22 ກໍຣະກະດາ ຜູ້ຕິດໂຄວິດ-19 ເພີ່ມ 223 ຄົນ

ຈໍາປາທອງ
2021-07-23
Share
22 ກໍຣະກະດາ ຜູ້ຕິດໂຄວິດ-19 ເພີ່ມ 223 ຄົນ ດຣ. ວຽງສີ ສຸພັກດີ ຫົວໜ້າຜແນກສາທາຣະນະສຸຂ ແຂວງຈໍາປາສັກ ຖແລງຂ່າວ ຕໍ່ສື່ມວນຊົນ ໃນມື້ວັນທີ 23 ກໍຣະກະດາ 2021 ກ່ຽວກັບ ສະພາບການໂຄວິດ-19 ທີ່ແຜ່ຣະບາດ ພາຍໃນແຂວງ.
ພາບຈາກວີດີໂອ: ສະຖານີວິທຍຸ ແຂວງຈຳປາສັກ

ຈາກຜົລຂອງການກວດວິເຄາະຫາເຊື້ອໂຄວິດ-19, 1,754 ຄົນ ໃນມື້ວັນທີ 22 ກໍຣະກະດາ 2021 ນີ້ ທາງການລາວກວດພົບຜູ້ຕິດ ເຊື້ອໂຄວິດ-19 ໃໝ່ອີກ 223 ຄົນ. ໃນນັ້ນຢູ່ ແຂວງສວັນນະເຂດ 117 ຄົນ, ຈໍາປາສັກ 57 ຄົນ, ສາລະວັນ 34 ຄົນ, ນະຄອນ ຫຼວງວຽງຈັນ 7 ຄົນ, ບໍລິຄໍາໄຊ 6 ຄົນ, ຄໍາມ່ວນ 1 ຄົນ ແລະ ແຂວງຫຼວງນໍ້າທາ 1 ຄົນ ຊຶ່ງສ່ວນໃຫຍ່ ແມ່ນຄົນງານລາວ ທີ່ ກັບຄືນມາຈາກຕ່າງປະເທດ, ມີຜູ້ຕິດເຊື້ອພາຍໃນ 3 ຄົນ ທີ່ໄດ້ສໍາຜັດໃກ້ຊິດ ກັບຜູ້ຕິດເຊື້ອຜ່ານມາ ຄືຢູ່ແຂວງຈໍາປາສັກ 2 ຄົນ ແລະ ແຂວງຫລວງນໍ້າທາ 1 ຄົນ, ເຮັດໃຫ້ລາວ ມີຜູ້ຕິດເຊື້ອສະສົມ 4,342 ຄົນ, ດັ່ງ ດຣ. ພອນປະເສີດ ໄຊຍະມຸງຄຸນ ຮອງ ຫົວໜ້າກົມຄວບຄຸມ ພຍາດຕິດຕໍ່ ກະຊວງສາທາຣະນະສຸຂ ກ່າວໃນພິທີຖແລງຂ່າວ ຕໍ່ສື່ມວນຊົນ ໃນມື້ວັນທີ 23 ກໍຣະກະດາ ນີ້ວ່າ:

“ການກວດວິເຄາະໃນມື້ວານນີ້ ທົ່ວປະເທດໄດ້ມີການເກັບຕົວຢ່າງ ມາກວດຊອກຫາເຊື້ອທັງໝົດ 1754 ຕົວຢ່າງ ກວດພົບຜູ້ຕິດເຊື້ອ ໃໝ່ 223 ຄົນ ແມ່ນມີຜູ້ຕິດເຊື້ອ ພາຍໃນແຂວງຈໍານວນ 3 ຄົນ 2 ຄົນ ແມ່ນຢູ່ແຂວງຈໍາປາສັກ ແລະອີກ 1 ຄົນ ແມ່ນຢູ່ແຂວງ ຫຼວງນໍ້າທາ.”

ຄະນະສະເພາະກິດປ້ອງກັນໂຄວິດ-19 ຢູ່ແຂວງຈໍາປາສັກ ໄດ້ອອກແຈ້ງການໃນມື້ວັນທີ 21 ກໍຣະກະດາ 2021 ໃຫ້ປິດໂຮງຮຽນ ສາມັນສຶກສາ ທຸກຊັ້ນທຸກສາຍ ບໍ່ໃຫ້ສອນໃນເຂດ ທີ່ ມີການຣະບາດໃນຊຸມຊົນ ຍົກເວັ້ນໂຮງຮຽນກິນນອນ. ເຈົ້າໜ້າທີ່ຂແນງສຶກສາ ແຂວງຈໍາປາສັກ ທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ ປັດຈຸບັນ ພື້ນທີ່ສີແດງ ບໍ່ມີເດັກນ້ອຍ ນັກຮຽນສາມັນສຶກສາ ໄປໂຮງຮຽນແລ້ວ ແຕ່ກໍຍັງມີບາງຊັ້ນຍັງຄາສອບເສັງ, ຖ້າເສັງແລ້ວ ກໍຕ້ອງໃຫ້ປິດຊົ່ວຄາວ, ຕ້ອງປ້ອງກັນໄວ້ກ່ອນ ຍ້ອນມີຜູ້ຕິດ ເຊື້ອເພີ່ມຂຶ້ນ ຢ່າງຕໍ່ເນື່ອງ. ໃນຈໍານວນຜູ້ຕິດເຊື້ອໂຄວິດ-19 ນັ້ນ ມີຜູ້ຕິດໃນຊຸມຊົນ 2 ຄົນ ດັ່ງທີ່ທ່ານກ່າວວ່າ:

“ເພາະເຮົາກວດເຫັນ ມັນມີຣະບາດໃນຊຸມຊົນມັນກະມີ 2 ຄົນຫັ້ນເດ້ ຊິບປິງນໍາເຂົາຫັ້ນ ບໍ່ຈັກວ່າຕົວເອງຕິດ ສາເຫດມັນຫັ້ນແມ່ນວ່າ ຕິດ ນໍາໂຊເຟີຣົດ ລາວໄປໃກ້ຊິດກັນ ມັນຖືກຢູ່ 15 ຄົນ. ຖ້າເບິ່ງຜົລໃນ 15 ຄັນຖ້າວ່າຕິດມັນ ມັນກໍເປັນໃນຊຸມຊົນ ໂລດຕີ໋.”

ດຣ. ວຽງສີ ສຸພັກດີ ຫົວໜ້າຜແນກສາທາຣະນະສຸຂ ແຂວງຈໍາປາສັກ ກ່າວໃນພິທີຖແລງຂ່າວຕໍ່ສື່ມວນຊົນ ໃນມື້ວັນທີ 23 ກໍຣະກະດາ ນີ້ວ່າ, ມື້ນີ້ຢູ່ແຂວງຈໍາປາສັກ ກວດພົບຜູ້ຕິດ ເຊື້ອໂຄວິດ-19 ຣາຍໃໝ່ຕື່ມອີກ 57 ຄົນ, ເຮັດໃຫ້ມີຜູ້ຕິດເຊື້ອ ສະສົມທັງໝົດ 1,304 ຄົນ, ປິ່ນປົວຫາຍແລ້ວ 556 ຄົນ ແລະ ກໍາລັງປິ່ນປົວ-ຕິດຕາມອາການຢູ່ໂຮງໝໍ 778 ຄົນ.

ແລະວ່າ ໃນປັດຈຸບັນ ໂຮງໝໍພາກສນາມ ຢູ່ວິທຍາລັຍການເງິນພາກໃຕ້ ມີຄົນງານລາວ ທີ່ກັບມາຈາກປະເທດໄທຍ ປິ່ນປົວຢູ່ຫລາຍ ຈົນບໍ່ສາມາດຮັບເພິ່ມຕື່ມໄດ້ ຊຶ່ງເບື້ອງຕົ້ນນີ້ ເຈົ້າໜ້າທີ່ທີ່ກ່ຽວຂ້ອງ ຈະຂຍາຍອາຄານຢູ່ພາຍໃນຕື່ມ ເພື່ອໃຫ້ມີສະຖານທີ່ປິ່ນປົວ ເພີ່ມຂຶ້ນ ດັ່ງທີ່ທ່ານກ່າວວ່າ:

“ບັນຫາທີ່ຕາມມານີ໋ ກໍຄືໂຮງໝໍສນາມນີ້ລົ້ນ ວິທຍາລັຍການເງິນພາກໃຕ້ ສະນັ້ນມື້ນີ້ ແມ່ນພວກເຮົາຈະໄດ້ຂຍາຍຕື່ມອີກ ອາຄານ ຕ່າງໆທີ່ຢູ່ໃນຫັ້ນແຫລະ ແມ່ນຈະໄດ້ຊອກຄົ້ນຫາ ເພື່ອໃຫ້ຜູ້ຕິດເຊື້ອ ໄດ້ໄປນອນປິ່ນປົວຢູ່ຫັ້ນ.”

ເວົ້າເຖິງເຣື່ອງການສັກວັກຊິນ ປ້ອງກັນໂຄວິດ-19 ຢູ່ລາວ ເຈົ້າໜ້າທີ່ທີ່ກ່ຽວຂ້ອງ ທ່ານນຶ່ງ ກ່າວຕໍ່ວິທຍຸເອເຊັຍເສຣີໃນມື້ວັນທີ 23 ກໍຣະກະດາ ນີ້ວ່າ ກະຊວງສາທາຣະນະສຸຂ ໄດ້ອອກແຈ້ງການວ່າ ວັກຊິນປ້ອງກັນໂຄວິດ-19 ຍີ່ຫໍ້ ຊີໂນຟາມ ໝົດແລ້ວ ແລະ ສູນບໍຣິການສັກວັກຊິນ ກໍຕ້ອງໄດ້ປິດໄປຊົ່ວຄາວ, ລໍຖ້າສັກວັກຊິນຊຸດໃໝ່ ຍີ່ຫໍ້ ຈອນສັນ ແອນ ຈອນສັນ, ແຕ່ຍັງບໍ່ຮູ້ວ່າ ຈະໄດ້ ສັກເມື່ອໃດ ເພີິ່ນຍັງປະຊຸມກັນຢູ່:

“ແມ່ນແຫລະ ເພາະວ່າເຮົາບໍ່ມີຢາຈັກຢ່າງເນາະ ໂຕໃດເຮົາກະບໍ່ມີ ເຮົາກໍໄດ້ຢຸດຊົ່ວຄາວ ລະກະເຮັດວຽກກັນປົກກະຕິຫັ້ນແຫລະ ໂຕນີ້ແມ່ນເພິ່ນຫາກະໄປປະຊຸມກັນຢູ່ຫັ້ນນ່າ ຖ້າເພິ່ນແຈ້ງການອອກ.”

ອີງຕາມການຣາຍງານຂອງຄະນະສະເພາະກິດ ປ້ອງກັນໂຄວິດ-19 ໃນມື້ວັນທີ 23 ກໍຣະກະດາ 2021 ນີ້, ມາເຖິງປັດຈຸບັນຢູ່ລາວ ມີຜູ້ໄດ້ຮັບການກວດວິເຄາະຫາ ເຊື້ອໂຄວິດ-19 ທັງໝົດ 333,714 ຄົນ. ໃນນັ້ນມີຜູ້ຕິດເຊື້ອສະສົມ 4,342 ຄົນ, ເສັຍຊີວິດ 5 ຄົນ, ປິ່ນ ປົວຫາຍແລ້ວ 2,602 ຄົນ, ກໍາລັງປິ່ນປົວ ແລະຕິດຕາມອາການຢູ່ໂຮງໝໍ 1,735 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ