ ກໍຄື ຊິເປັນເຣື່ອງ ຂອງການເຂົ້າເຖິງ ການບໍຣິການ ດ້ານສຸຂພາບ ຂອງປະເທດໄທຍ ວ່າຕົວເອງຈະຂຶ້ນຢູ່ກັບ ສະຖານະຫຍັງ ມີ ສາມີ ເປັນຄົນໄທຍແນ່ ເຈົ້າຂອງບໍ່ໄດ້ຂຶ້ນ ປະກັນສັງຄົມແນ່ ເຈົ້າຂອງ ຢູ່ກັບນາຍຈ້າງແນ່ ຈັ່ງຊີ້ເນາະ. ອັນນີ້ກະຊິຫຼາຍ ຫຼາຍໆ ໃນຊ່ວງປີນີ້.”

ທາງດ້ານຕົວແທນ ກຸ່ມນັກເຄື່ອນໄຫວ ດ້ານສິດທິແຮງງານ ອີກທ່ານນຶ່ງ ກໍກ່າວວ່າ: ໃນໄລຍະ ການແຜ່ຣະບາດ ຂອງໂຄວິດ-19 ນີ້, ທາງການໄທຍ ກໍຄວນເປີດໃຫ້ ຄົນທຸກກຸ່ມ ສາມາດເຂົ້າເຖິງ ການບໍຣິການສຸຂພາບ ໄດ້ຢ່າງທົ່ວເຖິງ ຕາມຫຼັກສິດທິມນຸດຂັ້ນພື້ນຖານ. ບໍ່ຄວນແບ່ງແຍກວ່າ ຜູ້ໃດເປັນຄົນໄທຍ ຫຼື ຄົນຕ່າງຊາດ ແລະ ບໍ່ຄວນແບ່ງແຍກວ່າ ຜູ້ໃດເປັນຄົນງານຕ່າງຊາດ ທີ່ຖືກກົດໝາຍ ຫຼື ບໍ່ຖືກກົດໝາຍ, ດັ່ງທ່ານໄດ້ກ່າວໃນມື້ດຽວກັນ ນີ້ວ່າ:

“ຣັຖບານໄທຍ ຕ້ອງເບິ່ງແຍງ ທຸກຄົນທີ່ຢູ່ໃນ ປະເທດໄທຍ ບໍ່ວ່າເພິ່ນຊິມີ ສະຖານະ ທາງກົດໝາຍຖືກ ຫຼື ຜິດ ເຂົ້າເມືອງຜິດ ກົດໝາຍ ອີ່ຫຍັງຕ່າງໆ ແຕ່ຖ້າຕິດໂຄວິດນີ້ ຈະຕ້ອງເບິ່ງແຍງ ໃຫ້ຄືກັນກັບຄົນໄທຍ ບໍ່ຕ້ອງມີຄ່າໃຊ້ຈ່າຍຫຍັງຫຼາຍ. ອັນນີ້ເປັນ ແນວນະໂຍບາຍ ທີ່ເຮົາຊິຜັກດັນ ໃຫ້ຣັຖບານໄທຍ ເບິ່ງແຍງ ໃຫ້ຄືກັບ ຄົນໄທຍທຸກຢ່າງ. ອັນນີ້ກະຄືແນວທາງ ຂອງພວກເຮົາ.”

ນັບແຕ່ ທ້າຍປີກາຍ ມາຮອດປີນີ້, ກໍມີຄົນງານລາວ ໃນໄທຍ ຈຳນວນຫຼາຍ ຈຳເປັນຕ້ອງກັບເມືອ ປະເທດລາວ ເນື່ອງຈາກວ່າບໍ່ ສາມາດເຂົ້າເຖິງ ການບໍຣິການດ້ານສາທາຣະນະສຸຂ, ການປິ່ນປົວໂຄວິດ-19 ແລະ ສັກວັກຊິນປ້ອງກັນໂຄວິດ-19 ໄດ້ທັນເວລາ. ອີກຢ່າງນຶ່ງ ການບໍຣິການ ດ້ານສຸຂພາບ ຂອງຄົນງານຕ່າງຊາດ ໃນໄທຍ ຖືວ່າ ເປັນໄປຢ່າງຍາກລຳບາກ ຍ້ອນຕ້ອງຕຣຽມ ເອກສານ ຫຍຸ້ງຍາກຫຼາຍຢ່າງ, ດັ່ງຄົນງານລາວ ໃນໄທຍ ກ່າວ ໃນມື້ດຽວກັນ ນີ້ວ່າ:

“ມັນກະຫຍຸ້ງຍາກເນາະ ມັນກະຫຍຸ້ງຍາກ. ກະບາງຄົນ ເຂົາບໍ່ມີພາສປອດ ຫຼື ບໍ່ມີເອກສານ ຖືກຕ້ອງ ຕາມກົດໝາຍເນາະ ບໍ່ມີບັດ ແຮງງານອີ່ຫຍັງຕ່າງໆ ຢູ່ໄປມື້ໆວັນໆຫັ້ນນ່າ. ຢ່າງເຊັ່ນຕົວຢ່າງ ຂ້າພະເຈົ້າເອງເນາະ ຂ້າພະເຈົ້າເອງກໍບໍ່ມີອີ່ຫຍັງ ໜັງສືຄົບຖ້ວນ ອີ່ຫຍັງຈັ່ງຊີ້ນ່າ. ກະອາສັຍຢູ່ໄປນຳ ຄົນຮູ້ຈັກ ຫຼືວ່າ ໝູ່ເພື່ອນທີ່ອາສັຍ ຢູ່ກັບເຂົາດົນໆແລ້ວ ຫັ້ນນ່າ ເຮົາກະມາ ຢູ່ນຳເຂົາ.”

ເຊັ່ນດຽວກັບ ຄົນງານລາວ ອີກຄົນນຶ່ງ ກໍເວົ້າວ່າ ກ່ອນໜ້ານີ້ ບໍ່ເຄີຍໄດ້ຮັບການຊ່ອຍເຫລືອ ຫລື ການບໍຣິການສຸຂພາບ ກ່ຽວກັບ ໂຄວິດ-19 ຈາກທາງໜ່ວຍງານຣັຖໃນໄທຍເລີຍ ແລະ ຫາກໍໄດ້ຮັບ ການກວດໂຄວິດ-19 ໃນມື້ທີ່ມາ ທີ່ມາເຮັດ ບັດແຮງງານ ໂດຍບ່ອນທີ່ເພິ່ນ ອາສັຍຢູ່ ກະມີຄົນງານລາວ ນຳກັນຕິດ ໂຄວິດ-19 ຫຼາຍຄົນ ແຕ່ກໍບໍ່ສາມາດ ເຂົ້າເຖິງ ການກວດຫາເຊື້ອ ໂຄວິດ-19 ແລະ ປີ່ນປົວໄດ້ ທັນເວລາ ຍ້ອນຂະເຈົ້າ ບໍ່ມີບັດຕາມກົດໝາຍ.

“ບໍ່, ບໍ່ໄດ້ຮັບຫຍັງເລີຍ ມີແຕ່ກວດ ໂຄວິດ ທັມດາ ນີ້ແຫລະ. ແບບວ່າ ກວດຕອນໄປເຮັດບັດຫັ້ນນ່າ. ຍາກໆ (ຕິດໂຄວິດ-19) ແຖວນີ້ ກະເປັນຫຼາຍ ຄືກັນໄດ໋ ດຽວນີ້ນ່າ.”

ນອກຈາກ ຄວາມຕ້ອງການ ກັບຄືນປະເທດລາວ ເພື່ອທີ່ຈະສາມາດ ເຂົ້າເຖິງ ການປິ່ນປົວ ແລະ ສັກວັກຊິນປ້ອງກັນ ໂຄວິດ-19 ໄດ້ແລ້ວ ຄົນລາວບາງສ່ວນ ກະຢາກກັບເມືອບ້ານ ຍ້ອນຢູ່ໄທຍເອງ ກໍບໍ່ມີລາຍໄດ້ ບໍ່ມີວຽກເຮັດແລ້ວ ອັນເນື່ອງມາຈາກມາຕການ ປ້ອງກັນ ໂຄວິດ-19 ທີ່ເຂັ້ມງວດ ຂອງຣັຖບານໄທຍ.

ກ່ຽວກັບເຣື່ອງນີ້ ອະທິບໍດີກົມຈັດຫາງານ ກະຊວງແຮງງານຂອງໄທຍ ກ່າວວ່າ: ຄົນງານຕ່າງດ້າວ ທີ່ເຮັດວຽກໃນໄທຍຢ່າງຖືກ ກົດໝາຍ ສາມາດເຂົ້າຮັບ ການກວດຫາໂຄວິດ-19 ແລະ ສັກວັກຊີນປ້ອງກັນ ໂຄວິດ-19 ໄດ້ຕາມສິດປະກັນສັງຄົມ ພາຍໃຕ້ ການເບິ່ງແຍງ ຂອງກະຊວງແຮງງານ. ແຕ່ຖ້າຫາວ່າ ເປັນຄົນງານ ທີ່ເຮັດວຽກ ໃນພາກກະເສຕ, ປະມົງ, ລ້ຽງສັດ ແລະ ເປັນ ແມ່ບ້ານ ກໍສາມາດໃຊ້ ສິດປະກັນ ສຸຂພາບ ພາຍໃຕ້ ການເບິ່ງແຍງ ຂອງກະຊວງສາທາຣະນະສຸຂໄດ້.

ສ່ວນຄົນງານຕ່າງຊາຕ ທີ່ເຂົ້າເມືອງແບບບໍ່ຖືກກົດໝາຍ ໂດຍປົກຕິແລ້ວເພິ່ນຈະບໍ່ມີສິດເຂົ້າຮັບ ການບໍຣິການດ້ານສາທາຣະນະສຸຂ. ແຕ່ເຖິງຢ່າງໃດກໍດີ, ເພື່ອໃຫ້ຄົນກຸ່ມນີ້ ສາມາດເຂົ້າເຖິງ ການບໍຣິການໄດ້ ຣັຖບານໄທຍ ຈຶ່ງພຍາຍາມ ອອກໃບອະນຸຍາດ ເຮັດວຽກ ໃຫ້ຄົນກຸ່ມນີ້ ເພື່ອເຂົ້າສູ່ລະບົບ ປະກັນສັງຄົມ. ຈາກນັ້ນ ກໍເຂົ້າສູ່ ການກວດເຊື້ອ ໂຄວິດ-19, ການປິ່ນປົວ ຜູ້ຕິດໂຄວິດ-19 ແລະ ການສັກວັກຊິນປ້ອງກັນ ໂຄວິດ-19 ໄດ້.

“ຄື ຄົນ ທີ່ບໍ່ມີບັດມື້ນີ້ ເຮົາຈະມີ ການເປີດຂຶ້ນທະບຽນໃໝ່ ຖ້າໄປກວດບ່ອນໃດ ພົບວ່າ ບໍ່ຖືກກົດໝາຍ ເຮົາຈະຈັບຂຶ້ນທະບຽນເລີຍ. ຄົນກຸ່ມນີ້ ເມື່ອຂຶ້ນທະບຽນແລ້ວ ມີໝາຍເລກ ຂອງໃບອະນຸຍາດ ທຳງານ ກະເຂົ້າສູ່ ລະບົບປະກັນສັງຄົມໄດ້. ລວມເຖິງ ກໍຣະນີ ການເຮັດປະກັນ ໂຄວິດ-19 ນຳ.”

ກ່ອນໜ້ານີ້ເຈົ້າໜ້າທີ່ ລະດັບສູງຂອງກະຊວງແຮງງານໄທຍ ໄດ້ອອກມາກ່າວວ່າ: ປະເທດໄທຍ ກຳລັງຂາດແຄນຄົນງານຕ່າງຊາດ ໂດຍສະເພາະ ຄົນງານ ພະມ້າ, ກັມພູຊາ ແລະ ລາວ ໃນໄລຍະ ການແຜ່ຣະບາດ ຂອງໂຄວິດ-19. ຍ້ອນຂະເຈົ້າບາງຄົນໄດ້ກັບ ຄືນປະເທດ ແລະ ຫຼາຍຄົນຍັງບໍ່ກັບຄືນມາໃໝ່ ຫຼື ຍັງກັບເຂົ້າປະເທດໄທຍບໍ່ໄດ້ ເຊິ່ງຫຼາຍ ພາກສ່ວນ ກະໄດ້ມີ ການປຶກສາຫາລືກັນ ເພື່ອທີ່ຈະ ອຳນວຍຄວາມສະດວກ ໃຫ້ກັບຄົນງານຕ່າງຊາດ ເຫຼົ່ານັ້ນ ໃຫ້ສາມາດ ກັບຄືນມາ ເຮັດວຽກ ໃນໄທຍໄດ້. ແຕ່ຄາດວ່າ ຕ້ອງໃຊ້ ເວລາອີກດົນ ຍ້ອນ ທາງຣັຖບານໄທຍ ຍັງມີບັນຫາເຣື່ອງ ການແຜ່ຣະບາດຂອງ ໂຄວິດ-19 ຢູ່.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ