ພົບຜູ້ຕິດໂຄວິດ 56 ຄົນ ເປັນມື້ທີ 2

ຈຳ​ປາ​ທອງ
2021-07-06
Share
ພົບຜູ້ຕິດໂຄວິດ 56 ຄົນ ເປັນມື້ທີ 2 ກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາຣະນະສຸຂ ເຂົ້າຊ່ອຍທິມງານແພດ ແລະ ໝໍ ໃນການວາງແຜນປ້ອງກັນ ແລະ ຄວບຄຸມການຣະບາດ ຂອງເຊື້ອໂຄວິດ-19 ຢູ່ແຂວງວຽງຈັນ.
ສູນຂ່າວສານ ການແພດສຸຂສຶກສາ

ທາງການລາວ ກວດພົບ ຜູ້ຕິດເຊື້ອໂຄວິດ-19 ເພີ່ມຕື່ມອີກ 56 ຄົນ ຄື ຢູ່ແຂວງ ຈໍາປາສັກ 45 ຄົນ ທີ່ເປັນຄົນງານ ມາຈາກໄທຍ, ສວັນນະເຂດ 7 ຄົນ, ນະຄອນຫລວງວຽງຈັນ 3 ຄົນ ແລະ ແຂວງວຽງຈັນ 1 ຄົນ, ເຮັດໃຫ້ລາວ ມີຜູ້ຕິດ ເຊື້ອສະສົມ 2,356 ຄົນ ຈາກຜົລ ຂອງການກວດວິເຄາະ ຫາເຊື້ອ ໃນຈຳ​ນວນ 1,559 ຄົນ ໃນມື້ວັນທີ 5 ກໍຣະກະດາ 2021 ນີ້, ດັ່ງ ດຣ. ສີສະຫວາດ ສຸດທານີລະໄຊ, ຮອງຫົວໜ້າ ກົມຄວບຄຸມ ພະຍາດຕິດຕໍ່ ກະຊວງສາທາຣະນະສຸຂ ຕາງໜ້າ ກອງເລຂາ ຄະນະສະເພາະກິດ ປ້ອງກັນ ໂຄວິດ-19, ກ່າວໃນພິທີ ຖແລງຂ່າວຕໍ່ ສື່ມວນຊົນ ໃນມື້ວັນທີ 6 ກໍຣະກະດາ ນີ້ວ່າ:

“ວັນທີ 5 ກໍຣະກົດ (ກໍ​ຣະ​ກະ​ດາ) 2021 ນີ້ ໄດ້ກວດວິເຄາະທັງໝົດ 1,559 ຄົນ. ຢູ່ໃນນັ້ນ ກວດພົບ ຜູ້ຕິດເຊື້ອໃໝ່ ທັງໝົດແມ່ນ 56 ຄົນ ຈາກນະຄອນຫຼວງວຽງຈັນ 3, ສວັນນະເຂດ 7, ຈໍາປາສັກ 45 ແລ້ວກໍ ແຂວງວຽງຈັນ 1 ຄົນ.”

ທາງການລາວ ໄດ້ເຣີ່ມເປີດໃຫ້ ປະຊາຊົນ ລົງທະບຽນ ຈອງຄິວ ສັກວັກຊິນ ປ້ອງກັນໂຄວິດ-19, ລົງທະບຽນ ໄປກວດຫາ ເຊື້ອໂຄວິດ-19 ຖ້າຫາກຕົນ ມີຄວາມສ່ຽງ ແລະ ສາມາດຣາຍງານ ການເຄື່ອນໄຫວ ຂອງຕົນ ທີ່ໄດ້ໃກ້ ກຸ່ມສ່ຽງ, ຫາກເກີດ ການຕິດເຊື້ອ ແລະ ໃນການກັກຕົວ ຢູ່ເຮືອນ ຫຼື ສະຖານທີ່ ກັກກັນຊົ່ວຄາວ ໃຫ້ແພດ ແລະ ໝໍ ໄດ້ທາງໂທຣະສັບມືຖື ໂດຍການດາວໂຫລດ ‘ລາວສູ້ໆ’ ຫຼື LaoKYC, ດັ່ງ ດຣ. ທະວີສັກ ມະໂນທໍາ, ຫົວໜ້າ ສູນບໍຣິຫານ ຣັຖອີເລັກໂຕຣນິກ ກະຊວງ ເທັກໂນໂລຈີ ແລະ ການສື່ສານ, ກ່າວໃນພິທີ ຖແລງຂ່າວຕໍ່ ສື່ມວນຊົນ ໃນມື້ດຽວກັນ ນີ້ວ່າ:

“ໂປຣແກຣມ ລາວສູ້ໆ ເປັນ ແອັບ​ປ​ລີ​ເຄ​ເຊິ້ນ (application) ທີ່ມີຢູ່ເທິງ ໂທຣະສັບມືຖື ນຶ່ງມາແມ່ນ ກັກໂຕ ຢູ່ບໍຣິເວນ ໃດນຶ່ງ ສາມາດ ຣາຍງານ ອາການ ຂອງໂຕເອງ. ອັນທີ 2 ເປັນລະບົບ ຕິດຕາມ ໃນບໍຣິເວນນັ້ນ ມີຜູ້ທີ່ມີຄວາມສ່ຽງ ໃນການຕິດເຊື້ອບໍ໋ 3 ແມ່ນລະບຸ ລຳ​ດັ​ບ​ເວ​ລາ (timeline) ແຕ່ລະມື້ ມື້ໃດ ທ່ານໄປໃສ ແລະອັນທີ 4 ກໍຄື ການຂຶ້ນທະບຽນ ຂໍສັກວັກຊິນ ລ່ວງໜ້າ. ລະອີກໂຕນຶ່ງ ລະແມ່ນລະບົບ ສາມາດຂຶ້ນທະບຽນ ໄປກວດຫາຊື້ໄດ້.”

ເຣື່ອງທີ່ວ່ານີ້ ເຈົ້າໜ້າທີ່ ກະຊວງສາທາຣະນະສຸຂ ທ່ານນຶ່ງ ຜູ້ຂໍສງວນຊື່ ແລະ ຕໍາແໜ່ງ ເວົ້າຕໍ່ ວິທຍຸເອເຊັຍເສຣີ ໃນມື້ວັນທີ 6 ກໍຣະກະດາ ນີ້ວ່າ ສໍາລັບແອັບ ‘ລາວສູ້ໆ’ ກະຊວງສາທາ ຣະນະສຸຂ ໄດ້ເປີດ ທົດລອງໃຊ້ ໃນມື້ວານນີ້, ທາງແພດ ແລະ ໝໍ ຍັງບໍ່ຮູ້ຣາຍລະອຽດ ຄັກແນ່ ເພາະຫາກໍເຣີ່ມ ທໍາຄວາມເຂົ້າໃຈ ແລະ ຄິດວ່າ ພາກສ່ວນ ທີ່ກ່ຽວຂ້ອງ ຕ້ອງໄດ້ເຜີຍແຜ່ ເຣື່ອງການໃຊ້ແອັບນັ້ນ ໃຫ້ປະຊາຊົນຮູ້ ແລະ ຈະເຮັດໃຫ້ ມີຄວາມສະດວກຫຼາຍຢ່າງ ທັງສໍາລັບ ປະຊາຊົນ ແລະ ເຈົ້າໜ້າທີ່,  ດັ່ງທີ່ ທ່ານກ່າວວ່າ:

“ແພດເຮົາ ກໍຍັງ ບໍ່ເຂົ້າໃຈເທື່ອ ເພິ່ນເປີດ ຕອນແລງວານນີ້. ເພິ່ນເປີດ ກໍຄືວ່າ ໃຊ້ໄດ້ເລີຍ ດາວໂຫລດເລີຍ ເພິ່ນຈະເຮັດ ວິທີທາງ ເພື່ອໃຫ້ໄດ້ງ່າຍຂຶ້ນ ຫັ້ນນ່າ ເພື່ອປ້ອງກັນຫຍັງໄດ້ ທີ່ເພິ່ນເວົ້າຫັ້ນ. ເພິ່ນຕ້ອງລວມເຜີຍແຜ່ ໃຫ້ພະນັກງານແພດ ທຸກຄົນ ຮູ້ວ່າ ເຮັດແບບນັ້ນແບບນີ້ ພວກເຮົາ ຈັ່ງສິແນະນໍາ ທາງປະຊາຊົນ ທັງຫຼາຍເນາະ ທີ່ວ່າໃຊ້ ບໍຣິການ ຫັ້ນນ່າ.”

ກ່ຽວກັບເຣື່ອງນີ້ ປະຊາຊົນ ຢູ່ນະຄອນຫຼວງວຽງຈັນ ທ່ານນຶ່ງ ເວົ້າວ່າ ຍັງບໍ່ຮູ້ ເຣື່ອງແອັບ "ລາວສູ້ໆ" ນີ້, ຖ້າຫາກ ທາງການເພິ່ນເປີດ ດາວໂຫລດແລ້ວ ຕົນກໍຄົງຈະໃຊ້ ບໍ່ເປັນ, ຕ້ອງໄດ້ອາສັຍ ລູກຫລານ ເຮັດໃຫ້ ໃນການລົງທະບຽນ ໄປສັກວັກຊິນປ້ອງກັນ ໂຄວິດ-19, ແຕ່ກໍເຫັນດີ ນໍາເພິ່ນ ເພາະຈະບໍ່ໄດ້ໄປ ແອອັດ ລໍຖ້າ ສັກວັກຊິນນັ້ນ:

“ຍັງບໍ່ຮູ້ ເດ໋ນີ໋. ຄັນວ່າໂຕນີ້ ຍັງເຮັດ ບໍ່ເປັນເທື່ອ ກະລູກຫຼານ ເຮັດໃຫ້. ໂອ໊ຍ ໂຕນີ້ຫັ້ນ ດີຫຼາຍດີ ລະເວີ່ຍ ຈຶ່ງສິບໍ່ແອອັດ ມັນຈຶ່ງສິ ບໍ່ອິຫຍັງຫັ້ນແຫລະ.”

ແລະຢູ່ແຂວງສວັນນະເຂດ ປະຊາຊົນຜູ້ນຶ່ງ ກໍເວົ້າວ່າ ຍັງບໍ່ຮູ້ ເຣື່ອງແອັບ ‘ລາວສູ້ໆ’, ຕ້ອງໄດ້ໄປ ສຶກສາກ່ອນ, ຖ້າຢູ່ ແຂວງສວັນນະເຂດ ໃຊ້ແອັບນີ້ໄດ້ ກໍຈະເປັນ ເຣື່ອງດີ ສໍາລັບທຸກຄົນ ໃນການລົງທະບຽນ ສັກວັກຊິນປ້ອງກັນ ໂຄວິດ-19 ແລະ ການໄປສັກວັກຊິນ ກໍຈະສະດວກຂຶ້ນ ເພາະຈະບໍ່ໄດ້ໄປ ແອອັດ ຄືທີ່ຜ່ານມາ, ດັ່ງທີ່ທ່ານກ່າວວ່າ:

“ຖ້າມີແອັບອັນນີ້ ມັນກະສະດວກ ລະກະ ເຮັດໃຫ້ຜູ້ທີ່ໄປໃຊ້ ບໍຣິການ ໃນການສັກຢານີ້ ກະງ່າຍເນາະ. ບໍ່ຈໍາເປັນ ທີ່ຈະໄປ ເປັນກຸ່ມເປັນກ້ອນ ຖ້າເພື່ອສິຈະໄປ ລົງທະບຽນ ຫັ້ນນ່າ.” 

ເຖິງແມ່ນວ່າ ເຊື້ອໂຄວິດ-19 ຍັງຣະບາດຫຼາຍ ຢູ່ລາວ ແຕ່ທາງການລາວ ກໍເຣີ່ມໃຫ້ ມີການບໍຣິການ ຣົດຂົນສົ່ງໂດຍສານ ສາຍໃຕ້ ມາຕັ້ງແຕ່ ມື້ວັນທີ 5 ກໍຣະກະດາ ແຕ່ຍັງບໍ່ທັນ ມີຄົນໄປໃຊ້ ບໍຣິການຫລາຍ ເພາະຍັງບໍ່ທັນ ໄດ້ສັກວັກຊິນ ປ້ອງກັນໂຄວິດ-19 ຄົບ 2 ເຂັມ ແຕ່ກໍຖືວ່າ ດີກວ່າບໍ່ເປີດ ດັ່ງເຈົ້າຂອງ ຣົດຂົນສົ່ງໂດຍສານ ສາຍໃຕ້ ຜູ້ນຶ່ງເວົ້າວ່າ:

“ມີແຕ່ມັນໜ້ອຍ ລໍໄປຈັ່ງຊັ້ນລະ ມື້ນຶ່ງ ຊົ່ວວ່າສິໄດ້ ອອກຄັນນຶ່ງ ມັນບໍ່ມີໃຜ ຈັກຄົບ 2 ເຂັມເດ໋. ແຕ່ເຮົາ ກໍບໍ່ກ້າ ເອົາໄປແຫລະ 2 ເຂັມ ເຮົາກະຈັ່ງເອົາໄປ. ໂອຍ… ຄັນສິເວົ້າແລ້ວ ມັນກະຍາກໆໃດ ຫັ້ນແຫລະ ແຕ່ກະໄຄກ່ອນ ບໍ່ໄດ້ໄປ.”

ອີງຕາມການຣາຍງານ ຂອງຄະນະສະເພາະກິດ ປ້ອງກັນໂຄວິດ-19 ໃນມື້ວັນທີ 6 ກໍຣະກະດາ 2021 ນີ້, ມາເຖິງປັດຈຸບັນ ຢູ່ລາວ ມີຜູ້ໄດ້ຮັບ ການກວດວິເຄາະ ຫາເຊື້ອໂຄວິດ-19 ທັງໝົດ 305,013 ຄົນ. ໃນນັ້ນ ມີຜູ້ຕິດເຊື້ອສະສົມ 2,356 ຄົນ, ເສັຽຊີວິດ 3 ຄົນ, ປິ່ນປົວຫາຍແລ້ວ 2,042 ຄົນ, ກໍາລັງປິ່ນປົວ ແລະ ຕິດຕາມອາການ ຢູ່ໂຮງໝໍ 249 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ