21 ມິຖຸນາ ຜູ້ຕິດເຊື້ອໂຄວິດ-19 ເພີ່ມ 13 ຄົນ

ຈໍາປາທອງ
2021-06-22
Share
21 ມິຖຸນາ ຜູ້ຕິດເຊື້ອໂຄວິດ-19 ເພີ່ມ 13 ຄົນ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າ ກົມຄວບຄຸມພຍາດຕິດຕໍ່ ກະຊວງສາທາລະນະສຸຂ ໄດ້ຖແລງຂ່າວວ່າ: ໃນວັນທີ 21 ມິຖຸນາ 2021 ໄດ້ກວດພົບ ຜູ້ຕິດເຊື້ອເພີ່ມອີກ 13 ຄົນ.
ພາບຈາກ: ສູນຂ່າວສານ ການແພດ ສຸຂສຶກສາ

ການຣະບາດຂອງເຊື້ອ ໂຄວິດ-19 ຢູ່ ປະເທດລາວ ເພີ່ມຂຶ້ນ, ຈາກຜົລຂອງການກວດວິເຄາະຫາເຊື້ອ ໂຄວິດ-19 1,159 ຄົນ ໃນມື້ວັນທີ 21 ມິຖຸນາ 2021 ນີ້ ທາງການລາວກວດພົບ ຜູ້ຕິດເຊື້ອເພີ່ມຕື່ມອີກ 13 ຄົນ ຄືຢູ່ແຂວງຈໍາປາສັກ 9 ຄົນ ທີ່ເປັນ ຄົນງານ ມາຈາກປະເທດໃກ້ຄຽງ, ນະຄອນຫລວງວຽງຈັນ 2 ຄົນ ແລະ ແຂວງສວັນນະເຂດ 2 ຄົນ, ເຮັດໃຫ້ລາວ ມີຜູ້ຕິດເຊື້ອ ສະສົມ 2,067 ຄົນ ດັ່ງ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມ ພຍາດຕິດຕໍ່ ກະຊວງສາທາຣະນະສຸຂ ແລະ ຕາງໜ້າຄະນະສະເພາະກິດ ປ້ອງກັນ ໂຄວິດ-19 ກ່າວໃນພິທີຖແລງຂ່າວ ຕໍ່ສື່ມວນຊົນ ໃນມື້ວັນທີ 22 ມິຖຸນາ ນີ້ວ່າ:

“ມື້ວານທົ່ວປະເທດເຮົາ ໄດ້ເກັບຕົວຢ່າງມາກວດວິເຄາະ ທັງໝົດ 1,159 ຕົວຢ່າງ. ໃນນັ້ນ ກວດພົບຜູ້ຕິດເຊື້ອໃໝ່ 13 ຄົນແມ່ນ ຈາກນະຄອນຫລວງວຽງຈັນ, ສວັນນະເຂດ ກວດພົບຜູ້ຕິດເຊື້ອໃໝ່ 13 ຄົນ ຊຶ່ງໃນ 13 ຄົນ ແມ່ນຈາກນະຄອນຫລວງວຽງຈັນ, ສວັນນະເຂດ ແລະ ຈໍາປາສັກ.”

ຢູ່ນະຄອນຫລວງວຽງຈັນ ແຕ່ລະຈຸດບໍຣິການ ສັກວັກຊິນປ້ອງກັນ ໂຄວິດ-19 ປະຊາຊົນຍັງແອອັດກັນຢູ່ ແຕ່ກໍເປັນຣະບຽບກວ່າ ຫລາຍໆມື້ທີ່ຜ່ານມາ ດັ່ງຊາວບ້ານຢູ່ເມືອງ ນາຊາຍທອງ ຜູ້ນຶ່ງເວົ້າວ່າ ຢູ່ແຕ່ລະຈຸດບໍຣິການ ເຈົ້າໜ້າທີ່ຈໍາກັດຈໍານວນ ຜູ້ທີ່ມາ ສັກວັກຊິນ ໃນແຕ່ລະມື້:

“ຫລັກໆແລ້ວ ແມ່ນຄົນຫລາຍແອອັດຫັ້ນແຫລະ. ໄຄແດ່ແລ້ວຊ່ວງນີ້ນະ ເພິ່ນກໍເຮັດຕໍ່ຄິວຫັ້ນແຫລະ ຮັກສາໄລຍະຫ່າງ. ຊາວໜຸ່ມ ແມ່ຍິງ ຢູ່ເມືອງກໍໄດ້ເຂົ້າໄປຊ່ວຍສົມທົບ. ຜ່ານມາແມ່ນເພິ່ນ ກໍານົດກຸ່ມບ້ານ ເພິ່ນກໍານົດໃຫ້ມື້ນຶ່ງມີແຕ່ 1,200 ໂດສ ຕອນເຊົ້າກໍຄື 600 ຕອນແລງກໍ 600 ກໍຄືຈົບ.”

ແລະປະຊາຊົນ ຢູ່ເມືອງໄຊທານີ ອີກຜູ້ນຶ່ງກໍເວົ້າວ່າ ຕົນໄດ້ໄປລໍຖ້າສັກວັກຊິນທຸກມື້ ແລະ ມື້ນີ້ ກໍໄດ້ໄປລໍຖ້າສັກອີກ ແຕ່ກໍຍັງບໍ່ໄດ້ ສັກເທື່ອ ຍ້ອນຍັງມີຄົນຫລາຍ ແອອັດກັນຢູ່ ແລະ ເຈົ້າໜ້າທີ່ກໍບອກວ່າ ມື້ນີ້ຄົນເຕັມແລ້ວ ວັກຊິນມີຈໍານວນຈໍາກັດ:

“ເຮົາໄປມື້ເຊົ້ານີ້ ຄົນຍັງອັດຍັງເຕັມຄືເກົ່າ. ສໍາລັບມື້ນີ້ແມ່ນ ເພິ່ນວ່າ ວັກຊິນຫັ້ນໝົດຄິວແລ້ວ ບໍ່ຮູ້ວ່າໝົດຄິວແທ້ຫລືວ່າ ຄົນເຕັມໂພດ ນີ໋ນ່າ ຕັ້ງແຕ່ວັນເສົາພຸ້ນໄປທຸກມື້ ແຕ່ກໍບໍ່ໄດ້ ກໍຢ່າບໍ່ເປັນຫຍັງ ໄປອີກ.”

ເຈົ້າໜ້າທີ່ສັກວັກຊິນປ້ອງກັນ ໂຄວິດ-19 ເມືອງນາຊາຍທອງ ເວົ້າວ່າ ວັກຊິນໃນແຕ່ລະມື້ ແຕ່ລະຈຸດບໍຣິການ ມີຈໍານວນຈໍາກັດ ເຊັ່ນຢູ່ໂຮງໝໍ ກຸ່ມບ້ານອີໄລ ມື້ນຶ່ງມີວັກຊິນສັກໃຫ້ ປະຊາຊົນປະມານ 500 ໂດສ, ເມື່ອປະຊາຊົນພາກັນມາສັກ ເກີນກໍານົົດ ກໍໄດ້ບອກໃຫ້ກັບບ້ານ ແລະໃຫ້ເບິ່ງວ່າ ເຂດບ້ານຂອງຕົນ ກໍານົດໃຫ້ມາສັກມື້ໃດ ແລ້ວຈຶ່ງມາ ເພື່ອບໍ່ໃຫ້ເສັຍ ເວລາ:

“ຢາກວ່າບໍ່ພຽງພໍເດ໋ ກະສິວ່າກາຍ 500 ກະສິບໍ່ເອົາ ເຮົາແນມເບິ່ງຄົນຫລາຍແລ້ວ ບໍ່ຮັບເດ໋ບ້ານອື່ນ ບາງເທື່ອ 3 ໂມງໂທໄປພຸ້ນ ກະບໍ່ມີ.”

ຢູ່ຫລາຍແຂວງທີ່ຕິດກັບຊາຍແດນ ຕິດກັບໄທຍ ກໍຍັງມີຕໍາຣວດ ແລະ ທະຫານຊາຍແດນ ເຝົ້າເວນຍາມເຂັ້ມງວດຢູ່ຄືເກົ່າ, ປະຕິບັດ ຕາມມາຕການປ້ອງກັນໂຄວິດ-19 ດັ່ງ ເຈົ້າໜ້າທີ່ສະເພາະກິດ ແຂວງບໍ່ແກ້ວ ທ່ານນຶ່ງກ່າວວ່າ:

“ຕາມຊາຍແດນ ແມ່ນຫຍັງກໍຕ້ອງໄດ້ເຝົ້າຣະວັງຢູ່ ຍັງເຂັ້ມງວດຄືເກົ່າ ຖືວ່າຍັງປະຈໍາການ ຢູ່ຫັ້ນປົກກະຕິ ເຂົາເຈົ້າກໍຍັງດໍາເນີນ ງານຢູ່.”

ເຖິງແມ່ນວ່າເຊື້ອໂຄວິດ-19 ຍັງຣະບາດຢູ່ ແຕ່ສາຍການບິນລາວ ກໍຈະເລິ້ມເປີດ ໃຫ້ບໍຣິການຖ້ຽວບິນ ພາຍໃນປະເທດຄືນອີກ ແຕ່ວັນທີ 25 ມິຖຸນາ 2021 ນີ້ໄປ ພາຍໃຕ້ເງື່ອນໄຂ ຈະບໍຣິການແຕ່ຜູ້ສັກວັກຊິນ ປ້ອງກັນໂຄວິດ-19 ຄົບ 2 ເຂັມ ເທົ່ານັ້ນ, ອາທິດນຶ່ງຈະມີ 2 ຖ້ຽວໄປ 4 ແຂວງ ຄືແຂວງຫລວງນໍ້າທາ, ອູດົມໄຊ, ຫລວງພຣະບາງ ແລະ ປາກເຊ ແຂວງຈໍາປາສັກ ຊຶ່ງ ຄາດວ່າມີຜູ້ໄດ້ສັກວັກຊິນຄົບ 2 ເຂັມແລ້ວປະມານ 10% ດັ່ງເຈົ້າໜ້າທີ່ການບິນລາວ ທ່ານນຶ່ງ ຜູ້ຂໍສງວນຊື່ ແລະ ຕໍາແໜ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 22 ມິຖຸ ນານີ້ວ່າ:

“ຄາດຄະເນພວກເຮົາຈະເປີດ ກໍສິແມ່ນທ້າຍອາທິດນີ້ແຫຼະ ຕາມແຈ້ງການກໍຄືຜູ້ໂດຍສານ ທີ່ໄດ້ຮັບວັກຊິນແລ້ວ 2 ເຂັມຄາດຄະເນ ປະມານ 10% ຂຶ້ນເມືອແລ້ວ ພົລເມືອງລາວ ຄືເຮົາສິເປີດລັກສນະວ່າ 2 ຖ້ຽວ ຕໍ່ອາທິດ ຕໍ່ເສັ້ນເທົ່ານັ້ນໄດ໋ ບໍ່ຫຼາຍ flight ຕໍ່ ອາທິດ.”

ທ່ານກ່າວຕື່ມວ່າ ຈຸດປະສົງຕົ້ນຕໍຂອງການເປີດຖ້ຽວບິນ ສາຍການບິນລາວພາຍໃນປະເທດ ເທື່ອນີ້ ບໍ່ແມ່ນເປີດແບບປົກກະຕິ ທົ່ວໄປ ແຕ່ເປີດເພື່ອແກ້ໄຂ ການເດີນທາງໃຫ້ ນັກທຸຣະກິດຕ່າງໆ ຫລືຄົນທີ່ຕ້ອງການຄວາມສະດວກ ໃນການເດີນທາງ:

“ລັກສນະເປັນການແກ້ໄຂ ການເດີນທາງເນາະ. ຄື ຫລວງນໍ້າທາ ມັນມີເຂດເສຖກິດພິເສດ ກໍເຊື່ອມຕໍ່ໄປກັບຈີນເນາະ ອຸດົມໄຊ ກໍເຊັ່ນດຽວກັນ ໃຊ້ເວລາຫລາຍຊົ່ວໂມງ 10 ກວ່າຊົ່ວໂມງ ເດີນທາງທາງຣົດ ທາງບົກນີ້ມັນລໍາບາກຫລາຍ ເຂົາເຈົ້າບໍ່ຢາກ ຂີ່ຣົດ ພວກນີ້ພວກເຮົາ ພວກເຮົາກໍຈະລອງເປີດເບິ່ງ ສົມມຸດມັນບໍ່ມີໂດຍສານ ອາຈຫລຸດລົງມາ ເຫຼືອອາທິດ ລະຖ້ຽວ.”

ອີງຕາມການຣາຍງານ ຂອງຄະນະສະເພາະກິດ ປ້ອງກັນໂຄວິດ-19 ວັນທີ 22 ມິຖຸນາ 2021 ນີ້, ມາເຖິງປັດຈຸບັນຢູ່ລາວມີຜູ້ໄດ້ ຮັບການກວດວິເຄາະຫາເຊື້ອໂຄວິດ-19 ທັງໝົດ 285,350 ຄົນ. ໃນນັ້ນມີຜູ້ຕິດເຊື້ອສະສົມ 2,067 ຄົນ, ເສັຍຊີວິດ 3 ຄົນ, ປິ່ນປົວຫາຍແລ້ວ 1,954 ຄົນ, ກໍາລັງປິ່ນປົວ ແລະຕິດຕາອາການຢູ່ໂຮງໝໍ 97 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ